1,310 اجمالى المشاهدات,  12 اليوم

رواية الجثة الرابعه بقلم زهور جمال الدين

مقدمة

🌱المقدمه 🌱

فى شقه فى وحدة من عمارات المدينه …سنه 2008

حاست غِزلان على روحها .. وضمت الحوش كله وخشت للمطبخ طلعت الماعين اللى ماتبيهمش وخلت غير القنينات
-غِزلان / مبشر ..تعالى نزلهم الكراتين هادو
-مبشر من الصالة / كمليهم كلهم وانزلهم مرة وحدة
-غِزلان / لا انا كملت خلاص ..تعالى
جى مبشر من الصالة / هاتى وينهم
-غِزلان / سلملى اللى باله واسع معاى
-مبشر يضحك / حتى انتى غزلان اللى كانا ماخديتهاش رانى هبلت 😁
قامت غزلان السطل اللى بتسيق بيه وحطاته قدام الشيشمه تعبى فى الميه/ يااااربي المرة هادى اتم البيعه
-مبشر/ لتوة نقولو 90% انباعت ..لكن الدولاب نضفيه كوووويس الراجل صاحبي
-عزلان/ انا والله ماراضيه نخليلهم دولاب كوجينتى …
وتضحك / مكبدة عليه هلبا
بدى مبشر اينزل فى الكراتين لين كملهم ……وركب يغسل فى ايديه …
-غزلان / متعطلش ..بيش تقعد مع الصغار بتفوت عليا اختك ليلى منمشو للعرس
-مبشر/ مزال الوقت …المغرب نكون معاهم
-غزلان / نحبك
-حضنها وباسها/ نموووت فيك
وطلع مبشر …وخشت غزلان تشبح فصغارها .. لقت عبدالبارى ولدها راقد فسريره .. ويمنى راقده عالارض تلعب بالالعاب .. قامتها غزلان وحطتها فى سريرها وغطتها وباست عليها وهيا مبتسمه وطلعت ..
خشت للحمام دارت دوش .. وطلعت لدار نومها …مشطت شعرها وخلاته مفتوح بيش يجف لانه ناعم مش محتاج سشوار بيش بتمشى لحفلة بنت خالة راجلها …
تعبت من ضمان الحوش ..اتكت على سريرها ..خداها النوم ورقدت .. وهيا راقده حست بحد يمسد على شعرها
-ابتسمت/ حبيبي روحت ….
وقاعده اليد تمس فشعرها وتخلل فى الشعرات …
-غزلان / حبيبي خلاص عااااد
فتحت عيونها لقت الستار اللى قدام باب البلكونه يتحرك لفوق من الريح …
تعبانه وتبى ترقد / حبيبي صكر البلكونه كيف سيقتها
فتحت عيونها ..راجلها مايردش عليها بكل
-غزلان / مبشر .. مبشر …
نزلت من سريرها .. طلعت للصالة …انفتح باب الحوش..خش مبشر ..
-غزلان/ مبشر انت هنايا 😱😱
-يحط فى كيسه الخبزة / نعم
-موجه ايدها عالدار / امالا منو اللى فى البلكونه ..

خش مبشر يجرى للدار وغزلان وراه …مشى للستار اللى قدام باب البلكونه قامه لقى الباب مصكر ..
تلفتلها / البلكونه مش مفتوحه …
قعمزت غزلان عالسرير وهيا مرعوبه / انا راقده وحد يمس فى شعرى ويحرك فيه نحسابك انت وبعدها طلع من البلكونه
-حضنها / ياروحى قلتلك نرفعك مرة ثانيه للحضرة وانتى شى مصكرة راسك
-غزلان / شفت اللى صار المرة اللى فاتت واحنا ماشيين لزليتن .. السيارة قريب انقلبت بينا لولا لطف ربي ..حبيبي المسافه بعيدة
-مبشر/ والله زمان صاحبي اخته جلستين ولا ثلاثه حضرة وبخور تعالجت …
-غزلان / اخر مرة شفتنى قريب متت وانا نرقص قريب نوصل للسقف …اسمع انا نبى نمشى لشيوخ القران
-مبشر/ حاضر.. نرفعك وين ماتبى
-غزلان / رد بالك تتخلى عليا
-مبشر/ نتخلى على روحى ومانتخلاش عليك …
وتنحنح / قتلك الشقه
-غزلان / خيرها
-مبشر/ ماصارش من بيعتها
-غمضت عيونها / كنت متاكدة بيصير هكى زى كل مرة
وقامت راسها شبحتله / اسمع.. احنا لازم نزبطو الشقه من كان ساكن فيها قبلنا !!

خش عبدالباري ولدها مخلوع / ماما ..يا ماما تعالى اجرى
-وقف / خيركم شن فى
-عبدالبارى/ يمنى مادة يدها كأن حد رافعها .. مشت للبلكونه ركبت عالحاشيه بطيح روحها
-غزلان / غبارتى ..بنتى حيه عليا
وطلعت تجرى هيا ومبشر لدار الصغار ..

غزلان ومبشر متزوجين عن حب ..كانو يقرو مع بعضهم فى نفس الكليه .. اتزوجو سنه 2000.. جابو عبد البارى ويمنى
عبدالبارى مواليد 2001 ويمنى 2002…

هادى المقدمه … لو عجبتكم القصه.. انكملوها …
نحبككككم ❤❤

رواية الجثة الرابعه بقلم زهور جمال الدين

🌱الحلقه الاولى 🌱

مشت غزلان تجرى لدار نوم صغارها .. تلاقى بنتها راقدة على سريرها …
خش مبشر قام بنته بين ايديه / يمنى ..يمنى فيقى
-فتحت يمنى عيونها / خيرك بابا
-حضنها / لااا مافى شى يابابا .. ارقدى
طلعت غزلان وفى يدها ولدها عبدالباري / ليش ترعش فيا يا ماما .. عيب هكى ولا …هدا اسمه كدب ..شن علمتك انا
-عبدالبارى / والله ياماما الا شفتها راكبه على حاشيه البلكونه وتبى اطيح روحها
-طلع مبشر/ خش للدار وارقد حبيبي القايله قريب اتم
-خش عبدالبارى / باهى
طلعو غزلان ومبشر للصالة قعمزو عالصالون ..
-مبشر/ نوضى وتى روحك معش وقت
-غزلان/وراس حبيبي مافيا عظمه صحيحه وماقادرة نمشى
-مبشر / لاااا لازم تمشى للعرس ..نجلا بنت خالتى وفى نفس الوقت اختى فى الرضاعه .. وماصدقنا جاها النصيب
-اتكت فى حضنه / ليا عام بنفس الطريقه .. من يوم سكنه هالشقه وانا لا ليلى ليل ولا نهار نهار .. حبيبي خيرك مش حاس بيا ولا شنو
-حط ايديه على ضهرها وحضنها بقوة / وكان ماحسيتش بيك انتى بمن بنحس … انا مانبيكش تربطى اللى صاير معاك بسكنتنا فى الشقه هادى
-قامت راسها / فى حوشنا الاول عمرها ماصارتلى حاجه ..
فى يوم وليله بعنا شقتنا ورحلنا تقول من ينادى فينا
-وقف مبشر/ نوضى نخشو لدارنا …
-حطت يدها فيده وابتسمت / هيا
خشو لدارهم .. دلعها مبشر شوى نساها الخوف والحالة اللى كانت فيها .. خشت دوشت وبدت اتجهز فى نفسها المغرب قريب
________________________________________

جهزت غزلان نفسها ولبست عبايتها لان حماتها ليلى اتصلت بالارضى وقالتلها انها بتطلع عشرة دقايق ويوصلوها …
-مبشر/ اهو مصطفى نسيبي يضرب فى الكلاكس
-غزلان / انا واتيه هى
فتح مبشر الباب/ يمنى حبيبتى نوصل ماما لسيارة عمتك ونركب باهى ردى بالك
-يمنى/ حاضر بابا
نزلو مبشر وغزلان ركبها سيارة حماتها ليلى .. وصكر الباب وركب فوق للصغار بيش يقعد معاهم …

خشو ليلى وغزلان للصالة .. كانت صالة صغيرة.. وقتها فى طرابلس يادوبك صالة ولا صالتين بس …حولو عباياتهم وخشو سلمو على خالتهم صالحه وهنوها وخدو شوكلاته وقعمزو عالطاولة ..
-ليلى/ خسارة اختى منيرة مش جايه
-غزلان/ بلحقه!!.. ليش مش قالت بنجى
-ليلى/ جتها عزوزتها وحماتها تحشمت تقوللهم عرس بنت خالتى ومنمشى
-غزلان / لا واجب …
وبدت الحفلة والزمزامات تخبط … ومدو الروزاطه والعبمبر
وناضت ليلى ترقص مع بنات خالتها .. وغزلان من عادتها رزينه ماتنوضش….
الحفله عامرة والزمزامات تخبط وطال الوقت ومدو العشى وتعشو .. هلبا ناس روحو .. لكن ليلى وغزلان من العيلة قعدو بيشوفو العريس .. رجعت ليلى ترقص عالزمزامات الشوط الاخير مع بنات خالتها .. وغزلان مقعمزة و تشوف فى عزوز مقعمزة مع زوز من اقارب مبشر وتشبحلها من بعيد …غزلان ماعطتش اهتمام بالموضوع …تلفتت للى يرقصو ومعش شبحتلها …
وهيا مقعمزة جت العزوزة وقفت جنبها تسلم عليها / اهلين يا غزلان شن حالك …
مدت غزلان يدها بتسلم ..لكن المراة ما سلمتش عليها قعمزت طول
-غزلان مستغربه/ الحمدلله الله يسلمك ..لكن والله ماعرفتك
-المراة/ انا عمتك هنية نقرب لى مبشر ..
تلفتت غزلان للطاولة اللى كانت مقعمزة فيها العزوز وتشبح فى قريبات مبشر يصفقو مع الزمزامات1

فى حوش مبشر …

مبشر مقعمز فالصالة … فاتح التلفزيون يتفرج على مبارة
جاه عبدالبارى / بابا يمنى تلعب بمكياج ماما راهو
-مبشر لاهى فى المبارة / اطلعو من دارى وخشو لداركم بسرعه …
وعيونه فالتلفزيون / قوللها قالك بابا اطلعى ولا نهارك راهو
-عبدالبارى/ باهى
ومشى خش لدار امه ….
ومبشر لاهى فى المبارة …
بعد عشرة دقايق …الصغار دايرين دوشه فى دارهم والصوت طالع حالة
-مبشر/ يمنى اهفتو بلا دوشه
-يمنى من الدار/ باهى يا بابا ..
وهوا يتفرج والدوشه زادت ..اخرها بدو ايكرو فى السرير من مكانه
-مبشر/ عبدالبارررررى
-عبدالبارى من الدار/ مندوشوش يا بابا
-مبشر / هدا كله مادوشوش .. اهفتو ….
تم الشوط الاول من المبارة ..وقف مبشر يبي يسكتهم ويضم
اللى حوسوه … مشى للدار لقى الباب مردود …فتحه يلاقى الدار مضمومه وهدوءءءء والصغار مهناش
-مبشر جمد فمكانه / يمنىىىىى انتو وين
انخلعو الصغار من عيطه وطلعو يجرو فم الباب
-يمنى/ احنا فى دار ماما
طلع مبشر يجرى قامهم الزوز فى غمره / انتو وين كنتو
..وشنو الى دايراته فى وجهك يا يمنى
-عبدالبارى/ من بكرى قلتلك يمنى فى دار ماما وخشيت انا معاها ومعش طلعنا
حطهم عالارض/ كيييييف .. من بكرى فى دار ماما …
مشى يجرى لدارهم لقى يرغانات الصغار محوسات
مبشر انهار/ انتووو شكوون ..انتو منو وشنو تبو مننا
الصغار يرعشو ورا بوهم / منهما يا بابا …

خداهم من ايديهم / انتو معش عندكم قعاد فالدار هادى
خداهم ومشى يجرى لداره يلاقى اليرغان محوس…عرف انه مفيش فايدة اللى وراه لاحقه لكل مكان
-يمنى/ خيرك يا بابا خوفتنا
-نزل مبشر وغير لون وجهه / لاااا يابابا .. نحساب ماما طالعه ومخليه الحوش حايس ..فقعدت انكشخ
-عبدالبارى / لكن انت تكلم فى ناس وتقوللهم انتو منو
مبشر معش عرف شن يقول ..خداهم من ايديهم وخشو للمطبخ ..عطاهم عشاهم …
-مبشر/ تعشو وخلى نرقدكم فى مكاناتكم قبل ما يبدا الشوط الثانى …
وبالفعل كلو سندوتشاتهم وخشو فرشو سنونهم وحطهم فمكانانهم/ اسمعو مش لازم تحكو لماما اللى صار وكيف انا قعدت نكشخ
-عبدالبارى / ليش
-مبشر / منغير ليش .. هكى وخلاص
-يمنى/ خاطر ماتبيش ماما تزعل منك ولا
-مبشر/ ايووووه سلم بنتى الفالحه …
غطاهم وصكر الباب وطلع للصالة ايخمم/ اول مرة نسمع حاجه بودانى ..ديما غزلان هيا اللى تحكيلى ..
حط راسه عالصالون / انا متاكدة انى سمعت دوشه مش تخيل بس
_______________________________________

فى صاله الفرح
غزلان مقعمزة عالطاولة وجنبها عمتك هنيه…بهداكة الوجه الطيب والحجاب المساوى والابتسامه الحلوة
-هنيه / شنحال امك وبوك
-غزلان / الحمدلله الله يسعدك ويهنيك فخيار الخير
-هنيه / قتلك
-غزلان حستها تبى تقول حاجه / نعم يا خالتى
-هنيه / حسيتك مش على بعضك خيرك فى حاجه
-غزلان استغربت/ لااا الحمد لله
-هنيه / يابنيتى اللى بيغرس الزيتون مايصبش عليه الميه المالحه ..تتخلط الانسال والدم
-غزلان / مافهمتكش راهو .. انا عمرى ما غرست شجرة زيتون
-هنيه / القراب منك ردى بالك منهم .. والبعاد عليك ماتنسيهمش
-غزلان ابتسمت / هادى فزورة ولا شنو اقرب شخص ليا راجلى مبشر ..حنون عليا وهوا خوى وبوى وامى كيف منرد بالى منه انا ماعنديش فيه شكية
-هنيه/ ماقلتش القراب فالروح …نقصد القراب فالمسافه
..عينك منهم
-غزلان / امالا كلام جاب كلام يا خالتى .. انامش مرتاحه
-قصت عليها / ماهو قتلك
-غزلان / غير خلى نكملك
-هنيه / عارفه كل شى ..سكنتى فى شقتك ليك عام توة .. وصاير فيك ما صاير
-غزلان انصدمت / وانتى كيف عرفتى ..مكشوف عليك
ليلى تشوف فى غزلان مقعمزة بروحها وتتكلم زى المهبولة ما معاها حد …
تنادى عليها بعيد / غزلان تعالى .. خيرك مقعمزة رروحك .. تعالى ارقصى
-غزلان/ اهو مقعمزة معاى خالتى هنيه تو نجى
-ليلى تعلى فى صوتها / شن تقوووولى
-غزلان تعيط / قلتلك معاى خالتى هنيه تو نجيك
-ليلى / والله ماسمعتك .. المهم تعالى
ومشت ولت لبنات خالتها ترقص معاهم …
هنيه مدت يدها فيها حاجه ….
-غزلان / هدا شنو
-هنيه / هادى حنتيته …
ودفلت فيها ….وصكرتها ….
-هنيه / كانك حسيتى بحد قريب عليك بخريها طول يهرب
-غزلان خدتها وحطتها فى شنطة يدها / ياحليلى رعشت مع بعضى …نحس فيك كأنك معاى فالحوش …
-هنيه / ربي يحفظك منهم .. المسلم ليه هلبا حلول.. المشكلة فى الكافر
-غزلان / اعود بالله من الشيطان الرجيم
-وقفت عمتك هنيه / توة خلى نرجع لمكانى
-غزلان/ خليك نبى نحكيلك اللى يصير معاى
-هنيه / لا خلاص انتى بتروحى توة .. وتو نتلاقو مرة ثانيه
-غزلان / احنا مزال مش مروحين خليك ..
وتشبحلها متأثرة / سبحان الله انتى شن جابك ليا الليله بيش نحكيلكونفضفضلك اللى فى قلبى
-هنيه / عمل خير ترا وين درتيه ونسيتيه قعدلك بيش جابنى ربي ليك ..
ومشت / هيا مستادنك ….

جتها ليلى حماتها تجرى/ نوضى يا غزلان .. مصطفى بعتلى من برة جانا توة
-غزلان مصدومه / قصدك بنروحو .. مش قلتى بنشوفو العريس
-ليلى تلبس فى عبايتها / جارتى اللى مخليا عندها صغارى سلفها دار حادث وتوفى .. جانى بيش نمشو بسرعه ناخدو منهم الصغار
-غزلان / وخيره مامشاش بروحه خداهم وجابهم معاه توة ولا شدهم
-اتساوى فى وشاحها / تحسابى الناس كلها زى خوى مبشر ايشدو عادى
تلفتت غزلان لعمتك هنيه وتاكدت انها مكشوف عليها .. امالا كيف عرفت انهم بيروحو …
طلعو غزلان وليلى من الصالة ..
تلفتت غزلان لى وين مقعمزة عمتك هنيه / تصبحو على خير
-البنات / تصبحى على خير
-غزلان / بالسلامه خالتى هنيه
-عمتك هنيه / الله يسلمك ويهنيك بنيتى مع السلامه
مشت غزلان ..
والبنات اللى مقعمزات فالطاولة يضحكو / هادى على منو تسلم …ومن هنيه هادى 😁
وهما طالعين شادين باكوات الحلويات ومدتلهم اخت العروسه بكلاوة …. غزلان من كثر مايديها معبيات انفتحت شنطتها وطاحت مرايتها وروجها والحنتيته …قامت الروج والمرايه وانتبهتش للحنتيته … طلعو من الصالة
-غزلان / خيرك ماسلمتيش على خالتى هنيه
-ليلى / ياوخيتى نرعش باللى فيا غير من خالتك هنيه هادى
-غزلان / وانت ليش ترعشى تعرفيهم
-ليلى/ نعرف عزوزتها وسلفها اللى توفى صغير يا نارى
وركبو السيارة
-ليلى / كيف صار
-مصطفى / اتصلو بى حوش فتحى صاحبي ماهو نلبعو فالكارطه عنده الليله قالوله خو عزيز جارى دار حادث وتوفى
-ليلى / وشن درتو
-مصطفى / شن بنديرو هوا طار لخوه فمكان الحادث وانا جيتك انتى بيش ناخدو من المراة الصغار منقدرش نطق عليها بروحى
-ليلى/ خير مادرت
_______________________________________

وصلت سيارة مصطفى قدام العمارة
-ليلى / وراس اوخيتى تسامحينا
-غزلان / لا والله عادى ..اهو شقتى فالدور الثانى مش بعيدة تو نركب فيسع
-ليلى / باهى تصبحى على خير
-غزلان / ليلتك سغيدة
وتلفتت بتخش للعمارة …وبالفعل خشت ..قدام العمارة فى ست درجات تركبيهم بيش تخشى للممر ….
وبالفعل ركبت منهم خشت من الباب تلاقى مراة لابسه عبايه سودة وفاتحة شعرها … وتنصدم بأنها عمتك هنية !!!!!

-غزلان تفاجئت/ خالتى هنيه …مش خليتك فى العرس
وبعتالى خيرك معريه شعرك
-هنيه قامت يديها الزوز / زير يازير طيحها فالبير …عفص يا عفص طيحها فالقفص .. زنتيته يا زنتيته حركى الحنتيته
-غزلان ترعش/ ووك عليا …انتى شن قاعدة تقولى …شن جاك يا خالتى توة كنتى طيبه …
فتحت عيونها لين جحضتهم/ وين الحنتيته …
ومدت يدها زى يد الديب/ هاتى الشنطه ….
خدتها فتشتها مالقتش الحنتيته ….
رجع شكلها الاول الطيب / بنيتى وين حطيتى الحنتيته مهناش فى شنطك
-غزلان بدت تنقز / انتى سحارة الله لاتربحك …مبشر ….
يااااامبشر وينك تعالالى
-طارت هنيه فالهوا/ الحنتيته طاحت منها … الجثه الرابعه وصلت .. لكن مش ح ادوخ نلموها حتى واعيه ….
طلعو ثلاث نساوين من وراها لابسين نفس العبايات السود
ومشو لى غزلان شدوها من ايديها الزوز وهيا تعيط ولا من سمعها..
دخلوها للمستراح الدخلانى متع العمارة ….تلاقى راجل طويل واقف شكله زى السحار المغربي متع الرسوم داير لحيه نازلة لوطا وشاد فى يده بندير …جوه خمس رجاله وقفو جنبه
-هنيه / ابدى بالحضرة يا على ….
– على/ وين سيدك
-هنيه/ حتى انا نقدرها …سيدى لاهى
وهادوكا النساوين شادينها وهيا تمولج وتعيط وتنادر فى مبشر / يامبشر وينك …يانااااااس ياناس تعالولى ياعمى صالح تربح نوض من نومك ( صالح البواب)
والنساوين اللى شادينه كل مرة وحدة منهم تعطيها ضربه بيش تسكت …
وبدى على يضرب فالبندير والرجاله اللى معاه يضربو حتى هما ….
وبدو يغنو / الله الله الله الله الله الله
رخوها النساوين ومعش تندري على روحها ترقص زى الطير المدبوح .. طاح وشاحها وهيا تنقز مش ترقص
والبدير يضرب والصوت تعلى / الله الله .. الله الله الله …
الطقه زادت .. وهيا معش تندرى على روحها ….
خش شخص لونه قريب الازرق …شاد فى يد خروف ….وفى اليد الثانيه كاس فيه دم
-هنيه/ يندبح عند رجليها يا قزون
-القزون عطى لى هنيه الكاس و تلفتت للنساوين / شدوهالى
وجاب الخروف عند رجلين غزلان وهيا تنقز …شدوها النساوين …ودبح القزون هداكه الخروف وحطت هنيه الكاس عالارض وخدت دم الخروف وبدت تلبز فى وجهه غزلان بالدم ….
وتلفتت لى على / على البندير يا على
– على يضرب فالندير/ الله الله الله الله
-هنيه / نزل الدبيحه يا قزون …
وياخد غزلان من كتافها ويرقدها عالوطا … ويطلع موس لمعته تضرب فى عيون غزلان …زى اللى ولالها عقلها …
وبدت اتمتم /بسم الله الرحمن الرحين.. الله لا اله الا هوا
…الحى القيوم….
وعلت صوتها / لا تاخده سنه ولانوووووم
قام القزون يده / حرقتنى الكلبه
-تحول وجهه هنيه لى شيطان/ ادبح ياقزوووووووون هادى الصقيطه الرابعه كملنا خلاص
-غزلان / له ما فى السماوات وما فى الارض ..من دا الدى
يشفع عنده الابادنه .. وسع كرسيه السموات والارض وسع كرسيه السموات والارض وسع كرسيه السموات والارض
وقف ضرب البندير نهائى
-القزون يعيط/ عيوووونى
-هنيه / حول يا خواف انا مسلمه …الدبيحه تجوزلى
-غزلان ترعش/ سلام قولمن رب رحيم سلام قول من رب رحيم …
-هنيه تعيط / يا قزون هات الموس …قزون وينك
مالقت حد فى المكان غيرها هيا وغزلان بس…
-هنيه / النجمه ماتكمل الا بيك .. السنه مازاللها شهر
…دمك لازم يتخلط فى هداكه الكاس اللى عالارض …2

ومشت للكاس خداته وطلعت من الباب واختفت نهائي
وطاحت غزلان دايخه ….

_______________________________________

طلع صالح من داره يلاقى مراة ملوحه …
-صالح/ يارسول الله حضر وجهك …هادى شكون
ومشالها يجرى شاف وجهها .. زبطها غزلان ..
-صالح حط وشاحها على شعرها /لا حول ولا قوة الا بالله
ركب يجرى لى مبشر طق عليه طق عليه وخبره على مرته
ونزلو يجرو …قامها مبشر بين ايديه يلقاها كلها دمايات
العجيب ان المكان كله نضيف هيا الوحيدة اللى الدم قاعد على وجهها …
ركبها مبشر الدروج وصالح راكب وراه وشاد شنطتها فى يده مركبهالها / غير شن صاير يا ولد عمى ومن ضاربها مخليها دمايات
خش بيها مبشر للحوش وكدلك صالح وراه حال فمه من اللى قاعد يشوف فيه …قعد واقف فى الصالة ومبشر خش بيها لدارها رقدها عالسرير وطلعله
-مبشر واضح متكنطى/ انت قداش ليك تخدم فى العمارة هادى
-صالح / قبل ماتجو انتو باسبوعين
-مبشر/ تعرف الناس اللى كانو ساكنين قبلنا فى الشقه
-صالح / لا والله ..اللى باعلك المكتب وانا حاضر.. لكن اصحاب الشقه منعرفهمش
-مبشر / منو كان يخدم قبلك
-صالح / واحد يقولوله غنوم
-مبشر/ ليبي
-صالح / لا افريقى
-مبشر/ تقدرتعرفلى مكانه توة وين
-صالح/اى نعم نقدر ماهو تابع نفس المكتب اللى جابنى هنايا
-مبشر/ امالا بالله عليك وعلى رحمه الوالدين نبيه ضرورى
-صالح / حاضر .. غير توة قولى العيلة خيرها ووين كانت ..
-حط يده على كتفه/ اللى شفته الليله يقعد بينى وبينك ومانلقاشى عند حد
-صالح يضحك فى ضحكه صفرا/ شنو تعرفنى نقال كلام ..الى صار هنايا مات هنايا
-مبشر/ باهى صحيت
-صالح / سلمك …
وتلفت طلع ومشى وراه مبشر صكر الباب وخش لى غزلان
مشى من الصالة خش دار النوم يلاقى غزلان وقفت ومشت قدام المرايه وتشهقها شهقه
-غزلان/ هييييييه غبارة شنو الدم اللى على وجهى هدا
-مبشر حاير/ قصدك ماكش عارفه منين
-غزلان / لاااا .. حيه عليا هدا شنو ومنين جانى
-مبشر واضح الغضب على وجهه/ خيره ليلى ومصطفى ما وصلوكش للشقه
-غزلان / ليلى سلف جارها توفى …ويجرو يبو ياخدو منها الصغار لانها اكيد بتمشى وفاة سلفها …
-مبشر/ غير خشى ديري دوش وبعتالى نهدرزو … الموضوع معش ينسكت عليه لانى حتى انا صاير معاى موقف توة
-غزلان باهتمام/ شنو صاير …احكيلى
-مبشر/ اغسلى الدم وبعتالى ساهل
وبالفعل خشت غزلان دارت دوش …غسلت هاديكا الدمايات كلها …ومافى فى ودانها غير طقت البندير …وكلام هنيه لما تقوللها ردى بالك من القراب عليك …هنيه بشكلها الاول قعد فى بالها …لكن الشكل الثانى ماتسجلش فى داكرتها …
طلعت من الحمام خشت دار نومها
شرين التليفون الارضى طلع مبشر يجرى رد/ الو
-ليلى/ اهلين مبشر …قول لى غزلان ماتنشغلش سلف جارتى ماماتش والمكالمه طلعت كدابيه ولما عاودو للرقم لقوه غير مستعمل
-مبشر/ لا حول ولا قوة الا بالله …
وانهى المكالمه وصكر الخط …

غزلان تعيط / مبشررررررررر
انخلع مبشر وانخلعو صغارها وفاقو من النوم
_________________________________________

تمت……ويتبع
زتما غِزلان شن صار معاها ….وليش عيطت
هنيه شن دورها وشن قصتها وشن قصه الجثه الرابعه ومنهما الجثث الثلاثه الاولى
ماتنسوش تقرو المقدمه اللى نزلت قبل الحلقه الاولى

نحبككككككم❤

رواية الجثة الرابعه بقلم زهور جمال الدين

الفصل الثانى

🌱الحلقه الثانيه🌱

فى حوش مبشر ..
اتصلت ليلى وفهمت خوها ان المكالمه الى جت لحوش صاحب راجلها كانت كادبه …صكر المكالمه ..وادا بي غزلان تطلقها عيطه لين صغارها فاقو ونزلو يجرو من سرايرهم …
مشالها مبشر يجرى فتح الباب وخش يلقاها حاطه يديها على وجهها وتعيط وشباك الدار مفتوح
-مبشر / خيرك تعيطى حبيبتى …
-يمنى تبكى/ خيرك يا ماما
-غزلان / قطوسه سودا تهجمت عليا توة وخبشتلى رقبتى وترا شن حدفت وطلعت
-مبشر/ مافيك شى يا غزلان رقبتك مش مخبشع ..هادى تهيئات بس ..
وتلفت للغرفه / شوفى الدار مافيها شى ملوح
-غزلان / والله خبشتنى فى وجهى وفى رقبتى ولوحت حاجه بيدها ضربت السقف ونزلت ولما انا عيطت هربت
-حضنها / اشششش خلاص الصغار بيخافو
-تلفتت لصغارها / انتو ليش نضتو من النوم حبايبي
-عبدالبارى / أنتى تعيطى يا ماما
-نزلتلهم ضمتهم / لا ياماما .. اشششش ماتخافوش انا طلعلى فار خفت وعيطت
-يمنى/ مش قلتى قطوسه
-غزلان / غير تلخبطت ..بنقول فار قلت قطوسه ياماما
وضمتهم وقعدت تبكى
-خداهم مبشر من ايديهم / تعالو ارقدو هى مافى شى
وبالفعل خداهم ورفعهم لدارهم حطهم فى سرايرهم وخلى الباب مردود …ورجع لى دار النوم
-غزلان / نبى نخش اندوش
-مبشر/ حبيبي توة كنتى فالدوش
-غزلان / لا منخش ثانى ..نقولك قتوسه خبشتنى مش مصدقنى ولا شنو
-مبشر/ باهى خشى ودوشى عادى مافيهاش باس
طلعت غزلان من الدار خشت للدوش عالسريع دارت صبت اميه يادوبك نزلت الميه على شعرها ورقبتها وطلعت من البانيو مسحت بالفوطه ولفتها عليها وخشت للدار
لقت مبشر ماسك شنطه اليد متع العرس اللى روحت بيها
فاتحها وترا شنو يدور…ويشوف عالحيط ظل اسود ..متع حد واقف وراه تلفت مخلوع
____________________________________________


فى حوش ليلى
-ليلى/ ياودى الصغار رقدو ..خلينى ننزل نشوف المراة وكيف صار ومنو اللى دار فيهم المقلب البارد هدا
-مصطفى / البلاغ زى ماقلتلك طلع كادب والراجل روح لحوشه وممكن حتى رقدو .. وانتى تبى تنزلى توة
-ليلى/نبى نفهم انت منين عرفت ان البلاغ كادب
-مصطفى/ اول ماخشينا لقيت البواب وقالى ان فتحى كلمه عالارضى وقاله ان صار وصار ويخبرنى ان البلاغ طلع كادب
-ليلى/ ااه قصدك هدا علاش وقفت عليه قبل مانركبو
-مصطفى/ ايوووه فهمتى توة
-ليلى/ و حفيظه جارتى سامعه مالاول ..
-مصطفى/ خير بلاك متبيش تفهمى ..الراجل سمع بالبلاغ كادب كلم مرته وقاللها قبل مانوصلو خافنا نخلعوها .. وقال لبواب العمارة قول لمصطفى مايديرش شوشرة
-ليلى/ ياسبحان الله عليك يا حفيظه..تصدق لما خديت منها الصغار وجهها عادى لا خايف من المقلب اللى صار لراجلها ولا مخلوعه من الاتصال الكادب .. اخيه عليها
-مصطفى / تى ماهو قلتلك راجلها وقضها قبل مانوصلو
…اكيده خافت وفات …تى اهو كدبه وفاتت
-ليلى / نقولك الحق انا الحكايه ماختش راسى
-مصطفى/ اجعنها ماخشت .. نوضى ديريلى قهوة
-ليلى / قهوة فى هالليل ..امتى بترقد
-مصطفى / انتى مش بتورينى نوضى ….
-ليلى / باهى

وطلعت للصاله لقت البرسيان مفتوح / سبحان الله انا مهناش كل شى يقعد زى ماهو …خيرك ماصكرتش البرسيان
ومشت للبرسيان بتصكره …فتحت الشباك وتلاقى قطوسه سودا واقفه على شرفه الروشن …وتطلقها ليلى عيطه
-مصطفى طلع يجرى/ خيرك بتنوضى الصغار
-ليلى/ تى خيرك تعيط غير شفت قتوسه سودة
-مصطفى / تى شنو اول مرة تشوفيها ..صكرى البرسيان وتعالى انخمدى حتى القهوة بلاش منها

__________________________________________

فى دار نوم غزلان
مبشر شاف وراه ظل اسود تلفت مخلوع …يلقاها غزلان طالعه من الدوش وواقفه وراه
-غزلان / مبشر شن ادير فى شنطى
-منغير مايحس بنفسه/ وين الحنتيته …

قعدت تشبحله وهيا مرعوبه
-غزلان انخلعت / وانت من قالك عندى حنتيته
-قام الشنطه وهوا عارق/ ريحتها طالعه
-غزلان تشبحله / وكيف انا ماشميتهاش ..وبعتالى انت منين تعرف ريحتها
-مبشر / الحنتيته يخافو منها الشياطين..وامى كانت تبخر فيها كل خميس …
ومدلها الشنطه / شمى
خدت الشنطه وحطتها فى خشمها وتشم / صح فيهاريحه
-مشالها حضنها / هاا شفتى مش قلتلك ريحتها طالعه ..
-حط يدها عالفوطه الملفوفه عليها وفتحها طاحت عالوطا / ستاحشتك
-غزلان خافت منه نزلت قامت الفوطه وحطتها قدامها / حبيبي معليش تعبانه ونبى نرقد
-ضمها ليه بالقوة / وراجلك بتخليه
-دفاته / حول يا مبشر قلتلك تعبانه
بعد عليها وهوا مصدوم خيرها ..لان هالتصرف عمرها ما داراته …
قعمزت عالسرير حولت الفوطه ولبست روبها / سامحنى حبيبي منرقد
-مبشر/ باهى حتى انا منرقد …
رقدو الزوز عالسرير … هوا يخمم وهيا تخمم
-مبشر يخمم/ الموضوع معش ينسكت عليه
-مبشر يخمم/ الدم ملبز فى جسمها كله ..كنت نكدب فيها لكن بعد اللى سمعته بكرى بودانى وبعد اللى شفته عليها خلاص مستحيل نسكت
-وهيا تخمم / لازم نلاقى خالتى هنيه بأى طريقه .. هيا الوحيدة اللى تقدر تساعدنى .. مكشوف عليها … يااااربى يجيبك ليا خالتى
_______________________________________

فى الصبح …

فاقت غزلان قبل مبشر ….طلعت من دار النوم حست ان جسمها كله تعبان …مشت للمرايه اللى فى السقيفه شافت جسمها خاطر روبها مكشوف …تلاقى كدمات وضرب فى ايديها وكتافها …طول جو النساوين الثلاثه بين عيونها ..
مشت للصالة قعمزت عالصالون وهيا ترعش .. هدا شنو الضربات اللى فى جسمى ياحليلى… والنساوين الثلاثه بين عيونها كيف هيا تنقز وهما يشدو فيها ويضربو .. وادكرت كيف تقرا فى اية الكرسى
وتخمم فى خاطرها / يا ربي هدا حلم ولا علم …باهى لو كان حلم كيف يطع الضرب على جسمى حق …
وتخمم/ اول مرة نواجه الشى هدا بالقرآن …ديما نمشى لشيوخ الحضرة والكتايب تقول عليا ماتعلمتش ولا خشيت مدارس
حست بيد تمس فشعرها ..انخلعت وشهت ووقفت تلفتت وراها تلاقى مبشر واقف / خيرك حبيبي انخلعتى
-غزلان / لاااا شى ..خلعتنى لان الحوش هدوء
طلعت يمنى من دارهم / صباح الخير ماما ..صباح الخير بابا
-غزلان ومبشر/ صباحك ورد
-طلع عبدالبارى/ صباح الخير
-غزلان/ صباحك فل وياسمين حبيبي
مشالهم مبشر قامهم فى غمره/ لااااا انا بنغير هما صباحهم ورد وفل وانا تنخلعى لما تشوفينى
-غزلان تضحك/ نديرلكم الفطور
-يمنى / ديريلنا كورن فليكس
-غزلان / لا نديرو فطور قنين بما ان اليوم جمعه
وخشت للمطبخ بدير الفطور ….لحقتها يمنى قعمزت عالطاولة
-يمنى/ حقه ماما امبارح بابا يعيط يقولنا اسكتو واعقلو واحنا ماندوشوش …وبعتالى قعد يعيط ويقول انتو شكون

خش مبشر بياخد اميه ….
-يمنى/ ولقينا يرغاناتنا محوسه واحنا مش فالدار
قامت غزلان عيونها شبحت لى مبشر/ نوضى ماما امشى تفرجى مع خوك تو نجيبلكم الفطور غادى
-نزلت يمنى/ باهى …
تلفت مبشر فتح الثلاجه خدى شيشه اميه وبيطلع
-غزلان / يعنى ماحكيتليش
-مبشر/ شنو منحكيلك
-غزلان / صوت الدوشه اللى تسمع فيها
-مبشر/ دوشه فالمبارة وانا نشجع .. وبعتالى قعد نعيط عالفريق الثانى ونقوللهم انتو شكون ..ولا غير تبينى نخلعك
-غزلان/ بيش يكون فى علمك .. انا قررت نمشى لشيخ قران
-مبشر/ ترا فكينى من هالمواضيع .. تشوفى فى السيارات كل يوم تلم فى الزنادقه ..من قعد مستشيخ ..ولا تعرفى حد
-غزلان / بندور… ولما نحصل تو نبلغك
-مبشر/ باهى …

غزلان خش لقلبها الشك من راجلها مبشر ..بالرغم يانارى ماباش يحكيلها بيش ماتنخلعش زيادة…
كملت الفطور …. وشرين باب الحوش
___________________________________________

فتح مبشر الباب يلاقى اخته ليلى وراجلها مصطفى وصغارهم …
سلمو عليهم وخشو ….
-غزلان / حماتك بتحبك …وصلتو عالفطور طول
-ليلى حطت شنطتها / عارفتها تحبنى …

فطرو وكملو فطورهم ..وخشو غسلو الماعين ويهدرزو
-ليلى/ لا خافت ..لا قالت حليلى من يتسهوك على راجلى.. لاقالت من يفاول على سلفى ..مدتلى الصغار وهيا متبكمه
-غزلان/ عادى مرات راجلها قاللها ماتتكلميش فالموضوع
-ليلى/ معقولة يكلمها راجلها ويقوللها صار وصار..وانا ومصطفى كنا مع بعض وماتقوليش كلمه
-غزلان/ اهو حتى انتى متكلمتيش معناها الامر عادى
-ليلى/انا مصطفى قالى ماتخلعيش المراة واسكتى لين تسمع
-غزلان / امالا كيف عرفتى انها سامعه لما بعد خشيتو
-ليلى/ بعد ماركبنا قالى مصطفى ان البواب قاللها
-غزلان/ قصه غريبه
-ليلى/ امالا كانا نقولك الاغرب
-غزلان انتبهت/ شنو
-ليلى / طبعا هوا كان فى حوش سالم صاحبه اللى مرته صبحيه ماك تعرفيها …
-غزلان/ ايه نعرفها ماشالله عليها
-ليلى/ امبارح سكتنى ورقدنا ..لكن اليو لما شديت فيه لازم يكلم سالم صاحبه ويخليه يهزب الراجل اللى كلمهم ودار العملة.. قالى مش لازم نكلم سالم اهو انا زابط الرقم وتو نكلمه وبالفعل مشى كلمه ترا قولى شن قالى
-غزلان ترد فى طواسى العصير / شنو
-ليلى/ اتصل بالرقم بيهزبه لقاه غير مستعمل😱😱!!!
طاحت الطاسه من يد غزلان تكصرت
-ليلى/ سمله عليك
-غزلان تقيم فالمرش / لااا عادى..لكن تو معقوله اتصال وردو وكلموهم ناس و بعتالى يطلع الرقم غير مستعمل .. وشن قال مصطفى
-ليلى/ تخيلى وبكل برود قالى غالب هدا اللى صار بتعرضى انتى توة ..
-غزلان/ باهى كلمتى صبحيه وفهمتى منها
-ليلى/ ماخلانيش انكلمها .. لكن بادن الله الليله كانا روحنا بكرى تو نكلمها ونفهم منها…وكانا متاخر تو نكلمها الصبح

مبشر ينادى من الصالة/ مزال
-غزلان/ لا لا كملنا هى
وتلفتت لى ليلى/ توة فكينا من هالسيرة وسقدى كان منطلعو
-ليلى/ قصدك حتى المرة هادى بنتغدو فى الاحياء البريه كرهناها 😁😁 ..
-غزلان تضحك/ عندك مكان ثانى هاتى …
_________________________________________

كملو ضمان المطبخ
وخشت غزلان لدار نومها .. وخشت معاها ليلى حماتها ..
غزلان تغير فحوايجها ورا الباب ماتبيش حماتها تشبح الكدمات وليلى مقعمزة عالشكماجه وفى مجموعه روائح
-ليلى / ماشالله كل ريحه احلى من الثانيه …هادو اكيدة هدايا مبشر
-غزلان من ورا الباب/ ايه كلهم من مبشر ..كانا عجباتك وحدة فيهم هيا ليك
-ليلى طمعت/ بلحق
-غزلان / وراسك اللى عجباتك خوديها
-ليلى قامت شيشه عطر/ انا عجبتنى اهيا السماويه
-غزلان مستغربه / انا ماعنديش عطر لونه سماوى
-ليلى/ اهو مكتوب عليه بالانجليزى….اسمها دا فور ..شن معناها …
-غزلان تضحك / معناها الرابعه.. لكن ماندكرش ان عندى ريحه بالاسم هدا .. لكن مدامها عجباتك هيا ليك
-ليلى فرحت / سلم مرت خوى الغاليه
كملت غزلان وطلعت من ورا الباب بتمشى لى ليلى .. لقت ليلى واقفه لكن الوجه لعمتك هنيه
-غزلان انخلعت/ خالتى هنيه
-صوت ليلى ووجهه هنيه/ خيرك اللطف غزلان اوخيتى من هنيه اللى من امس تدوى عليها
ورجع وجه ليلى …
-غزلان / اعود بالله من الشيطان الرجيم ….
وطلعو من الدار …الصغار فرحانين بالزردة .. غزلان تلبس فى كندرتها ..وخشت بتجيب لصغارها ادجابوطواتهم …
ليلى اتفكرت هاديكه الشيشه متع العطر..وفى خاطرها / هيا قالتلى خوديها …غير احنا ارتبكنا لما جابت سيرة هاديكه المراة ونسينا …
وتخمم متحشمه/ توة هيا قالتلى خوديها …معناها ماتبيهاش ..
وتلفتت / خلى نخش نجيبها وخلاص ..
فتحت باب الدار وشدت العطر فى يدها وحطاته فى شنطتها وطلعت من الباب وتعثر فى الفرشه اتجى طايحه على طولها اطيح شنطتها وتتبعثر واطير شيشه العطر بعيد …
جى راجلها مصطفى يجرى وخوها مبشر قاموها …
-مصطفى/ خير بلاك تطايحى
-ليلى/ احيه راسى مافيا شى ..غير حولو خلونى نوقف وتلفتت لى بنتها امل / لمى الشنطه امولة
امل قايمه شنطه امها وتلم فيها ..شافت الريحه متلوحه بعيد مشتلها تجرى وحطتها فى شنطه امها 😱😱
وطلعو وزردو والجو حلو
______________________________________

فى حوش ليلى نفس الليله ….
دوشت ليلى لصغارها خاطر الزردة كلها رملة .. وخشت هيا دوشت.. ولبست روب عنابى ….
وخشت للدار لقت مصطفى راجلها متكى عالسرير وفاتح التلفزيون قدامه …

فتحت ليلى القجر…وطلعت شنطتها اللى كانت طالعه بيها ..
خدت منها شيشه الريحه ..وبختها بيها روحها انغسلت بيها غسل😁😁😁….

وحولت طرف الروب الخارجى وجت قعمزت على سريرها وتمشط فى شعرها ..
قرب منها مصطفى/ شنو هالريحه الحلوة هادى طيرتى عقلى بيها …
وقرب من رقبتها ويشم ..وهيا تضحك وتتلوى
-ليلى/ هادى هديه ليا من خوى مبشر
-حط يده على سيور الروب ونزلهم / يسلم وخيها اللى لاهى بيها ويبيها ترتاح مع راجلها
-ليلى تدلع / مصطفى .. بالشوياااا عاد
ضمها ليه ورقدها فى جنبه ودلعها ❤

______________________________________

ثانى يوم الصبح السبت ….
كان السبت عطلة ..وغزلان متعودة كل سبت تتلاقى مع صاحباتها متعين ايام الدراسه …
دارت مكياج خفيف ولبست سروال ادجين وتيشرت احمر ولمت شعرها ..ولبست فوقهم عبايتها ووشحاها ..
خدت مفتاح سيارة مبشر / حبيبي اهو خديت السيارة
-مبشر/ متعطليش .. تو نجيب غدى من برة
-غزلان / كيف بدير والسيارة معاى
-مبشر/ تو ندبر راسى ولا نقول لى صلاح يفوت عليا
-غزلان/ تمام .. اصلا انا بناخدها معاى زينب مرته
-مبشر ابتسملها / تمام
حطت يدها على فمها حدفتله بوسه / باى
-مبشر مبتسم/ باى ..

طلعت من الحوش نزلت من الدروج .. وطلعت من العمارة ولا حست ان فى وسط العمارة صارلها موقف ..كله امتسح من داكرتها ….
فاتت على حوش صلاح صاحبهم ..دارت كلاكس نزلت زينب وركبت السيارة سلمو على بعضهم …ومشو لحوش فاديه اللى كانت تقرا معاهم …

خشو لقو غزلان وزينب لقو رباب و غادة وهاجر ..سلمو على بعضهم وقعمزو يهدرزو …
جابت فاديه العصير والشوكولاته ..وقعدو يهدرزو قريب نص ساعه ….
وبعدها ناضت فاديه بدير النسكافه…فوقت غزلان بتعاونها
_______________________________________


فى المطبخ
-فاديه / كيف حال مبشر
-غزلان ضحكت/ ماهو سألتونى بكرى وقلتلكم كويس
-قربت منها فاديه/ شكلك مش عاجبنى حبيبتى ..دبلانه
-غزلان 😔/ والله شن منقولك يا فاديه …انتى اقرب صديقه ليا ..صاحبتى من لما كنا فالاعدادى وتعرفينى مندسش عليك
-فاديه /وانا هدا علاش سألتك….انى عارفه انى اقرب صديقه ليك
-غزلان عيونها دمعو / انا ندور فى شيخ يعالج بالقران
-جتها فاديه حضنتها/ يااارووحى خيرك …علاش شيخ قران
-غزلان مسحت دموعها وابتعدت عن فاديه/ نقص صوتك تو يسمعونى البنات فى الصالة
-فاديه / باهى ليش..خيرك تحلمى
-غزلان لقتها فكرة/ ايوووووه بالزبط نحلم ونوض مخلوعه
-فاديه / خالتى عندها سلفها يعالج غير مايبيش يقول على روحه ..تو تشوفها ونرد عليك
-غزلان / اى وراس اوخيتى تشوفيهولى
-فاديه / حاضر ولا يهمك كونى هانيه…

وكملو النسكافيه .. وقصت غزلان الكيكه اللى رافعتها هيا .. وحطتها فى صحون .. وطلعو الصفر للصالة
يشربو ويهدرزو ويضحكو …شرين تليفون الارضى
ردت غادة / ايووة…يا اهلين .. انشالله خير شن فى..باااهى
.. حاااضر ….
وتلفتت لى غزلان/ يبيك مبشر
انخلعت غزلان وقف/ انشالله خير والصغار مافيهم شى
مشت تجرى خدت السماعه / نعم … اااه …شنقت روحها ..ووه عليا …
طاحت منها السماعه..وصار الهرج والمرج..ويسكتو فى غزلان

زينب مشت تجرى للسماعه/ انشالله خير يا مبشر شن فى
اااه …معقوله .. لا حول ولا قوة الا بالله
وغزلان تعيط وتخبط على وجها وصحباتها يشدو فيها / ووه على صغارها يا نارى
-رباب / نى منهيا خيرهم يازينب شن فى؟
-زينب حاطه ايديها على خدودها/ ليلى حماتها شنقت روحها
-غادة/ لا حول ولا قوة الا بالله ….
-زينب / نوضيها يارباب ولبسيها عبايتها معاى خلى نرفعوها لحوش حماتها
-هاجر تعيط/ ياودى صغار غزلان وين
-زينب/ والله مانغرف ماسألتش راجلها .. لكن دوشه جنبه شكله فى المستشفى
غزلان صايرة فيها حاله..صاحباتها قسمو روحها..ديل داروها وطارو بيها لحوش حماتها وديل خدو مفتاح حوشها ومشو جابو الصغار ولحقوها لحوش حماتها
__________________________________________

فى الوفاة ….

فى خيمه الرجالة …
-مصطفى يبكى/ والله مافقت بيها …. دارت اللى داراته وانا فى سابع نومه …ولما نضت الصبح طلعت من الدار نلقاها معلقه فى الممر
مبشر يسمع ويبكى بحرقه وساكت
-صلاح / انا لله وانا اليه لراجعون يا مبشر.. انت مؤمن وعارف ان هدا قضاء الله وقدره
-مبشر يبكى/ اختى ليلى .. المصليه اللى تقرا فى القران تشنق روحها…مستحيل..هدا قتل نفس يبي قوة جبارة
-جار مصطفى/ الاولين ايقولو متخطيه ..معناها مش بعقلها ولا تتحاشب عليه …

اما فى خيمه النساوين….

غزلان مقعمزة تبكى .. وصاحباتها حواليها …
جت حفيظه جارة ليلى قعمزت جنب غزلان تعزها من زمان ….
ومنيرة اخت ليلى مقعمزة من الخلف وتعيط/ يا حليلى.. اوخيتى .. قعدت لا ميما ولا وبي ولا وخيه
-فضيلة جارة امها/ سلامت خوك ومرت خوك وصغاره..شنو بتكفرى
-منيرة/ لا اله الا الله …ولا اعتراض لا حكم الله
فى كراسى غزلان وصاحباتها يحكو كيف لاقاها راجلها وكيف فاق وشبح للثريا لقاها مشنوقه …وكيف نزلها من الخيط اللى شانقه بيه روحها
وتبان صبحيه صاحبتها مرت سالم خاشه تبكى …عزت الكل ومن ضمنها غزلان .. وسلمت وكملت وقعمزت جنب غزلان وقعدو يبكو
-غزلان / والله امبارح فى سيرتكم انتو الزوز صبحيه وحفيظه
-صبحيه/ بالخير انشاءالله
-غزلان/ اكيدة بالخير.. حكتلى عالاتصال الكادب اللى جاكم يا صبحيه اول امس لما مصطفى وجماعه راجلك عندكم وقالولكمسلف حفيظه توفى
-صبحيه تلفتت لى حفيظه / امتى صار هدا!!!
-حفيظه/ منك نسمع يا وخيتى
-صبحيه/ لا جانا اتصال ولا شى
-رباب انتبهت/ بالك صار لبس فالموضوع
-غزلان حمقت حستهم يكدبو فيها / لا مفيش لبس.. ليلى قالتلى ان جى اتصال فى حوش سالم صاحب مصطفى وفزعوهم وقالو لى فتحى خوك دار حادث
-حفيظه/ بالنسبه لى فتحى ما عنداش علم بالموضوع
-صبحيه/ ولا سالم حكالى حاجه زى هادى
غزلان قعدت ساكته ومتبلكمه …امالا ليش مصطفى جى يجرى روح بيهم من العرس يومها
وتسمع فى منيرة تعيط/ علاش تجى في اختى ليش
وغزلان تخمم/ وليش منيرة ما جتش للعرس ليلتها طول عمرها عزوزتها تجيها وتطبع ما دورش فيها …
وتخمم/ مبشر من قاله ع الحنتيته …الدايرة فى دماغى فيها ثلاثه توة مبشر ومصطفى ومنيرة…
حفيظه توشوش لى صبحيه/ فتحى راجلى لحقه طول لما رفعها …قالو فيها نفس شوى ..لحق عليها فى اخر لحظه .. وهيا تنادى وخلاص
غزلان انتبهت لكلامهم
-صبحيه / تنادى فى امها
-حفيظه / لاااا قالو تنادى فى وحدة اسمها هنيه …وهيا فى كلمه ياااهنيه تعالى
وقفت غزلان مرعوبه / خالتى هنيه!!!!!

______________________________________

تمت ….ويتبع
زعما خيرها غزلان وشن يبو منها.. معقولة يكون راجلها دايرلها هكى..لااا ياودى.. امالا راجل حماتها ..عقلى داخ معش زبطت ..
عموما اليوم طلعو شخصيات جديدة اليوم .. وحيكون ليهم دور كبير فى الحلقات القادمه …زعما بنشكو فيهم حتى هما ولا كيف !! والقزون مزال بيطلع ولا تم دوره .. وعليوة اللى شاد البندير يصحن فيه ولا شنو
اليوم نقصنا العيار شوى ..لكن شدو روحكم فالحلقه الجايه
انشالله غير عجبتكم القصه وسامحونى عالتأخير
تعديل/ لو سمحتو عبرولى عن مستوى الحلقه وتوقعاتكم منو زعما داير فيها هكى
نحبكككككم ❤

رواية الجثة الرابعه بقلم زهور جمال الدين

الفصل الثالث

فى خيمه العزى ….

غزلان افكار ترفعها وافكار تجيبها..شنو هالعالم اللى خشتله من مدة سنه .. ضرب البندير ليها مدة فى ودانها …
وتخمم/ الوحيدة اللى زبطتنى تعبانه هيا خالتى هنيه
..وماحد يقدر يساعدنى غيرها ..
تشوف فى نساوين خوتها يخشو هنيدة وسلمى .. مشتلهم طول اضبطوها وقعدو يبكو معاه …ليلى حماتها حبابه والناس كلها تحبها ….خشو عزو منيرة وبنات عمها …وخالتها
-هنيدة/سبحان الله..ليلى الباهيه تشنق روحها..مستحيل نصدق هالكلام
-غزلان تبكى/ والله حتى انا ماصدقت لين جيت للخيمه وشوفت بعيونى
-سلمى/ رحمه الله عليها كانت من خيرة الناس
قامت غزلان راسها لقت قريبات مبشر اللى مقعمزة معاهم خالتها هنيه يومها فى العرس…
-غزلان / نستادكم نسلم على اقارب مبشر
-هنيدة / خليك تو يجوك هما
-غزلان / صح تلخبطت …
قعدو هادوكا البنات يسلمو … وصلو لعند غزلان سلمو عليها عادى ومشو قعمزو عالكراسى ..ولحقتهم هيا قعمزت جنبهم
______________________________________

مشت غزلان قعمزت جنب البنات الزوز
-غزلان/ احم .. هوا انا تصدقو ناسيه اساميكم
-نورا/ انا نورا ..وهادى اختى فوزيه …نقربو لى مبشر….
-قصت عليهم غزلان/ لا عارفه قرابتكم بيه بوكم ولد عم عزوزتى بواتهم خوت
-فوزيه / ايوووه بالزبط
-غزلان دايرة روحها تتخوبث😁/ لكن خالتى هنيه هيا اللى مزبطش شن قرابتها بي مبشر
-نورا باستغراب/ منو خالتك هنيه
-فوزيه / تصدقى يا غزلان انتى فى بالى من يومها .. لانى نتبهت لما اتأشرى بي يدك وتقولى بالسلامه خالتى هنيه ومعرفتكش على منو تحكى..وعموما عندى حاجه وكنت ندور فى فرصه بيش نتلاقى معاك ونقولك عليها
-غزلان بدهول / خالتى هنيه…اللى .. كانت جنبكم
-نورا/ احنا ماكان فى جنبنا حد ..انا ونورا بس عالطاولة ولت نعرفو هنيه ولا دنيه
-غزلان تبيش تفضح روحها / حقة ادكرت ..مش انتو اللى كانت مقعمزة جنبكم صح .. ايه توة زبطت
-نورا/ احنا الاسم هدا ماعندناش فى العيلة
-غزلان وجهها يتخضر ويتصفر/ ممكن لخبطت فى الاسم
-فوزيه / لا مالخبطيش … نوضى معاى نبى نوريك حاجه
-غزلان وجهها اصفر ومخلوعه / تعالى هى
وقفت فوزيه ووقفت وراها غزلان ورفعتها لطرف الخيمه
-فوزيه/ لحظه بس بنجيب حاجه من سيارتى ونجيك
-غزلان قعمزت عالمرشابيدى اللاصق فى العمارة/ هى
وبالفعل طلعت فوزيه وجابت حاجه خلت غزلان ترعش
_________________________________________

فى خيمه الرجالة …مبشر مقعمز يبكى ومنهار على اخته .. ومصطفى نفس الشى …
الرجالة اللى يتوضا واللى واللى حايس على روحه لان بيصلو
الضهر..فيسع طلع تقرير الطبيب الشرعى لان الحادثه صارت
بكرى ..وقالولهم بعد الضهر نسلمولكم الجثه وبيصلو عليها الجنازة العصر
مبشر مقعمز وجنبه صحابه اللى كان قارى معاهم زمان.. اصحاب عمره من الثانوى وفى منهم من الاعدادى
فى الجامعه قرو بنات وشباب مع بعضهم قروب واحد ودارو علاقات وحبو بعض ..غزلان تزوجت ميسر ورباب تزوجت محمود وزينب تزوجت صلاح والثلاثه تزوجو بعد قصه حب كبيرة …لكن غادة خدت ولد خالتها مايعرفوشى وهاجر نفس الشى تزوجت مديرها فالعمل بعد تخرجت

-صلاح يوشوش لى محمود / تقرير الطبيب الشرعى قال انتحار بمساعدة
-محمود / ومن بيساعدها بس .. وهما طول شدو راجلها وحققو معاه وداروله تحليل اثبت انه كان راقد
-صلاح / اول مرة نسمع بتحليل يديروه يعرفو بنادم كان راقد ولا ساهر
-محمود/ ياراجل ماليناش علاقه ..الهى فروحك مبشر يشبحلنا
-صلاح / ربي يهدى كانا انا راهو قلبت الدنيا على راجلها واتهمته …مش عارف شن مخليه ساكت وهما قالوله حد ساعدها عالانتحار
-محمود/ اووووه علينا عاد ..
تلفتله/ وبعتالى علاش قالولهم حد ساعدها انا هادى اللى مافهمتهاش
-صلاح/ لان الحبل مش مربوط فالثريا ..مربوط فى الشنغال اللى موجود اصلا من صبت السقف .. مستحيل يدها تقدر توصل يدها غادى وتربط الحبل لان المكان ضيق حتى يد عيل ماتقدر تخشله
-نخصه محمود/ خلاص اسكت مبشر يشبحلنا
-صلاح / اهو سكتنا1
-مصطفى/ قزون .. ياقزون
-تلفت القزون / نعم
نفس الراجل اللى يومها بيدبحها مع هنيه …لكن شن يدير هنايا يا همى
-مصطفى/ جيبو مالقيات للناس خلى يتوضو
-القزون / حاضر يا عرفى اهو بعتنا لسوق الثلاث على بضاعه كاملة …

وصلو خوت مصطفى وخواته خمس سيارات مع بعضهم من بلادهم ..خاطر مصطفى بس يسكن فطرابلس ..الاولاد نزلو اضبطو خوهم وبكو لانهم بجديات ايعزو ليلى

______________________________________

فى خيمه النساوين …

غزلان مقعمزة عالمرشابيدى .. ويقيمو خوات مصطفى ونساوين خوته الستار وهاتك يا عياط …تلقتهم غزلان وبنات عم ليلى .. واللى داخت واللى يصبو عليها فى الميه .. ومشو لى منيرة يعزو …
غزلان نست فوزيه ولهت فى النساوين اللى خشو ..حتى صاحباتها عادرينها مقعمزات مع بعضهم ويهدرزو ..

بعد نص ساعه …
-فوزيه / غزلان .. تعالى نبيك
-وقف غزلان ادكرت ان فوزيه بتوريها حاجه/ اهو جيتك
وتلفتت للى مقعمزة معاهم/ نستادنكم
تشبح فى صغارها يلعبو فى الخيمه/ ردو بالكم تطلعو برة من الخيمه
-صغارها / حاضر ماما …
ومشت لى فوزيه ….
-فوزيه/ تعالى قعمزى جنبى وردى بالك اديري اى حركه
-غزلان / حاضر
قامت فوزيه كاميرا فى يدها / بنوريهالك هنايا
-غزلان / باهى
فتحت فوزيه الكاميرا وعطتها لغزلان … فوزيه قايمه الكاميرا وتصور فى روحها ووراها غزلان لما تحكى مع هنيه
-فوزيه / ردى بالك ترعشى وتلمدى علينا الناس
-غزلان قامت راسها/ ومن شنو منرعش..هادى انتى تصورى فى روحك وهادى انا وراك نحكى مع خالتى هنيه اللى حكيتلكم عليها
وقف فوزيه قامت يديها/ يا غزلان انتى تحكى مع روحك ..مافى حد مقعمز جنبك
-غزلان / بتخلينى نضحك وانا ماخاطرى فى الضحك ..اهى تحكى معاى سلامة الشوف يا وخيتى خيرك
-فوزيه / هاتى
وخدت منغزلان الكاميرا / ناديلى اى حد من الصغار
-غزلان/ يمنى … يمنى تعالى ماما
-جت يمنى تجرى / كلمى ابله فوزيه تبيك
-يمنى / نعم ابله فوزيه
مدتلها الكاميرا / ترا سميلى من طالع فى الصورة
حطت يمنى صبعها / هادى انتى .. وهادى ماما محلااااها
-غزلان عيونها دمعو/ من مقعمز جنبى انا
-يمنى / ترا …
وقعدت تشبح للكاميرا وقامت راسها / ماحد..انتى عالطاولة بروحك
-غزلان خدت الكاميرا حطت يدها على وجه هنيه/ هادى شكون
-يمنى/ هدا كرسى فاضى
وخيم الصمت… غزلان واضح مصدومه …
-فوزيه/ برى العبي حبيبتى
-يمنى/ باهى
ومشت تجرى للصغار
-فوزيه / اسمعى يا اختى.. انتى بالتأكيد عندك مشكلة نفسيه
..مفيش حاجه فالدنيا اسمها مكشوف عليك الحجاب .. مفيش حاجه اسمها جماعه سفليه اتابع فيك .. ف العلم فى مرض نفسى اسمه تهيئات ..
-غزلان / كيف يعنى…
-فوزيه/ انا استادة علم نفس نعطى فى الجامعه وعندى خبرة …مثلا انتى توة فى الكاميرا قاعدة يتهيئلك ان قدامك مراة وتكلمى فيها بينما مفيش حد قدامك
-غزلان/ شن رايك انها موجودة بالفعل ..بالامارة عطتنى حنتيته وطاحت منى .. ولما روحت راجلى شمها فى شنطى
-فوزيه ماقتنعتش/ انتى على اى حال ماتسكتيش ..لازم اتابعى عند دكتور …
-غزلان/ انا مش مريضه يا اختى والله نشوف فيها …
-فوزيه / باهى نعطيك حل وسط …اول ماتشوفى اللى اسمها هنيه اقري فى وجهها القران كانا انسانه عاديه وفيها الخير مش ح ادور ..وكانها مش طبيعيه شر ح تكز من القران ..
ونعاود ونقولك لازم اتابعى عند دكتور
-غزلان/المراة هادى انسانه حقانيه..عرفتنى مريضه ووعدتنى تعالجنى .. لكن مفهمتش كيف انا نشوف فيها وانتو لا
-فوزيه/ لان زى ماشرحتلك .. بس لو كانت انسان السؤال مش هنايا كيف انتة تشوفى فيها واحنا لا …السؤال هل هيا صاحبه خير والا صاحبه شر .. وشن تبى منك .. ماعندكش كيف تعرفيها الا بالقران اللى تقريه فى وجهها9

انقام الستار شوى…..
صلاح صاحب مبشر ينادى/ زينب .. يازينب
-غزلان اتأشرلها / تعالى صلاح اينادى
جت زينب بسرعه كلمت صلاح وخشت
-زينب/ راجل المرحومه باعث بضاعه للحوش هنايا قالى كلمى اهل الحوش خلى اندخلوها
-غزلان / وينهم اهل الحوش بلاهى .. قوليله ايدخل
طلعت زينب قالت لصلاح دخلوهم .. قام الستار شوى بيش يحط الحاجات ويرفعوهم النساوين
-صلاح / دخل الحاجات يا قزون
غزلان سمعت الاسم وبدت ترعش مع بعضها…
خش القزون قايم كروانات وفوقهم خيط مربوط فيه مالقيات …
غزلان تشوف فى ايديه لونهم اخضر ومعبيات شعر ويشبحلها ويبتسملها ….وطول ادكراته لما قامها فوق وحطها عالوطا وماسك الموس وبيدبحها
-غزلان عيطت/ القزون…
وطاحت صايخه عالوطا مشولها زينب وفوزيه يجرو قاموها3
“غير شن لازك عليهم يا فوزيه 😁😁”

قاموها بين ايديهم ودخلوها لممر العمارة …وصلاح مشى يجرى لى مبشر ناده ..وحتى هوا جى يجرى المسافه بين الخيمتين ممكن عشر ثوانى …خش يجرى لممر العمارة قام غزلان بين ايديه وركبها لحوش اخته ليلى ووراه صلاح ومحمود وزينب وفوزيه …..فوزيه حست ان البنت فى خطر فحبت تلحقها …خشو الخمسه للشقه وصكرو الباب وراهم ….دخلوها للدار ورقدوها عالفراش …
-مبشر/ اطلعو كلكم .. فؤاد خو مصطفى شيخ جامع اهو لاحق بيش يقرا عليها
فوزيه مقعمزة جنبها وتلقن فيها فلدى ودنها/ بسم الله الرحمن الرحيم…يس… والقران الحكيم ..انك لمن المرسلين
….
قرتلها قريب عشرين ايه وطلعوها .. وقعدت غزلان بروحها

_______________________________________

فى نفس الغرفه….

غزلان فتحت عيونها …وتسمع فى نقاش خارج الغرفه …
غمضت عيونها …. وحست ان فى حد يحرك فى شعرها …
فتحت عيونها ثانى تلاقى عليوة صاحب البندير يمسدلها فيه.. وهيا يابسه ولا حركه
-غزلان دموعها نازلات عالجنب/ انت شكون..وشن تبى منى

-على فاتح فمه فيه قريب اربعين سن/ انا اللى يحبك ويبيك
-غزلان تحاول اتحرك ايديها/ حول..حول لعنه الله عليك
-رياقته سايله وبتنزل/منقدرش نسيبك انتى ليا
وتجيه ضربه من وراه يطيح ..لكن ما داخش
-غزلان / خالتى هنيه … وينك اندور فيك …شوفى اللى صايرلى
-هنيه تتكلم بطيبه/ وينهم يا بنيتى انا ماشايفه حد
-غزلان خافت / خالتى ترا اقربي منى نبى نقولك حاجه ما حد يسمعها
-قربت هنيه بوجهها الطيب/ قولى بنتى نسمع فيك
-قرت غزلان البسملة فى خاطرها/ يس .. والقران الحكيم .. انك لمن المرسلين ..على صراط مستقيم ..تنزيل العزيز الحكيم …
وتوخر هنيه خايفه / عميتينى الله يعمى عيونك
وقفت وادا بيها خفاش فى حجم انسان …
-غزلان اتخضرت/ مبشررررررر تعالالى بيقتلونى ….وووااااك عليا انتى مش انسان …انتى شيطان …انتى سبب دايا
-هنيه قربت منها / وين شيشه الصنه اللى حطيناهالك يا كلبة …كيف تعطيها للمراة تخليها تشنق روحها
غزلان تبكى /يعنى انتو السبب فى موت ليلى حسبيا الله فيكم ..
-هنيه/ كنتى انتى اللى بتشنقى روحك .. وبعدها انا نجى نشرب من دمك ..ونصبه مع دمايات الثلاث جثث.. لما جيت بنشرب الدم نلقاه دم مراة ثانيه
-غزلان/ واشمعنى انا ياناس ياعالم ..شن فيه دمى وليش تبوه …
-هنيه مدت وجهها وسنونها فوجه غزلان/ من قالك تاخدى مكانها .. من قالك تشوفى سرها ..انتى ناديتينا لماجيتى فى مكانها
-غزلان/ منهيا اللى خديت مكانها …منها اللى عرفت سرها
..مبشر يبينى من لما شافنى ماكانش يبي حد قبلى وعطانى مكانه
-هنيه / مانحكوش عالنصيب ..انتى ماخديتى نصيب حد
-غزلان/ امالا مكان شنو قوليلى فهمينى

ويسمعو فى فوزيه برة تتعارك / المراة مريضه والمفروض منخلوهاش بروحها افتحو الباب

-هنيه تعيط وسنونها طالعات / يا قزووون سقد …الكلبه تبى تخش للدار
-جى القزون يجرى / نغيت ثوانى نجيب الموس ونجى
واختفى عن العين
-هنيه / البندير يا علي
وقف علي وشد بندير وجنبه بنادير يضربو منغير بنادميه
-وغزلان تعيط / يا فووززيه …تعاليلى ماتخلينيش بروحى
-وعلى يضرب فى البندير/ الله حى …الله حى ..الله حى
وهنيه جنبه ترقص زى المهبوله بشكلها اللى زى الخفاش/ الله حى .. الله حى ..الله حى
وغزلان ترعش مع بعضها…
وطلع القزون شكله متغير زى الجوكر ولابس لبسه جوكر/ هيا زيدو طق البنادير …
والبندير يطق فى طقه حارة ….
ومد القزون ايديه/ المرة الى فاتت نزلته وهربت منى توة نبى نرقيه
-وهنيه ترقص/ الله حى …الله حى
القزون ماد ايديه وغزلان تركب فووووووق وصلت للنص بين الارضيه للسقف …
وادف فوزيه الباب ويختفو كلهم واطيح غزلان للفراش اللى كانت عليه …ماشاف اللقطه حد الا فوزيه …ولكنها سكتت ماعاودتهاش لانهم بيكدبوها
خشلها مبشر يجرى/غزلان فيقى …غزلان خيرك شنو اللى صاير معاك
-غزلان/ فوزيه …وين فوزيه
-فوزيه / انا جنبك وماتخافيش …
وحطت فوزيه صبعها على فمها بمعنى/ اسسسس
اشرتلها غزلان بعيونها انها مش حتحكى …
-غزلان/ وين صغارى
-مبشر يبكى/ ماحسوش بيك ..غير قوليلى خيرك ..وخيره القزون قالو عيطى باسمه ودختى
-غزلان/ نقز عليا فار عيطت ودخت
-مبشر/ الحمدلله ….10

ونزلو ولا كأن شى صار …قعمزت غزلان جنب فوزيه وهيا ساكته ….
بعد ساعه …
-غزلان/ بالله عليك ماتسيبينى يا فوزيه
-فوزيه / طلعتلك نفس المراة من جديد
-غزلان متفاجئة/ كيف عرفتى
-فوزيه / قلتلك انا قاريه علم نفس ونفهم فى الحالات اللى زيك..انتى تتخيلى فى حاجات بس..والحقيقه انك ماتشوفى
فى شى ..ولدلك بحسب خبرتى والكلام العلمى يقول انك شفتيها ثانى لان عقلك الباطن هوا اللى يمثلك فيها
-تلفتتلها/ شن رايك طلعتلى وتغير شكلها على هيئة خفاش
-فوزيه / لان عقلك الباطن هوا اللى يتصور فيها
غزلان سكتت لانها متاكدة انها شافتها …

العصر جابو ليلى مغسله ..دخلوها للخيمه ..شافوها صغارها واختها منيرة والكل …
-مفيدة سلفت ليلى / تعالى غزلان شوفى ليلى كنتو احباب هلبا …
قربت غزلان وهيا تبكى .. مسكها مبشر لانه كان حوالين التابوت هوا وصغار عمه وسلاف ليلى …
غزلان قربت من التابوت ومبشر حول الطرف الابيض من على وجه ليلى .. مبشر تلفتت للنساوين ايكشخ ان باعدو ..وليلى تلفت وجهها لى غزلان و فتحت عيونها
– غزلان تصكها عيطه/ ليلى
-تلفت مبشر/ معش تعيطى بالشوى …
رجعت غزلان شبحتلها لقت ليلى حالها عادى وعيونها مغمضات ومش متلفتتلها عرفت ان يتهيألها بس
______________________________________

فالليل
سهرو الناس فى الوفاة … وفى منهم بايت وفى منهم روحو
هنيدة مرت خو غزلان خدت الصغار روحت بيهم يباتو عندها باعتبار غزلان ماعندهاش خوات…
جيران مصطفى متع شقتين الدور الاول فتحوهم للنساوين يباتو فيهم ..لان شقة ليلى اولا بعيد الدور الرابع ..ثانيا شنقت روحها فيها مايبي يخشها حد …2

غزلان راقدة عالفراش وتخمم/ معقولة نتخيل…والله شفتهم ودويت معاهم …

ورجعت تتفكر فى ليلى كيف شبحتلها/ باهى اهو ليلى تلفتتلى وشبحتلى …معقولة هيا شبحتلى حق..اكيدة يتهألى ….
وجها راسها من التفكير رقدت
اما فى حوش فوزيه …

روحو نورا وفوزيه وامهم قعدت بايته …
لقو خوهم معاد كيف مروح حتى هوا داروله سندوتش ورقد ..
نورا وفوزيه فى نفس الدار…نورا اتكت تبى ترقد ..وفوزيه خدت حوايجها وخشت بدير دوش
كملت الدوش وطلعت.. خشت للصالة مشطت شعرها وصكرت البرسيان وخشت لدار نومهم
تلاقى نورا راقدة… ومراة واقفه جنبها هيا وراجل داير لحيه
-فوزيه يبست/ بسم الله الرحمن الرحيم
-هنيه واقفه جنب نورا/ شفتيها هادى الراقدة…نكصرولها رقبتها ولا من شاف
-فوزيه ترعش مع بعضها / انا هنيه اللى تشجعى فى غزلان تقرا فى القران فى وجهى
وتلفتت لى علي/ قيمها
قام على يده .. ويركب جسم نورا فوووووق…
-فوزيه عيطت/ نوووراااا
-هنيه / قظ اعدر من اندر …..
وتحولت خفاش وطارت من الروشن وعلي اختفى !!!!

فاقت نورا قعمزت .. فوزيه شدت روحها ماتبيش تخلعها
-نورا/ اااه راسى يوجع فيا وجسمى رزين
-فوزيه قاعدة مخلوغه / خيرك علاش
-نورا/ وااااك كنت نحلم بروحى طايره فوووق .. وخفافيش ايطيرو فوقى وانا نلحق فيهم …5

فوزيه قعدت واقفه يابسه ماعرفتش شن ترد
_______________________________________


ثانى يوم
فى الوفاة الناس من الصبح تولى ….

غزلان صاحباتها من الصبح ولو للوفاة
-هاجر/ على فكرة لاحظتك ماقعمزتيش جنب منيرة حماتك بكل ..بالرغم كانت علاقتك قويه بى ليلى
-غزلان / ليلى مايجى زيها حد …ومنيرة عادى خير من بعيد وخلاص
-زينب/ علاش
-غزلان / قصه طويله …نحميهالكم وقت ثانى ..

خشو نورا وفوزيه/ السلام عليكم
وفوزيه ادور فى غزلان بعيونها
شافتها مشتلها بسرعه
-فوزيه / غزلان تعالى
-غزلان / عن ادنكم …

ووقفت مشت لى فوزيه
-فوزيه / جتنى هنيه امس وتهدد
-غزلان / هنيه!!!.. مش قلتى خيال
-فوزيه/ انا فكرت فى فكرة …خلى نقولهالك ونديروها لو انها شيطان ح ينحرق طول
-غزلان باهتمام/ قولى

ويبان خفاش صغير متعلق بالمقلوب فى نهايه الخيمه يشبحلهم باهتمام
______________________________________

تمت ….ويتبع
زعما شن القصه اللى بين منيرة وغزلان !!!!
وفوزيه شن دورها فى الروايه …غدوة نكملو
نحبككككم ❤

رواية الجثة الرابعه بقلم زهور جمال الدين

الفصل الرابع

العزى قايم .. ومنيرة لابسه جلابيه ووشاح .. وتشوف فى غزلان تدوى مع فوزيه
-فوزيه / الجن ينقسم لقسمين ..جن مسلم ..وجن كافر .. الكافر ينحرق لما تقرى القران والمسلم يخاف بس
-غزالان / قصدك انا ملبوسه
-فوزيه / لا ماقلتش هكى .. لكن انتى اللى يلاحقو فيك جنون .. ومدامهم شادينها وراك يبو منك حاجه
-غزلان / نقولك سر
-فوزيه / قولى
-غزلان/ ليلى حماتى ماتت بسببي ..
-فوزيه بخوف / نقصى صوتك يسمعوك .. والله تسمعك منيرة مايصير فيك طيب اليوم
-غزلان / باهى باهى ..
-فوزيه / كيف عرفتى انك انتى السبب
-غزلان / انا ندكر فاللى صارلى كله فى الدار بكرى .. وندكر انها قعدت تقولى وين الريحه اللى عطيناهالك …
-فوزيه / ايييه
-غزلان/ شنو ايه ..والليله اللى توفت فيها ليلى كانت عندى وعجبتها ريحه وقلتلها خوديها وبالفعل خدتها
-فوزيه/ لا حول ولا قوة الا بالله .. مبشر جابهالك الريحه
-غزلان / لاااا لما ورتهالى قلتلها انا منعرفهاش الريحه هادى ولما لقيتها عجبتها قلتلها خوديها
-فوزيه / شن اسمها الريحه
-غزلان / تقريبا دا فور
-فوزيه / يعنى الرابعه 😏
-غزلان / ايه بالزبط …غير قوليلى شنهيا الفكرة اللى فكرتى فيها وكنتى تبى تقوليهولى
-فوزيه / جبتلك معاى رقيه واخدتها زمان من شيخ سعودى لما درت عمرة ..
وطلعت من شنطتها مق مصكر ….
-تأشر عليه/ حطيتلك شويه منها فى طاسه حليب وصبيتها فى المق .. وقريا عليها ايات معينات ن الدكر الحكيم .. ونبيك تشربيها ..الجن مستحيل يقربك بالرقيه هادى
-غزلان تبى اى شى يفكها ماللى هيا فيه / هاتى
فتحت فوزيه المق ومداته لى غزلان
ويجى هداكه الوطواط ينزل عليهم ايطيح طاسه الحليب ويدير فيهم حوسه النساوين كلهم انخلعو
_________________________________________

ومر اسبوع …..

غزلان قعدت فيه بسلام .. واللى يطلعولها خلوها فى حالها
والوفاة خفت..واتفقت مع فوزيه انهم يتلاقو بعد اتم الوفاة ويشوفو شن بيديرو ..اقاربهم البعاد كلهم روحو .. وحولو الخيمه وركبو لحوش ليلى … منيرة وغزلان لتوة ماروحوش قاعدين يتقبلو فى العزى
فى الصاله منيرة مقعمزة مع جارتها..اللى نتقلت من ثلاث سنوات للجنوب وتوة بالصدفه مروحه زايرة …
-منيرة / يمنى نادى امك قوليلها عمتى امال جارت عمتى منيرة تبى تعزيك
-يمنى/ باااهى يا عمتى اهو تو اناديها …

وبالفعل خشت يمنى للمطبخ تنادى فى امها / ماما قالتلك عمتى فى مراة تبى تسلم عليك
-غزلان طفت الغاز على براد الشاهى وتمسح فى ايديها/ اهو بنجى هى …
طلعت للصالة لقت امال جارت منيرة مقعمزة / اهلين امال
-امال تشبحلها معجبه/ اهلين غزلان ..سلامت راسك فى حماتك
-غزلان / يسلم راسك حبيبتى.. كيف حالك وحال صغارك…
-امال/ الحمدلله فخيار الخير تسلمى ..وكيف حال هنيدة بنت خالت ليهاوحشه
-غزلان / هنيدة مرت خوى .. كويسه الحمدلله ماشيه امورها هيا وعماد
-امال/ وشن عندها من صغار توا
-غزلان / عندها ولدين وبنيه
-امال/ماشاااءالله ياريتها حملت من خوى وعقبتله حتى بنيه
-غزلان / اهو ربي عطاها ..سبحان الله يشاء القدر ان خوك يتوفى بعد ماقعدت معاه خمس سنين وجرى بيها لكل مكان وماحملتش… ولما خدت خوى حملت من اول شهر
-امال / بالرغم زمان المشكلة عندها هيا وبعلم منيرة اهو تعرفنى وشاهدة على كل شى
-غزلان / لا عارفتها وحتى هيا معترفه تقول شورة هما الزوز ماكانوش يجيبو مع بعضهم
-امال/ سبحان الله نصيبات ..اهو ربى جابلها نصيبها مع خوك اللى كان 5 سنين رافض الزواج بعد مامرته وولده توفو فى هداكا الحادث
-غزلان/ نصيبات ..قد ماشدينا فيه زمان ياخد ماباش.. متأثر الحادث المشؤم اللى داره هوا وياهم ..هما ماتو وهوا قعد حى ولما قلتله على كنتكم واقف طول منغير اى اعتراض بالرغم مايعرفهاش
-امال/ ربي يوفقها انشاءالله

هدا كله ومنيرة ساكته
-غزلان لاحظت ان منيرة تكنطت من قعادها / نستادنكم توة … خلى نكمل شاهى الرجالة
-امال/ غير قعمزى شوى خيرك ..مننشدك قالتلك هنيدة بنت خالتى عالشقه اللى قلتلها عليها ايامات انتى ادورى
___________________________________________

فى حوش زينب صاحبة غزلان
-زينب/ اسمع بتمشى للجنوب رجلى على رجلك مانقعدش بروحى انا والصغار هنايا
-صلاح/ هيا حاجه بنجيبها وبنجى غير اتعبى فى روحك
-زينب/ مافيهاش تعب ..احنا نمشو بالطيارة ناخدو فندق ونقعدو فيه اتكمل انت موضوعك ونولو
-صلاح / انا مانبيكش تتعبى يا عمرى نمشى…
-قصت عليه / انت ليش ماتبينيش نمشى ..من رافع معاك
-صلاح/ اوووف علينا عاد ..تقعدى هكى طول عمرك شكاكه
-زينب/ كانا ماشفتكش بعيونى نقول شك والشيطان لعب بيا
-حضنها / حبيييي .. حركه ومشت فى حالها انسيها عاد
-دفاته / اسمع انت عارف علاش انا قاعدة معاك .. يكمل موضوعنا وكل حد يمشى فى طريقه
-صلاح / لا حول ولا قوة الا بالله..غلط اللى اديري فيه راهو
-زينب/ امالا نخليك تلعب بيا ونسكتلك
-صلاح / اوووووف علينا عاد .. انتى مش حترتاحى لين تخربيها على روحك
-زينب / انخربت وفات …
وخشت للممر مشت لدار صغارها تشوف فيهم
_________________________________________


فى شقه ليلى …

امال وغزلان قاعدين يهدرزو
-غزلان / نستادنكم توة … خلى نكمل شاهى الرجالة
-امال/ غير قعمزى شوى خيرك مستعجلة ..مننشدك قالتلك هنيدة بنت خالتى عالشقه اللى قلتلها عليها ايامات انتى ادورى
-منيرة وقفت / خلى نعطيهولهم انا ونجيبلكم هنايا
-غزلان / لا لا عادى اهو تو نمشى انا نكمله بسرعه
-منيرة بحزم/ لا لا عادى خليك
ومشت للمطبخ تبى تكمل شاهى التريس وتعطيهولهم
-غزلان استغربت / هنيدة مرت خوى .. لا لا ماقالتليش على شقه ..لكن احنا الحمدلله حصلنا شقه وساكنين لينا قريب نصكرو عام ..بالزبط عشرة شهور فيها توة
-اماال/ خسارة .. والله شقه ماهى عاديه وسط البلاد .. سوق السنابل جنبها خطوة
-غزلان استغربت / حتى انا سوق السنابل جنبى خطوة
-امال/ بلحقة …معناها نفس الجهه اللى قلت عليها لى مرت خوك …
-غزلان ركزت /عماراتنا لونين الشقه اللى قلتى عليها شن لون عمارتها
-امال / ابيض مختلطه بالاخضر
-غزلان / نفس جيهتى …هيا اما دور
-امال/ الدور الثانى
-غزلان ضحكت / سبحان الله نفس مواصفات شقتنا ..اكيدة نفس الجهه اللى احنا فيها
-امال/ شكلها مكتوبتلك مش بعيد تطلع نفس الشقه … وبالامارة عندهم بواب للعمارة واسمه غنوم
-غزلان / لا احنا البواب العمارة اسمه صالح ..معناها مش نفسها …
-امال/ صح معناها مش نفسها ..معناها بالتاكيد وحدة من العمارات اللى حواليها …. انتى من قالك عليها
-غزلان / قالتلى عليها غادة صاحبتى …
-امال / وتعرفتى عالجيران ودرتى صحبه ..نعرفك تحبى الهدرزة احرف منى 😁
-غزلان / لا والله .. ماعنديش هلبا على خلطه الجيران مبشر ميحبش
-امال/ على حكايه جارتى كانو جيران عسل مع بعضهم .. وكانت عندها جارتها اسمها الهام هيا وياها زى الوخيات .. وغنوم بواب عمارتهم كان الى يبوه يجيبهولهم مرتحات 24 قراط
-غزلان / شفتى مش نفسها .. لان مافيش وحدة اسمها الهام فالعمارة نعرف اساميهم …لكن انتى منين لك المعلومات هادى كلها …انتى تعرفيها صاحبة الشقه
-امال / نعرفها ايه .. كانت جارتى تعرفنا لما انتقلت هيا وراجلها للجنوب …غير توة بعدو علينا شوى وسكنو فى منطقه ثانيه
-غزلان / انتى فى اما منطقه فالجنوب
-امال/ انا فى غدامس
-غزلان/ وصاحبتك
-امال/ فى غات
-غزلان / وكيف معرفتيش منها لمن باعوها
-امال/ هما باعوها لى سلفها تاجر عقارات ..وهوا اللى باعها بعد ماشراها منهم بي عشرة ايام.. وهيا مش فالابيض مع سلفها ولا تحب تجيب سيرته

-غزلان تشبحلها حست بحشمه ان مرت خوها فاتتها وماقالتلهاش فحبت تغطى / اهاا توة ادكرت .. ايه قالتلى هنيدة على شقه صح
-امال/ حتى انا حايرة علاش ماقالتلكش
-غزلان / توة بس ادكرت … لكن لما قالتلى وقتها خلاص كنا حصلنا الشقه هادى ……قتلك انتى لامتى قاعدين هنايا
-امال/ ممكن اسبوعين لان ابراهيم ما جاش معانا
-غزلان / اعطينى رقمك الارضى
فتحت امال شنطتها وطلعت بيرو ولقت ورقه قصت منها شوى وكتبت رقمها وعطاته لى غزلان
وقعدو كل مرة حد يخش موليين يهدرزو .. المغرب روحت امال … ودارو مبكبه للرجالة والصغار والنساوين اللى معاهم …ودارت غزلان صغارها وبتروح..اسبوع ليها توة .. وصغار ليلى قاعدة معاهم خالتهم بصغارها
_________________________________________

فى حوش غزلان ….

غزلان ومبشر راقدين فى دار النوم .. مبشر رقد وغزلان ماجاش لعينها النوم ….
وتخمم / انا ليش مش مريضه وطايحه زى الناس اللى يلتبسو .. زعما انا ملتبسه وساكن فيا جنى … لكن صحتى كويسه وبعقلى ..وفوزيه وينها لا حس ولا خبر
تلفتت لى مبشر حطت الغطا عليه بالكويس …
وحطت راسها عالمخدة بترقد لكن رجعلها للتخميم/ وهنيدة مرت خوى ليش ماقالتليش ع الشقه اللى قالتلها عليها امال
…او عالاقل استغربت لما شرينا شقه نفس الجيهه وسكنا فيها …كفت الخبر وسكتت عليه
وتخمم/ بالتاكيد وحدة من العمارت اللى جنبى هيا اللى تقصدها امال .. وبعدين انا لازم نستفسر من صالح البواب
فتحت عيونها / هما ليش معش جونى ولا زارونى الاشكال اللى كنت نشوف فيها
-مبشر قرب منها / قاعدة فايقه
عيطت غزلان
-مبشر/ خيرك اللطف
-غزلان / خلعتنى
-مد يده / تعالى حبيبتى ..
حضنها / ارقدى خلاص
-غزلان / قتلك منسألك
-مبشر مغمض عيونه / شنو
-غزلان / لما بعتت الكرواين والحاجات لى خيمه النساوين ..
فى واحد اسمه القزون بعتهم مصطفى معاه
-مبشر/ ايه خيره
-غزلان / اسمه غريب .. اول مرة نسمع بيه
-فتح عيونه وشبحلها /القزون هدا نفس الشخص اللى زوقنا شقتنا هادى بعد شريناها ماهو مصطفى مقاول ..وهوا يخدم عنده
انخلعت غزلان لاكن سكتت .. لانها بصراحة زيكم حاطه مبشر فى دائرة الشك وحاسه انه عنده يد فى الحكايه من يوم سأل ع الحنتيته
-غزلان / نبى نطلع منها الشقه
-مبشر/ حتى انا زيك …غير خلى نحصلو مشترى
-غزلان تشبحله بحزم / انا بنطلع الايام هادى انأجرو مابين درنا حل لى هالشقه اللى معش تبى تنباع
-ضمها ليه / حاضر زى مانبى غير خلى نكملو الوفاة
-غزلان / قصدك تاخد فيا على قد عقلى
-مبشر/ طبعا لا ..غير ارقدى توة وهالايام بندير حل انا
____________________________________________

وفات اسبوع ثانى ….

كملت الوفاة نهائي .. وقعدت عمتك مريم ام مصطفى مع صغار ولدها ترعاهم باعتبار بو مصطفى متوفى وماعندها شن شاغلها …وروحو منيرة وغزلان لحياشهم …

فى حوش غزلان …

جايينها صاحباتها خاطر سمعو بيها روحت لحوشها
مدتلهم طاسه شاهى …ومقعمزات يهدرزو
-هاجر/ والله موتت حماتك فاجعه .. عقاب الليل تلقينى نايضه من مكانى نمشى لدار صغارى نضمهم ليا ونرقد تقول حتى انا بنموت ونخليهم
-زينب/ بعيد السو عليك يا هاجر .. ربي يخليك لصغارك
-غادة/ لكن انتو معرفتوش شن جاها وشنو اللى خلاها تشنق روحها
-رباب/ اكيدة متخطيه …مستحيل وحدة بعقلها تحط الحبل على رقبتها وتقتل روحها
-غزلان / الله اعلم شن صار معاها ..وشن اللى خلاها ادير هكى …انا واجعينى غير صغيويرتها
-غادة/ اى والله يوجعو ..
-رباب/ خاطرى نعرف اللى بينك وبين منيرة حماتك لا جت على حالك ولا كلماتك طول الوفاة
-غزلان/ زمان لما خطبت هنيدة مرت خوى ماقلتلهاش.. ولانى نعرف ان امال جارة منيرة كانت حماتها كلمتها وسألتها عليها …شكرتها وتمينا الخطبه والفاتحه
-زينب/ باهى هدا مايزعلش
-غزلان / لما سمعت انى كلمت امال وساألتها عليها زعلت قالت كلمتى جارتى وفوتينى
-رباب/ وهيا شن دخلها تفوتيها ولا ماتفوتيهاش… امال هيا اللى كانت حماتها ومعاك حق تسأليها
– غزلان / ماهو عقليات ..قالت لا مفروض قالتلى بنكلم جارتك ومنشاورها ..
-غادة/ النمادج هادى فى كل مكان ..غضب بلا قدو
-غزلان / ليلى اختها عكسها تماما ..بل بالعكس عاركتها وقالتلها انتى اللى غالطه
شرين باب الحوش …

-غزلان / نستادنكم نشوف شكون …
وخشت لدار نومها بتاخد وشاح وبتفتح …

-غادة/ مدامه غزلان مش معانا .. شن رايكم يابنات نغيرولها جوها الايام هادى و نطلعو مع بعضنا رحلة لى اثار لبده او صبراته او اى مكان
-هاجر/ نمشو لى اثار صبراته ..ونقعدو فى فندق ايام ونمشو لهلبا مكانات صبراته محلاها
-رباب/ لا نمشو للخمس .. نقعدو فى فندق ونزورو زليتن والنقيزة .. وفى هلبا اماكن كويسه
-غادة / ماقلتيش رايك يا زينب
-زينب / احم م .. احنا المدة هادى ماشيين لبنغازى
“مابتش تقوللهم للجنوب”
-رباب/ وخيرك ماقلتيش …باهى خلاص نمشو مع بعض.. حتى بنغازى حلوة
-زينب/ انا الحق ماشيين سلفاتى ورجالاتنا مع بعض..هدا علاش ماقلتش
-هاجر/ ماشالله بديتى تتكلمى مع سلفتك سماح
-زينب/ انا شن عندى فيها .. اهو ماشيه زينى زيهم وخلاص
-غادة/ معاك حق صدقتى
اما عند الباب …
فتحت غزلان لقت صالح البواب
-مدلها زوز اكياس/ عطاهملى مبشر لوطا وقالى انركبهملك
-خدتهم منه / قتلك عمى صالح ..انت قداش ليك تشتغل فى العمارة هنايا
-صالح / انا جيت قبلكم بشهر ممكن
-غزلان / اهاا صار انت ماكنتش فى العمارة من زمان
-صالح / لا ليا سنه وشوى
-غزلان / امالا اللى كان قبلك شن اسمه
-صالح / اسمه غنوم
غزلان انصدمت طاحو منها الاكياس
-صالح / بسمالله
قامهم ومدهملها / صحيت
سكرت الباب وخشت وهيا ساكته ..بدت تربط فى الاحداث بى بعضها .. هادى نفس الشقه اللى قالو عليها لى هنيدة
..الحيرة ليش ماستغربتش لما جت تبارك بالشقه ..حتى لو متعرفش انها نفسها …كيف مستغربتش انى بالصدفه سكنت فى نفس الجهه ..وليش ماقالتش ان امال وصتها تقولى على نفس الجهه والعمارة
حطت براد الشاهى عالنار وتسمع فى الارضى يشرين
طلعت ردت لقت صلاح راجل زينب يتصل …
سلمت عليه وتلفتت/ زينب يبيك صلاح
جت زينب للتليفون ردت / باهى اهو تو نجى هى
وصكرت الخط ..
-زينب / يابنات بنروح
-غزلان والبنات / انشالله خير شن فى
-زينب/ عقبونى حماواتى وعزوزتى…. منقدرش نقعد الحق
-غادة / وااااك مالقو امتى يجو الا اليوم
-زينب تلبس فى وشاحها / الله غالب شن بندير هى
روحت زينب ودارت غزلان الشاهى ومداته للبنات
-رباب/ توة كنا نهدرزو يا غزلان ..اقترحت غادة قالت شن رايكم نطلعو مع بعضنا نديرو دورة نغيرو جونا
-غزلان / وين قصدكم
-غادة/ اى مكان نمشو للاثار او زردة او هكى المهم نطلعو مكان بعيد
-رباب/ ونباتو فيه ايام
-هاجر/ انا رائي نمشو لى اثار صبراته ..والله فيه جو ماهو عادى
-غزلان / انا عندى مكان عمرنا مامشيناله وكان نقول لى مبشر مستحيل يرفعنى ..لكن بالرفقه معاكم ممكن يوافق
-غادة/ وين قصدك
-غزلان / للجنوب
-رباب/ قصدك نمشو لى سبها
-غزلان وقفت / نمشو لى غات
وفى بالها تخمم/ لازم نقابل المراة صاحبة امال اللى كانت صاحبة الشقه لازم نوصلها ونستفسر منها لكن قبل مانمشى لازم نعرف شن قصه القزون ومنهوا وشن قصه غنوم
-هاجر/ فكرة حلوة ..ونمشو لى جبال اكاكوس تهبللل
-غادة تضحك/ ومنها نمشو لى كهف الجن
-رباب/ فكينا من البصارة البايخه عاد ما تخوفيناش1
-غادة/ وراس امك فى كهف فى غات اسمه كهف الجن واللى يخش فيه ماعاد يطلع
-غزلان / خلاص متفقين عالمكان وكل وحدة تقول لى راجلها
البنات / تم 😍

_________________________________________

تمت … ويتبع
القصه بتنتقل لى غات وجبال اكاكوس..نشوفو هل بيسلمو هما وصحابهم والا بتصير معاهم مقالب … وهل بتفيدها صاحبة الحوش الاولى ولا ماتعرف شى
وحنعرفو هلبا معلومات على غات وع جبل الجن الموجود فى جبال اكاكوس 😎..
الحلقات الجايه اجمل وفيها كميه استرس اعلى 😊+

حلقه الليله بتنزل فى وقتها بعتالى الساعه 3 ونص او الاربعه هادى حلقه امس
ن ح ب ك م❤

رواية الجثة الرابعه بقلم زهور جمال الدين

الفصل الخامس

خدو صاحباتها واجبهم وطلعو روحو ….

روح مبشر بعد المغرب .. لكن غزلان ماخبراتاش باللى تفقت عليه مع صاحباتها …سكتت وخلاص بيش مايعاندش ..خلى الفكرة تجى من صحابه خير…
دارت العشى ..تعشو ..ورقدو الصغار…ورقد مبشر…لكن غزلان ماجاهاش نوم ..حايرة فى الجماعه اللى كانو يجوها وينهم .. وتبى تعرف شن علاقه مصطفى باللى اسمه القزون ..هيا رجحت انها لما سمعت الاسم جتها تخيلات وقعدت تتخايل فى شكل الجنى اللى اسمه قزون
-وتخمم/ من قال اللى يتابعو فيا جنون
وترد علي روحها / امالا شياطين .. اكيدة جن .. بس شن قصه انتى الرابعه ..وشن قصه اعطيتيها الريحة ..هما يبونى انا نبخ الريحه ولا كيف …وبعدين من حط الريحه فى دار النوم ….
وتلفتت لى مبشر …وهوا راقد فى سابع نومه …
وتخمم/ معقولة اتشكى فى مبشر حبيب العمر .. معقولة مبشر يبيلى الحاجه الحاجه هادى
حطت يدها على شعره / مستحيل مبشر يديرلى حاجه زى هادى …
حطت راسها عالمخدة وتلفتت لى مبشر/ بس انا كيف سمعت اسم قزون تخايلته ..وانا كنت ناسيه انى شفته مهناش فى داكرتى نهائي …مدكرتش انى شفته غير لما نقام الستار وجت عينى فى عينه ..
وتخمم/ بس انا وين شفته ياربي …مش مدكرة لكن مدكرة انه قامنى وحطنى جنب رجليه كأنه بيدبحنى
فتح مبشر عيونه ..انخلعت غزلان / بسم الله
-مبشر/ خيرك انخلعتى ..وليش فايقه لتوة
-حضنااته/ مش جاينى نوم
-حط يده على شعرها ويمس فيه / ارقدى حبيبي ياسرك تخميم
-حولت راسها من حضنه وشبحتله شاكه / تخميم!!.. تخميم فى شنو قصدك
-مغمض عيونه / مدامك فايقه لتوة اكيدة تخممى فأنا قلتلك ياسرك تتخميم حبي
-غزلان / اهاا ….

ورقدو للصبح ..فاقو الساعه 9 دارتلهم الفطور ولبسو ومشو لحوش ليلى بيباتو ..خاطر كان يوم خميس واكيدة حماواتها وسلفاتها يولو …
وبالفعل لما مشو لقو سلفاتها وحماواتها جو الصبح ساريين
والعشيه جوهم صحابهم ماعدا زينب كانت اتوتى فى روحها بتمشى للجنوب وقالولهم ماشيين لى بنغازى
باتو وفالليل يهدرزو مع بعضهم
-غزلان / قتلك بنات خالتك نورا وفوزيه غريبه معش ولو
-منيرة من راس خشمها/ فوزيه بعتتها الجامعه لتونس سته شهور مشو معاها العيلة كل
-غزلان / اهاا…ربي يهنيها وانا نقول معش شفتها ولا تلاقينا
-امنه بنت عمهم / غير الكلام بيناتنا قالو حتى ترا كيف البنيه نورا تنوض عقاب الليل تعيط وتقول يجرو وراى
-منيرة / لا لا داسينه الكلام مايبوش يطلعوه فكك بنت عمى
-غزلان اتأثرت / معقولةةةةةة
عزوز جنبهم راقدة جنبهم .. تكون خالة مصطفى تسمع فيهم وساكته
-سليمه / قتلك
-تلفتتلها امنه / نعم خالتى حدود تبى نجيبلك حاجه
-عمتك حدود / خيرها بنت خالتكم التبست ولا كيف
-انخلعت امنه/ لاااا انا ماقلتش التبست …قلت تحلم بس
-منيرة/ ماهو قلتلك داسينها ومايبوش ايقولوها ..انتى شن لازك
-حدود / خيرك خفتى اللطف رانى مش متعت دوة ..لكن نبى نقولك راهو الجنى ولا الجنيه مايخاف من شى غير المسك
-غزلان باهتمام / مسك شنو
-حدود / مسك الطهارة والمسك العادى…ومدابيها تقرا عليه ايات من الدكر الحكيم تمشى امورها ميه ميه
-غزلان فرحت / حتى هادى فكرة
-منيرة/ احنا مانندرو على شى ومادخلنا فى شى

وسكتو عالموضوع وغزلان المهم عندها انها خدت الزبدة ..
والمسك عندها منه فالحوش ..ورقدو
وثانى يوم الجمعه قعدو لى الليل وبعدها روحت غزلان وصغارها لى حوشها
________________________________________

الجمعه فالليل فى حوش ميسر
بعد ماروحو من حوش ليلى دوشت لصغارها وعشتهم ورقدتهم ….وخشت دارت دوش طلعت لدارها عبت جسمها بى المسك ..ايديها رجليها راسها فالاخير حكت ايديها وداراته على وجهها .. وطلعت مشت للمطبخ ودارت شاهى خفيف وبريوش وجاباته لى مبشر فى الصالة وقعمزت تهدرز
-مبشر/ قالى محمود شن رايك نديرو جولة نغيرو جونا
-غزلان / والله
-مبشر/ تو دايرة روحك مش عارفه.. ماهو اكيدة نساوينهم قالولك
-خدت طاسه الشاهى مدتهاله/ امتى بيقولولى واحنا ماقعدناش بروحنا بكل
-خدى طاسه الشاهى/ انا قلتلهم توة صعب نطلع.. اختى ماليهاش اسبوعين حتى راجلها وصغارها يوجعهم خاطرهم
-غزلان / لاااا معاك حق
-شرب من الشاهى ونزل الطاسه / قلتلهم كان بتراجونا لى بعد الاربعين باهى وكنهدا براحتهم
-غزلان / كلامى منطقى
-حط طاسه الشاهى/ يعنى ماسألتينيش وين ماشيين .. غريبه كأنك تعرفى
-خدت طاسه الشاهى وطرف بريوش / حبيبي خيرك ..لو نعرف علاش بنتحشم منك
-مبشر/قالو بيمشو للجنوب..لكن انا قلتلهم نمشو للخمس احسن.. عالاقل اقرب مسافه
-غزلان / لاااا عادى وين مايبو يمشو باهى …
قامت راسها تلفتت لرواشن .. شبحت من مرش الشباك هنيه وعلى واقفين قدام باب المطبخ ويسمعو فيهم
وتصكها عيطه وتلوح طاسه الشاهى تجى على رجل مبشر حرقاته يجى واقف …وتجرى غزلان تتعلق فى رقبته
-وتعيط / وراى …واقفين وراى شوفهم هنيه وعلى2
-مبشر واقف /منو هنيه …ومنو على
-غزلان ترعش باللى فيها / تشبح فيهم والا لا
-مبشر/ حبيبتى مانشبحش فيهم وينهم
يباعدلها فى راسها يبيها تتلفت وتشبح انهم مهناش لكن هيا مابتش وخلت وجهها فى حضنه
قعمز عالصالون وحطها فى حجره وقعد ضامها ليه / اششش
خلاص حبيبي حصل خيرر…

________________________________________

ثانى يوم …..

زينب وصلاح وصغارهم ركبو طيارة ونزلو للجنوب …
صلاح عنده مصلحة الله اعلم شنهيا …خلى زينب وصغارها فى الفندق وخدى تاكسى نزل لى غات
المصلحة اللى يبيها لقاها بتعطل اسبوعين ثانيات
ففضل انه ياخد صغاره ويرجع لى طرابلس ….لكن زينب عندت .. وقالتله نبى نقعد يومين هنايا انريح راسى

وبالفعل قعدو فى سبها قريب 4 ايام وبعدها روحو …قالو لصغارهم ان هادى بنغازى بيش حتى لو تلاقو مع صحابهم وسألو الصغار بعضهم يقولولهم انهم مشو بنغازى
بس شنهيا المصلحة اللى بياخدها صلاح من الجنوب معرفناهاش شنهيا
______________________________________

يوم الاربعين ….

ليلى دارولها ختمه .. واتفقو ان ام مصطفى هيا اللى تقعد مع الصغار …
بعد ماكملو الحويسه و غزلان توتى فصغارها بيروحو ..خشو مبشر ومصطفى لقو غزلان فى السقيفه ادور فى كنادر الصغار
-مبشر / شنو واتيين
-غزلان / واتتين ايه
-وتلفتت لى مصطفى / قتلك يا مصطفى مننشدك على واحد يخدم عندك يومها جابنا الكراوين اسمه القزون
-مصطفى/ والله مانعرفه جانى اليوم اللى قبله يترجى ويبي يخدم عندى وافقت..يوم وفاة ليلى لزيته قلتله وجهك شؤم
-غزلان / قصدك ماتعرفاش زمان
-مصطفى / ولا عمرى ريته
-مبشر تكنطى/ وانتى منين تعرفيه الراجل
-غزلان / مانعرفاش لكن لفت نضري اسمه غريب
-مصطفى/ انا والله كان مش من اسمه القزون مانخدمه عندى ..شن بندير بيه
سكتت غزلان وزبطت ان فى شى غريب فى الامر
ويسمعو فى صوت منيرة تبكى فى الصالة ..خشولها مبشر وغزلان ..ولكن مصطفى خش للمربوعه ماعنداش هلبا دوة مع منيرة
-منيرة تبكى/ هدا حال الدنيا .. اللى مشى مشى على روحه
وصغارها يبو من يرعاهم وانتى قداش منك يا حاجه
-الحاجه فاطمه / لاااا صغار ولدى والله مانسيبهم
-منيرة / الاخت اختى ..ومفيش حد بيحزن عليها زينى انا .. لكن الصغار يبو من يرعاهم دوريله يا حاجه مسامح
-مبشر واقف جنبها ضمها ليه / عين العقل وخيتى .. الحى اولى من الميت
-فاطمه / لاااا هوا هدا ….

مبشر بلغ مطصفى ومنيرة انه ماشى للجنوب مع صحابه ..
منها عمل ومنها يغيرو الصغار جوهم …
وسلمو عليهم وروحو …وسقدهم مصطفى للسيارة
وهما فى الطريق
-غزلان مغصوصة/ قصدك كان متت انا بدير هكى من يوم اربعينى بدور على مراة ثانيه
-قام يدها باسها / اكيدة لا حبيبتى
-تلفتتله/ كداب …انت توة تقول الحى اولى من الميت
-مبشر بهدوء/ الصغار يسمعو فينا حبيبتى
-غزلان / معقولة بعد حب سنين تبيعنى …انا معرضه كل يوم للموت …معناها فى شهرين تجيب مراة وتملى حياتك ولا كأن فى حد ضاع منك ..بينما انا لو لا قدر الله تصيرلك حاجه استحالة نخونك او نتلفت لغيرك من بعدك
-مبشر/ حبيبتى
-غزلان / اسكت معجبنيش كلامك
-حط يده على كتافها / خلاص حبيبي عاد
-بعصبيه حولتله ايده من وراها / حول
اختل منه توازن السيارة قعدت تلعب فى الطريق ..والصغار يعيطو …
طول دور الدومان يمين وشد فرينو بيش وقفت السيارة
وتلفتها/ غزلان …حبيبتى صارلك حاجه
وتلفت لصغاره / يمنى بابا تعالى انتى وخوك
-غزلان/ نحس فى رجلى اليمين حصلت
-مبشر/ كيف
-غزلان / مش عارفه
جوهم زوز سيارات شافو لما السيارة اختلت لحقوهم ..درسو جنبهم
-نزل صاحب السيارة الاولى / الف لاباس عليكم شن صار
-مبشر غيور/ لا لا ماصارش شى ..مشكور
-نزل صاحب السيارة الثانى شاب/ لاباس عليكم اوخى
-مبشر/ صحيتو السيارة اختلت منى شوى ..لكن الحمدلله
-صاحب السيارة الاول/ العويله والصغار كويسين
-مبشر/ الحمدلله كويسين .. صحيتو ياشباب ربي يحفظكم
-صاحب السيارة الثانى/ اوخى خلى نوصلوكم بالك السيارة فيها حاجه ارجعلها حتى غدوة
-مبشر/ لا لا صحيتو ربي يبارك فيكم

ركبو سياراتهم ومشو …..

ولف مبشر لى باب غزلان …بيش يفتحه ويشوف رجلها خيرها …
فتح الباب ونزل يشوف فى رجل غزلان خيرها واحلة
يسمع فى صوت من وراه / تبى مساعدة خونا
-رعش مبشر مع بعضه وتلفت وراه / انت منين طلعت …
ولكنه مالقى حد 😱😱😱😱………….
تلفت/ غزلان سمعتى الصوت ولا
-غزلان خافت/ سمعته ايه وقالك تبى مساعدة خونا
-مبشر رعش وتلفت وراه يشبح فى حد ماشى من بعيد اشر بيده / هويناه .. شوفيه وين وصل
-غزلان / بي هالسرعه …
ولمعت حاجه فالارض ..شافتلها غزلان لقتها مفتاح قديم كبره مش طبيعى ..اكبر من المفتاح العادى
مدت يدها وخداته / هدا شنو
عطاته لى مبشر ….
مبشر/ مفتاح قديم … شن جابه هنايا
-غزلان / شوف مكبره …هدا لا يجى متع حوش ولا متع دولاب
طيحه مبشر عالارض / ياودى مادخلناش فيه …
وشبح لولده / جيب شيشه الميه وتعالة صب عليا يا بارى
-عبدالبارى / حاضر بابا
ولف لى جيهه السواق …وطبس وولده يصب عليه يغسل فى يده …
انتهزت غزلان الفرصه ومدت يدها خدت المفتاح …حطاته تحت فرشه الدواسه اللى تحت رجليها منغير ماينتبهلها مبشر
وكملو طريقهم وروحو لحوشهم …بيش بيدرسو السيارة لداخل جنب العمارة لانهم غدوة بيسافرة …
وصلو لكن غزلان تبيش تنزل هيا الاولى بيش تاخد…المفتاح منغير مايشوفها هوا ….
وهوا خاش نادى على صالح / تعالى يا صالح وراى
درس مبشر السيارة وتلفت لى غزلان / انزلى انتى والصغار اركبو فوق بيش نوصى صالح عالسيارة
نزلت غزلان وماعرفتش كيف تتلفت تاخد المفتاح منغير مايلاحضها هوا … تلفتت لقاته يشبحلها لكن مقدرتش تنزل تاخد المفتاح من تحت الدواسه …
خدت صغارهاوماشيه بتركب من الدروج…

مبشر /صالح جيب القيطون خلى نغطى بيه السيارة
-صالح/ باهى هى لحظه …
مشى صالح بيجيب القيطون من تحت الدروج.. لقى غزلان كيف راكبه هيا وصغارها
-صالح / اختى غزلان
-غزلان / نعم عمى صالح
-صالح/ انتى سألتينى على غنوم وتبى اراضيه
-غزلان باهتمام/ عرفته وين
-صالح/ قالولى الشركه بعتاته لى غات
-غزلان / مش معقولة
-صالح / والله زى مانحكيلك
مبشر ينادى/ هيا يا صالح
-صالح / هيا اهو جيت
وخدى القيطون وسكرو السيارة كويس .. وغطوها …
وقعد هداكه المفتاح وسط السيارة !!!!!!!

______________________________________

فى الليل
غزلان ومبشر راقدين فى السرير
-مبشر/ تى كيف هادى رحلة وهكى الصح نكونو مع بعضنا فى سيارة وحدة
-غزلان / بلحقه ..قصدك منمشو فى سيارة وحدة
-مبشر/ انا اللى اقترحتها عليهم ..
-غزلان / صغار وحوايج وحاجات ..كانا كل عيلة مشت فى سيارتها خير
-مبشر/ لا لا حلاوتها سيارة وحدة ..مع بعضنا نضحكو ونبصرو واللى بينا بيهم
-تلفتت غزلان للجهه الثانيه / على راحتكم ..
-مبشر/ صلاح بيلحقنا
-غزلان / ماقالتش زينب
-مبشر/ قال عالاتصال …ممكن يكلموه الاسبوع هدا وممكن يكلموه الاسبوع الجاى هوا والحظ
-غزلان/يقدرو يمشو معانا الاسبوع هدا حتى لو ماكلموشى ..
ويرجع الاسبوع الجاى بعد يكلموه
-مبشر/ لااا ماهو هيا ساهله تحسابيها مش حجز تدكرة وفندق …فلوس راهى
-غزلان / عموما براحتهم …
-مبشر اتكى ويحط فى اللحاف عليه / مش تخلينا راقدين غدوة بيفوتو علينا الساعه 7 راهو
-غزلان / كيف بديرو ..من بيجينا غدوة مدامه سيارتك درستها
-مبشر/ بيفوت علينا الشبوب اللى تفاهمنا احنا وياه بيرفعنا .. يدير كلاكس ننزلو طول ونتوجهو الى غدامس
-غزلان / حاضر
وفى خاطرها / توة كانا نقولك نمشو لى غات لاويتك معاند .. خلينى ساكته ولما نوصلو ساهل
__________________________________________

جاهم الولد من الصبح فات على مبشر وعويلته هما الاولين لانه اقرب وحدين ليه
نزلو غزلان ومبشر وصغارهم …هوا لابس سروال ادجين وتيشرت مخطط ..وهيا لابسه عبايه لان مبشر غيور يبيها فى الاختلاط تلبس عبايه بس
-مبشر/ صباح الخير عمورى
-عامر/ صباح الورد يا مبشر …
-مبشر/ انت بتقعد اسبوع مننا وفينا ..هادى اختك غزلان .. وهادو صغارى يمنى وعبدالبارى
-عامر/ تشرفت بيك اختى وبالصغار
-غزلان / تشرفنا بيك وخى
وفاتو على باقى الجماعه …غادة وهاجر ورباب…ورجالتهم وصغارهم ….
ركبو فى هاديكا الباص وهاتك يا ضحك محمود يحب ينكت وديما نكته جدد …حتى عامر انسجم معاهم ويضحك …

وصلو غدامس قيس الساعه 12 فالليل لانهم وقفو فالطريق وتغدو وشرو حاجات … درسو قدام فندق حاجزين فيه من قبل مايطلعو من طرابلس
شدو النساوين صغارهم وخشو للهول ( الصاله اللى وسط الفندق اسمها الهول) …
ومشو عاملين الفندق جابو الشناطى من الباص
ومدو الرجالة كل واحد جوازه وجواز مرته وعطوهم غرف .. وركبو للطابق الثانى
جى بعدهم واحد وقف عالريسبشن ويشبح فيهم كيف ماشيين والصغار اينقزو
-الشاب اللى واقف فى الريسبشن / تفضل خوى
-الشخص/ نبى حجز غرفه ليا ولامى مع بعضنا
-الشاب مد يده / جوازك خوى
الشخص مد جواز وعطاه للشاب …
قامه الشاب يقرا فى الاسم / القزون حمد
-القزون ضحكته شينه / ايه اسمى القزون
-الشاب/ جواز امك
مدله جواز
-خداه الشاب قري الاسم / هنيه
القزون مبتسم / ايووووه اسمها هنيه
-الشاب/ وينها تتفضل
-القزون يضحك/ هيا فى السيارة رجليها يوجعو فيها تستريح شوى ونجيبها
-الشاب / باهى براحتكم+
________________________________________

نفس الوقت فالليل ….
شرين تليفون حوش منيرة …ردت
-امال تبكى/ ياوخيتى حاق اختك ليلى ماتت …ووه عليا ليلى للباهيه قداش وجعتنى
-منيرة / انتى شكون …
-امال/ انا امال جارتك نكلم فيك من الجنوب خيرك معرفتينيش
-منيرة / من الجنوب!!!!.. انتى فى حوشك ولا …
-امال / لا لا مزال مامشيتش طرابلس
-منيرة ارتعبت / امالا منو اللى جت عزتنى قبل شهر 😱!

____________________________________

تمت …ويتبع
الحلقه الجايه نشوفو كيف بيصير فى الفندق …
ومنو بيرد على اتصال منيرة لى خوها
نحبككككم ❤

رواية الجثة الرابعه بقلم زهور جمال الدين

الفصل السادس

وصلو غزلان وصحباتها ورجالاتهم لى الفندق فى غدامس
وقدمو جوازاتهم وخدو شناطيهم وركبو لغرفهم …
ماشافوش اللى وقف وراهم وحجز …المشكلة ان لو تلفت مبشر او غزلان كانو عرفوه …لكن الحظ
ركبو من الدروج تعبانين وهلكانين …
عامر تلفت لى مهيمن تصاحبو فالطريق/ ندمت انى ماجبتش مرتى وصغارى معاىوالله كان ندرى بنتآلفو وبتعجبونى راهو جبتهم معاى عالاقل تعرفو النساوين على بعض
-مهيمن/ مفروض جبتهم معاك يا راجل عارف الرحلة قريب خمسه ايام
-عامر/ صراحة قلت مدامهم حاجزيلى الغرفه نرقد خمسه ايام ونرتاح الكريه فلوسها باهيات
-مهيمن / لا تستاهل الحق .. صحة ليه اللى خمم فحكاية نمشو فى باص واحد ..اقل تكلفه للبنزين ويحوز سيارة تفسد
-عامر/ لا احسن امالا شنو
-غادة قدام غرفتها تنادى/ مهيمن
-عامر يضحك / سعدك ناداك …برة انت وخلينل انا مقابل الحيوط
-مهيمن يضحك/ نستادنك توة ….
ومشى للغرفه …وخش عامر غرفته الواقعه جنب غرفه مبشر لاصقه فيها …..

حط شنطته ..وفتح الدولاب بيعلق حوايجه ….

_______________________________________

فى غرفه مبشر …

-يمنى/ بابا هيا ننزلو للالعاب لوطا
-مبشر/ توة فى هالليل…توة خلاص نوم ..وغدوة ننزلو ونلعبو ونديرو كل شى
-عبدالبارى / احنا جيعانين
-مبشر/ توة ليل ومطعم الفندق صكر ..
تلفت لى غزلان / جبتى معاك جبنه ولا بريوش فى الشنطه
غزلان سرحانه
-مبشر/ حبيبتى نكلم فيك ..
تلفتتله غزلان / نعم
-مبشر/ انتى ليك ايام مش عاجبتنى راهو
-غزلان / عادى خيرك غير سرحت من التعب
“غزلان معش تبى تشكى لى مبشر لانه ياما شكتله وفاتها وماصدقهاش..ومالاخير توة شاكه فيه حتى هوا ”
-يمنى/ قالك بابا جبتى جبنه ولا بريوش فى الشنطه
-غزلان بهدوء/ جبت ايه …
وقفت فتحت الشنطه وطلعت منها كيسه وسكرت ابشنطه
-مبشر/ خيرك سكرتى الشنطه مش بترتبى الحوايج
-غزلان / حااااضر… غير خلى نعطيهم ماياكلو
-مبشر مبتسم / حتى انا جعت
-غزلان / حاضر نحسبك معاهم
-عبدالبارى / وانتى يا ماما
-غزلان / سلم اوليدى النشاد عليا ..لا لا مش جيعانه انا
فتحت الكيسه اللى طلعتها .. طلعت منها كيسه بريوش وقوالب زبدة وباكو جبنه ابو الولد😍… ودارتلهم سندوتشات كلوهم مع عصير السنتوب ….1

_________________________________________

فى الريسبشن ….

صلاح صاحبهم كيف واقف هوا ومرته وصغاره الزوز …
كيف وصلو من المطار
شرين الخط …. رد الشاب اللى واقف توكه ليلتها اسمه احمد
-احمد / الووو
-منيرة/ السلام عليكم كيف حالك اوخى
-احمد / وعليكم السلام يا حاجه انشاءالله خير
-منيرة / غير بننشدك عندى خوى ماشى اليوم لغدامس ومش عارفه امافندق نازل …جابلى زوجى دليل الفنادق وكل مرة نتصل بي فندق نبى نعرفه وين
-احمد / تفضلى اختى خوك شن اسمه
-منيرة / اسمه مبشر .. واهله اسمها غزلان
-احمد / لحظه نشوف الجوازات …
حط التليفون وطلع الجوازات اللى حاجزينهم من الزباين
خدى التليفون / اهو عندنا جوازه اختى معناها نازل عندنا
-احمد / وراس اوخى عطينى نكلمه …

صلاح انتبه ان اخت مبشر تبيه لانه سمع كلمه خوك شن اسمه……
-صلاح / يبو مبشر
-احمد / هادى خصوصيات خوى منقدرش نفصحلك عليها
-صلاح / باهى غير قوللها يا منيرة يبيك صلاح صاحب مبشر
-قام الشاب التليفون / اختى فى شاب اسمه صلاح يقول انه صديق مبشر خوك ويبيك
-منيرة / هاته نكلمه وينه صلاح
عطى احمد التليفون لى صلاح / تفضل نبيك
-خدى صلاح التليفون / ايوة اختى منيرة شنحالك
وزينب تتفرج عليه وحايرة منين هالطيبه منين نزلت عليه
-منيرة / اهلين بيك يا صلاح شنحالك انت وزينب وصلتو كلكم لاباس
-صلاح / انا لحقتهم وكيف وصلت توة …
وتلفت عطى لى احمد متع الريسبشن بالضهر بيش مايزبطاش كداب😁/ لقيتهم كلهم طالعين مبشر والجماعه .. وقالولى ممكن يروحو متاخر ..انتى تبى حاجه قوليلى تو نوصلهاله انا
-منيرة / انا صارت معاى حاجه انا ومرته ولازم يكون عنده بيها علم
-صلاح / احكى شنو
-منيرة/ زارتنا الغولة فى حوش ليلىى… جتنا وحدة جارتى غادى وعزتنى وتوة اتصلت بيا قالتلى لا جيتكم ولا ريتكم
-صلاح / بالشويه اختى منيرة وحدة وحدة خلينى نفهم
-منيرة / اهو نفهمك بالشوى
وقعدو يحكو اكثر من ربع ساعه ..ولما كملو وصكرو الخط كان احمد مكممللهم حجز …
خدى الولد الشناطى ومركبهم للغرفه
-زينب / خيرها منيرة شن تبى
-صلاخ / تصدقى والله مافهمت منها كلمه
-زينب/غير بجديات خيرها فهمنى …هيا عااااد احكيلى

وركبو لعند فوق وهيا اا حصلت منه حق ولا باطل
-صلاح/ ردى بالك تقولى قدام مبشر وغزلان ان منيرة كلمت وردينا عليها احنا
-زينب/ لا لا منقولش بادن الله ..شن لازنا احنا
-صلاح / عارفها ادير فى افلام تبيه ايروح …ومبشر ودنه
عند خواته لو قالتله روح ح يروح وايضيع علينا زردة حلوة
________________________________________

بعد ساعه
رقدو اللى فالفندق كلهم ..والفندق بدى هدوء ….وكلهم ماسمعوش ان صلاح لحقهم وحجز فى نفس الفندق ..صلاح كان يبي يديرها مفاجئة
الغرف اللى سكنو فيهم عبارة عن سرير زوجى كبير وجنبه زوز اسرة صغار من الجهه الثانيه من الغرفه …لكن غزلان ومبشر ماهانوش عليهم صغارهم ورقدوهم معاهم على سريرهم فالوسط
السرير لاصق فى الحيط وغزلان راقدة عالطرف من الجهه اليسار ….
تسمع فى حد ينادى فيها / غزلاااااان …..غزلان نوضى معش وقت
كأنها فى الحلم تتخايل فى هداكه الجوكر وهوا ينادى فيها من ورا الحيط ….لكن عيونها مفتوحه
وزاد الصوت تعلى/ غِزلااااان غِزلاااان
فتحت عيونها تلاقى هداكه الجوكر مقعمز قدامه يحط يده على فمها بيش ماتعيطش / اشششششش هدوءءءءءء
وتشبح فى الباب انفتح ….وهيا متاكدة انها فايقه مش راقدة ….
خشو خمس رجالة شادين بنادير وقفو صف مع بعضهم .. وفى وسط الغرفه انحفرت حفرة بدى فيها زى الجمر …
وبدو يحطو فالبخور تغبت الدار معش يبان منها شى وتشبح فى حاجه تقرب منها ووجهها مش واضح من البخور …لما قربت منها تلقاها عمتك هنيه
-هنيه / غزلان بنتى ستاحشتك ….
وتضحك …سنونها يبانو كلهم دم …..والقزون قاعد حاط يده على فم غزلان وهيا تحته زى الطير المدبوح تتحرك بالقوة تبى تحرك ولدها عبدالبارى لانها جبها لكن يدها مش قادرة توصله ومش قادرة تعيط …

بدت البنادير تضرب….وخشو عزوز وبنتها .. وبدو يرقصو عالبدير .. وغزلان بتموت مالرعب .. البنت عيونها فيهم ضى والعزوز عيونها مشحمات ومضروبات وشعرها ابيض فاتحته على وجهها …البندير يضرب والعزوز اللى كانت ترقص جايبه فازو فتحاته موجود فيه زيت اسود زى القطران… تبى تدهن بيه شعر غزلان .. حطاته عالطاولة ومدت ايديها لرقبه غزلان وهيا تخنق فيها وغزلان تحتها تفرفش..وجت البنت مع امها وحتى هما نفس الشى يخنقو فيها .. معش قدرتهم هما زوز وهيا وحدة ….. والقزون حاط يده على فم غزلان ويضحك وهيا تتحرك تبى تفك نفسها منهم

وفجأة بدى باب غرفتهم يطق👋👋👋 …..

اختفو كلهم فلحظه جماعه البندير وههنيه والقزون والبنت وامها …..وكلهم مهناش
فاق مبشر مخلوع مشى يجرى للباب فتحه يلاقى عامر السواق واقف قدام الباب
-مبشر/ شن فى يا عامر خيرك
-عامر تحشم/ سامحنى كأنى سمعت صوت فى غرفتكم ولا انا غالط
غزلان تسمع فيهم ومنهارة راقده على سريرها وساكته كأنها راقدة..تتخايل ان فى حد بيخنقها وخلاص مش مدكرة اللى صار …
-مبشر/ بالك كنت تحلم خوى عامر احنا راقدين راهو ومافينا شى
-عامر/سامحنى خوى امالا شكلى كنت نحلم من التعب تخايلت هكى
-مبشر/ لا مسامح اوخى …
خش مبشر شبح لى غزلان وصغاره اتاكد انهم راقدين …
بالرغم غزلان فايقه غير دايرة روحها راقدة …ورقبتها توجع فيها حالة من الخنق فى رقبتها ….وبعدها طول غشاها النعاس ورقدت …

__________________________________________

فاقت غزلان الصبح من النوم قبل مبشر وصغارها ..نست اللى صارلها كله .. خشت الحمام توضت وطلعت صلت .. ورجعت قعمزت فمكانها حست انها منهارة من التعب …تشبح قدامها لقت فازو …
وقفت تحركت خطوتين وقفت قدام الشكماجه …وقامت الفازو بين ايديها … تفتحه خافت…
وفى خاطرها / هدا شنو اللى فى الفازو .. تبأن كإن ايدين اخطبوط يابسات حاطينهم فى زيت اسود …
وحايرة / خيره الزيت اسود هكى ..غريبه
حست بحركه وراها رعشت مع بعضها تلفتت لقاته ولدها عبدالبارى فاق …
-عبدالبارى / صباح الخير ماما
-غزلان / صباح الخير عبودى
-عبدالبارى/ هيا مش مننزلو بنفطرو تحت ومنمشو للالعاب
-غزلان / خلى ينوضو اختك وبابا وننزلو مع بعضنا
-يمنى من مكانها / انا فايقه يا ماما هيا ننزلو نفطرو ونلعبو
-غزلان تضحك/ ياشريرين ..خلى ينوض بابا قبل
-مبشر فمكانه / انا فايق ماما هيا ننزلو نفطرو ونلعبو
قعدو يضحكو عليه ونقزوله صغاره يتعاركو باللعب …
-غزلان / باهى هيا اغسلو وجوهكم وبدلو سقدو هى
مبشر وولده قاعدين يتعافرو ويمنى جت لامها / شنو الفازو هدا اخىىىىى لونه اسود
-غزلان تبيش مبشر يشبحه لانه مش زابطه من حطه / هدا زيت علاج لشعرى جبته معاى ..
وناضت خداته ومشت للدولاب فتحاته لقت خزنه صغيرة زى ما موجود فى كل فندق …عدلتها ودارتلها رقم سرى فيسع وحطت الفازو فيها وصكرت الخزنه ….
ونلفتتلهم لقت مبشر قاعد يلعب مع ولده وجتهم حتى بنته
-غزلان / هيا عاااد سقدو….
ناضر مبشر خش للحمام هوا الاول ….وطلع صلى
ودخلت غزلان صغارها دوشتلهم وطلعتهم بتلبسلهم لقت مبشر واقف عالخزنه بيحاول يفتحها
-رعشت لانها تبيشى يشوف الفازو/ خيرك شن ادير
-مبشر/ نحاول نفتح الخزبنه لقيتها مصكرة
-غزلان / وانت شن بدير بيها
-مبشر/ نحط فيها فلوسنا اللى جبناهم معانا وبطاقتى الشخصيه وفلوسنا
-غزلان / كيف تخلى حاجتنا هنايا …لاااا فلوسنا وبطايقنا نطلعو بيهم ونخشو بيهم …كيف تأمنلهم وتطلع
-مبشر/ حتى هدا راى

كملو تغيير ملابس .. وغزلان لبست حجابها… طلعو قدام غرفتهم فى الممر يسمعو فى دوشه لما قربو لقو انور يسلم على صلاح وهااجر تسلم على زينب …
مشت غزلان للنساوين تسلم ومشر مبشر يسلم على صلاح
ونزلو لمطعم الفندق يفطرو
________________________________________

قعمزو فالمطعم على طاولة كبيرة فطرو مع بعض …
الفندق مش مليان هلبا ….
كملو فطورهم…وجهزو الصغار نفسهم يبو يمشو للمسبح يلعبو .. وبالفعل رفعوهم ومشو يلعبو .. الرجاله فى خيمه الارقيله …و النساوين قعمزو ع طاولات المسبح ويهدزو
-غزلان / نستادنكم ناخد فى علاج ولازم نستريح عليه شوى
-غادة / الف سلامه عليك حبيبيتى علاج شن تاخدى فيه
-غزلان /تو نحكيلكم عليه بعتالىى…توةةخلى نركب وتو نجى
وتلفتت عطت بالضهرر..تيى تركب وفى قلبها لازم نشوف الفازو وشنو فيه ….
ركبت من الدروح… مشت لى دار النوم خشتف وصكرت الباب وراها …مشت للكاصه فتحتها تبى تشوف الفازو
فتحت باب الخزنه وادا بيها تلاقى الخزتة فاضيه …
ارتعبت / وين فازو العسل !!؟؟؟

________________________________________

نزلت غزلان وهيا مرعوبه ..

مشت للهول بيش تخش باب المسبح لقت شيخ شكله فى عمر الخمسين مقعمز بروحه يقرا فالقران بصوت واطى.
..انتهزت فرصه ان راجلها مع الصغار والهول مافيشى حد منهم …قربت من الشيخ …
غزلان / السلام عليكم يا شيخ
-الشيخ صكر كتاب القران/ صدق الله العظيم
-قام الشيخ راسه / وعليكم السلام يا بنتى
-غزلان عيونها مدمعات/ ممكن نسألك بعض الاسئله ياشيخ
-الشيخ / هدئ من روعكى وتفضلى اسألى
-قعمزت غزلان … هدت شوى .. غمضت عيونها / انا يتبعو فيا جنون .. ويطلعولى ..
وفتحت عيونها/ هل انا فى حلم والا فى علم ..المقصود هل الجن يطلع للانسان على هيئة انسان
-الشيخ / اى نعم يطلع على هيئة انسان ويكلمنا ويطلع للسوق ويشترى يقول تعالى بسم الله الرحمن الرحيم ( انه يراكم هوا وقبيله من حيث لا ترونهم )
-غزلان / معقولة !!!!.. مكنتش نعرفها المعلومه هادى…انا نعرف الايه اللى تقول
-الشيخ / يضهر الجن على هيئة الانسان وعلى هيئة العوامر
-غزلان / شنهما العوامر ..
-الشيخ / العوامر هيا الحيات والثعابين التي تكون في البيوت
-غزلان واطت راسها / باهى سامحنى يا شيخ عندك دليل ان الجن ضهر فى الدنيا على هيئة انسان .. او العوامر اللى قلت عليهم …
-الشيخ / طبعا … بالنسبه للعوامر قال شيخ الإسلام ابن تيمية – رحمه الله – : والجن يتصورون في صور الإنس والبهائم ، فيتصورون في صور الحيات والعقارب وغيرها ، وفي صور الإبل والبقر والغنم والخيل والبغال والحمير ، وفي صور الطير ،
ولعلمك يابنتى يطلع حتى في صور بني آدم ، واندكرت فى حديث ابن تيميه نفسه
قال انه قد جاء على صورة إنسي لأبي هريرة يدَّعي الفقر والحاجة ،
وروي أنه قد تشكل على صورة ” سراقة بن مالك ” .
كما أتى الشيطان قريشا في صورة سراقة بن مالك بن جعشم لما أرادوا الخروج إلى بدر ، قال تعالى( واد زين لهم الشيطان اعمالهم وقال لا غالب لكم اليوم من الناس وانى جار لكم فلما تراءت الفئتان نكص على عقبيه وقال انى برئ منكم انى ارى مالا ترون انى اخاف الله والله شديد العقاب )

-غزلان / قصدك الايه هادى مقصود بيها الجن
-الشيخ / طبعا تشكل على هيئة انسان وخاطب الناس وشافوه كلهم مرى العين
-غزلان / انا مكشوف عليا ومشوف فجنون ويديرو فى حضرة ويدكرو فى اسم الله
-ابتسم الشيخ / هؤلاء مسلمون
-غزلان / قصدك فيهم مسلم وفيهم كافر
-الشيخ / بالطبع . .. بس بنتى تخافى هادى جثامه …
-قصت عليه / لا يا شيخ والله انى نشوف فيهم
-الشيخ / ربي يفك كربك يا بنتى بس لما تضايقى منهم اقري ايات من الدكر الحكيم وانشالله ربي يفرج
وقف/ نستادنك
-غزلان / ادنك معاك ….
وطلع من الفندق
___________________________________________

غزلان مازالت مقعمزة ومزال مالقتش ايجابه مقنعه عاللى يصيرلها ..وهيا جايه اصلا بيش تقرب من كهف الجنون يابيها ماتت .. يابيها روحت سليمه
مشت للريسبشن / لو سمحت عندكم مرشد سياحى
-الشاب/ طبعا اختى عندنا احسن مرشد فى الجنوب اسمه الصافى
-غزلان / معليش نبى نكلمه
-اشر بيده / هوينا اللى واقف جنب الباب فيسع الحقيه بيطلع
تلفتت لقت رجل فى عمر الاربعين طويل اسمرانى لابس لبسه التوارق وداير زماله على راسه ومغطى بيها فمه وخشمه ماباين منه الا عيونه
-مشتله غزلان بسرعه / لو سمحت
-تلفتله/ نعم
-غزلان/ نبى نمشى لى كهف الجن
-الصافى ضحك / كهف الجن مرة وحدة
-غزلان / بالله عليك خوى
-الصافى / عادى .. انا اليوم وبعد بكرة بس فاضى
-غزلان / خلاص نمشو اليوم
-الصافى / عادى مفيش مشكلة …من معاك
-غزلان / احنا قروب مع بعض …
-الصافى/ بس نقولك من توة …صغار لا
-غزلان / حاضر ندورو وين نحطوه …بس منطلب منك طلب
-الصافى / شنو
-غزلان / متقولش قدام راجلى وصحابنا اننا ماشيين لى كهف الجن
-الصافى ضحك/ هادى ساهله تو نسميلهم اسمه الثانى
-غزلان / خلاص راجينى شوى انادى راجلى والشباب
وبالفعل مشت نادتهم كلهم واعجبو بالفكرة .. ومسألة الصغار
حلهالهم الولد متع الريسبشن قاللهم هلبا ناس تشد فالصغار هنايا بالفلوس…يا اعطو صغاركم لى عائله هنايا يا جيبولهم مربيه تقعد معاهم على ضمانه الفندق لكن فيها فلوس
وافقو وجتبو جماعه الفندق مربيه تقعد مع الصغار ودفعولهم الرجالة
وصار نقاش ثانى …قالو للصافى انهم يبو يمشو فى الباص متعهم لانهم يبو يكونو مع بعض فى سيارة وحدة
________________________________________

وافق التارقى انه يمشى معاهم فى سيارتهم .. لكن جاب المنظومه متعه اللى فيها الميكرفون وحطها على فودرة السيارة بيش يتكلم بيها لما بيقوللهم على اى معلم او اثار فالطريق..ركبو فى الباص وهما فرحانين … الصغار خلوهم مع المربيه اللى جابهالهم الفندق ..وركبو نساوين ورجالة بس
ومعاهم الصافى التارقى …
طلعت الباص وبدو يمشو ….. وصلو مدينه العوينات .. طبعا هما مايعرفوش اسماء المناطق ..وقف التارقى بيعرفهم عالمنطقه ..
-مسك الميكرفون /احنا توة فى شمال العوينات فى الطريق المؤديه الى مدينه غات
-رباب تشبح للجبال ع يدها اليسار/ اوووو شن المنظر الخلاب هدا .. شوفو جبال صخريه فى وسط الصحراء تقول علينا مش فى ليبيا
وغزلان رابطه جأشها ساكته وخلاص…. جت لى كهف الجن اللى تبى توصله كورجت وخلاص ممكن تجى معاها وممكن تنقلب عليها
-الصافى/ اللى تشوفو فيه على اليسار هوا جبل” ايدينان”..
وهوا على شكل هلال..ارتفاعه 700 متر فوق مستوى سطح البحر طول الجبال المتحاديه تقريبا 30 كيلو متر .. فيها جمال طبيعى وسحر خلاب. ….
-مبشر/ نشهد بالله انه جمال غير طبيعى
وتلفت لى صلاح / من مدة قولتلى عندك عمل فى الجنوب… زرت المكان الجميل هدا ولا موصلتش هنايا
-صلاح /لا لا اول مرة نمشى لغات .. زمان دابى داب غدامس
وبعتالى هما كلهم مرتين جيت فيهم درت منهم قصه
رباب شبحتله😠..ماتحسابش انه مبقبق لصحابه
-غادة/ شوفو هاديكا الصخور تبان كأن شخص راكع لله
-الصافى/ على فكرة من يدخل الى هده الجبال ويتسلقها صعب انه يطلع منها ثانى
-زينب مدهولة فى جمال المضهر/ واااضح ..الداخل ليها مفقود والطالع منها مولود
-الصافى/ زمان يقولو فى واحد مستكشف زمان عام 1845 اسمه جيمس ريتشاردسون قالو جتى بيكتشف المكان وخش وركب للجبل لكن مرض مرض كبير وروح بلاده
-غادة/ ماشالله عالثقافه وحافظ الاسماء الاجنبيه …
-انور راجل هاجر/ بالشويا ياسواق خيرك تجرى خلى نتفرجو على تقاطيع الجبال الحلوة
-الصافى/ ومعاه واحد يقولوله هارى بارت ..لكن المنجوه هارى وصل للقمه ولما بينزل معش عرف الطريق لين لقوه التوارق ملوح عطشان قريب يموت شربوه وانقدوه وحكى انه وصل للقمه
-هاجر/ مالاااك حكايه
-الصافى/ لكن بعد سنين…..

جنب السواق مقعمز مهيمن راجل غادة
-عامر السواق يكلم فى الصافى وراه / نقص صوت المكرفون يا خونا
-مهيمن يضحك/حتى انا طمسلى ودنى ياراجل صوته يخوف
-عامر/ الجماعه هادو تحسهم يتعاملو مع الجنون 😏
-مهيمن / بينه بين ربه..هدا ماناقصنا غير جنون
من الخلف /
-هاجر/ كمل اشرحلنا اكثر عن الجبال هادو ايدينا ولا شن سميتهم وقعدو كلهم يضحكو
-مسك الصافى الميكرون/ هده الجبال خطيرة …..
تلفتتله غزلان انتبهت
-الصافى / اهل الجنوب والتوارق والتبو عندهم معتقدات انهم لاااازم يكونو حاملين سيف معاهم او سكين بيش يحميهم ..
-صلاح /تى شنو زى المسلسلات السوريه القديمه
لفت الباص
-الصافى/ اقتربنا من الكهف اللى نسجت عنه الناس روايات حقيقيه وروايات من الخيال ..
مبشر/ تى كهف شنو …غير كملنا بعد سنين شن صار مع العلماء اللى زارو المكان
-الصافى/ رجعو بعد سنين لنفس المكان واكتشفو ان الاصوات اللى تطلع هيا نتيجه ملامسه الرياح جدران الكهوف والانفاق الجبليه فتصدر صوت يتردد صداها فتعتقد الناس انها اصوات طالعه من الكهف
غزلان شبحتله باهتمام
-مهيمن من قدام / كهف شنو خونا !!؟
-تلفتلهم الصافى / ايديناين او مايعرف بكهف الجنون
..المسكون بالجان
يعيطو فى صوت واحد/ جنووووون …كهف جنون
ومن الخلعه تميل السيارة بى عامر تخش عاليسار وتنزل للرمله … السيارة تجرى وهما يعيطو لحد ماستقرت
__________________________________________

تمت …ويتبع
زعما كيف بيصير معاهم ….وعلى فكرة المعلومات المكتوبه كلها حقيقيه 😊😊

.ن ح ب ك م ❤

رواية الجثة الرابعه بقلم زهور جمال الدين

الفصل السابع

غزلان ومبشر وصحابهم راكبين فى الباص وماشيين لى غات
-الصافى بالمكرفون / اقتربنا من الكهف اللى نسجت عنه الناس روايات حقيقيه وروايات من الخيال ..
مبشر/ تى كهف شنو …غير كملنا بعد سنين شن صار مع العلماء اللى زارو المكان
-الصافى/ رجعو بعد سنين لنفس المكان واكتشفو ان الاصوات اللى تطلع هيا نتيجه ملامسه الرياح جدران الكهوف والانفاق الجبليه فتصدر صوت يتردد صداها فتعتقد الناس انها اصوات طالعه من الكهف
غزلان شبحتله باهتمام
-مهيمن من قدام / كهف شنو خونا !!؟
-تلفتلهم الصافى / ايديناين او مايعرف بكهف الجنون
..المسكون بالجان
يعيطو فى صوت واحد/ جنووووون …كهف جنون
ومن الخلعه تميل السيارة بى عامر تخش عاليسار وتنزل للرمله … السيارة تجرى وهما يعيطو لحد ماستقرت
لما ستقرت السيارة
-رباب قامت راسها من / اااه راسى …راسى انضرب فى الكرسى اللى قدامى
-محمود راجلها حط يده على جبتها / بالشوى عليك ماتتحركيش انضربتى عالجنب فى جبهتك دم نازل
-الصافى طايح ع ارضيه الباص/ الله لا تربحكم ولا تربحنى اللى خديت رايكم وجيت مع سواق حمار زى هدا
-عامر قام راسه من ع الدومان / الله لا تسامح اللى عطاهم رقمى.. ادعى عليه ماتدعيش عليا انا
-غادة/ مهيمن …يا مهين تعالة طلعنى انحشيت فالكرسى
-غزلان/اااه راسى … شن صار
-مبشر/ ماتتحركيش مرات فى كسور خليك فمكانك
انفتح الباب القدامى نزل مهيمن بسرعه لف للخلف بيش يفتح باب الركاب الخلفى الباص…حط يده عالمقبض بيسحبه ماباش يفتح …لقاه عالق …
-مهيمن/ الباب مايبيش يفتح يا عامر كيف الحل
-فتح عامر بابه ونزل متهالك/ ياجيه حرفه على راسى .. كيف الباب ماينفتح يا همى باش بنصلحها
-مبشر يعلى فى صوته / بدل ماتبكى عالسيارة .. شوف بالك فى اموات فى جرت عدم تركيزك
-زينب / بعيد السو علينا
وتلفتت لى صلاح/ صلاح ..صلاح خيرك ساكت
-صلاح / تى صكرى فمك تحسابينى متت..ضهرى مش قادر نحركه من الضربه
-انور/ ضحكتونى وانا والله ماخاطرى فى الضحك
-هاجر جنبه / ركبتى انضربت
-عامر شاد الباب يحاول يفتحه / تى خير امه معش يبي يفتح الباب شن درتوله
-الصافى وقف/ اهو نعاونك من داخل وانت حاول من برة
-مهيمن/ مدامه ماباش يفتح كل حد يكصر المرش اللى جنبه وينقز منه
-عامر/ اللى بيكصر مرش بيدفع حقه ..والله مانعرفكم شنو الكريه المشومه هادى
-محمود / خلاص انقزو من الكرسى متع السواق وامرنا لله
رباب قرصاته / لكن الكرسى لاصق فى بعضه كيف بنطو وانا اجسامنا مش لاصقه فى بعضها من الضربه
-الصافى / ياودى كل واحد تنط قدامه مرته يساعدها وينط وراها1
” كرسى السواق واللى جنبه صالون واحد لاصقين فى بعضهم والخلفيه عاليه فوووق يادوبك مخلى شوية مساحه بينه وبين السقف”

فى الفندق …

الصغار كلهم مع بعضهم فى غرفه الالعاب فالفندق تحت
..والمربيه اللى جابهالهم الفندق اسمها مريم مقعمزة تتفرج عليهم وهما يلعبو …الامهات عطوها موعد ايروحو الساعه 9 ليلا ….الصغيويرة يلعبو ومريم مقعمزة و ساكته …
لابسه ملابس فضفاضه وملونه ودايره عصابه على راسها .. لبس اهل الجنوب ..وموشمه وجهها وايديها
-جتها يمنى/ انتى شن اسمك
-مريم / اسمى مريم
-يمنى/ عندك صغار
-مريم تضحك / عندى حتى احفاد …بري العبى ماما
-جى سيف ولد زينب/ تعالى يمنى بنلعبو عليك راهو
-يمنى / باهى …
ومشت تجرى معاه ومريم تشبحلها ..

لما بعدو الصغار
-سيف / شفتى كيف راسمه على ايديها
-يمنى تلفتتلها لقتها تشبحلها/ ايه شفتهم هلبا يخوفو
-سيف/ هيا كلها تخوف
-يمنى تضحك / يا خواف
ومشت تجرى للبنات
فى نفس الوقت …

خش مراد الولد اللى يخدم فى مطعم الفندق وفى يده كوب عصير بارد / عمتى مريم تبى نجيبلك عصير
-مريم تشبح لى يمنى / لا لا صحيت ولدى مانبيش ارفعه
-مراد/ العصير وغداك وعشاك على حساب اهالى الاطفال راهو
-تلفتتله / كانا هكى خليه امالا
-شبح مراد لى يمنى/ عجباتك البنت
-مريم / فى امر مش طبيعى صاير فى الفندق .. ويمس البنت ولا واحد من اهلها
-مراد يضحك / ماشالله بدت قواك الخارقه واحساسك يتحرك زى زمان
-مريم / طول عمره احساسى موقفش..لكن تعرفنى منحسش
الا بالحاجه القويه والخطيرة ..
-مراد بيطلع/ مدامك تكلمتى ربك يستر
-مريم / انشاءالله …

طلع مراد وخلى كوب العصير جنبها ومشى
حطت مريم صبعها فى العصير وقعدت تقرا فى القران ..
وتشبح لى يمنى
-مريم / يمنى تعالى
-تلفتتلها يمنى/ ايووة ابله مريم
-مريم تضحك/ ابله 😁.. تعالى شوى بنتى ..
-وقفت يمنى جنبها / نعم
-مريم/ خودى اشربي من العصير
-يمنى/ لا لا مانبيش فطرنا بكرى والغدى مزال
-مريم/ اشربي منه سلم بنتى واللى فيه الدى بيشفى
-يمنى/ مفهمتكش شن تقولى
-مريم تضحك/ سايرينى شوى واشربي معاى
-يمنى/ باهى
خدت طاسه العصير وشربت منها وحصتها ومشت طول للصغار شاغلها اللعب
______________________________________

فى منطقه كهف الجن
الشباب وزوجاتهم بدو يطلعو بالواحد …..مفيش كسور ولا شى مجرد تدمديم وشووويه جروح فيها دم …
-مبشر مقعمز عالرملة/ حبيبتى صارلك حاجه
-غزلان تساوى فى حجابها / لا حبيبي مافيا شى ..وانت
-مبشر/ انا الحمدلله
-وقف جنبهم الصافى / تعال يا ولد ساعدنى نساوى جهاز الارسال طاح عالوطا
-وقف مبشر/ باهى
مشى الصافى ووراه مبشر …
-مهيمن/ خيركم ماشيين للسيارة
-مبشر/ بيساوى جهاز الاتصال …
-وقف الصافى وتلفتلهم / كلكم لازم تمشو توة على حد الطريق…بيش اى حد فايت يشبحكم
-عامر وقف/ سيارتى والله مانى مسيبها
-رباب/ الطريق اهيا قريبه هلبا خوى نقعمزو جنبها لين تفوت سيارة
-غزلان/ هما السيارات يفوتو هلبا من هنايا
-الصافى ماشى للسيارة / كل 4 او 5 ايام تفوت سيارة
-غادة بدت تبكى/ يا غبارتنا بنموتو فالصحرا
-هاجر / وصغارنا … حيه علينااااا
-صلاح / اسمع انا لازم بعد خمس ساعات نكون فى غات
فتح الصافى الباب القدامى وتلفت لى مبشر/ نقز جيبلى الجهاز والخيوط كلهم
-مبشر/ باهى

وبالفعل نقز مبشر من الكرسى القدامى للخلف و لقى الجهاز طايح … لمه ومده للصافى بالقطعه …
حول الصافى عبايته وحطها عالرمله ….وبدى يحط عليها فى طروف الجهاز …
كمل مبشر ونقز طلع / شنو يتصلح
-الصافى/ انقولو انشاءالله
تلمدو عليه الشباب كلهم بيش يعاونوه
_________________________________________

قبل المغرب بي ساعه ….

النساوين مقعمزات جنب بعضهم …
-رباب / حيه علينا هدا مكان جنون والليل بخش علينا واحنا هنايا يا غبابير على روسنا
-غادة جبهتها انتفخت/ انا حايرة غير عالصغار كيف صاير فيهم ..وزعما المراة روحت ولا قاعدة معاهم
هاجر تشبح على جنب / حجزناها للساعه 9 وتوة الشمس مزال ماطاحتش
-غزلان / تصدقو ادكرت حاجه.. مدامه احنا مخليين صغارنا فى الفندق .. تو ينشغلو علينا ويبعتونا حد يدورنا
-رباب / نهار ابيض .. قصدك منقعدو لين يفقدونا وينشغلو .. تى احنا قلنالههم بنروحو قيس التسعه
وهاجر متلفته تشبح …
-غادة / مفروض السواق ايولع ضى السيارة بيش اى حد فايت يشوفنا
-زينب / تى من بيشوفنا وهوا قالك يفوتو السيارت كل 4 او 5 ايام …

وقفت غزلان مشت خطوات …..وتلفت للخلف
-غزلان / مبشر
-قام راسه / نعم
-غزلان/ اسأله وينه كهف الجن
رباب وزينب اضبطو بعضهم / يمااااا
-غادة/ جن شنو ربي يهديك ياغزلان قعمزى
-هاجر وقفت واشرت بيدها / تشبحو فى الحاجه اللى تلمع غادى
-زينب/ ياوخياتى ماتخوفوناش حرام عليكم هكى نرعش مع بعضى
-غادة/ وانا زيك
-هاجر/ مش كأنى نشوف فى كتاب يلمع غادى
-وقف الصافى ومشى يجريلها/ كتاب شنو.. يلمع …وينه
-صلاح /اااااه كتاااااب… ورونى ترا
-انور لحق الصافى/ هاجر تعالى …كتاب شنو اللى تتكلمى عليه وشن بيجيبه هنايا
-غزلان / صح كتاب …حتى انا نشوف فيه
-الصافى / كتب الجان
-رباب/ ياغبابيرنا السود كتاب شنو اللى يلمع هدا2
__________________________________________

الكل واقفين خايفين
اما الصافى مشى يجرى للكتاب قامه / الله اكبر
-عامر / انا شن جاب امى للمشيه الحرفه هادى .. نبى نروح
جنون شنو اللى تتكلمو عليهم
-محمود / ومن طاح بينا الطيحه السودة هادى ماهو انت
-جاه عامر يجرى بيضرب/ انا اعصابى مش متحملات يا صغار الكلب اللى ودرتونى
ويشده محمود يطيحه تحت يبي يمرجه بطريحه… وجوه الكة يجرو يبو يحزو ماعدا الصافى وغزلان قعدو فى اماكنهم .. الصافى يشبح للكتاب … وغزلان تشبح للصافى
والشباب ايحزو
-رباب / يا محمود سيبه فكنا منه ادير رقبه فى رقبتك
-مبشر يفك فيهم / صلو عالنبى يا جماعه
-صلاح / ياناس لقينا الكتاب خلونا هاديين لين نقروه
-وقف محمود عن الضرب وشبحله / انت تعرف الكتاب هدا من زمان
-عامر وقف / تى والله ماعاد قاعد معاكم
-الصافى/ ياولد …ننصحك ماتمشيش راهم يطلعو على هيئه حيوانات ..ولازم ايسيلو منك دمك
-غادة بدت تعيط / معش تخوفونا اسكتو
-مهيمن مشالها يجرى / تعالى ….
وقعمزها عالارض / ياناس النساوين مايتحملوش العراك والكلام عالجنون …فكونا وخلونا ساكتين لين ايجى حد ينقدنا ..
-زينب / صح بينقدونا…. حتى غزلان خممتها وقالت تو يفقدونا بعد الساعه 9 زى ماقلنالهم ….واهوالشمس طاحت والساعه توة 8 الاربع يعنى معش مزال هلبا
-غادة/ املنا فيهم هما بس يفقدونا
-مبشر/ احنا املنا فى الله .. مش فى العبد
-صلاح مشى للصافى / ترا هات الكتاب نبى نشوفه
-الصافى مد الكتاب / تعرف تقراه
-صلاح / لا
-رد الكتاب / معناها مايلزمكش .. الكتاب مكتوب بلغه ثانيه
-غزلان / شمس المعارف
تلفتولها كلهم ….
-هاجر / نسمع عليه … بس هداكه كتاب مكتوب بالعربي
-غزلان / بس هدا الكتاب الاصلي
-قرب منها الصافى بخطوات واسعه وعين اكبر من عين/ انتى …….تعرفى لغه الكتاب هدا
-غزلان انتبهت لنفسها / لا … ومنين منعرفها
والعجيب والغريب انها تقرا فى عنوان الكتاب .. والكلام المكتوب تحته .. وهيا مش قاريه اللغه هادى …

_________________________________________

الساعه 9….

خشت امال جارت منيرة للفندق … لابسه جلابيه وشاربة ومعاها راجلها وقفت ع الريسبشن …
-امال / السلام عليكم
-الشاب / عليكم السلام مرحبتين بيكم تفضلو
-امال/ نبى نسأل على عويلة نازلين عندكم هنايا …الراجل اسمه مبشر والمراة اسمها غزلان
-الشاب/ اسف اختى منقدرش نعطيك اسماء النزلاء عندنا ممنوع …
-امال/ ياوليدى نبي غزلان مرته ضرورى …انا متاكدة انهم هنايا .. بالتاكيد النزلاء مش هلبا … معناها تقدر تزبطهم
-الشاب/ خيرك شن تبى منهم بالزبط انتى
-عمك عزيز راجلها / خوى احنا اصحابهم مش عدوينهم
..والمراة فى خطر فلو سمحت نبو المراة فى اسرع وقت
-الشاب/ لحظه بس اناديلكم المدير …
وبالفعل قام التليفون واتصل ….
بعد ماكمل المكاله / غرفه المدير من الممر هدا …الغرفه اللى فى اخر الممر.. تفضلو قالى ناديهم
-عزيز وامال/ باهى صحيت ….

وبالفعل خشو للمدير واحكوله عاللى صار وقالوله بالامارة امس اتصلت اخته منيرة ودوت عليا ..ولما نادو الولد متع توكه امس …قاللهم بالفعل اخت مبشر واسمها منيرة واتصلت ورد عليها واحد يقولوله صلاح ..واتصلت بي منيرة بيش يتاكدو وردت عليهم منيرة واكدتلهم انهم اصحاب
-المدير/ لكن هما فى رحلة ماشيين غات وبيروحو
وقام ساعته / توة الساعه 8 …وهما عطونا موعد للتسعه
-امال/ باهى انراجوهم ساعه ثانيه مافيهاش باس
-عزيز / عادى نراجو
قعمزو وجابولهم قهوة .. الولد حط السفرة وبدو يسمعو فى ضجة طلعو يجرو
________________________________________

فى ارض كهف الجن …

-انور/ انتو ليش خايفين من الجن .. المصريين يقولو ماالجن الا بنى ادم
-غادة / وانت الصادق يقولو ماعفريت الا بنى ادم .. ماقلوش الجن
-مهيمن / لعلمكم فى دراسات عالجان من الناس اللى يحضرو فيه يعنى الامر مش ساهل
-صلاح باهتمام / اشرحلنا ترا
-هاجر/ ياودى فكونا من هالموضوع…

وهما يتكلمو قربت غزلان من الصافى منغير ماينتبهولها
-غزلان / ممكن انشوفه
-مدهولها / تفضلى
خداته منه وقعمزت …فتحاته من اول صفحة …

والشباب قاعدين يحكو مع بعض …

-انور/ اسكتى يا هاجر خليه يحكيلنا بلا خوف زايد
-غادة / تى كيف خوف زايد واحنا مقعمزين قدام كهف اسمه كهف الجن
-مبشر / شفتى حاجه …سمعتى حاجه … هيا اسكتى
وعامر السواق يشبحلهم من بعيد …
-مهيمن/ ياستى وياسيدى والكلام للمستمعين اكل … قبل ما نحكيلكم ع الجن اللى ينقسم لى انواع …لازم نحكيلكم عالطلاسم
قامت غزلان راسها وشبحتله
-رباب/ نعرفوهم …طلاسم يعنى كلام تقوله بيش تحضر الجن
-مبشر/ صحة ليك ..هوا هدا بالزبط .. والطلاسم هما يعتبرو زى الباب اللى ينفتح بيش يكون فى تواصل بين الانس والجن
-مهيمن / انواع الجان هلبا واسماء ..فى جنى اسمه مسيطرون ويقولو عليهم انهم من خدام الشياطين و الشموع ومختصين بسحر التبديل والجلب والتفريق
-رباب / لاااا مسيطرون حق مدامه هادى اعمالهم
-مهيمن/ نوع ثانى من الجن اسمه عزازير وهدا يحضر على هيئة حيوانات..واللى بيحضر الجنى هدا لازم يركعله ويمجده قبل ما يطلب منه اللى يبيه
-غادة/ بلحق ولا تبصر
-مهيمن / والله زى منحكيلك .. عزازير هدا طلع للدنيا هلبا مرات على هيئة قط كبير.. وعلى هيئة رجل اسود لابس عمة حمراء وفى يده اليسار زى العلامه الناريه
-انور/ ياودى هادى تخاريف..معقولة يطلعو فى الدنيا وللناس
-مبشر/ استغفر ربك يا انور ..الجان مدكور فى القران وموجود فعلا وانا والله مرة صارلى موقف وسمعت الحوش بيتقربع ولما خشيت شفت مالقيتش شى والدنيا هدوءءء
-محمود / ياودى انسجمنا كمل
-مهيمن / وفى جان اسمه دات المحاسن ويحضر فى المقابر
-الصافى/ الكلام اللى تقول فيه كله نعرفوه مش جديد
-مهيمن / خلى نكمل … وجنى اسمه العائنه .. هدا تكتب على يده الطلسم .يرقد شوى ..وبعد اينوض اينفدلك كل اللى تبيه
-عامر انسجم / صار لازم ايقيل 😁
-مهيمن/فى جنيه اسمها نائلة دات الشعور المائلة .. وسموها هكى لان تجيك شعرها نازل على وجهها
-هاجر/ وااااك بديت نخاف …هادى اللى يقولنا عليها الغوله زمان
-مهيمن/ واخر واحد ناصور…وهوا اقوا واحد فيهم لانه صعب فى التعامل …
-مبشر/ لكن اكيدة حاجته قويه .. 1
_________________________________________


فى الفندق
امال وعزيز والمدير مقعمزين والولد جاب فنجان القهوة وطلع وبدو يسمعو فى دوشه قويه
المدير وقف / شن فى
طلع يجرى وطلعو وراه امال وعزيز…. لقو العاملين متع المطبخ طالعين يجرو …وطلعو الصغار يجرو من الغرفه متع الالعاب ….
المدير/ شن فى شريف
-شريف متع الريسبشن/ منعرفش يا استاد وليد ..كأنه فى عركه فى كل الديار فوق
-وليد المدير/ اركبو اجرو شوفو شن فى
ركبو مراد وشريف واحمد يجرو للطابق الثانى …يلقوه هدوءءء ومافى شى …فتحو كل الديار اللى فى الممر مافى شى …وغرفتين فيهم نزلاء لما طقو عليهم طلعو واستغربو لانهم ماسمعو شى …
نزلو يجرو للطابق الارضى / مافى شى فوق
وقفت مريم / هادو ارواح
-امال / ارواح شنو اللطف علينا …شن جابنى انا بس
ورجعت الدوشه والتكصير فى الدور الثانى
-وليد متعصب/ لقيتو شى مكصر فوق
-شريف/ مافى شى فوق نهائيا ولا نسمع فى اصوات
قامت مريم يديها وبدت تقول فى طلاسم / شرقووش مرقووووش … احمينا … اسمعنا ….شرقووووووش
اصبح الفندق كله هدوووووء …والصغار خايفين ويتباكو
-مراد/ خالتى مريم انتى سحارة ولا شنو
-مريم قعمزت/ سحارة عينك …هادى عزومه كفيتهم عليكم وقت بس لكن بيرجعولكم
-وتلفتت للمدير/ وين اهلهم هالمفرخ معش وقت عليا انا بنروح
-وليد / اكيدة على وصول توة
_______________________________________

فى ساحة كهف الجن
-الصافى / قصص الجن هلبا وخاصه عالكهف هدا .. يحكو زمان على راعى تباوى من التبو كلماته الدابه متعه لانهاالتبست
-مبشر/ مستحيل
-مهيمن/ سمعت حتى قصه الراعى اللى عطاه واحد اكل وقعمز ياكل معاه ولما شاف رجليه لقاهم رجلين حمار
-رباب/ وووك عليا يا ناس فكونا من هالحكايات هادى عاد
-الصافى/ ويحكو على جنيه صغيرة كانت اميرة زمان ضاعت فى الصحراء ومسكها مارد وطلب على اهلها دم اربع جثث فسفوريه ..حصلو ثلاثه جثث .. ومن ميه سنه يدور فى الجثه الرابعه
-غزلان / الجثه الرابعه ….
وسرحت بخيالها لما يقولولها انتى الرابعه
-مهيمن / وانت من حكالك عليها
-الصافى تلفتله /خلينى نكمل… كانو مكلفين جنيه كافرة اسمها ميمونه ادور عليها .. ولما طولت عاقبوها بالسجن .. ويقولو كلفو جنبه مسلمه اسمها هنيه بالمهمه
طلعت هنية من وراه..لكنها فاتحة شعرها وتمرد / تنادى فيا
وضحكت وكل سنونها دم ……

ودو كلهم يتعايطو رجالة ونساوين 💔💔

_______________________________________

تمت …..ويتبع
لما نكتب الضى هارب ف ولعنا المولد ..شوى وطق خوى
على دارى جاب بناته صغار خش هوا ياهم خاطر مولده مايولعش مكيف ..قعدت مرة نكتب مرة نوقف مانبيش يلاحظنى😁.. وفالاخير انسجمت نكتب وهوا يشبحلى مندريش عليه …تلفتله قالى تعرفى اللى يشوفك مابطلتيش نقر عالهاتف يقول عليك تكتبى فى قصه 😁😁😁
وسامحونى عالتاخير اشعر بالتنبلة 😁..ربي يقطعها
نحبكم ❤❤

رواية الجثة الرابعه بقلم زهور جمال الدين

الفصل الثامن

فى الفندق
مريم تعارك/ متقوليش اهلهم على وصول .. انا موعدى التسعه خلاص معش نقدر نقعد
-مراد/ انتى عايشه بروحك خالتى مريم ..مفيش باس لو عطلتى شوى …
-يمنى تبكى/ وين ماما
-سيف جنبها / حتى انا نبى ماما وبابا وينهم
-عبدالبارى / وين ماما …
وبدو هادوكا المفرخ كلهم يعيطو ….
-امال/ ياودى انا حاسه ان فى حاجه …تعالو نلحقوهم ونشوفوهم فيش حصلو
-وليد/ وبالك نتعاقبو
-عزيز/ خلى ناس هنايا…وناس تمشى معانا
-وليد / اسمع مالياش اى علاقه بالموضوع هدا ولا الطاقم اللى يخدم عندى …ليكم عليا نهتم بالصغار…غير هكى لا
وتلفت ماشى لى مكتبه / هادى ارض فيها بسمالله العظيم انا لا نقدر نعانده ولا نقدر نديرله شى
-امال مشت لى مريم / امشى معانا يا حاجه مدامه عندك فى العزومه ..تربحى …احساسى عمره مايكدب …انا حاسه ان فى حاجه صايرتلهم
شهقت مريم لين عيونها انقلبو …هربت منها امال .. وبدو الصغار يتعايطو
-مريم / اااه … ااااااااه
-عزيز / خير بلاها العزوز
-مريم عيطت / ااااه
وفتحت عيونها عادى ولا كأنها كانت قبل شوى زى المخنوقه
-مريم/ منو بيمشى ومنو بيشد الصغار

طلت امال وعزيز ومريم فى سيارة .. ومراد وشريف فى سيارة …
والباقى قعدو فى الفندق ودخلو الصغار لدار الالعاب وهما يبكو فى صوت واحد
______________________________________


فى جهه كهف الجن
الصافى/ يحكو على جنيه صغيرة كانت اميرة زمان ضاعت فى الصحراء ومسكها مارد وطلب على اهلها دم اربع جثث فسفوريه ..حصلو ثلاثه جثث .. ومن ميه سنه يدور فى الجثه الرابعه
-غزلان / الجثه الرابعه ….
وسرحت بخيالها لما يقولولها انتى الرابعه
-مهيمن / وانت من حكالك عليها
-الصافى تلفتله /خلينى نكمل… كانو مكلفين جنيه كافرة اسمها ميمونه ادور عليها .. ولما طولت عاقبوها بالسجن .. ويقولو كلفو جنبه مسلمه اسمها هنيه بالمهمه
طلعت هنية من وراه / تنادى فيا
وضحكت وكل سنونها دم
وبدى العياط والهرج والمرج لانهم كلهم شافوها ..وبدو يشبحو فى حاجه زى الموجه طالعه من جهه الكهف وجايه جيهتهم .. .
غزلان واقفه جنب الصافى ترعش مع بعضها ….
اما الصافى قام حجر فى يده / حركوش بركوش .. ملك الجان والروح ..بركيتا مركيتا ملك القلب والعين ….ارفعو البلاء …واكثرو العطاء … واجعلو بينى وبينها مدا ..وكون امامها صدا .. وهدها فى الارض هدا
وجهه ايديه ليها / بحق من جمد الميه ف يد جدودى يجمدك فمكانك ….
هنيه وقفت مكانها معش قدرت تتحرك الصافى عزم عليها وجمدها
ومشو كلهم يجرو للسيارة اللى طاحت بيهم لبدو وراها …
خدو ساتر😁… ماعدا غزلان قعدت واقفه والكتاب فى يدها ..الصافى واقف قدامها ويعزم …بدت الريح تجرى والرملة اطير ..تقولى جو ديسمبر

هنيه بترد مش حتسكت عاد
-قامت يديها فوق وتلفتت للسماء وتعيط/ صُلت وجُلت .. ومشيت وجيت …وقلبت ودورت .. وشميت الدم الفسفوى من ملااايين المسافات ….احضر يا سيدنا …احضر يا رايسها
احضر ياللى كلها عبيدك ….
غمضت عيونها وزادت رفعت يديها فوووق/ حرتووووت برتووووت خود دم الانسيه قبل ماتموت ….مارد يا مارد .. يلى لقصه الانسيه سارد .. ملح جلدها .. وطلع عيونها
…وخلى دمها يشر…ناديتك يا سيدى وسيد الاسياد جيب الكاااس وحط فيه الترياق
وبدت السما كلها برق ورعد … وهداكه المد قاعد جاى من الكهف …ماعرفوشى شنهوا .. يسمعو فى صوت زقزقات بس
9
__________________________________________

فى حوش ليلى
مصطفى راقد فى دار نومه ع السرير وفاتح الباب …يخمم كيف بيدير لى هالعويلة وهالصغار …
وهوا يخمم لمح طيف تحرك من قدام باب داره …
لبس شبشبه وطلع …. وقف يتفرج عالممر مافيشى شى
مشى لنهايه الممر طفى الضى .. وتلفت بيخش لى داره انفتح الضى ….
وقف مستغرب وخايف فى نفس الوقت … رجع للضى طفاه ومشى لداره كيف بيخش ولع الضى … تلفت للمر انطفى الضى ….تلفت بيخش للدار يلاقى ليلى قدام وجهه بالزبط
واقفه وراه منضرها مزرى ..رقبتها مدبوحه ..وجلدها كله مسلوخ ….ينخلع من المنضر يجى طايح
-عمتك فاطمه امه تنادى من دار الصغار/ مصطفى ..خيرك وليدى بسم الله عليك
ليلى حاطه صبعها على فمها وتقوله اسسسسس
-مصطفى يوخر/ ليلى …اقسم بالله انك ليلي وانا مانحلم
خداته من يده ودخلاته للدار وصكرت الباب وهوا ولا صوت ولا حركه منه ..
-ليلى تضحك / جيت بنشرب من دمك زى ماخليتهم يشربو من دمى وبعدين بعتنة و خليتنى انت وياهم نشنق روحى
-مصطفى / والله مانعرف حاجه ماللى تقولى عليه …انا كيف نبيعك …كيف نقتلك
-شبحتله بغضب وتقرب منه / كداااب ..امالا منو اللى جاب الخيط وخلاهم يربطوه فى الثريا
-مصطفى يوخر/ كانو ساحرينى ونحسابها مرة حقانيه ..
فالاخير لما ختفت عرفتها جنيه
-قربت منه وبى رومنسيه/ مزال تحبنى ..مزال تبينى
وهوا مسبت فمه لا عارف روحه فى حلم ولا فى علم …
وقفت فى وسط الدار وبدو رجليها يطولو لين وصلو للسقف وهوا يشبح ومخلوع
-ليلى/ خيرك خايف .. وخيره لما طلعولك هما ماخفتش
-مصطفى يبكى / انتى غولة …اعود بالله منك ليلي ماتت
-ليلى تشبحله وتضحك/ انا مامتش .. انا رفعونى معاهم تحت الارض …وماتنكرش انك انت اللى خليتهم يرفعونى
-مصطفى/ مانقدرش نعاندهم ياليلي .. هما لما شمو الصنه جوك يجرو …
-ليلى حمرت عيونها وطلعت سنونها/ ومن قالك جو لما شمو الصنه ….انت كداب انا مسمعتهمش قالولك هكى
-مصطفى/ والله اللى اسمه (على) قال ما جاباته الا الصنه … وحتى بعد مارفعوك مقدرتش نتكلم …مخليين معاى واحد يقولوله القزون يراقب …وانا لا ليلى ليل ولا نهارى نهار
-ليلى تدمع وتتمسكن / انا راقدة جنبك وجت العزوز اللى اسمها هنية قامتنى من شعرى حدفتى للسقف ..وانت تعيط وتنادى وفالاخير سكتت وقلتلهم باهى ديرو اللى تبو
-مصطفى / ماهم هددونى بالقتل مقدرتش ندير شى
-ليلى/ كداب وعدوك ايموك وتتساوى حالتك .. وانت شفتهم كيف عدبونى وشنقونى وسكتت ..
وطلعت موس/ لازم تتعدب وتنسلخ زينى
-مصطفى يبكى وهوا مش قادر يتحرك /لااااا والصغار يا ليلى
-ليلى / ليهم الله …
وحطت الموس على وجهه وبدت تسلخ فالجلد/ عارفه روحى بنموت من عالمهم بعد ننتقم..لان هدا قانونهم.. لكن المهم نردلك اللى درته …وهوا يبس فمكانه شكله جاته سقطه قلبيه ومات1

_________________________________________


فى جهه كهف الجن …

المد وصل …عبارة عن اعداد هائلة من الجردة كبيرة الحجم تجرى ورا بعضها ….
قام الصافى يده / حبسها يا مولاى …انحبسى وكان دمك جارى التبسى …
وقف سيل الجردة كلهم فمكانهم انحبسو
قامت غزلان الكتاب وتقرا / صردوك يا صردوك .. هربت وشدوك …دبحناك وشويناك وهما كلوك ..كان عندنا عليك حق … شد السما فوووق .. وزيد ووقفها عمدان …
وغمضت عيونها / شركيش والنارى تحضرو الليله.. واللى يغيب منكم يتعدب ومعنده علينا حيله …
الصافى يشبحلها / انتى تقري فى الكتاب …تعرفيها لوغته
-هنيه / وراس مولاى القاضى..دورت عليها فى البلدان ..
وخليتهم يعرفو مكانها توة ومكانها زمان ..والليله بالتصاخير تلاقى الكاس مليان ..تخلط فيه دمها ودم الجثث الاولة ودم الجردان ….
قامت يدها فووق/ قرشوش برقوش احضر يا مولاى

وزاد صوت البرق والرعد والدنيا مقلوبه قلب غير المطر ماصبتش والباقى حتى الرملة طايرة
راجلها وصحباتها وصحابهم التريس شادين السيارة ولابدين وراها ومعاهم السواق عامر.. ويشوفو فى المشهد كله
-غزلان تقرا من الكتاب/ البنت مايصحيها الا دم اربع جثث .. ينغلثو ويتخلطو وينوضوها تقول توووة انبعتت
قامت راسها تشبح لى هنيه لقتها تحاول تفك فى رجليها من الرملة .. الصافى عزم عليها ..والعزومه مش ساهلة تبيس ايدين ورجلين ….

-هنيه تنادى / يا قزون هووووه .وينك انت وعلى والحضار
-وقف وراها على / جيتك يا خالتى …. ونبى بشارتى…
الرايس جاى والحاشيه كلها وراه
-هنيه توشوش/ الجثه خدت الكتاب ..لازم تخدعها وتحصله منها .. كان وصلت للباب السابع قول كلنا تمينا
ويشبحو فى فيلة جايين من بعيد ومركبين فوقهم ناس …
وفى وسطهم فيل كبير ومركب فوقه هودج …كأنه الملك متعهم …

هاجر طول طاحت داخت …
-عامر يشبح لى مبشر/ برة لمراتك يا راجل شكلها ستلبست ولا شنو الدعوى
-صلاح/ انا نمشى
-زينب تبكى/ يا صلاااح لاااا بيقتلوك تعالة
-صلاح / بسم الله والله اكبر
وطلع من جنبهم ماشى جهه غزلان والصافى …
-الصافى/ ارجع يا ولد لتالى ..
-صلاح / ماعاد ايردنى الا اللى خالقنى
وصل جنب غزلان والصافى …
-القزون / صلاح المخاوى …جيت ياصاحبنا ..
وتلفت لى غزلان / هدا هوا اللى خبر فيك
-صلاح/يا كداب انا منين نعرفك ولا نعرف شن تبو فيها بيش نخبر..غزلان اختى ومانبيعهاش
-القزون / باهى قوللهم انت ليش جاى لى غات وشن جبت معاك .. وشن بترفع
-تلفتله الصافى/ انت شن تبى فى غات
-صلاح/ جايب معاى السيف نبى نملك بيه الجان
-الصافى/ كانه معاك توة جيبه ..راهم يخافو مالحديد
-القزون / واللى جبته معاك شنهوا
-صلاح / جبت فلوس بندفع بس
-القزون / وشن ثااااانى 😁
السما بتتقربع بالرعد والبرق لدرجه الناس اللى فى غدامس وغات والعوينات يشبحو فيه وطلعت كلها من حياشها تسبح فى الله عرفو ان فى حاجه فى كهف الجان1

_______________________________________

فى الطريق
سيارتين يجرو …وحدة فيها عزيز وامال وراكبه معاهم مريم والثانيه فيها احمد وشريف اللى يشتغلو فى الفندق
ويشبحو فى السما مقلوبه فوق الجبل…هما السما فوقهم صافيه لكن الجبل بيتقربع …
ويشبحو فى شخص واقف يومى ….
شد عزيز فرينو …فتح الروشن اتفاجأ / غنوووم …انت شن ادير هنايا ….
غنوم شخص اسمر طويل وكلامه بالعربي مش مفهوم
-غنوم / ماشى وين ما انتو ماشيين
-عزيز/ احنا ماشيين للجبال والكهف
وفتح الباب من قدام /وانا ماشى معاكم … انزلى
نزلت امال وركبت من الخلف …
-مريم تهمس/ هدا منو
-امال / هدا جارنا طيب ودرويش
-مريم/ وشن جابه هنايا
-امال / وين ندرى عليه ماهو قلتلك درويش…

احمد وشريف واقفين وراهم …
احمد / منو هدا
-تلفت عزيز من الروشن / هدا جارى وقفتله
ومشو السيارتين فى جرت بعض ….
-شريف / الراجل هدا اسمه غنوم …جابه جارنا يومها لبنته التبست
-احمد / بلحق
-شريف / وراسك
__________________________________________

-الصافى / طلع السيف يا راجل واوقف جنبنا
-صلاح / راهو سيف صغير ..ماتتوقعش انه بهداكه الحجم
-الصافى / هوا هدا .. السيف المدكور حجمه صغير…جيبه
حط صلاح يده فى جيبه وطلع سيف فى حجم السكين …
ومده فوق/ اهوا فى جيبي
-الصافى / افتحى الباب الرابع …عنوانه السيف
-غزلان / بااهى
والفيلة قربو خلاص بيوصلو مكان هنيه
قلبت غزلان الكتاب فتحت الباب الرابع / قيم السيف فوق
قام صلاح السيف وجهه للسماء
-غزلان / يا نجمه النجوم …اضوى وخلى تباعك فى السماء تحوم
ضوت نجمه ف السما فوق
-غزلان / مكتوب ان اللى عنده السيف هوا صاحب الميثاق …اقرا الطلسم اللى عاطيينه ليك وحط خد بينا وبينهم …
-صلاح /”اقـسمت عليـك يا ابـن الـنار أن تـنفذ الـعهد والميثاق
.. بـحق إبـليس و كفيال و كهيش و فهيش, بـحق ذو الـبطش الشديد الوحا نفـذ الـعهد إن شممت في جـسدي روح الـخادم, نفـذ الـحُكم وحـرك غرائز الـشيطان داخلي, أنا الـخادم أنا الـخادم أنا الـخادم ”
-غزلان / دير خط بينا وبينهم بالسيف بسرعه
طلع صلاح يجرى قدامها حط السيف فى الوطا ومشى بيه يجرى دار خط لعند من قبل غزلان بشوى لع بعد السيارة
-الصافى / لاااازم نديرو حل… الطلسم اللى قلته سهل يبطلوت بطلسم ثانى من عندهم …

وصلو الفيله ….فيه جنيات عليه ضى … وفيه جنون شكلهم مرعب …
نزل الملك من الفيل الكبير…شكله يخوف هوا وتباعه
-الملك / وين الكاس
-التباع / هنيه هاتى الكاس موعدك وصل
-هنيه / ياسيدى لما الريحه طلعت من حوشها خشت حوش ثانى صعب عليا دمها …بعتلها مفتاح ماوصلهاش . بعتت بعده جنيه تعزى على هيئة وحدة يقولولها امال ..ودكرتلها غات والغنوم .. ولزيتها عالجيه بيش نلمو اللى فضل من الدم الفسفورى .. واهى قدامك توة كفيت ووفيت انا
-الملك / تكفى وتوفى لما تجيبي الدم .. والخير ايعم .. وبنتى تتكلم …ساعتها انديرك اميرة وندير عليوة سلطان
-هنيه/ هوا حق …وين على وجماعه الحضرة …
-الملك / هاتو الكاس
-هنيه / اعطينى اخر فرصه ..بعتت للغنوم واهو جاى فى الطريق.. ومعاه الترياق
غزلان واقفه تسمع …مايحسابون انها لما ملكت الكتاب بدت تفهم فى لغه الجن ودوتهم وشن يقولو1
_________________________________________

وصلت سيارة عزيز ووراه احمد …

درسو ونزلو …الخط اللى داره صلاح خلى عزيز وامال مايشوفوش الاقوام اللى مقابله
لكن غنوم ومريم يشوفو …..

-عزيز/ انشالله لاباس ياجماعه الخير شن فى
-غزلان / امااال
-امال/ اهلين يا غزلان …شن اديرى هنايا
-غزلان اشرت على غنوم / هدا شكون
-عزيز/ هدا جارى لقيته فى الطريق ركبته
-غنوم / هدا الكتاب اللى فى يدك خطير عليك يا اختى هاتيه
-غزلان / اهااا
-عزيز/ وين مبشر
-غزلان / كلهم متخبيين ورا السيارة
-عزيز/ لااااه خيركم
-غزلان / جاركم شن اسمه
-امال / اسمع غنوم …

قامت امال الكتاب وتقرا/ كبش فدى وليومه جى …خامور هامور جيبو الحبل وربطوه وفى ثالث نجمه دلوه
-غنوم بدى يبكى/ يا صلاح انا ساعدتك وعطيتك السيف ..ساعدنى وفك ربطى
-صلاح / من ربطك
-غنوم / اللى قالاته غزلان طلاسم الملوك ربطتنى بيهم ..شوى وبيجو يرفعونى يعلقونى
-صلاح تلفت لى غزلان/ السيف ساعدنا توة .. ومنه هوا جانى فالاصل…فكيه تربحى
-غزلان / منهيا هنيه ..ومن دلها عليا
-غنوم / هنيه جنيه .. وانا دليتها عليك…تربحى فكينى
-غزلان / انت اللى كنت بواب فى العمارة ..وانت اللى جبتنى ليها …منين تعرف غادة لان هيا اللى دلتنى
-غنوم / بعتنالها هنيه وهيا اللى دلتها
-غادة تسمع فيهم وترعش مع بعضها / هنيه..انا جتنى هنيه …حيه عليا امتى جتنى
غزلان تكلم فى غنوم / غادة مشتركه معاكم …تكلم
-غنوم / لااا مش معانا… لكن زلبحناها وعطيناها عنوان الشقه بيش تعطيهولك
-غزلان / لكن انتى يا امال قلتيلى ان هنيدة مرت خوى تعرف بمكان الشقه
– امال/ هنيدة بنت خالتى ليا اكثر من عام ونص ماشفتهاش .. ولا شفتك حتى انتى
-غزلان / توة قلتيلى فى وفاة ليلى لما جيتى عزيتى
-امال / وفاة ليلى والله ماعفستها .. وليا اربعه ايام بس سامعة بيها ماتت …
-غزلان / امالا منو اللى جت للوفاة
-امال / وين نعلم انا
-غنوم / فكينى تربحى قريب يجونى
-غزلان / توووةة قولى كيف عثرتو عليا وجيتونى
-غنوم / حاضر نحكيلك من دلنا عليك ومن ساعدنا وكيف جيناك
_____________________________________

تمت ….ويتبع
انتضرونى اليوم فى الحلقه التاسعه والاخيرة ….
زعما منو بعتهم لى غزلان !!؟؟؟؟ ….. خممو وقولولى
وشن سر المفتاح
ن ح ب ك م ❤❤

رواية الجثة الرابعه بقلم زهور جمال الدين

لحلقه التاسعه والاخيرة

فى الفندق
الصغار يتباكو فى هاديكا الدار ….
-احمد / يابابا خلاص روسنا وجعتنا .. قلنالكم اهلكم اتصلو وقالو اهو جايين فالطريق
-سوسو بنت غادة تمسح فدموعها / انت تكدب ..من بكرى تقولنا بيجو وهما ما جوش
-فؤاد الطباخ / حبيبتى فى وحدة متأدبه تقول لى عمو انت كداب
-عبدالبارى / باهى جيبلنا عشى
-فؤاد /حاضر..عندى دجاج محمر تو نديرلكم منه سندوتشات
-عبدالبارى / اعطى نص حتى لاختى يمنى
-احمد / سلم وخيها اللى راد باله من اخته
-خش محمد / طلعو ثلاث عائلات درنالهم تشك اوت توة انا واستاد وليد
-فؤاد / واستاد وليد كيف صاير فيه
-محمد / اسكت ساكت يغلى
-احمد / قصدك الناس سمعت الصوت هدا علاش طلعو
-محمد / لا عشان الشوشرة اللى دارها استاد وليد لوطا وكيف ركبنا احنا نجرو وندورو
-فؤاد / هوا اللى داير عيطه وخايف ويقول اجرو ..المشكلة ان الناس فوق طلعو ماسمعو شى
-احمد / تبى الحق معاه الحق يعيط كلنا خفنا ..وبعدين من قاله ان اللى فوق ماحسوش بشى ..بعتالى احنا عرفنا ان النزلاءماسمعوش حتى حاجه
-محمد / زعما فى جنون فى المكان يا جماعه الخير ولا غير احساس
-فؤاد/ الاحساس يجى لى واحد اثنين …مش لكل من فى الفندق
-وليد من برة اينادى/ فؤاااااد
__________________________________________


فى كهف الجن
غزلان واقفه وشادة الكتاب فى يدها وتكلم فى امال وغنوم
غزلان / امالا منو اللى جت للوفاة
-امال / وين نعلم انا
-غزلان / مش قلتيلى صاحبه الشقه الاصليه جارتك ..تى انا ثلاث ارباع جيتى ليها
-امال/ والله مانعرفها مسكينه ..ولا عمرى ريتها
-غنوم / فكينى تربحى قريب يجونى
-غزلان / توووةة قولى كيف عثرتو عليا وجيتونى
-غنوم / حاضر نحكيلك من دلنا عليك ومن ساعدنا وكيف جيناك لكن وقفى ربطى تربحى
-غزلان / الكلام يقول ان صحاب النجمه ايجو لو انا رفعت ايديا وقلت وينكم
-غنوم / انتى غلطتى غلطة عمرك فى يوم ..واليوم المشؤم هدا هوا اللى جابلك الدم الفسفورى انتى ماخلقتيش بيه
-غزلان / وشن صار فاليوم اللى تحكى عليه ..و كيف جانى
-غنوم / فى يوم رافعه صاحبتك تعاين …ولقيتى مراة طالبين عليها دم بيش يزيدوهولها ….
-غزلان / مش مدكرة …
وبعدين ادكرت/ اهااا…ادكرت صح.. كنت انا ورباب ماشيين عندها موعد بتعاين عند دكتورة النساء ..ولقينا مراة مريضه فقالتلى رباب هى نتبرعولها …و تبرعت بالدم لانها كانت مريضه هلبا …وبعدها سلمنا على الدكتورة منة اخت رباب وروحنا
تلفتتله / شن علاقة هدا بموضوعى
-غنوم / المراة بدل ماتاخد منك دم ويزيدوهولها ….عكسو
…خدو منها هيا دم وصبوه فى جسمك
وقعدت تدكر ..وشبحتله / صح انا لما رقدت ع السرير كانت فى شكارة دم …لكن..قصدك حطولى الدم فى جسمى..كيف!!
-غنوم / بالزبط ..
-غزلان / مزبوط انا بعدها قعدت مريضه وقالولى دمك زايد ومنعو عليا حاجات ناكلها ..وقالولى تبرعى بدمك لكن ماخلتنيش رباب
-غنوم / الدم اللى خديتيه انتى من المراة كان مختلط بالدم الفسفورى..وكانت هيا تبى تتخلص منه..وادور فى اى ضحية
-غزلان / لكن كيف منبهتش …كيف….
وتلفتت لى رباب / شفتى اللى صار معاى يا رباب..شفتى كيف انقلب الخير اللى درته عليا بالشر …
تلفتت ورا السيارة / رباب وينك ..
تلفتو اللى جنبها يلاقو رباب طايحه والعرق يتصبب منها وترعش مع بعضها

مريم واقفه وتتفرج …
-تلفتت للصافى وبهمس/ منو اللى واقفين غادى
-الصافى / هادوما جماعة الكهف
-مريم / معليين البوق فوووق …هادو ينادو
-الصافى/ درنا خط بينا وبينهم بي سيف الصابر
-مريم استغربت / وكيف حصلوه
-الصافى/ حصله اللى واقف من غادى يقولوله صلاح
-مريم / صحة ليه ..هدا يبدا يملك بعد ياخد طلاسم السيف
-الصافى / هدا حمار ماعارف راسه من رجليه ..ولا عارف السمى مالعمى
-مريم بهمس/ قصدك مش عارف قيمه اللى فيده
-الصافى / نقولك حمار…لكن انأكدلك انه مبعوت وحد حاكيله ومكبرله راسه ..ترا منو حسه شجاع شوى
وزادت ارتفعت الابواق فووق اكثر واكثر
-مريم / خيرنا مانسمعوش فيهم
-الصافى/ الباين حتى انتى ماتعرفيش هلبا عالسيف.. لعلمك حد السيف يمنع الخطر والصوت …
وتلفت لى غزلان / وحتى الخوف
قربت مريم من الحد اللى دايره السيف / لكن طول حماياه ما يوصلش للسمى ويمنع الخطر اللى جاى من فوق
-قرب من الحد / شن قصدك
-مريم /انت فهمت قصدى..بيعتو جراد فتاك..هادو مايغلبوش
-الصافى/ لو بعتو جراد بيمسنا كلنا ….
وتلفت للسيارة والجماعه اللى فيها …لاااازم نديرة حل1
___________________________________________


فى جهه كهف الجن
واقفين كلهم ورا السيارة … ورباب طايحة عالارض كلها تتصبب عرق
-مبشر/ خيرك خايفه ..انتى ليك علاقه بالموضوع
-رباب / والله مانى انا …مش انا ..هما قالولى
” فى علم النفس لما يبدا كل جيناتالجسم مخلوعه معش تعطى اشارات للدماغ بالتفكير وتسواية الجُمل وتبدا تطلع بروحها لان اللسان حر والدماغ مش متحكم فيه
-محمود قرب منها شدها من شعرها ووقفها / امالا شكون …ا
انتى دايرة حاجه من وراى
-غزلان / منهما اللى قالولك
-رباب / انا مادخليش .. جارتنا عزوز كبيرة هيا اللى حكتلى وقالتلى مراة تعرفها قالولها فى المغرب لازم اطلعى الدم الفسفورى من جسمك
-يشدها محمود من شعرها بالقوة / وانتى شن دخلك يا مصخة
-رباب / قالتلى بتعطينى مبلغ كبير بعد ماتم المهمة وتموت اللى بتاخد الدم
-غزلان مصدومه / انا صاحبتك ..صديقه الدراسه …كيف اديري فيا هكى كيف
-رباب تعيط/ ماكنتيش انتى المقصودة ….كانت غادة هيا المقصودة .. هيا اللى كانت بتجينى يومها وبعتالى صار معاها ضرف وكلماتك وقالتلك امشى لى رباب
-غادة/ يا حيوانه …كيف اديريلى هكى .. يعنى كنت بندير فيك خير وبنرفعك بيش اتخونينى
-غزلان / توووة فهمت لما يقولولى من قالك اتجى فمكانها
-رباب/ ماك انتى الفالحه الاولى عالمجموعه .. اللى دايرة فى روحك حالة وتتجعدى بي راجلك
-هاجر/ لعنه الله عليك ..بعد مادرناك صديقه ودخلناك بيوتنا
-مهيمن/ كنتى تبى اضري مرتى يا حقيرة
وغزلان تراجى فى مبشر يهزبها .. ولكنه ك العادة سلبى ولا دار اى ردت فعل
-صلاح/ لحظه بس …معناها حتى انا مخدوع
-غزلان / كيف
-صلاح / ماهو رباب هيا اللى كانت تكلم فيا وتحكيلى عالسيف …و عرفتنى على غنوم .. وقالتلى بتتعبى بالفلوس
-تركه زينب كف/ يا مصخة يا حقيرة وانا اللى بسببك قريب اطلقت من راجلى وشاكه فيه يكلم فى وحدة وهيا انتى تحرضى فيه عالحرام …
-غزلان / وانتى يا غادة كيف عرفتى بالشقه وقلتيلى عليها
-غادة / قالتلى عليها رباب
وشهقو كلهمممممم 😳😳😳
-غزلان / وليش ماجتنيش هيا بنفسها .. ليش تستغلك انتى …وكيف صدقتيها
-غادة/ قالتلى اختها منى ادور فى شقه …. وهيا تبى تقول عليها لى غزلان …خافت ان اختها تسمع انهافضلت غزلان عليها …فقالتلى دليهم انتى ع الشقه وردى بالك تطلع متك انى انا قلتلك عليها قدام البنات
-غزلان / وانت ياغنوم منين عرفتها
-غنوم / من خالتى المبروكه اللى المراة اللى قالتك انها جارتها ..وانا اللى قلتلها اتجيبك للعمارة ..وكنت انا بنستلمك …..ولكن قبل ماتسكنى اسيادى نادونى وجيت للجنوب وجابولك القزون وجماعته
-غزلان / يعنى انت مش انسان …انت جنى
-غنوم / لاااا انا انسان …لكن عندى قدرات قريب اكثر من قدرات الشياطين
-غزلان / اه يا قدرين انت وياها
وتلفتت لى رباب / ياواطيه …عاطياتك الامان ومدخلاتك حوشى واديري فيا هكى
-رباب تبكى / والله ماكنتى انتى المقصودة
-غزلان / واختك الواطيه زيك تساعد فيك
-غادة/ يعنى انا عادى اديرى فيا هكى ولا كيف
-محمود / اللى اتبع الجنون والكتايب كفرت .. وطلعت من الملة …و لازم تعاود التوحيد بربي …وتخش الاسلام …وانا مش فى طموحىناخد كافرة …انتى طالق
-رباب / لاااااا لا ماطلقنيش
-صلاح / تى انتى الطلاق شويا فيك ..سهلتيلى كل شى
..وربطي بينى وبين الغنوم ….
-غزلان / سألك القزون شن جبت معاك..شنهوا اللى جبته قول
-صلاح / فازو عسل فيه عقارب .. وعطيته للغنوم
-غزلان / نفس الفازو اللى لقيته انا عالشكماجه
-صلاح / انا جبته ليهم بيعزمولى عليه ..وبنرفعه معاى طرابلس .. بيش نملك ميه جنى
-امال / حتى انا منسئل ..منو اللى تصورت فى شكلى ومشت عزت وقالت كلام على لسانى
-غنوم / جنيه بعثتها انا …بعد مادبرت هنيه وتبيك اتشكى فى مرت خوك بالكدب
-امال/ الله يرزينى فيك بجاه هالليله قلبي عليك دم

وبدو يسمعو فى صوت زى التكسير وراهم
-الصافى/ بيكسرو الحد اللى بينا وبينهم … وبدو يسمعو فى الاصوات من ورا السد اللى داروه بالسيف
-هنيه تحولت من عليها العزومه وتحركت / اهو جايكم الصافى .. لما يقطعكم …
-القزون / اهو جى سيدها ..شدى حيلك انتى واللى معاك
-هنيه / سلمى روحك بالباهيه خيرلك
وراهم على وجماعته واقفين صف يضربو فى البندير طقه قويه هلبا …
وقرب منهم جنى بشع / هاتو السيف
-هنيه تنقز/ اقتلهم يا صابر…راهم يكرهونا
-غزلان / تى ضمى فمم انتى
قرب الصابر من الخط وبدى يعزم بيش يحوله / دمك نبوه .
..منغير ماتفكرى فى ولا شى …دمك بالكامل لازم يتصفى
خدت غزلان الكتاب وبدت فى التعزيم / تشحيم تشجهيل تقريب … تراااب يعمى العيون
وبالفعل ارتفع فووووق
__________________________________________


فى الفندق
-خش وليد للغرفه / انادى انا ولا ياسيد فؤاد .. ولا اطرش مسمعتش
وتلفت لباقى الشباب / .خيركم ماحد رد عليا
-فؤاد / انا كيف بنطلع بندير سندوتشات للصغار …واحسبنا كلنا
-فؤاد بيطلع / باعى
-احمد / كانا نفتحو الالعاب الالكترونيه
-وليد / لا لا …مش ناقص دوشه ونفخ راس انا
وبدو بيسمعو فى حاجه تجرى فى الدور الثانى ..جى فؤاد من المطبخ يجرى..خش للغرفه
-فؤاد / سلام قول من رب رحيم …خيركم شن فى
-وليد /وين نعلم انا هالكريه الحرفه
-احمد / انا منركب للدور الثانى …وخلى اللى بيصير يصير
-فؤاد / لااا مستحيل نخليك تركب بروحك ..يانعفس معاك
..يااما مش حنخليك
وبدى هداكه الفرس يجرى بالقوة …تقول عليها ملهاد فوق والمشكله ان الفندق كله فاضى ….
-وليد شبحلهم / حتى انا مانخاطرش بيكم الزوز
-سيف / نساعدك انا عمو ….
-عبدالبارى / وحتى انا معاه
-وليد / قعمزو سلم وليداتى ربي يهديكم
-قربت منه يمنى/ وحتى انا عمو
وزاد صوت اللهيد متع الحصان
–وليد / اسمعو يا جماعه.. الكل يتوضأ وتعالو انصلو جماعه الباين الفندق التبس
-يمنى جنبه/ انصلو معاكم عمى
-وليد / صلى يا عمو وانشالله ربك يستر
_________________________________________

ارتفع التراب فوووووق وقف بين غزلان والصابر
وهنيه تشبح من بعيد …وعلى وجماعته يضربو بالبندير
-صلاح / توة يا صافى هيا كلنا بيد وحدة
ومشو الصافى وصلاح مسكو السيف بايديهم الزوز وقاموه فووووق ….
الصافى/ اقسمت عليك ان تحرقهم .. بحق نهرون .. وبحق زفرون …
ومريم من وراهم / حبسهم وين معش يطيرو ولا يشوفو .
..مولاى يا مولاى انت تشبح فى داى.. وانت دبار هناى
…وانت نزال دواى
ومشو صلاح والصافى يجرو يديرو فى خط ثانى بيش يفصل بينهم وبين جماعه الجان اللى من الجهه الثانيه
-الصابر/ فشتوووون مشتون … نزل عليهم صاعقه تقسملهم اجسامهم على اثنين …
-صلاح / اقري الباب السابع بيش تحرقيه
-صابر طلع سنونه / لااااا

قلبت غزلان الصفحاات … لحد ماخشت للباب السابع وبدت تقرا منه
-غزلان / الشعله زيتها طفي …والكلب مردوم …والكدابه محروقةةةةة
وفى لحظه …لوحت الكتاب عالارض
-صلاح / خيرك
-غزلان/ مانيش راضيه عاللى ندير فيه
وشبحتلهم / انا دواى فى القران …هدا كله زايد
-وغمضت عيونها وبدت تقرا فى سورة البقرة / الم ..دلك الكتاب لاريب ..فيه هدى للمتقين …الدين يؤمنون بالغيب ويقيمون الصلاة ومما رزقناهم ينفقون
وتلفتت لصحبلتها / الكل يقرا قران هيا اااااا
وبالفعل بدو كلهم يقرو بالصوت العالى
-هنيه من مكانها/ اقتلها يا صابر ..اشرب من دمها ..الجردة كبيرة وتبى تشم الدم و تاكله
-غزلان وجهها تعبى دموع / تبى تشم الدم …بااااهى
مشت للصافى وصلاح خدت منهم السيف …
وحطاته على يدها ودارت جرح من فوووق اليد لتحت
…الجرح كبير وانهلب بالدم ..وغزلان داخت شوى من الالم …ومسكت يدها ومشت تجرى فاتت الخط ….
-صلاح والصافى يعيطو/ غزلاااان …ارجعى
طاح الخط الواقى بينهم وبين الجنون لما تحول السيف
ومسكت غزلان يدها بيش الدم ماينزلش كله ايطيح ..ومشت تجرى لى وين ما واقفه هنيه وتكشف يدها وتلبزها بالدم .. تحدفه علي وجهها …
والجنى صابر يشبحلها كيف مشت تجرى ومزبطش لمن ….
غزلان بعد ماحدفت الدم على هنيه رجعت لمكانه طول خافت من اجردة
-غزلان تعيط / ردو الخط بسرعه مدامهم لاهيين …
-وهنيه تعيط وتمس فالدم بايديها / هدا شنو اللى حدفتيه
عليا …
ووصلت غزلان للصافى / صكر الخط اللى بينا وبينهم بسرعه قبل مايشمو صنه الدم عندى
مشتلها امال تجرى حطت يدها عالدم بيش ايدها تتلبز .. ومشت تجرى لى غنوم لبزتله وجهه ودفاته غاااادى من الخط
ومشى يجرى هوا وصلاح من بدايه المكان حطو السيف ودارو خط عالجهه بالكامل بيش يحموها
__________________________________________

الجردة لما شمت دم غزلان على هنيه مشتلها تجرى …
جرد ياكلو فى خشمها وجرد فى عينها وجرد فى ودنها وتخلطو عليها ….
ومادة يدها للقزون وتعيط تقوله طلعنى..مدلها يده بيش يطلعهة من الجردة… لكنه غلط وهنيه لوثتله يده حتى هوا بالدم ونقزت عليه الجردة …

وتقاوت الجردة بصوت البندير والحضرة .. وعليوة البندار صايخ يرقص فى الحضرة مايدرى عليها منين زارقه ولا شاف هنيه واللى صارلها …..
وشمت صنه غنوم ..ومشتله تجرى خدى نصيبه منها حتى هوا
مشت جنيه صغيرة تجرى خدت من دم هنيه …ورجعت للملك ….
-الملك / هدا دم مخلط مايصلحش بالكاس …
-الجنيه / المهم فيه من الدم الفسفورى حتى نقطه ..الجثث الاولى فسفورى صافى معبى الكاس …يعنى هادى غير كمالة عدد بس
-الملك / يا عبيد .. كفو الحرب وارجعو للكهف …الكاس امتلى
رجع صابر لجماعته من من الجان ولحقهم للكهف..ووقفو الحضرة ..وشاف عليوة هنيه ومشالها حتى هوا يجرة مش عارفه خيرها زعميتا بيساعدها ..مس الدم ونفقزت عليه الجردة هوا الثانى …وصفت السماء ولا كأن فيها حاجه قبل شوى ..وصفت الرمله …جثة الجنية هنيه جبدتها الجردة للكهف .. والقزون وعليوة وغنوم نفس الشى جبدوهم
..بالرغم غنوم انسان ..لكن رفعاته الجردة تاكله فى

مراد وشريف اللى جايين من الفندق مع امال ومريم
..واقفين فاتحين افامهم ويرعشو .. حايرين فاللى قاعد ايصير قدامهم …..
اما غزلان طاحت من كبر الجرح اللى فى يدها …
شدوها الصافى وصلاح …وجى مبشر يجرى / غزلان
-فتحت عيونها وشبحتله / توة عرفت ان عندك مراة ..حول
-مبشر/ انا بنى ادم يا غزلان ومن حقى نخاف
-غزلان باشمئزاز / قلتلك حول…

_________________________________________

فى نفس الوقت
جت اربع سيارات شرطه يعيطو من بعيد .. شافوهم الجماعه كلهم فرحو …ومشولهم يجرو
-عامر/ ياوخيينى نبى طرابلس طول …ياريتها ماصارت هالكريه المشومه
-الشرطى/ خيركم ..انشاءالله خير .. شن جايين اديرو فى المكان الخطير هدا .. وليش الدنيا كانت بتنقلب
-مبشر/ حتى احنا شفنا الرعد والبرق زيكم .. لكن لان السيارة طاحت بينا من الصبح وومعش تبى تولع ..فقعدنا هنايا فى المكان
-الشرطى الثانى/ هوينا فى سيارتين مدرسات فوق ليش ماروحتوش فيهم
-عزيز / هادى سيارتى..والثانيه سيارة مراد …اصلا كيف وصلت انا وياهم توة
-الشرطى/ اهاا صار قلتلى توة بس جيت ..باهى نوضو هى كلكم نروحو بيكم ….
” الشرطى شاك فيهم يسحرو 😁”
-الشرطى الثانى يشبح لى غزلان / والاخت خيرها
-مبشر/ طاحت توة ..وانجرحت يدها
-الشرطى / باهى قيموها خلى نرفعوها للمستشفى العام
-مبشر/ باهى
تلفت الشرطى مشى لى سيارته .. ومد مبشر يده بيش يشاعد غزلان
-غزلان / قلتلك حول…تو يساعدنى عمى الصافى
-الصافى/ حاضر نساعدك ..لكن وين الكتاب
-غزلان / صح وين الكتاب ….اختفى
” كتاب شمس المعارف يحتوى على جميع انواع الطلاسم .. وفيه قوه غريبه وتقدرى تملكى اى جنى …ولكنه بقدرة قادر اختفى …فى من يقول انه مدسوس فى المغرب ..وفى من يقول انه ماحد يعرف مكانه ..الله اعلم ..بس اى كتاب بنفس العنوان مقلد عليه ..لان الاصلى اختفى “6
-صلاح ايعيط/ كيف اختفى …وينه نبيه
-الصافى/ والسيف
-حط يده على جيبه / اهوا .. تحسابونى نلعب امالا
-الشرطى من فوق / مزال
-محمود ماشى لسيارة الشرطه ووجه ايديه ع رب / اللى بيساعدها دونه …انا طلقتها خلاص …والحمدلله حتى صغار ماعنديش منها
-مشت زينب لى صلاح / انساعد قهرتها الخاينه …
-رباب تبكى ومشت لسيارة الشرطه
وبدو كلهم يمشو بيركبو سيارة الشرطه …..
صلاح واقف يكلم فى الشرطى…وجنبه واقفه هاجر ومعاها راجلها …وتشوف فى هداكه السيف الصغيرون فى جيبه الخلفى …مدت يدها منغير مايحس … وخدت السيف .. وتحركت شوى حدفاته منغير ما يلاحضها حد
عامر السواق / وسيارتى
-الشرطى/ توة غير ننقدوك انت .. والسيارة جيبلها رافعه حتى يومين ثانيات
-عامر/ باهى
ركبو فى السيارات …غزلان رفعوها للمستشفى العام ورفعولها صغارها ..والباقى مشو للفندق لمو حوايجهم ..
..وحجزو فى الطيارة متع مطار سبها بيش يروحو لطرابلس …مش حيروحو فى السيارة1
_________________________________________

بعد وصلو لطرابلس
غزلان روحت لحوش بوها ومعاها صغارهة وطالبه الطلاق لانها شافت سلبيته وعدم اهتمامه ..برغم رفضه وتمسكه بيها لكن شى شدت
ورباب حتى هيا روحت حوش بوها .. باعتباره طلقها
ولما روحتو لقو راجل ليلى اخت مبشر متوفى حتى هوا
…لقوه مسلوخ وميت فى دارنومه
والباقى روحو لحياشهم عادى ..لكن صلاح قريب هبل لما ملقاش السيف …

بعد شهر
دارت رباب حادث هيا واختها منى توفو الزوز … لكن الله اعلم بفعل فاعل ولا قضاء وقدر بالرغم انها تسجلت قضاء وقدر
وغزلان اطلقت من مبشر وخدت صغارها معاها وقعد فى حوش امها بوها اللى تسكر من يوم توفو ….وتخدم فى شغل ثانى ..حولت منه شغلها مع مبشر
امال رفضت انها تقعد فى غات وحولو طرابلس
وعامر السواق رفع رافعه بهاديكه الحسبه لمد هوا ومبشر وجماعتهم … ومشى لسيارته بيسحبها….
واقف ايراجى ويشبح فى حاجه تلمع …لما مشى قامها وشافها يلقاها السيف اللى طاح من صلاح .. حطه فى جبه وهوا فرحان ….بيجرب حظه فيه و ماحد خير من حد
وفى نفس العمارة ….صالح البواب واقف فم الباب …
ومن تحت الدروج متخبيات زوز جنيات ترا فيش يراجو .. خلاص العمارة التبست صعب تصفى الا بالقران 😁😁

خلاصه القول
انهم هما موجودين من حولك طول اليوم … يتحركو يعيشو يستمتعو زى ماتستمعى انتى …لعلمك حوشك هو حوشهم فى الليل ، يا اختى راهو حياتك هي الوجة الاخر من حياتهم
، ف ما تتطفليش عليهم ولا تحاولى تعرفى لوغتهم او طلاسمهم… ولا تضايقهم بيش ما يضايقوكش.. خلة لهم الليل بيش يتحركو فيه واكتفي انت بالنهار…وللرعب وجوه كثيرة ،
القصص موجودة من ايامات الفراعنه وما قبلهم2
__________________________________________

تمت 🌷🌷

الشاهد مالكلام …ردى بالك تلعبي معاهم ولا تمشى لشباحه تلعب بيك واطلعك من دينك …وخاصه لو كنتى قلبك ضعيف وتخافى منهم …ومفيش حاجه اسمها بتغلبيهم …راهم اقوام وعشائر وعندهم مزايا ماعندناش احنا البشر
يوم 1/9 … اللى هوا1 سبتمبر حنبدو فى عرض الروايه المشتركه وانا معاهم طبعا 😊😊2

وبعدها نبدا فى عرض روايتى الرومنسيه ” تازربو”4
نحبككككككم❤❤