شوفوا الراجل الاهبل بيحكى قصته هتموت من الضحك 🤣🤣🤣🤣🤣🤣🤣🤣🤣🤣🤣

قلبي كان هايوقف من ضحك 🤣🤣🤣🤣🤣🤣

مستوحاه من أحداث حقيقة !

– رن جرس تليفون البيت فردت أمي لاقيتها بتقول لى : كلم أخوك عاوزك .
فأخذت السماعه عشان اكلم اخويا اللي ساكن قريب منا واكبر مني بخمس سنين.
انا : الو
-أيوه ، تعرف تتعامل مع الأبراص 😒؟
انا : وأنت خايف من برص، مش عارف تتعامل معاه 😕 ؟
– يعنى لو انا عارف هكلمك ليه يا ذكى😠 ؟!
– ماشى جايلك على طول ، سلام .
-سلام .
امى سألتني هو عايز ايه فاخبرتها بفخر وأنا فى طريقى للخارج أن :
– ابنك الكبير مش عارف يموت حتة برص ، هروح اموتهولو واجى 💪😌.
وصلت ودقيت جرس الباب ففتحت لى مراته وهي شكلها مخضوض وبدون ترحيب او كلام شاورت لأوضة النوم فدخلت وانا بسئلها عن البرص الهرقليز ، قالتلي فى الحمام هو واخوك
دخلت الحمام لاقيت اخويا ماسك فردة شبشب ووشه اصفر هو كمان أول لما شافني قالى : أيه اللى اخرك كده؟
– أبداً ، جيت على طول ،،،، هو فين البرص اللى مش قادرين عليه 😌😌😊؟
شاور على السقف وقال : اهو هناك جنب اللمبه .
رفعت عينى و……….. : ((( يخربيت كدا دا تمساح مش برص )) 😨😨😲
اللى شوفته كان ابعد ما يكون عن برص العادي الصغير لطيف المعشر 🐉 ، دا بقي كان عملاق طول بعرض حاجه كدا فريد شوقي ، لونه ابيض , (مبطرخ)🦎 ، متعلق بشكل مقلوب على السقف ، و………: ودا هانعمل معاه ايه 😓 انتوا ماقلتوش انه ديناصور من ما قبل التاريخ، دا عايز الاخ ستيفن سبيلبيرج؟!!
قلتها وانا بخرج بضهري من الحمام .
بصلي اخويا بأحتقار : رايح فين ؟؟؟؟! تعالي موته .
أخدت نفس عميق وخرجته بهدوء بحاول استجمع بيه اعصابى ودخلت تاني متسلح بشبشب وفى ايدى التانيه عصاية المكنسه ،وجسمي بيترعش ويتنفض
دخلت وانا باصص على البرص بكل حذر وترقب وانا بمد العصاية نحيته وخويا واقف جنب الباب….. وفجأه بدل ما يهرب – ( ابن ال… )ً – طار (والمصحف عندة اجنحة) ناحيتي فى حركة سريعه مباغته 😱. روحت حادف الشبشب والعصايه بكل قوتي ناحيته وانا بنط لورا.
راحت العصاية لبسه فى لمبة السقف ومكسراها والشبشب لبس في وش اخويا اللى كان واقف ورايا ورا الباب ازاي معرفش اللي هو اصلاً كان عمال يتنطط زيي وهو مش عارف ايه اللى بيحصل جوه
دا طبعاً كل دا ومرات اخويا عماله تصوت بره فى الصاله
والعيال ولادهم قاعدين يسقفو ويضحكو على مناظرنا
– غبى 😠😠😲 : قالها أخويا (ليا طبعاً مش للبرص)
حاولت امد ايدي اقفل الباب راح البرص الطائر دا عامل ابرار جوي على أوكرة الحمام
روحت ساحب ايدي وناطط لفوق نطه أوليمبيه تليق برشاقتي وكرشي المدلدل قدامي
ولمست طرف الباب من فوق وشديته جامد
قفلت الباب وانا عمال اتلفت حواليا ليكون خرج قبل ما اقفل الباب
سمعت خبط جامد على الباب من جوه
ديب ديب ديب
يا نهار اسود هو بيخبط كدا ازاي
رجعت بضهري لغاية لما لذقت فى الحيطة اللي ورايا
-افتح يا حيوان
يا نهار ازرق دا بيتكلم كمان
ببص حواليا مالقيتش اخويا
لاقيت بس مراته اللى عماله تصوت والعيال اللى مستمتعين جداً بالسيرك دا
يا نهار ملحوس انا قفلت على اخويا جوه .. مع التيريكس
فتحت بسرعه الباب بس حته صغيره يا دوب ادخل عين واحده منها
الحمام هادي ومفيش اي علامات على وجود اخويا
معقول يكون البرص بيشتغلني؟
يا نهار ملزق
دا ممكن يكون اكل اخويا
لسه هانده على مراته عشان اعزيها وابتديت افكر هاقول ايه لامي
لاقيت ستاره البانيو بتتشد واخويا بيظهر وبيجري على الباب
روحت قافل الباب بسرعه قبل ما يوصل له
قعد ينده لى ويقولى افتح بدل ما اخرج اموتك
قلتله ما هو ممكن يكون على ضهرك
او جواك زي فيلم alien
قالى افتح متخافش هو واقف ورا الغساله
فتحت الباب بحذر
راح اخويا خارج جري
قفلت الباب وراه بسرعه وانا بتنطط
ولفيت حضنت اخويا
سمعت خبط على الباب تاني روحت ناطط في الهوا تاني
بس اخويا طمني ان دا خبط على باب الشقه
مراته فتحت
لاقينا ناس كتير دخلت الشقه
طلعو جيران اخويا اللى اتجمعو على صوت الصوييت والخبط
واحدة ست قالت لمرات اخويا
بيضربوكي يا بنتي؟!
هاتي نمرة اهلك اكلمهم ما هو بنات الناس مش بيتهانو
وقفت فهمتهم انه تمساح من بتوع بحيره ناصر
او ممكن يكون تمساح من بتوع نهر الامازون
المهم في راجل كدا جار اخويا فى الشقه اللى قدامه راجل ضخم كدا عارف شبه مين؟
عارف فرج بتاع فيلم الكرنك
اهو من نفس السلاله
بصلنا باستهتار وقال حاجه عن
(رجالة الايام دى اللى مش عارفين يموتوا برص )
شمر بنطلون بيجامته
وقلع الجزء الفوقاني وفضل بالفانله البيضه اللى ظهر وراها غابة من الشعر الاسود الكثيف
لدرجة انك تحس انه وولفرين ولا حاجه
ونده لمراته انها تجيبله الجاروف من عندهم
راحت شقتهم ورجعت تاني وناولته جاروف حديد
اكيد بيحفر بيه قبور الناس اللى بياكلهم لما بيتحول لذئب
المهم بصلنا باحتقار
وفتح باب الحمام ودخل
والله بالظبط ثانيتين
ولقينا الباب بيتفتح
والراجل خارج
بيصوت وبيقول دا بيطيييييييييييييير
وطلع يجري على شقته
ومراته وراه
جريت قفلت باب الحمام
ومرات اخويا قالت للناس شكرا وقفلت الباب
سألت اخويا هانهبب ايه فى الموضوع دا ؟!
سمعنا الباب بيخبط تاني
حضنا بعض من الخوف واحنا باصين للباب
بس مراته طمنتنا انه باب الشقه وقامت تفتح
فتحت الباب لقينا امى داخله وبتسألنا في ايه ؟!
حكيتلها اللى حصل
راحت بكل حنان وأمومه قالت
واكسه توكسكم يارتني جيبت دكرين بط
هاتي لي يا بنتي علبه البايروسول
مسكت العلبه ودخلت الحمام
وسمعنا فسسسسسسسسسس
ودقيقه وخرجت وهي ماسكه بكيس نايلون جثة السبينوصور
وراحت باصلنا من فوق لتحت
و سابتنا ومشيت