Reel Story
@REELSTORYCOM
banner
مايو 26, 2020
271 Views
0 0

رواية حماتي بالوراثه بقلم كوكي سامح

Written by
3.7
(15)

 6,165 اجمالى المشاهدات,  8 اليوم

وقت القراءة المقدر: 48 دقيقة (دقائق)

رواية حماتي بالوراثه بقلم كوكي سامح


الفصل الاول
مكنتش اعرف ان خطيبى بيحب مرات ابوه اوى كده ومتعلق بيها لدرجه انها مستحوذه عليه ورغم كده تمت جوازتنا وقولت ان بعد الجواز ومع حبى لى هيتغير بس طلع العكس صحيح الكلمه كلمتها والشورى شورتها انا تعبت نفسيا منهم ومعاملتهم لبعض أصلها ست عنيده وعاوزه كل حاجه من الدنيا جاه ومال وصحه وسعاده اما حمايا يا عينى عليه

بيترعب منها أصلها مسيطره جامد ما انا بقولكم الكلمه كلمتها اما عنى فحاولت اتأقلم واعيش وكان بيصبرنى على العيشه دى حمايا كان راجل طيب وغلبان وكفايه انه مستحمل الست دى اللى اسمها عزه انا ليه 5 سلايف من ضمنهم 3 بنات بس بصراحه ميتخيروش عنها مع انهم مش ولادها انا بقى لما سألت جوزى حماتى ماتت امتى وازاى رد عليه بكل برود

وقالى انا مليش ام غير عزه هى اللى ربتنى وبصراحه حاولت افهم حكايتها ايه بس كتمنى ومعرفتش اكمل باقى كلامى معاه وده عيب فى جوزى كل لما اتكلم معاه يقاطعنى وكلامه حاد ومش بيسمع كلمه ليه انا ساعات بحس انى وحيده فالبيت ده مع ان البيت كله سلايفى بس مش بعرف اتكلم معاهم خالص لحد ما جه اليوم اللى حصلت حادثه لناس قرايب جوزى وكلهم سافروا على البلد علشان يحضروا

الجنازه والعزا وانا كنت لسه فى اول حملى والدكتوره طلبت منى ارتاح ومينفعش السفر ليه وكمان الطريق طوووويل وفعلا كلهم سافروا الا انا وفضلت فالبيت لوحدى مع ان محمد جوزى طلب منى اروح اققعد عند ماما وانا مرضتش وفضلت قاعده لوحدى فالبيت وكنت زهقانه قوووى وتليفون رن وكانت حماتى العقربه عزه وقالت ليه بنفس الأسلوب وكانت بتزعق يا ست رضوى ابقى انزلى نضفى الشقه بس اوضتى لأ سامعه؟ انا بصراحه قفلت معاها وفضلت افكر

اشمعنى اوضتها روحت نازله ودخلت الشقه ووقفت عند باب اوضتها ومسكت بإيدى الأوكره وفضلت افكر ادخل ولا لأ بس شيطانى غلبنى وفتحت الباب ودخلت لأول مره من ساعه ما اتجوزت ادخل اوضه عزه العقربه اللى هى حماتى بالوارثه وفتحت الدولاب وكانت هدومها غريبه حاجه بترتر مش لايقه ع سنها وهى فعلا ست عايقه بجد وفى الاوضه لقيتها حاطه غساله اتوماتيك بايظه بصراحه استغربت روحت قربت من الغساله ولقيت وراها كراكيب لفتوا نظرى قعد عالأرض ولقيت علبه خشب وقولت ايه ده والفضول قاتلنى وحاولت افتحها وفعلا فتحتها بس بعد ما بوظتها ولقيت

جواها ورق حسيت ان مالوش لازمه وفى ضمن الورق لقيت جواب قديم مسكته وحاولت اققراه أصله قديم وحتى الخط مش واضح وابتديت اققرى وكان مكتوب فيه عزه انا عارف انك قتلتى أمينه بالحيا وخدتى عيالها وجوزها منها معقووول حماتى عايشه…..

رواية حماتي بالوراثه بقلم كوكي سامح

الفصل الثانى

معقول حماتى عايشه انا هحاول اكمل قرايه بس الخط صعب معنى كده ان الكلام ده قديم لأن واضح من الورقه والخط مش باين وابتدت رضوى تكمل قرايه الكلام المكتوب انا عارف انك موتى أمينه بالحيا وخدتى منها جوزها وعيالها انا عاوز منك حاجه واحده لو اتعملت هفضحك واكشف سرك وانتى عارفه الحاجه دى ايه يا عزه……؟؟

ورضوى اتجننت وفضلت تفكر والعلبه الخشب قدامها والجواب وقالت لما حماتى عايشه طيب هى فيين؟ وبعدين فى حاجه تانيه من الراجل اللى باعت الجواب ل عزه…. ويا ترى ايه الحاجه اللى طلبها منها؟ انا مش فاهمه حاجه عموما انا هقوم دلوقت اروق الشقه واحاول اققفل العلبه الخشب دى وهسيبها زى ما هى واحاول اعرف فى ايه..
وفعلا رضوى قامت وروقت الشقه وحطت العلبه مكانها وقفلت الباب كما كان وطلعت ع شقتها ودخلت المطبخ وعملت كوبايه لبن وخدتها جمبها عالسرير وفضلت تشرب وتفكر ومش عارفه حاجه والنوم غلبها وفى صباح اليوم التالى

محمد : رضوى رضوى رضوى
رضوى : ايه ده محمد انت وصلت امتى
محمد : لسه واصل بقولك قومى حضرى فطار انا مأكلتش حاجه من امبارح
رضوى : ثوانى افوق بس ممكن
محمد : طيب قومى انا هدخل الحمام اغير هدومى واخد دش وأخرج الاقيكى محضره الفطار
رضوى : حاضر
ورضوى قامت غسلت وشها وحضرت الفطار لمحمد
ومحمد خرج من الحمام وعلى وشه فوطه وقال ايه ده
رضوى : ده فطار هيكون ايه يعنى اهو فول وبيض ولانشون وعيش

محمد : بجد هو انا أعمى يعنى فين فطار ماما
رضوى : ماما هى هتفطر معانا اه انا بحسب انها فالبلد
محمد : كلهم تحت
رضوى : خلاص ننزل نفطر تحت معاهم
محمد : خلاص
ورضوى خدت الفطار هى ومحمد ونزلوا ع شقه حماتها
عزه : هههههه ايه ده هو حد قالك اننا معندناش أكل
رضوى : محمد بيحب الانشون علشان كده جبته معايا
عزه : ادخلى حضر الفطار لينا كلنا يا هانم
وفعلا رضوى وهى مضايقه من أسلوب عزه ودخلت المطبخ تحضر الفطار وطلعت جهزت السفره وحضرت الفطار ومحمد وحماها وعزه حماتها قعدوا ع السفره
عزه : فين البنات يا عبدالله

عبدالله : بناتى كل واحده فى شقتها سبيهم وياريت تسيبى رضوى تفطر البنت لسه فى اول حملها

عزه : اه نسيت يارب يكون ولد
رضوى : عمى عبدالله انت فعلا زى ابويا الله يرحمه وساعات بحس انك مش حمايا اصلا
عبدالله : يا بنتى انتى من اول ما دخلتى بيتنا وانتى بقيتى مننا
عزه : انتم مش خلصتوا أكل يلا قومى لمى السفره دى وشوفى هنعمل غدا ايه
محمد : حمام بس من غير فريك يا احلى أم فى الدنيا
رضوى قالت فى سرها نفسى اعرف دى ازاى احلى ام دى مصيبه دى حتى الكل بيقول عليها عزه العقربه وبعدين ياعينى عليك يا محمد لما تعرف ان ماما أمينه عايشه يا ترى هتعمل ايه

عزه : سمعتى يا هانم جوزك عاوز حمام من غير فريك
رضوى : حاضر
الباب بيخبط وعزه قالت انتى واقفه تبصيلى كده ليه يا ست رضوى هانم روحى افتحى الباب
عبدالله : براحه عالبنت دى حامل
عزه : اسكت انت
رضوى راحت فتحت الباب وكانت حنان اخت جوزها
حنان : صباح الخير يا رضوى صباح الخير عليكم جمعيا
عزه : تعالى يا روح امك وقلبها حماتك بتحبك تعالى افطرى
حنان : ماما ماجد ضربنى وبهدلنى انتوا مسمعتوش صوته كان فاتح عليه صوته قد كده البيه بيغير وكل ده علشان صاحبه اتصل وانا رديت عليه.. قال ايه عيب
عزه : لا لا لا انا بس لما اشوفوا هبهدله هو نسى نفسه ولا ايه انتى بنت عبدالله اكبر تاجر خشب فيكى يا بلد
عبدالله : انا مش عاوز مشاكل وانتى يا عزه بطلى الأسلوب ده كفايه بقى سيبى البنت تعيش مش كفايه جوزها الاولانى الله يمسيه بالخير طلقها بسبب اللى بتقولوا ده حنان صالحى جوزك انتى غلطتى.. وبعدين يعنى ايه تردى ع تليفونوا مينفعش برضه يا بنتى

عزه قالت فى سرها راجل خيخه ملكش لازمه كان يوم اسود يوم ما شوفتك
رضوى دخلت المطبخ وفضلت تشوف هتعمل اكل ايه
حنان : ماما انا هدخل اخلى رضوى تعملى شاى
وفعلا حنان دخلت المطبخ ع رضوى وقالت مالك يا رضوى فيكى ايه اوعى تكون ماما مزعلاكى
رضوى : انا عارفه انك اطيب قلب وعلى سجيتك انتى شبهه حمايا بالظبط يمكن بتعملونى احسن من محمد جوزى
حنان : معلش محمد متعلق بماما اوى

رضوى : ممكن سؤال بس ياريت محدش يعرف حاجه
حنان : قولى يا بنتى عيب عليكى
رضوى : هى ماما أمينه حماتى ماتت ازاى
حنان : ماما ياريت متقوليش ماما ومتجبيش سيرتها علشان مش حلو علشانك دى ست خانت بابا وراحت ب أفعالها الوسخه والشقه ولعت بيها…..

رواية حماتي بالوراثه بقلم كوكي سامح

الفصل الثالث والرابع

الشقه ولعت بيها دى خانت بابا وراحت بعملها الوسخ بس رضوى مش مصدقه كلام مديحه وقالت ازاى الجواب بيقول ان عزه هى اللى اخدت جوزها وعيالها اكيد فى سر

مديحه : رضوى مالك متنحه ليه
رضوى : طيب سؤال تانى

مديحه : قولى يا بنتى شكلنا مش هنخلص
رضوى : هو انتى شوفتى مامتك
مديحه : الحمد لله كنت صغيره مش فاكراها اصلا ولا عاوزه افتكرها
رضوى قالت فى سرها اومال حماتى أمينه فين؟
مديحه : بقولك اعمليلى شاى انا طالعه ماما بتنادى عليه
رضوى : طيب لا حول ولا قوة الا بالله ده حتى لو عرفوا ان امهم عايشه مش هيرحموها انا لازم اعرف حماتى فين؟ وعلشان اعرف لازم أراقب عزه العقربه واراقب تصرفاتها
وابتدت رضوى تعمل شاى وتجهز فالغدا وعزه دخلت عليها المطبخ وقالت ابقى اعملى الحمام من غير فريك لجوزك

واعملى باقى الحمام بالخلطه رز بالكبد علشان حماكى بيحبوا كده يا ست هانم ومتنسيش المكرونه بالبشاميل وكمان ورق العنب علشان سها وسهام هينزلوا وكمان عيالهم وكمان رجالتهم هينزلوا يتغدوا وسلفك عمرو وخطيبته كمان من الاخر العيله كلها
رضوى : بس يا ماما عزه انا تعبانه ولسه حملى فى أوله وعاوزه راحه وكمان هعمل كل ده لوحدى وكمان محمد مقالش انهم معزومين
عزه : عزومه ايه يا حبيبتى قولى الله اكبر فى سرك خمسه وخميسه علينا ده بيتهم فاهمه

رضوى : ما شاء الله بس كتير عليه اوى
عزه : يلا عندك الحاجه وخلصى انا رايحه افتح الباب باين كده بناتى نزلوا وعيالهم
رضوى : منك لله بس انا هقول لمحمد
ورضوى قالت وهى متعصبه ومتنرفذه يا محمد يا محمد
محمد : ايه يا رضوى فى ايه
رضوى : اخواتك كلهم معزومين عالأكل وانا هعمل كل ده لوحدى ينفع مش المفروض حد منهم يساعدنى
محمد : يا ستى اعملى فى ايه

رضوى : فى انى حامل وانت اسلوبك مش حلو يأخى حرام عليك ده الكلمه الحلوه صدقه ده انا مراتك وحامل فى ابنك او بنتك انت ليه كده
محمد : اه اه ابتدينا ام الاسطوانه المشروخه كملى كملى 😁 انت ظالمنى ياريت تحبنى وتقدرنى زى ما بتحب اهلك وبتقدرهم
ر ضوى : لا انا هخرس خالص
محمد : انا هخرج ولما تحضرى الأكل ابقى كلمينى انا هطلع اريح شويه
رضوى قالت فى سرها والله انت راجل ما عندك شخصيه وانا ندمت ع الجوازه دى

ورضوى فضلت تجهز الغدا لوحدها وبتفكر تعمل ايه مع عزه وكمان تعرف حكايتها مع حماتها أمينه وقالت السر فى ايد حمايا هو اللى هيقولى على كل حاجه وانا هحاول اسأله بس من غير ما يحس هستدرجه فالكلام

عزه : اقعدوا يا بنات والله وحشتنا اللمه دى
عبدالله : ههه ع اساس انهم مش فالبيت
عزه : اه وانت كنت عاوز ابعد بناتى عنى ويتجوزا بره البيت مينفعش ابدا
عبدالله : بس عمرو هيعملها وطلب تمليك بره
عزه : المهم بناتى علشان مفيش راجل يرفع عينه فيهم
مديحه : اه اه يا اختى بأماره ماجد يا ست ماما اللى مبهدلنى
عبدالله : يا بنتى جوزك اطيب خلق الله حافظى عليه
مديحه : والله انت اللى طيب يا بابا
سها : بابا عاوزاك فى حاجه ساهر جوزى عاوز ينزل مغلق الخشب تانى

الاب : تانى انا زهقت منه قوليلوا دى آخر مره
سها : ربنا يخليك لينا يا احن اب
الاب : وانتى يا سهام مش عاوزه حاجه يا بنتى
سهام : عايشه من فضلت خيرك يا بابا بس عيد ميلاد ابنى عليك عاوزاك تعملوا ليله مش عيد ميلاد
الاب : من عنيه
والباب خبط وعزه قالت رضوى رضوى
عبدالله : فى ايه فى ايه البنت بتعمل الاكل قومى يا سها افتحى الباب
سها : حاضر
وقامت سها فتحت الباب وقالت ده عمرو اخويا وخطيبته علا يا بابا
عمرو : انا هموت من الجوع ههههه ايه ده متجمعين عند النبى ايه كل ده

عزه قالت فى سرها القرف وصل ابو لسان عقربه طالع شبهها بالظبط هى أمينه لو أطول اموتك هعملها مش هتردد
علا : ازيك يا بابا ازى حضرتك يا طنط
عزه : قولى ماما يا حبيبتى زى رضوى كده
علا : بس عمرو قالى حماتى ماتت
عزه وقفت وقالت وبعز جبروتها وقوتها انا حماتك فاهمه اللى مش عجبه يتفضل من هنا
عمرو : بجد لو علا مشيت يا بابا انا همشى
الاب : عزه اسكتى
عمرو : اققعدى يا علا
علا : فين رضوى
الاب : فالمطبخ يا بنتى
علا: هدخل اساعدها عن اذنكم

وعلا دخلت ع رضوى المطبخ وقالت بتعملى الأكل لوحدك والله حرام انتى حامل وتعبانه عزه دى مفتريه الحمد لله عمرو محذرنى منها
رضوى : ياريت محمد زى عمرو انا شيلاها ع كفوف الراحه ومش عاجب الحمد لله ع كل حال
ورضوى قالت فى سرها انا هقول لعلا عالموضوع اللى عرفته ان حماتى عايشه بس مش هينفع هنا وهى ممكن تساعدني
علا : رضوى فى حاجه
رضوى : الأكل جهز ياريت تخرجى تحضرى السفره ومعلش يا علا انا عارفه انى بتاقل عليكى

علا: عيب عليكى عارفه انا وانتى هنبقى احلى سلايف وحضنت رضوى
وخرجت علا تجهز السفره وعين عزه عليها وبتبصلها وعنيها بتطق شرار وعزه قالت فى سرها البنت دى مش هتنفع معانا لسانها طويل زى خطيبها اللى ما يتسمى إنما رضوى هبله ومحمد فى ايدى ودلدول ليه انا لازم ابعدك عن عمرو هو انتى هتبقى احسن من أمينه حماتك 😂
ورضوى خرجت بالأكل وعزه تليفونها رن ودخلت ترد فى اوضه نومها

ورضوى حطت الأكل على السفره وجريت ع اوضه عزه وابتدت تتسنط وسمعت عزه بتقول انت كل يوم عاوز فلوس يا عبد القادر انا مش هقدر ع كده وكمان كل شويه عاوزنى فى شقتك مش هينفع انا حاسه مبقتش طايقه عبدالله ولا عياله…….

رواية حماتي بالوراثه بقلم كوكي سامح

الفصل الخامس

انا مبقتش طايقه عبدالله وعياله بس ع قد ما اقدر بحاول انفذ اللى اتفقنا عليه يا عبد القادر ربنا يخليك ليه وياخدك يا عبدالله يارب وارتاح من قرفك
رضوى : يا نهار اسود ومنيل انتى كمان خاينه

عزه : بقولك متتصلش بيه تانى انا بكره هكون عندك ومعايا الفلوس يا حبيبى
رضوى : يالهوى دى خلصت التليفون لما اروح عالمطبخ علشان متاخدش بالها

وفعلا رضوى راحت عالمطبخ وعزه خرجت من الأوضه وطلعت بره تقعد مع عبدالله وولاده وكان باين عليها الفرحه
عمرو : بابا انا عجبتنى شقه وطبعا عجبت علا وعاوز حضرتك تشوفها علشان بصراحه عاوز اتجوز بقى
عبدالله : حاضر يا حبيبى بس كده اختار كل اللى يعجبك وانا تحت امرك انت وعروستنا
وسهام قالت بصوت واطى شايفه يا سها الدلع اهو عمرو ده هو اللى على الحجر
سها : هههه عمرو ده اطيب واحد فينا وبعدين ماما الله يسامحها بقى سابته وماتت وهو صغير ده حتى مشفهاش مع ان كلهم بيقولوا حتى بابا انه واخد من طبعها
سهام : بس بيحبه يعنى طبع ماما كان حلو اوى ما خانت بابا وماتت محروقه

سها : مش عارفه هى خانت بابا ليه مع انى فاكراها كويس دى كانت حنينه اوى بس ممكن تكون خانت بابا علشان كان زمان عصبى وبيضربها

سهام : مش شرط بقولك احنا قلبناها غم ليه قفلى على السيره النكد دى
سها: انا ومحمد ومديحه نفتكر ماما كويس إنما انتى وعمرو كنتم صغيرين فرق بينكم سنه
سهام : انا مش فكراها خالص واحسن برضه دى جابت لينا العار
سها: خلاص خلصنا انا كل اللى فكراه اليوم اللى ماتت فيه وطلعوا جثتها محروقه انا كنت صغيره وبعدها بكام يوم حتى بابا ماخدش عزاها وطرد خالى ولقيته جايب لينا ماما عزه اعز أصحاب ماما واتجوزها ومن وقتها وهى حنينه علينا وعوضتنا عن غياب ماما وبرضه مش هقول غير الله يرحمها ويسامحها

عزه : مالكم يا بنات بتتكلموا فى ايه 🤔 ايه ده
وقامت عزه وقعدت جمب سها وقالت مالك يا حبيبتي انتى بتعيطى ولا ايه اوعى يكون ساهر جوزك مزعلك
سها : لا يا ماما انا بس الحمل تاعبنى
عزه : الف بركه انتى حامل مبروووك يا حبيبتى امممم خلى بالك بقى لو جبتى بنت هتبقى ع أسمى عزه
سها : احلى الاسامى واغلى الاسامى من عنيه هسميها عزه ويارب تطلع قمر زيك
عزه : عبدالله شوفت سها حامل انا اتفقت معاها لو بنت هتبقى عزه
عبدالله : عزه تانى كفايه واحده بس 😂
عزه : انا بشم فى كلامك ريحه تريقه 😂
عبدالله قام خد عزه فى حضنه وقالها انتى كل حاجه ليه هو انا ليه غيرك

رضوى : بابا ماما اتفضلوا الشاى
عزه : ومعملتيش لعلا حبيبت قلبى سلفتك شاى ليه
علا : كلنا هنشرب عصير مانجه فريش
عمرو : بابا انا كلمت صاحب العماره واتفقت معاه ع بكره انك هتشوف الشقه وهتكيش يا باشا
الاب : ههههههههه اولاد اخر زمن تصدق يا ابنى انا مكنتش اققدر اققول لأبويا يا باشا 😂 انتم جيل واحنا جيل تانى خالص
وقام عمرو وباس ايد ابوه وقاله ربنا يبارك فى صحتك يا حج
رضوى قالت فى سرها كده فى حاجات كتير مش فاهماها اكيد اللى كتب الجواب ده يبقى الراجل اللى بيكلمها فالتليفون بس لما هو بيكلمها وشكلها بتحبه طيب بيهددها ليه وهى بتخون عم عبدالله ليه وفين حماتى اذا كانت عايشه انا لازم اهدى واربط الخيوط ببعضها يمكن اعرف حاجه

محمد : رضوى هاتى كوبايه عصير
رضوى : خد اتفضل كمان مش قادر تاخد الكوبايه
عزه : رضوى مالك بتكلمى محمد كده ليه ده ابنى البكرى يا حبيبتى انتى هنا خدامه لجوزك
رضوى : حاضر
محمد : حبيبتى يا ماما
رضوى قالت فى سرها انا لازم افضحك وافضح الاعيبك يا حماتى بالوارثه
وعمرو اخد خطيبته علا ومشى وسها وسهام طلعوا ع شققهم ومحمد قال ل رضوى انه طالع وخليها تقعد تروق الشقه مطرح ما سهرنا

رضوى : حاضر وقالت فى سرها فعلا أسوأ حاجه لما جوزك ميحسش بيكى وبتعبك انا لسه عروسه وده اول حمل ليه وعندى انيميا وعاوزه غذا وراحه وهو انسان بيحب مرات ابوه اوى من الاخر بتاع امه انا مقلتش ميحبهاش بس فى عدل انا مش مجبوره ع كل ده ما يحب امه بس ميشيلنيش فوق طاقتى حرام والله حرام

رواية حماتي بالوراثه بقلم كوكي سامح

الفصل السادس

عزه مسكت فونها واتصلت وقالت بصوت واطى الو بكره ميعادنا ع الساعه 3 العصر
رضوى : بكره 3 العصر كويس انى اخدت بالى

وابتدت رضوى تروق الشقه وخلصت وطلعت شقتها وفى صباح اليوم التالى رضوى صحيت بدرى ونزلت ع شقه حماها ولقيته لوحده وقالت ازيك يا عمى صباح الفل
عبدالله : صباح الخير يا حبيبتى

رضوى : هى فين ماما
عبدالله : طقت فى دماغها تشترى بسبوسه بالفستق وكمان راحت البنك تودع فلوس
رضوى قالت فى سرها هههههه يا عينى يا عمى دى هتاخد فلوس وانتى الصادق
عبدالله : عاوز افطر
رضوى : بس كده من عينى
ورضوى قالت فى سرها لما ادخل اوضه حماتى ادور يمكن اعرف حاجه جديده وفعلا رضوى دخلت وفتحت الدولاب وبدور ولقت شنطه صغيره وفتحتها لقت فيها خاتم دهب

وشكله غالى و مفتاح وقالت يا ترى ده مفتاح ايه عموما انا هخده يمكن اعرف بتاع ايه بس كده عزه هتعرف؟ خلاص انا هاخد الشنطه كلها وخلاص علشان متعرفش ان المفتاح حد خده وتفتكر نفسها شالت الشنطه ونسيت مكانها وخرجت رضوى من الأوضه ودخلت المطبخ تحضر فطار واتصلت ببنت خالتها ريهام وقالت لها انها عاوزه منها خدمه تتصل بمحمد وتقولوا انها تعبانه وعاوزاها فى مشوار

ورضوى حضرت الفطار وعبدالله فطر وكان مبسوط وفضل يدردش مع رضوى من حبه فيها لأنها بنت محترمه وبتعامله بما يرضى الله ورغم قسوه عزه عليها بس بتعاملها كويس
رضوى : عمى هى حماتى ماتت ازاى
عبدالله : الله يسامحها ماتت الشقه ولعت بيها
رضوى : يا عينى وع كده بقى انت اتجوزت ماما عزه على طول
عبدالله : اه علشان ولادى وهى كانت بنت جميله ولسه شابه وفيها صحه
عزه : صباح الخير عليكوا تصدق يا عبدالله البنك زحمه موت والحر مفرهدنى ومجبتش البسبوسه انا هخرج شويه كده اشتريها رضوى قومى حضرى فطار ليه
رضوى : حاضر

رضوى قالت فى سرها وانا هكون وراكى
وعدى الوقت والساعه دقت 3 وعزه قامت لبست ونزلت وطبعا ريهام بنت خاله رضوى كلمت محمد واستأذنت منه انها تعبانه وعاوزه رضوى معاها ورضوى كانت جاهزه ونزلت ورا عزه
وعزه وقفت تاكس ومخدتش عربيه جوزها والسواق كالعاده ورضوى خدت تاكس وومشيت وراها واول ما عزه نزلت فضلت تبص وراها زى الحراميه وطلعت عماره
رضوى : غريبه العماره مفيهاش بواب وكأنها مهجوره بس لازم اطلع وطلعت ورا عزه ورضوى طالعه وسامعه رجل عزه بدب عالسلم وفجأه وقفت وسمعت صوت بيقول تعالى يا حبيبتى والباب اتقفل وراهم ورضوى طلعت وعرفت الشقه وفضلت تتسنط ومش سامعه حاجه بس صوت عزه كان

عالى هى وعبد القادر بيتكلموا وفجأه صوت اختفى خالص ورضوى فضلت واقفه عالباب وقالت انا هفضل واقفه كده ومش عارفه ايه اللى بيحصل جوه وفتحت شنطتها علشان تتطلع تليفونها وشافت الشنطه اللى كانت فى دولاب عزه وقالت صح انا ممكن اجرب المفتاح ده يمكن يفتح وطلعت المفتاح من الشنطه وابتدت تفتح الباب بشويش والباب اتفتح…

رواية حماتي بالوراثه بقلم كوكي سامح

الفصل السابع

والباب اتفتح ورضوى قالت معقول الباب اتفتح ودخلت الشقه بشويش وقالت ايه ده مفيش صوت ولا فى حد فالشقه اومال راحوا فين وقفلت باب الشقه وراها وكان مردود ودخلت تدور ع عزه وعبدالقادر فالشقه وفجأه سمعت عزه بتتكلم من اوضه النوم وكان معاها عبدالقادر ورضوى قالت انا هقف اسمع بيقولوا ايه يمكن اعرف ايه حكايتهم واعرف حماتى أمينه فين

عبدالقادر : معقول يا عزه 100 الف جنيه بس
عزه : والله يا حبيبى معرفتش اجيب غيرهم وبعدين ده مبلغ محترم
عبد القادر : الدنيا بقت غاليه اوى والفلوس دى قليله
عزه : انا بحبك ومش هسيبك يا حبيبى
عبدالقادر : خليكى بايته معايا النهارده
عزه : يا مصيبتى انت عاوز عبدالله يشك فيه ده كان يفرج عليه الدنيا
عبد القادر : يااه امتى نخلص منه بقى زى ما خلصنا من أمينه
عزه : بلاش تجيب سيره البنى ادمه دى علشان دمى بيتحرق
عبدالقادر: لسه بتغيرى منها

عزه : انا اغير لا عاش ولا كان اللى يهز شعر واحده منى ده انا ست الستات ولا عندك شك يا قلبى 😍
عبد القادر : خلاص انا تعبت من البعد ده ولازم نكون مع بعض
عزه : اصبر ع رزقك
رضوى : يا مصيبتى شكلهم خارجين من الأوضه انا لازم أمشى بسرعه وفعلا رضوى خدت بعضها وفتحت باب الشقه ومشيت ونزلت جرى عالسلالم وقالت المهم انى عرفت المكان اللى بيتقابلوا فيه وان شاء الله كل حاجه هتبان
عبدالقادر : حبيبتى انا هعمل لقمه ناكلها
عزه : أكل ايه مفيش وقت انا لازم أمشى يلا بقى وبعدين هبقى اكلمك سلام
وعزه مشيت ونزلت وخدت تاكس وكانت رضوى روحت البيت وسبقتها
عزه : رضوى ايه ده انتى لسه معملتيش الغدا
رضوى :لا انا لسه راجعه من بره ريهام بنت خالتى كانت تعبانه وكنت معاها عند الدكتوره
عزه : طيب يلا ادخلى اعملى الغدا
رضوى : حاضر هطلع اغير هدومى وهنزل اعمل الغدا ع طول

ورضوى قالت فى سرها لازم اكشفك قدام عيالك وعمى عبدالله بس الاول اعرف حماتى فييين؟؟ ولازم أراقب تليفونك واعرف بتعملوا ايه انتى والراجل ده
وفعلا رضوى طلعت شقتها والتفكير شاغل دماغها ولسه مش عارفه تعمل ايه ودخلت اوضه نومها ولقت محمد نزل شغله ومش موجود وغيرت هدومها ونزلت وكان عندها فكره عن تهكير الواتس ولما لقت عزه نايمه اخدت تليفونها وهكرت الواتس وقالت لازم أراقب كل كلمه بتحصل بينك وما بينه وفعلا هكرت الواتس ودخلت التليفون جمب عزه وعزه فى سابع نومه ومش حاسه بحاجه ودخلت رضوى المطبخ وعملت الغدا وفضلت مستنيه عزه تصحى ولما عزه صحيت لقت رساله واتس وكانت من عبد القادر

عبدالقادر :عزه حبيبتى فينك
عزه : كنت نايمه
وعزه قفلت النت وخرجت علشان تتدخل الحمام
عزه : رضوى حضرى الاكل محمد جوزك زمانه جاى
رضوى : حاضر حاضر
ورضوى قالت فى سرها مش هسيبك يا خاينه ودخلت رضوى تحضر الأكل وخرجت وحضرت السفره ومحمد وصل من شغله وكانت الساعه 7 بالليل وعبدالله ورضوى ومحمد وعزه قعدوا ع الأكل ورضوى قالت فى سرها هى ليه قفلت النت ومكملتش كلامها عالواتس مع عبد القادر انا خايفه تكون شكت فى حاجه يارب استر وخليك معايا
عزه : بقولك يا محمد يا روح وقلب امك
محمد : نعم يا ست الكل
عزه : ع اتفقنا لو بنت هتبقى اسمها عزه هههه
محمد : ههه بس كده ده انتى ست الكل وست الناس
عبدالله : اه بطنى بتتقطع

وعبدالله فضل يصرخ ومسك بطنه ووقع عالأرض وفضل يتلوى من الألم وعزه واقفه ومحمد هيتجنن ع ابوه ورضوى و شها اصفر ومسكت ايد حماها وجريت واتصلت بدكتور وعزه فضلت تصرخ وتقول لعبدالله مالك ايه اللى جرالك وعبدالله يقولها بطنى بتتقطع
محمد : الدكتور وصل اتفضل يا دكتور
ومحمد خد الدكتور دخل ع ابوه علشان يكشف عليه ويشوف تعبان من ايه
عزه ورضوى قاعدين بره مستنين الدكتور يخرج ويطمنهم
محمد خرج بيصرخ ويقول ازاى ابويا مات……

رواية حماتي بالوراثه بقلم كوكي سامح

الفصل الثامن

وخرج محمد وقال ازاى ده ابويا مات وهو مصدوم وعينه كلها دموع وسند عالحيطه وفضل يرزع فى دماغه ويقول ابويا مات يا أمى ابويا مات والدكتور خرج وقال فى اشتباه انها حاله تسمم

رضوى قالت فى سرها انا كنت حاسه لأن عمى عبدالله كان زى الفل وانا عامله الأكل بإيدى يانهار اسود الأكل معقول تكون عزه حطط السم فالأكل وعاوزه تتهمنى فيها يالهوى يالهوى انا كده هروح فى داهيه اكيد عرفت انى براقبها
عزه : سم ايه يا دكتور ده كان زى الفل ده حتى عبدالله حبيبى مش بيحب أكل بره يا عينى عليك يا حبيبى خلاص انا توهت من بعدك
محمد : سم ايه ده لسه واكل معانا وكلنا أكلنا من الأكل؟!!
الدكتور : مفيش حاجه هتبان دلوقتى عموما انا هبلغ البوليس وده شغلهم والدكتور بلغ بالتليفون وقال إن فى حاله تسمم وعزه فضلت تصوت ورضوى منهاره وسها وسهام نزلوا جرى وعرفوا خبر وفاه ابوهم وانهاروا تماما والبيت كله بقى حزن وكلهم لبسوا الأسود وكان عمرو فى شغله وبعد ربع ساعه البوليس وصل ووكيل النيابه سألهم ع الأكل ورضوى قالت إنها اللى عملته وخدوا رضوى ومحمد قال رضوى عمرها متأذى ابوه ولا اى حد فيهم لأنها بتحبهم وقال لوكيل النيابه انهم كلهم كانو بياكلوا مع بعض من نفس الأكل وخدوا الأكل علشان يتحلل ويشوفوا انه مسموم ولا لأ لأن كل ده اشتباه وخدوا عبدالله جثه هامده وخرج عبدالله جثمه

هامده مسموم من بيته وسط مراته وعياله وعمروا وصل وشاف ابوه جثه وانهار وقال لأ يا حج اوعى تسبنى انا مليش غيرك والله كلنا ملناش غيرك امى راحت وكمان انت القلب الطيب وشاف رضوى زيها زى المجرمين وقال رضوى لأ رضوى متعملش كده وكان معاه علا خطيبته وكانت منهاره ع حماها وبعد مرور 24 ساعه النيابه ابتدت تحقق فالقضيه وتقرير الطب الشرعي طلع ووصل فى ايد وكيل النيابه وكان وكيل النيابه بيحقق مع رضوى ورضوى قالت إنها أكلت من الأكل وجوزها وعزه كمان ووكيل النيابه قال فى مفاجأه

فالتقرير ان الأكل مش مسموم والمجنى عليه عبدالله اتسمم من عصير شرب عصير مسمم بس رضوى استغربت وقالت العصير ده موجود فالتلاجه من اول امبارح بس وكمان مغلف ومده صلاحيته مش منتهيه وحماها بيحبوا وع طول بيشربوا وكمان بيشتريه بنفسه واستغربت ووكيل النيابه سألهم كلهم وقالوا نفس كلام رضوى ووكيل النيابه أمر بدفن الجثه وأمر بخروج رضوى وجارى البحث عن الجانى…

وفى صباح اليوم التالى كلهم واقفين قدام المستشفى مستنين جثمان عبدالله والحزن ع ملامحهم ولابسين اسود ومنهارين وعزه كلها خبث ورضوى قالت فى سرها اكيد انتى فرحانه علشان مات ويفضى بقى الجو لعبدالقادر اكيد هو

اللى قتله بس ازاى ده السم فالعصير المغلف بس انا فاكره كلامه ليها قالها عاوزين نخلص منه وهى قالت اصبر ع رزقك وبعدين هى كانت بره طيب وحطت السم ازاى انا هتجنن والله هتجنن انا حاسه انى شيطان لأنى ساكته عن الحق وكده بضلل الحقيقه بس مين هيصدقنى يارب يارب
وسها وسهام وعمرو ومحمد كانوا منهارين ووصلت مديحه وانهارت لما عرفت خبر وفاه ابوها ولما عرفت العصير قالت اكيد العصير فاسد محدش يتجرأ يحط سم لأبويا لأنه سيد الناس ومعروف بطيبته وكرمه
وخرج جثمان عم عبدالله وسط صراخ بناته ورضوى وعلا وعزه وولاده إلى مثواه الأخير ووسط ولاده وادفن عم عبدالله الطيب وفارق حبايبه وللأسف مات وميعرفش ان عزه بتخونوا وغدرت بأمينه أم أولاده وفى وسط المقابر وبعد دفن عبدالله بدقايق كلهم مشيوا وكل واحد اخد مراته وركب عربيته وروحوا عالبيت واول ما دخلت عزه الشقه

فضلت تصوت مسكت چاكت عبدالله وفضلت تصوت وتلطم عليه والبنات انهاروا على ابوهم وعمرو ومحمد فضلوا يعيطوا

رضوى : محمد بقولك انا هفتح باب الشقه علشان ناخد العزا
محمد : انا اتفقت هناخد عزا ابويا وهعمل صوان كبير فالشارع ابويا تاجر خشب ومعارفه كتير
عمرو قام وقف وبعلو صوته قال اسمعوا كلكم مفيش عزا هيتاخد انتوا فاهمين ابويا مات مسموم مسموم مسموم يعنى اتاخد غدر وانا مش هسيب حقه ان شالله لو من التاجر نفسه لأن آخر حاجه أشك فيها ان حد منا يكون عمل كده صح ولا ايه

مديحه : ايوه اكيد العصير فاسد 😭😭 يا عينى عليك يا بابا
عمرو: انا مش هسيب حق ابويا ابدا ولا ايه يا اخويا الكبير يا ابن امى وابويا
محمد : اه اه
عزه : محمد 😭 تعالى فى حضن امك تعالوا يا بنات احنا ملناش غير بعض صح يا عمرو
عمرو مشى متعصب وحزين وخرج وقفل باب الشقه وراه ومشى وبلغ ان مفيش عزا لحد ما البوليس يعرف الجانى…
رضوى : علا عاوزاكى فى حاجه
علا : نعم يا حبيبتى قولى

رضوى : مش هينفع هنا تعالى معايا فوق شقتى
علا : حاضر اسبقى وانا طالعه وراكى
ورضوى طلعت ع شقتها وعلا طلعت وراها ورضوى حلفت علا متقولش حاجه
رضوى : انا عاوزه اققولك ع حاجه احنا كلنا فى مركب واحده
علا : قولى
رضوى : عزه بتخون عم عبدالله الله يرحمه
علا: يا نهار اسود انتى بتقولى ايه اسكتى خالص
رضوى : وكمان حماتك عايشه بس فين معرفش
علا : انتى عرفتى ده كله منين
رضوى : انا معايا دليل عليها وواثقه ومتأكده انها هى اللى سممت حمايا بس اللى ملغبطنى ومحيرنى ازاى دى كانت بره والعصير كان فالتلاجه ومغلف وهى كانت مع عشيقها
علا : حبيبتى اوعى حد يعرف الكلام ده لان الدنيا شايطه ده عمرو يقتلها وياخد عزاها ده مجنون ده كان بيعشق ابوه
رضوى : انا مقدرش اتكلم فى اى حاجه بس هقولك ع حاجه ده الدليل خودى الورقه دى فيها العنوان اللى عزه بتقابل فى عشيقها وخودى ده كمان

علا : ايه ده
رضوى : ده مفتاح الشقه بتاعت عبد القادر عشيق حماتك بالوارثه 😢
علا : انتى بتعملى كده ليه
رضوى : مفيش وقت انا خايفه محمد يطلع او عزه تشك ان انا وانتى مع بعض عموما ده تليفونى وعليه واتس عزه متهكر وانا هستعمل تليفونى التانى تمام التليفون عليه واتس عزه راقبيها واعرفى الحقيقه لأنى انا مش هعرف اعمل حاجه انا مش طايقه اققعد فالبيت هنا انا حامل وهقعد عند ماما شويه
علا : يادى المصيبه عموما خلاص انا هحاول اشوف حل واعرف آخره عزه دى ايه انا طول عمرى مبستريحش للست دى

رواية حماتي بالوراثه بقلم كوكي سامح

الفصل التاسع

وبعد مرور اسبوعين ع وفاه عبدالله رضوى راحت تزور حماها فالقبر ولقت باب مفتوح وعرفت ان فى حد بيزوروا ولما دخلت شافت ست مغطيه شعرها ولابسه هدوم مش نضيفه وكأنها شحاته وقاعده بتعيط

رضوى :السلام عليكم ورحمة الله وبركاته
الست : عليكم السلام ورحمة الله وبركاته
رضوى : ازيك
الست : نحمد ربنا يا بنتى
رضوى : ايه اللى مقعدك هنا كنتى عاوزه حاجه
الست : 😭😭 ده قبر جوزى وتاج راسى
رضوى قالت فى سرها ياااه حماتى أمينه
رضوى : جوزك انتى اسمك ايه
الست : أسمى أمينه

رضوى : ممكن سؤال
أمينه : قولى يا بنتى
رضوى : هو انتى عايشه فين
أمينه : هنا فالترب تعالى قومى
وخدت رضوى وشاورت لها ع باب اوضتها فالمقابر وقالت لها انا عايشه هنا
رضوى : عموما انا هجيلك تانى يا ماما أمينه
أمينه : ياااه ماما تعرفى يا بنتى انا ام واتحرمت من ولادى ومن كلمه ماما انتى اسمك ايه يا بنتى
رضوى : اسمى رضوى
أمينه : عاشت الاسامى يا بنتى هستناكى بس انا زعلانه منك
رضوى : ليه بس

أمينه : علشان مشربتيش حاجه وراحت أمينه طلعت من حجرها قرصه وقالت لرضوى خودى كلى دى حلوه وهتعجبك
رضوى : شكرا يا ست أمينه انا همشى بس هرجعلك تانى سلام سلام
ورضوى خرجت من المقابر وسألت التربى ع أمينه والتربى قالها ده الست أمينه بركه وعالطول دعواتها مستجابه والكل بيحبها وهى موجوده هنا اكتر من عشرين سنه وبتسترزق من باب الله ورضوى مشيت وحست بألم فى ضهرها وحست بمغص فى بطنها وخبط فى ضهرها وهى لسه فى اول حملها وروحت البيت ونزل عليها دم واترمت عالأرض من الوجع وفضلت تصوت ومحدش موجود غير عزه ووشها عرق وعرق شديد ووشها اصفر وماسكه بطنها

رضوى : الحقينى يا ماما عزه انا عندى نزيف وحاسه انى هموت
عزه : ما تموتى ولا تغورى
وعزه قعدت عالأرض ومسكت بطن رضوى وقالت بكل غل انتى تمشى ورايا انتى بتراقبينى يا روح امك انا هموتك زى حماكى وهسيبك غرقانه فى دمك…..

رواية حماتي بالوراثه بقلم كوكي سامح

الفصل العاشر

وعزه قالت لرضوى انا تراقبينى يا روح أمك انا هسيبك تموتى زى حماكى ورضوى بتنزف جامد والمغص بيقطع فى بطنها وقالت بصوت واطى انتى اللى سممتى عم عبدالله ورضوى اغمى عليها وعزه فضلت تصوت وتقول مالك يا بنتى فيكى ايه وجريت فالعماره زى المجنونه وخبطت ع كل شقه وسها وسهام ومديحه اتخضوا وعزه طلعت ع شقتها

ورضوى سايحه فى دمها وسها وسهام ومديحه طلعوا ورا عزه وشافوا رضوى وسهام قالت هى مالها دى مغمى عليها وكمان بتنزف وفى حمل يا نهار اسود فين محمد يا ماما
عزه : فى شغله يا بنتى انا لقيتها داخله عليه وبتقولى الحقينى يا ماما واغمى عليها
مديحه : هو احنا لسه هنتكلم يلا يا جماعه نروح المستشفى اللى ع اول الشارع

سهام : ماشى انا هنزل وهخلى السواق يجهز
عزه : السواق من وقت ما عبدالله الله يرحمه مات مش بيجى
سهام : انا هسوق بس يلا شالوها وسندوها وانزلوا
وفعلا سندوا رضوى ونزلوا وخدوها على المستشفى وبعد مرور 24 ساعه والكل مستنى يشوف رضوى فيها ايه وخصوصا الدكتوره قالت إن حالتها خطر ولو كان عدى عليها ساعه كانت ماتت ومحمد وعمرو وسها وسهام ومديحه وعزه وكلهم فالمستشفى ومستنين رضوى تفوق لأنها جالها تسمم حمل وفقدت الجنين

عزه : يا بنات يا حبايب قلب امكم يلا روحوا عالبيت علشان ولادكم انا هقعد معاها
مديحه : لا يا ماما انا هستنى اشوف رضوى وعاوزه اطمن عليها دى صعبانه عليه اوى
عزه : بقولكم روحوا علشان رجالتكم وعيالكم واديكم شايفين انا فالبيت لوحدى بعد حبيب عمرى راح وانا لوحدى انا هقعد معاها يلا على بيوتكم
عزه :محمد يلا خد اخواتك وروحوا وانا لما رضوى تفوق هكلمكم علشان اطمنكم عليها
محمد : حاضر يا ماما ربنا يخليكى لينا
عمرو : ايه ده انت هتسيب مراتك وتمشى المفروض وقت زى ده انت اللى تكون جمبها ومتلقيش حد غيرك
عزه : ما خلصنا يا عمرو محمد تعبان
وعزه قالت فى سرها نفسى اخلص منك انت يا عمرو الكلب يا ابو لسان طويل
محمد : حاضر انا همشى يا ماما وهاخد اخواتى بس طمنينى هه..

ومحمد مسك ايد عزه وباسها وخد اخواته ومشى وفضلت عزه مع رضوى

عزه : يا دكتوره ممكن ادخل اققعد مع بنتى جوه عاوزه اطمن عليها
الدكتوره : ادخلى بس لما تفوق ياريت قوليلى وبرضه انا هدخل وهتابع واطمن
عزه : شكرا يا دكتوره
وعزه دخلت الغرفه على رضوى ورضوى نايمه وفى دنيا تانيه ومعلقه محاليل واتنقل ليها دم لأنها كانت اتصفت من كتر النزف
وبعد مرور ساعه تليفون عزه رن وكانت ريهام بنت خاله رضوى وخاله رضوى بيطمنوا عليها لما عرفوا بس عزه رددت عليهم بكل قله ذوق وطمنتهم وقفلت حتى من غير سلام
رضوى : اه اه انا فييين!!

عزه : هههههههههه هههههههههه انا جمبك
رضوى : انتى عاوزه منى ايه وفين محمد
عزه : محمد ده مش راجل وحتى مبيحبكيش ده لما قولتلو أمشى مشى وحتى مسألش عليكى
رضوى : حرام عليكى انتى قتلتى عمى عبدالله ليه هو عملك ايه
عزه : وهقتلك انتى كمان لو ملمتيش نفسك عنى وبطلتى تراقبينى وبطلتى شغل العيال ده انتى والبت الجربوعه اللى اسمها علا
وعزه مسكت رضوى من ايدها وقالت المره دى خليتك خسرتى حملك وانا اللى سقطك

رضوى : ازاى 😭
عزه : بدلت حقن التثبيت بحقن تنزل الطفل وتعملك نزيف
رضوى : ليه حرام عليكى انا معملتش حاجه
عزه : بت انتى تعرفى ايه عنى انا سمعتك بتقولى لعلا انك كنتى ب تراقبينى وبخون عبدالله
رضوى : انا بس سمعت مكالمتك مع واحد بس معرفوش
عزه : انتى بتكدبى يا بت
رضوى : هو ده وبس اه والله
كوكى سامح
ورضوى قالت فى سرها معنى كلامها انها مسمعتش كل الكلام وكمان متعرفش انى شوفتها فالشقه مع عبد القادر
عزه : يا دكتوره بنتى فاقت وعاوزه اطمن عليها
الدكتوره : حمدالله ع سلامتك وان شاء الله ربنا يعوضك خير بيبى جديد

رضوى : الحمد لله
الدكتوره : حالتك بقت كويسه بس التزمى الراحه واتغذى كويس علشان انتى نزفتى كتير وهكتبلك ع خروج بكره ان شاء الله
رضوى : شكرا يا دكتوره
عزه: يعنى خلاص هى بقت كويسه
الدكتوره الحمد لله
ورضوى خدت علاجها ونامت وهى مرعوبه من عزه وفى صباح اليوم التالى رضوى خرجت من المستشفى ومعاها عزه واول ما وصلت البيت طلعوا ع شقه عزه وكانت مديحه والبنات قاعدين
مديحه : انتوا جيتوا حمدالله ع سلامتك يا رضوى وقالت ماما ماما عزه فى ضيف مستنيكى جوه
عزه : ضيف مين عموما يا اهلا يا اهلا
وعزه دخلت تشوف الضيف وقالت مين عبد القادر ابن عمى وخدته بالحضن……

رواية حماتي بالوراثه بقلم كوكي سامح

الفصل الحادى عشر

وعزه قالت مين عبد القادر ابن عمى وخدتوا بالحضن…ورضوى قالت فى سرها يا نهار اسود ده عبد القادر ده انتى فعلا ست جبروت ومفتريه ربنا على الظالم

عزه : يا بنات تعالوا تعالى يا مديحه وانتى يا سها وانتى يا سهام تعالوا سلموا على عمكم عبدالقادر
مديحه : اهلا بحضرتك بس اول مره اعرف انك عندك ولاد عم

عزه : ياااه انا أهلى كتير بس الدنيا تلاهى يا حبيبتى بس عمك عبدالقادر مش ابن عمى لزم لالا ده ابوه ابن عم ابويا الله يرحمهم جمعيا
سهام : اهلا بيك يا…
عزه : عبدالقادر يا سهام
سها : ازيك يا عم عبد القادر
عزه مسكت ايد رضوى وقالت مديحه خودى اسندى رضوى وطلعيها على شقتها
محمد : السلام عليكم انتى جيتى يا ماما
رضوى : مش تسأل عليه

محمد : حمدالله ع سلامتك
رضوى قعدت عالكرسى وفى عنيها دموع ومكسوره وقالت ابننا مات وفقد حملى يا محمد
محمد: معلش معلش
رضوى قالت فى سرها ياااه لما يكون الراجل مش حاسس بمراته وفى وقت هى محتاجه لى اكتر من اى وقت
محمد : رضوى يلا ع شقتنا
عزه : محمد ده عمك عبد القادر سلم عليه
محمد : عمى مين يا ماما اول مره اشوفوا
عزه : ده قريبى
محمد : منور يا عم عبد القادر
عبد القادر : ربنا يكرمكم جمعيا
رضوى قالت فى سرها لأ والصراحه انت راجل تقى
عزه : لأ خليكم نقعد كلنا ناكل لقمه مع بعض علشان خاطر عمكم عبد القادر الراجل ضيف
مديحه : حاضر انا هدخل احضر الأكل رضوى ادخلى جوه استريحى

رضوى : انا هطلع شقتى علشان مش قادره
عزه : اققعدى كلى لقمه معانا
محمد : ما تقعدى يا رضوى ماما أمرت
رضوى : حاضر
عزه : وحشتنا يا عبد القادر بس مالك يا اخويا شكلك مبهدل ليه كده
عبد القادر دى حكايه طويله هبقى احكيلك عليها
الباب خبط وكان عمرو ومعاه علا ومديحه حضرت الأكل على السفره وسهام وسها حطوا الاكل ومديحه والسفره جهزت وعبد القادر قعد وعزه ومحمد
عمرو: ما شاء الله متجمعين عند النبى خير هو فى ايه
عزه قالت فى سرها انت اللى مش تحت طوعى بس هوريك
علا : ازيكم كلكم رضوى عامله ايه حمدالله ع سلامتك
رضوى : الحمد لله بس مقهوره انا سقط
علا: حبيبتى ربنا هيعوضك خير
عمرو : انتوا عاملين عزومه وابويا مكملش ولسه ميت ايه القرف ده

محمد : عمرو عيب كده احترم نفسك
عمرو : انا محترم بس فعلا مش بالكبير ولا بالصغير بالاصول يا ابن ابويا بس انا هلوم عليك ليه ده انت حتى قاعد بتاكل وسايب مراتك تعبانه بدل ما تاخد بإيدها
محمد : متخلنيش آمد ايدى عليك
ومحمد رفع ايده ع وش عمرو بس عزه قامت وقالت بصوت عالى بس اسكتوا هو البيت خرب ولا ايه يلا يا عمرو اقعد يا حبيبى معانا وسلم عالضيوف ده عمك عبد القادر
عمرو : اسف ازيك يا عم عبد القادر بس حضرته اول مره اشوفوا
عزه : قريبى
علا مسكت ايد عمرو وقعدوا معاهم عالسفره
عزه : معلش يا عبد القادر هما الولاد كده ناقر ونقير ربنا يباركلى فيهم بس مقولتش مالك
عبد القادر : انا لسه راجع من البلد وحالتى معدومه خسرت فلوسى كلها

عزه : معقول خلاص انا هخلى محمد يشوفلك شغل معاهم
عمرو : وليه احنا عاوزين سواق وطبعا الشغلانه دى عاوزه حد أمين وكفايه انك تبع ماما عزه ده كفيل اوى
عبد القادر : سواق
عزه : وماله السواق عالاققل لما احتاج حاجه تكون معايا عالطول
محمد : وفى شقه تحت فالدور الارضى ممكن تسكن فيها
عزه : هى زى الفل
رضوى : انا تعبانه وعاوزه اطلع شقتى ولو سمحت يا علا تعالى طلعينى
عزه : رضوى خلى بالك من نفسك
رضوى : حاضر
عبدالقادر والله يا جماعه مش عارف اشكركم ازاى
وعلا طلعت مع رضوى واول ما دخلوا شقه رضوى
رضوى : علا عملتى ايه
علا : للأسف معملتش حاجه ومش هدخل فالموضوع ده.. ده موضوع مش سهل وهتحصل فيه مصايب
رضوى : هى اللى سقطتنى وكمان عبد القادر ده الراجل اللى بتخون معاه عم عبدالله الله يرحمه

علا : انتى تعبانه اسكتى دلوقتى وبعدين نتكلم
علا : انا نازله دلوقتى وهبقى اطمن عليكى
وعلا نزلت وكانوا خلصوا أكل ومحمد قال لعبد القادر خد يا عم عبد القادر ده مفتاح العربيه وده مفتاح الشقه اللى تحت
مديحه : انا عملت الشاى انا نازله بقى ومديحه نزلت وسهام وسها وكل واحده فيهم نزلت شقتها وعمرو خد علا يوصلها…
ومحمد فضل قاعد مع عبد القادر وعزه وبيشربوا الشاى
محمد : ماما انا مش قادر وعاوز انام
عزه : اطلع يا حبيبى وانا هنزل مع عمك عبد القادر علشان يشوف الشقه وفعلا محمد طلع وعزه نزلت وعبد القادر نزل معاها.. وفتحت الباب ودخلت الشقه وقالت لعبد القادر… اوعى تزعل انا عاوزاك سواق علشان تبقى جمبى
عبد القادر : خلاص انتى عارفه بحبك قد ايه وحابب اكون معاكى عالطول

عزه : ربنا ما يحرمنى منك يا حبيبى
وعزه حضنت عبد القادر وعنيها بجحه
عبد القادر : خليكى معايا النهارده.
عزه : لا انت اللى هتطلع هستناك الساعه 2 بالليل البيت كله بيكون نايم وانا قاعده لوحدى زى ما انت شايف وابقى انزل على 6 الصبح ومحدش هيشوفك
عبد القادر : وانا قتيل هنا 😂
عزه : بحبك خلاص هانت..
عبد القادر : عملتى ايه فى البت مرات محمد
:عزه : هددتها وسقطها كمان ولو عملت حاجه تانيه والله هقتلها زى ما قتلت عبد الله
عزه : انا طالعه وعلى ميعادنا قبل مقصوف الرقبه ده ما يجى عمرو الكلب لاحسن يشوفنا وتبقى مصيبه…

وعزه طلعت على شقتها وهى مبسوطه وفرحانه ان عبد القادر بقى معاها فالبيت…

وكانت الشقه فاضيه وكل واحد نزل شقته وكانت الساعه 11 بالليل عمرو خبط عالباب عزه : تعالى يا عمرو
عمرو : ماما عزه انا النهارده هروح عند حد من اصحابى وهبات معاه وقولت اققولك علشان اخواتى لو حد فيهم سأل عليه
عزه : تروح وترجع بالسلامه ياريت يا عمرو تعتبرنى زى امك
عمرو : حاضر عن اذنك
وعزه فرحت وقالت ياااه البيت بقى فاضى محمد بيصحى عالضهر وينزل شغله والبنات مشغولين مع رجالتهم وكمان بيصحوا متأخر وانا بقى لحبيبى عبد القادر لما اققوم اعمله أكله حلوه لسه بدرى ودخلت المطبخ وعملت أكل وجهزت عصير ودخلت خدت شاور ودخلت اوضه نومها لبست احسن ما عندها وبصت فالمرايا وقالت انا حلوه طول عمرى ست جميله.. ياه عبدالله مات وغار فى ستين داهيه والوقت عدى وكان تليفون عزه صامت وعبد القادر فضل يتصل وهى مردتش والساعه دقت اتنين وقامت عزه ومسكت تليفونها وقالت ايه ده عبدالقادر اتصل كتير معقول وراحت باعته رساله عالواتس وقالت لعبد القادر اطلع الساعه اتنين انا مستنياك يا حبيبى 😍

وعبد القادر بعت رساله انه طالع وجاهز من بدرى وخد بعضه وطلع لعزه ولما طلع عزه كانت مواربه الباب وعبد القادر دخل لقى عزه فى أجمل صوره وحضنها وهى كمان مستسلمه زى اى ست خاينه ورخيصه وغداره
عزه : انا جهزت حتته أكله وعصير إنما هيعجبك يا حبيبى
عبد القادر : انا مش جعان انا عاوزك انتى يا حبيبتى بس ممكن نشرب عصير وعزه وهى داخله المطبخ عبد القادر كان مجنون عليها وقالها انا هجيب العصير اسبقى ع اوضه النوم ودخل جاب العصير وجرى على اوضه النوم وشرب من العصير وكمان عزه شربت العصير وكانت فرحانه وعبد القادر طاير بيها وشالها ونيمها على السرير ونامت فى حضن عشيقها وعلى سرير ومكان الراجل الطيب اللى أداها كل حاجه وائتمنها على فلوسه وأولاده عبدالله الطيب…. وهى خاينه ورخيصه… وهى فى حضن عبد القادر… باب اوضه النوم اتفتح عليهم وعزه قالت وصوتها وعنيها مرعوبه عمرو…….

رواية حماتي بالوراثه بقلم كوكي سامح

الفصل الثانى عشر

وعزه فى حضن عشيقها باب الاوضه اتفتح وعزه بصت وعنيها كلها رعب وخوف وقالت عمرو….

عمرو: ايوه عمرو يا خاينه يا رخيصه يلى مطمرش فيكى عيش وملح الراجل الطيب اللى سممتيه انا مش هسيبك
وعزه بتحاول تقوم من السرير وتغطى نفسها وقالت يا عمرو افهمنى وغمزت لعبد القادر بخبث وعبد القادر قام بسرعه ومسك عمرو وابتدى يخنقه وعزه قامت ومسكت عمرو من ايده وعبد القادر بيخنقه اوبااااا دخل محمد وجرى على عمرو ومعاه اخواته البنات وكمان رضوى

عبد القادر : ايه ده يا نهار اسود وقام وحاول يجرى ومحمد مسكه وقالوا تعالى يا كلب انت فاكر نفسك هتهرب مننا لأ
وعزه ابتدت تتكلم بجنون لأنها عرفت انهم اتكشفوا واتفضحت قدامهم وجريت على محمد وقالت محمد يا قلب امك الحقنى شوفت عمرو عمل فيه ايه بيلبسنى تهمه وعمل ليه فخ انا طول عمرى بقول انه بيكهرنى
محمد : اوعى ايدك يا كدابه يا خاينه انا طول عمرى بحبك وكنت بعتبرك امى واكتر ودلوقتى شوفتك على حقيقتك يا خاينه يا قاتله مش كفايه سممتى ابويا الراجل الطيب يا شيخه حرام عليكى ده كان كلامك أوامر وبتتفذ ابعدى عنى يا كدابه
عزه : عمرو عملى الفخ ده علشان بيكرهنى
محمد : بجد طيب وده ايه
عزه : ده تليفون
ومحمد فتح التليفون وفتح الواتس المتهكر وشافت كل كلمه بينها وبين عبد القادر

محمد : غطى نفسك واسترى نفسك البوليس فالسكه علشان تغورى من هنا يا خاينه
عبد القادر : انا مليش دعوه انا بحبها وهى اللى كانت بتقولى على كل حاجه

عمرو : ومين اشترى السم يا روح امك يا قاتل انت زيك زيها كلب
مديحه : انا مش مصدقه نفسى بجد انتى ماما عزه 😭
سها : معقول 😭
سهام : منك لله الحمد لله ان ربنا كشف لينا كل حاجه فالوقت المناسب
محمد : البركه فى عمرو وعلا
عمرو : رضوى اللى اكتشفت الخاينه دى وقالت لعلا وعلا لما خافت على رضوى قالت لها مش هتتدخل بس انا عرفت كل حاجه وخدت التليفون منها وراقبت الكلبه دى
رضوى : الحمد لله

عمرو واقف قصاد عزه وقالها عملتى فى امى ايه اللى يخلى ابويا يقول عليها ماتت ونعيش محرومين منها لحد دلوقت
عزه : امكم ماتت
رضوى : كدابه
عمرو : انطقى قولى عملتى فى امى ايه
عزه : انا هقول بس بلاش سجن ابوس أيديكم
عمرو : قولى
عزه : انا كنت خياطه وامينه كان لبسها بتفصله عندى انا شوفتها ست حلوه وجوزها مهنيها كنت بحسدها واحقد عليها علشان مش ناقصها حاجه وعبد القادر كان عشيقى وكان عالطول عندى اصل انا كنت وحدانيه لوحدى مليش حد وفى يوم أمينه جت وهو موجود ولما شافها لابسه دهب وغنيه قالى نلعب عليها لعبه وأولها اتصاحب عليها وفعلا ابتديت اتصاحب عليها ودخلت بيتها ومن وراها كنت بشكك عبدالله فى أخلاقها بس هو مش مصدق بس عبد القادر قالى خلى أمينه تيجى عندك البيت وقالى ومش عاوزك معانا وفعلا

اتصلت بأمينه وقولتلها تيجى تقيس فستانها الجديد وهى فعلا وصلت وانا كنت لوحدى ودخلت تقيس الفستان وعبد القادر قالى هى دخلت الاوضه أمشى انتى بسرعه وعبد

القادر اتصل بعبدالله وقاله ان أمينه بتخونوا وبتستغل شقه الخياطه صاحبتها من غير علمها وفعلا عبدالله جرى على شقتى وانا طبعا مكنتش هناك وماشيه عالخطه زى ما عبد القادر قالى ولما راح الشقه عبد القادر كان بيتهجم على أمينه فالاوضه ولما شاف عبدالله عبد القادر جرى وفضلت أمينه تعيط وقالت إنها مظلومه وانا وصلت لقيت عبدالله وامينه بس أمينه جريت عليه وقالت ابوس ايدك مش انا كنت جايه علشان اخد فستانى ده وانتى اللى اتصلتى بيه انا بقى بهدلتها وكدبتها وعبدالله صدق دموعى وخد أمينه وروح بيها البيت وبعد اسبوع عرفت انها ولعت فى نفسها فالشقه بس مماتتش بس عبدالله فضحها وفضح اخوها وقال انها ماتت وكمان ست خاينه وفهمكوا انها ماتت وست وخانته ومشيت ومعرفش عنها حاجه واخوها وأهلها طردوها وبعدها بأسبوع وعبدالله ما اخدش عزاها وطلب منى الجواز واتجوزتا
محمد : ظلم ظلم ظلم الله يخربيتك يا ملعونه ومسك عزه وخنقها

عمرو : لأ دى متستهلش توسخ ايدك بيها
محمد : يا ترى فين امى
رضوى : فالترب انا شوفتها عايشه هناك
عزه : اه اه يا بطنى الحقووونى بمووت وبصت لعبد القادر وقالت انت سممتنى يا كلب اه اااااه آآآآآآه
وعزه مدت ايدها علشان تمسك عبد القادر وملحقتس وقعت عالأرض وبطنها بتتقطع وقالت سممتنى يا كلب وحاولت تقوم وقالت مش هسيبك وفقدت الوعى
عمرو : ايه اللى بيحصل ده سم ايه
وعمرو قعد على الأرض وقال دى ماتت
محمد : البوليس وصل

وفعلا البوليس وصل وكان عمرو مسجل كل اللى حصل وواخد اذن من النيابه ومركب كاميرات فى كل الشقه وحتى الحمام والمطبخ وبفتح الكاميرات تبين ان عبد القادر حط السم لعزه فالعصير وسم مميت من اقوى انواع السم وهو نفس السم اللى اتقتل بيه عبدالله وتبين من التحريات ان عبد القادر كان بينتقم من عزه بعد ما خد منها مبلغ كبير وطلب منها تانى وهى مرضيتش وزعقت معاه وكمان طلب الجواز منها وهى قالت لا مش هتتجوز وهيفضل طول عمره سواق عندها وقال ان كان هيتهم عمرو بقتلها علشان بيكرهها وكان هيسرق دهبها وفلوسها كلها ويهرب وبسؤاله عن قتل عبدالله قال عزه حطت السم فى سرنجه وحقنت علبه العصير اللى كانت موجود ورمت الباقى علشان ياخد العلبه المحقونه بالسم المميت وعبد القادر اتهم فى قتل عزه عمد وكمان اشتراكه فى قتل عبدالله واخد حكم بالإعدام…
وعزه ماتت وادفنت فى مدافن الصدقه زيها زى اى حد مجهووول وملوش هويه

عمرو ومحمد والبنات رضوى اخدتهم وراحت لحد الترب وسألت على أمينه التربى قال إنها مبتقومش من على قبر عبدالله ليل ونهار قاعده عنده ورضوى دخلت وقال ماما أمينه ازيك
أمينه : تعالى اتأخرتى عليه ليه يا بنتى
سها : انا بنتك يا ماما 😭
سهام : وانا كمان بنتك يا أمى 😒😭
مديحه : ماما حبيبتى 😭
محمد : ماما ماما 😭😭😭😭
عمرو : انا عمرو يا ماما
أمينه : ولادى تعالوا فى حضنى انا كنت مستنيه اليوم ده يوم انتوا اللى تسألوا عليه وتعرفوا انى بريئه يا حبايب قلب انا عمرى ما نسيتكوا ولا نسيت عبدالله علشان اتظلم زى انا انا اللى دخلت صاحبتى بيتى وامنت ليها وعملت ليه فخ وسخ وخلتنى فى نظر جوزى ست خاينه معندهاش شرف ومكفهاش كمان قالت لولادى انى خاينه حسبى الله ونعم الوكيل تعالوا فى حضنى

محمد : يا حبيبتى يا ماما يا حبيبتى انا فرحان انى شوفتك انتى تاج راسى يا أمى
عمرو : بحبك يا أمى وحتى وانت مش معانا بس كنتى فى قلبى وعزه ماتت مسمومه زى بابا بالظبط ربنا عقابها
سها : سامحينى يا ماما
سهام : ابوس ايدك سامحينى
مديحه : اه اه يا أمى حضنك أغلى حاجه
أمينه : اسامحكم على ايه انتم مالكوش ذنب العيب فيا وفى الملعونه عزه والحمد لله انا دعيت ربنا ودعوه المظلوم لا ترد 🙏❤️
محمد : قومى معانا

والبنات ومحمد وعمرو ورضوى خدوا أمينه على بيتها واول ما أمينه دخلت البيت قالت بيتى ومملكتى انا عشت هنا أجمل سنين عمرى يمكن مش كتير بس كانت أجمل سنين خلفت ولادى وبعدت عنهم وسابتهم غصب عنى طلعت مفضوحه قدام نفسى وجوزى واهلى جوزى مات وميعرفش انى بريئه واخويا مات وبرضه ميعرفش انى بريئه بس ربنا موجود ودلوقتى ولادى معايا واحفادى وراجعه بيتى مرفوعه الراس وربنا اخد حقى من الخاين والخاينه فعلا ربنا كبير 😍
وبعد مرور شهرين رضوى عاشت مع محمد واتغير تماما وطبعا عرفت ان عزه كانت مسيطره عليه مش علشان مرات اب لأ لأنها مش كويسه وخاينه
وابتدت التجهيزات تتم لفرح عمرو وعلا وبعد مرور اسبوعين واليوم بالتحديد كان فرح عمرو وعملوه فى قاعه كبيره وكانت علا زى القمر وعمرو كان عريس جميل وكان حواليه امه واخواته وكان الكل فرحان

رضوى : محمد محمد
محمد : فى حاجه يا حبيبتى
رضوى: اه فى
محمد : بقولك العروسه والعريس خلاص هيمشوا يلا وبعدين نتكلم
وكلهم ركبوا عربياتهم وامينه ركبت مع عمرو وعلا ووصلوا لحد البيت بس عمرو مخدش تمليك بره قعد مع امه فى نفس العماره وطبعا هو كان هياخد تمليك علشان عزه وربنا جمعهم ع خير
أمينه : الف مبروك يا حبايب قلبى ربنا يرزقكم الذريه الصالحه وعقبالك يا رضوى
رضوى : يا ماما ما انا عماله من الصبح اققول لمحمد عاوزاك وهو مشغول وعندى خبرين
أمينه : عاوزاه فى ايه بقى
محمد : قولى يا حبيبتى

رضوى قالت قدام الكل الخبر الاول انها عرفت انها حامل واتأكدت والكل بارك لرضوى
محمد : بجد الف مبروك يا حبيبتى وايه الخبر التانى
رضوى : اسأل العروسه
محمد : قولى يا عروسه اخويا
علا : المحامى كلمنى وقال إن عبد القادر اتعدم 😍
محمد وعمرو : ياه الحمد الله
مديحه : الحمد لله يا ماما
سها وسهام : ربنا اخد حقك يا ماما .

عمرو : علا يلا يا حبيبتى ادخلى شقتك
علا : ثوانى 😊😉
علا ورضوى حضنوا أمينه اوى 😍 ورضوى قالت ايوه انتى ماما وحماتى اللى بجد مش حماتى بالوارثه ❤️🥰
وانتهت القصه 😍
مفيش اسوء من الظلم والخيانه والغدر بس ربنا قال دعوه المظلوم لا ترد وان ربك يمهل ولا يهمل وفعلا ربنا بياخد الحق حتى لو بعد السنين..
ياريت تخلوا بالكم من الطيبه الزياده وخبث البشر مش كل حد واى حد نثق فيه من كلمتين حلوين الثقه دى بتيجى بعد مواقف وسنين علشان اقول دى صاحبتى ودى حبيبتى وفى حاجه مش كل مرات اب وحشه لأ طبعا فى ناس انا شوفتها بتربى اولاد جوزها والله احسن تربيه لو امهم مش هتعمل كده وربنا يبارك فيها
ياريت نخلى بالنا من عين الحاسد والحاقد ودايما نذكر ربنا علشان يبعد عنا شر خلقه 🙏
وياريت مننساش الأيه دى ويمكرون ويمكر الله والله خير الماكرين ✋
ربنا يسعدكم جمعيا ويفرح قلوبكم منتظره تعليقاتكم الجميله برأيكم في القصه في الاسفل

ما مدى فائدة هذا المنشور؟

انقر على نجمة لتقييمه!

متوسط ​​تقييم 3.7 / 5. عدد الأصوات: 15

لا أصوات حتى الآن! كن أول من يقيم هذا المنشور.

As you found this post useful...

Follow us on social media!

Article Tags:
banner
http://www.reel-story.com

عن الموقع ورسالتنا القصة والرواية هي فن من الفنون الإنسانية الرائعة التي تروي القصص الخيالية والواقعية من أجل العبرة والعظة والتعلّم منها دائماً، فهيا بنا سوياً لهذه الرحلة الرائعة في بحر الأدب العربى والتعرف أكثر على الروايات الشهيرة التي اخترناها. سواء كنا نحب أن نقرأها أو نسمعها ..أو نشاهدها، فنحن نحب القصص. منذ فجر التاريخ عندما كان البشر يتجمعون حول النيران، إلى عصر النتفلكس، نحن نحب القصص.. قد يبدو الأمر مجرد تسلية وتزجية للوقت، لكن أي شيء منتشر إنسانيا لهذه الدرجة، وعبر التاريخ، لا بد أن يرتبط بشيء أكثر جوهرية من مجرد التسلية

اترك تعليقاً

لن يتم نشر عنوان بريدك الإلكتروني.

The maximum upload file size: 512 ميغابايت. You can upload: image, audio, video, document, text, other. Links to YouTube, Facebook, Twitter and other services inserted in the comment text will be automatically embedded. Drop file here

Reel-Story © 2020 | Established in 2019 Privacy Policy I Terms & Conditions I Advertise I Contact