3,117 اجمالى المشاهدات,  7 اليوم

قصة الزوجة الخامسه بقلم كوكي سامح

انا فى مصيبه القيامه هتقوم خلاص شوفت اخ فى حضن اخته بجد انا قرفت وخوفت ع بنتى من اخوها لحد ما الشك ملى دماغى وبقيت امنع بنتى حتى تهزر مع اخوها مع انهم كبار وفاهمين طيب اعمل ايه دلوقتى أبلغ امها ولا اسكت

وخلاص😏 للأسف امها صاحبتى واعز اصحابى وانا متأكده من تربيتها لاولادها انا عارفه ان مصطفى جوزها أخلاقه مش تمام بس عبير طول عمرها بنت ناس محترمه انا هتجنن خلاص ياربى اعمل ايه اعمل ايه😒 تفكيرى اتشل لازم

اتصرف وإلا هتحصل مصيبه وبعد تفكير طويل لأنى مش لاقيه مخرج اعمل ايه قمت ع اوضه بنتى ما هو الشك قتلنى✋ وفتحت باب الاوضه عليها مع ان ده مش من طبعى دى خصوصيتها وانا متعودتش ع كده ولما فتحت الباب لاقيت بنتى نايمه تحت البطانية ومحستش بيه لما فتحت الباب وسمعت صوت بيهمس انا استغربت جدا روحت شلت

البطانيه من عليها سوفيا اتفزعت وقالت فى ايه يا مامى انا بكلم ضحى فالتليفون حطيت ايدى ع قلبى مش عارفه ليه فكرت فى حاجه مش كويسه يارب يا معين اعنى ومعرفتش ارد عليها انا اتحرجت انا ام وفاهمه الدنيا وكبيره بما فيه اللزوم ازاى اعمل كده فى بنتى واقتحم خصوصيتها وازاى افكر كده ياربى رحمتك بيه يا حبيبتى يا عبير لما تعرفى

مصيبه ولادك بجد انتى صعبانه عليه عموما انا هسكت وخلاص وانا مالى دى حياتهم ودى تربيتهم والشيطان همس فى ودانى وقالى شوفى ابنك فارس بيعمل ايه بصراحه وقفت افكر ثوانى بس ابنى فارس عصبى ومش بيحب الأسلوب ده فالتعامل انا الحمد لله مربياهم احسن تربيه كفايه تفكير لحد كده والساعه دقت 10 بالليل خرجت اققعد فالانتريه استنى مدحت جوزى ده ميعاد رجوعه من الشغل

اصل سوفيا وفارس بيدرسوا وطبعا بيتعشوا بدرى ويناموا مع نفسهم بس النهارده انا حسيت انى ربيت بجد من اللى شوفته 😔 ايه ده دى القيامه هتقوووم خلاص 😭 وانا قاعده بفكر والتفكير شاغل دماغى اكلم عبير ازاى انا لازم اققرب منها علشان انا فعلا الفتره دى بعيده عنها ومع التفكير الوقت راح وفجأه بصيت فالساعه لاقيت الساعه 12 ياااه ده مدحت اتأخر اوى وده مش من طبعه لما اكلمه ومسكت

الفون ولسه هتصل بيه لاقيته داخل عليه ومفزوع جريت عليه مالك فيك ايه يا حبيبى لاقيته قعد من غير حتى ما يرد عليه وفضلت اسأله مالك راح قالى مياه يا أسماء بسرعه جريت عالمطبخ وجبت المياه مسك الكوبايه من ايدى وفضل يشرب زى المجنون راح قالى وهو مفزوع انا عملت حادثه فالطريق وغصب عنى دوست ولد وخوفت واترمى فى

حضنى وفضل يرتعش وجسمه متلج بصراحه قلقت وقولت انا فى ايه ولا ايه وحاولت انى اهديه وخدته فى حضنى وفضلت اققولوا متقلقش ان شاء الله خيييييير وطلبت منه يغير هدومه وفعلا هو لما دخل الشقه قلع الچاكت ورماه ع كرسى السفره من الخضه وقام سمع كلامى ودخل الاوضه

يغير هدومه وطبعا انا مسكت الچاكت علشان احطه فالغسيل ولما مسكت الچاكت وقولت اطلع منه المحفظه او اشوف الجيوب فيها ايه وانا بفتش فالجيوب شوفت صوره لعبير صاحبتى وكمان …….

قصة الزوجة الخامسه بقلم كوكي سامح

الجزء الثانى

وانا بفتش فى جيب الچاكت لاقيت صوره عبير صاحبتى وكمان علبه فيها خاتم دهب لاقيت نفسى مذهوله والتفكير تاعبنى وقفت زى المشلوله معقول عبير ليها علاقه بمدحت جوزى😩 طيب ازاى ده مدحت حب عمرى عشت معاه

عالحلوه والمره بس العيب فى صاحبتى اللى دخلتها بيتى فعلا وانت يا مدحت الكلب تخونى انا 😭 اه صح ع الأصل دور بس انا مش هسيبك ولاقيت نفسى زى المجنونه بجرى ع اوضه النوم ما البيه بيغير هدومه وقال بيترعش وعامل حادثه اه ده وقعته سوده معايا انت يا سى مدحت وفجأه لاقيت نفسى اتسمرت مكانى لأ كده مش عقل وايه الإثبات الصوره وايه يعنى وبرضه الصوره جت فى جيبه ازاى منه

لله يبقى بيشوفها ده الحوار باين عليه كبير اوى بس فيها موته مش هسيبه يعيش اصلا وقولت لنفسى مش هينفع المواجهه اصل مدحت ده انا عارفاه كويس هو طيب ومش حارمنا من حاجه بس بيعرف يطلع من اى موقف وهيقول اى حجه ياربى دماغى هتنفجر اااااه لما ادخل احضر العشا وبعدين يحلها اللى ما يغفل ولا ينام 😭✋

وانا بحضر العشا لاقيت مدحت داخل عليه المطبخ وكان مرتبك وسألنى ع الچاكت بس انا عملت عبيطه 👌 وقولت انى مخدتش بالى شوفوا بره فالصاله وجرى زى الأطفال ولما لاقاه وانا شيفاه بعينى بيفتش فى جيب الچاكت وشاف صوره عبير وطلع علبه الخاتم ودخل ع اوضه النوم وانا حضرت العشا والله نفسى اسممه واحط السم فى الاكل لولا خوفى من الله والله ما يستاهل اهو كلب لاقا عضمه بس

مش هسبهم هو عبير نهارهم مش فايت معايا وناديت عليه حبيبى 😁 العشا ومردش عليه وبعد كذا صوت برضه مردش قمت من ع السفرا ودخلت اوضه النوم اشوفوا مردش ليه لاقيته ماسك الفون وبيتكلم ده مش بيتكلم ده بيوشوش🤣 تلاقى المحروسه صاحبتى ست عبير اللى سايبه عيالها ع حل شعرهم ما هما هيطلعوا لمين أم خاينه وانا قال ايه

بفتكرها بنت ناس وغير ابوهم مصطفى اوسخ راجل شوفتوا فى حياتى ده حاول معايا كذا مره وانا كنت بصده وعلشان خراب البيوت بعدت عنهم إنما هى تخرب بيتى عادى بس انا هوريكى يا عبير يا صاحبتى
وطلعت قعدت ع السفره وعملت عبيطه ولاقيت مدحت خرج بس مزعور وقالى انا مش قادر اتعشى مليش نفس خالص
أسماء : ليه أن شاء الله تكونش أكلت بره ما ده الناقص 😏
مدحت : نعم بتقولى ايه

أسماء : بكح بهزر يا حبيبى 😂 شوفت اللى حصل
مدحت : خييير
اسماء : انا شوفت منظر زى الزفت شوفت ابن عبير صاحبتى وبنتها فى وضع زباله ومش عارفه اعمل ايه 😒
مدحت ارتبك واتلغبط وقالها وضع ايه مش فاهم
أسماء : انا بكره هروح لعبير اققولها ايه رأيك
مدحت : لا متروحيش
أسماء : ليه لازم اقولها

مدحت : متروحيش عندها وخلاص واقطعى علاقتك بيها افضل
اسماء قالت فى سرها اه عاوز ابعد علشان تاخد راحتك يا كلب
مدحت : انا خايف حد يكون خد رقم العربيه
أسماء : كله هيبان بس لازم تروح تسلم نفسك
مدحت : يا سلام نفترض مات اتحبس انا
اسماء : كل واحد لازم ياخد جزاءه
مدحت : انتى عاوزانى اتحبس

اسماء قالت فى سرها ياريت تتشنق وتريحنا بدل الفضايح اللى هتحصل
مدحت : انتى عاوزانى اتحبس يا اسماء
أسماء : ههه لا ي حبيبى الف بعد الشر عليك
واسماء مضايقه ومدحت حتى مأكلش وقام مضايق بس أسماء بتفكر تعمل ايه وتكشفه ازاى لما مدحت قام نام مسكت الفون واتصلت بأختها اللى اكبر منها وكانت بتعيط ومنهاره وقالت لها ع كل اللى حصل بس اختها قالت لها يبقى معملش حادثه ده بيرسم الدور عليكى علشان متاخديش فى بالك عموما انا هساعدك بصى فى ابلكيشن بينزل برنامج

تجسيس ع الواتس انا بكره هجيلك وتنزليه ونظبطه ونشوف البيه بيعمل ايه معاها وعلاقته بيها ايه بس اختها واسمها نيره قالت لها بس ازاى لازم يكون الفون بتاعه معاكى راحت اسماء قالت لها هو نام دلوقتى 😃 قوليلى هنزل البرنامج ازاى وانا هدخل اجيب تليفونه ونظبط الدنيا وانا قاعده دلوقتى يأما تيجى الصبح قبل ما يمشى بس نيره قالت لأ ناصحه قومى هاتى الفون وفعلا ابتدت اسماء تتحرك علشان تعرف علاقه عبير بمدحت ونسيت خالص حوار اولاد عبير راحت نيره قالت لها تحمل برنامج التجسس ع الواتس وفعلا اسماء حملته وجابت تليفون مدحت وفضلت تفتح بس قالت لنيره يا خساره ده عامل باسورد

بس نيره قالت لها سهله ادخلى قولى لمدحت انك عاوزه تعملى مكالمه ومش معاكى رصيد وأسماء مكدبتش خبر ودخلت صحت مدحت وقالت افتح الفون عاوزه اكلم ماما لأنها كانت تعبانه ومدحت كان نايم مش مركز فتح الفون وأسماء اخدته وطلعت بره فالصاله وقعدت علشان تكمل الكلام مع اختها نيره ولما فتحت فون مدحت شافت حاجه غريبه 🤔 ولسه بتقول لنيره شافت ايه فى تليفون مدحت وفجأه الباب خبط وأسماء قالت خير من جاى دلوقت ونيره قالت لها شوفتى ايه فالفون بس أسماء صوتها ارتبك وقالت الباب بيخبط

نيره : مين جايلكم دلوقت دى الساعه 2 بالليل قومى افتحى
بس أسماء خافت ونسيت فون مدحت ع الكرسى ودخلت تصحى مدحت وقالت قوم افتح الباب ومدحت قام مفزوع وخرج يفتح الباب وأسماء خرجت وراه واول لما مدحت فتح الباب لاقا فى وشه عبير وقالت الحقنى يا مدحت…..


قصة الزوجة الخامسه بقلم كوكي سامح

الجزء الثالث

ومدحت فتح الباب وكان مفزوع لاقا فى وشه عبير وقالت الحقنى يا مدحت وطبعا أسماء واقفه مزهوله من منظر عبير ومدحت متنح وقال خير مالك يا مدام عبير الحقى يا اسماء شوفى صاحبتك مالها وأسماء محروق دمها وقالت فى سرها لازم مبينش حاجه وقالت فى ايه مالك وايه اللى مبهدلك

كده 😏 عبير قالت مصطفى جوزى ضربنى وكان هيموتنى من الضرب وملقتش مكان اروح فى غير عندك انتى عارفه انتى اختى وعنيها بتبص ع مدحت بس أسماء ملاحظه كل حاجه وقالت اه بس هنعملك ايه يعنى 😁🤔
مدحت : اسماء صاحبتك فى بيتك مالك يا اسماء

اسماء : معلش اصل اتخضيت
عبير : طيب ادخل ولا امشى
مدحت : تمشى ودى تيجى ادخلى ده بيتك يا عبير
عبير دخلت قعدت ع كنبه الانتريه ومدحت وأسماء واقفين وعبير قالت انا اسفه يا مدحت معلش يا اسماء ملقتش مكان غير هنا انا هتصرف
مدحت : اسماء ادخلى حضرى عشا لعبير

عبير : لا لا مليش نفس
مدحت : يا ستى اهو تفتحى نفسنا احنا كمان متعشناش
وأسماء قالت فى سرها انا كده هحط النار جمب البنزين يا نهار اسود انا جوايا نار 🔥 ايه البجاحه دى انا لازم انزل برنامج الواتس اشوف بيقولوا ايه
من ورايا كمان
اسماء دخلت المطبخ تحضر العشا وكان محروق دمها
وعبير ومدحت قاعدين بيتكلموا وأسماء فالمطبخ

عبير قربت من مدحت ومسكته من صدره وقالت حبيبى انا جاتلك لحد عندك وحشتنى اوى صح عملت ايه هههههه ومدحت قالها قولت حادثه وأسماء صدقت😂
وعبير قربت من مدحت واترمت فى حضنه ومدحت قالها لا لا مش هنا أسماء جووه

وأسماء فالمطبخ وقالت لما ابص عليهم واشوف بيقولوا ايه ولما بصت عليهم شافت عبير بتحضن مدحت وقالت فى بيتى كمان ماشى انا همسك نفسى مع انى عاوزه افضحهم بس علشان خاطر ولادى

وخرجت سوفيا قلقانه من النوم بس، مدحت حس، بيها وبعد عبير عنه وسوفيا قالت طنط عبير 🤔 مالك يا طنط
عبير رددت بصوت كأنها مضايقه عندى شويه مشاكل يا حبيبتى وسوفيا دخلت الحمام ودخلت ع اوضتها
وأسماء خرجت من المطبخ وحضرت الأكل وكان جواها نار وقعدوا ع السفره ونظرات عبير جريئه اوى لمدحت مع ان مدحت بيدارى والكارثه اللى مدحت ميعرفوش ان اسماء، عارفه كل حاجه

مدحت : الحمد لله انا أكلت
عبير : وانا كمان
وأسماء قالت فى سرها بالسم الهارى على قلبكم انت حب عمرى آنت الراجل اللى عشت معاه ع الحلوه والمره
مدحت : اسماء بقولك قومى يا حبيبتى افتحى شقه نهى اختى علشان عبير تقعد فيها
اسماء : شقه نهى ليه 😁 انا هخليها تقعد مع سوفيا وان شاء الصبح كلم مصطفى وحل معاه وعبير تروح ع بيتها
عبير : المشكله كبيره يا اسماء وشكلها هتاخد وقت وع فكره مصطفى ميعرفش انى هنا

اسماء : امممم ميعرفش عموما مدحت يكلمه وبعدين يا مدحت انا خايفه اختك نهى تضايق ان فتحنا شقتها
مدحت : هبقى اكلمها
اسماء قامت وخدت مفتاح الشقه وخرجت لان نهى اخت مدحت واخده شقه تمليك قصادهم وهى مسافره مع جوزها بره

وأسماء فتحت الشقه ودخلت وفتحت النور وابتدت تكلم نفسها وقالت دول شكلهم متفقين مع بعض لأ والبيه مش قادر يستغنى عنها جايه لحد هنا بس وحياه ولادى ما هسيب حقى وخرجت وقالت تعالى يا عبير واول عبير ما دخلت الشقه قالت لأسماء لو سمحت هتعبك معايا يا اسماء، انا عاوزه هدوم انام بيها وياريت كام قميص نوم علشان بحب اخد راحتى
اسماء : كام قميص نوم 😆 كمان

عبير : ياريت معلش هتقل عليكى
وأسماء دخلت شقتها وجابت هدوم لعبير وراحت ادتهم لعبير بس عبير كان شكلها مبسوط اوى
اسماء : اتخانقتى مع مصطفى ليه
عبير : بكره هقولك اه اصل عاوزه انام وخدت الهدوم ودخلت اوضه النوم ودخلت تنام وسابت اسماء واقفه
اسماء قالت فى سرها تنامى نامت عليكى حيطه وخرجت اسماء ع شقتها ولاقت مدحت نام وقالت لما اتصل باختى نيره اقولها ع إللى حصل وكلمتها وحكت ع كل حاجه ونيره اتفقت معاها ينزلوا برنامج الواتس علشان تتجسس ع فون

مدحت وقفلت معاها ودخلت تنام جمب مدحت وفضلت تكلمه بس كان نايم وقالت انت نمت طيب وأسماء نامت هى كمان وراحت فالنوم واسماء قلقت من النوم وكانت الساعه عدت 5 بعد الفجر وقالت ايه ده هو فين مدحت وقامت

تجرى عالحمام تشوفو ملقتهوش وقالت اكيد هو جوه عند الهانم وخدت مفتاح الشقه وفتحت الباب وقالت لازم اققفشهم ومش هسكت……


قصة الزوجة الخامسه بقلم كوكي سامح

الجزء الرابع

اسماء قامت تجرى ع الشقه وقالت لازم اققفشهم ومش هسكت وفتحت بالمفتاح ودخلت الشقه على طراطيف صوابعها ولاقت النور مطفى واتسحبت لحد اوضه النوم وقالت بصوت واطى اوى انا مش سامعه حاجه خالص انا حاسه ان الشقه فاضيه اومال فين الهانم انا هتكل ع الله

وادخل اوضه النوم واشوف بيحصل ايه وراحت فتحت الباب وكانت عبير نايمه وأسماء قالت دى نايمه بس عبير اتخضت وقامت من النوم وقالت اسماء فى حاجه خضتينى بس أسماء قالت معلش كنت بطمن عليكى واتحرجت اوى وخرجت وقالت وانا كنت ناويه اققفشهم اومال مدحت راح فييين؟! فالوقت ده وأسماء بتكلم نفسها وهى خارجه لاقت مدحت طالع ع السلم راحت اسماء استغربت وقالت ايه ده أنت كنت فييين

مدحت : لا معلش انتى اللى بتعملى ايه ع باب الشقه
اسماء : بدور عليك قمت ملقتكش جمبى ايه كفرت 😁
مدحت : عموما انا كنت بصلى الفجر فالجامع وعديت ع الراجل بتاع الفطير عارفاه اصل كان نفسى فالفطير اوى فضلنا نرغى شويه علشان كده اتأخرت
اسماء : ما انت عارف ان انا وفارس وسوفيا بنحبه ليه معملتش حسابنا
مدحت : ع فكره بيتاكل سخن وانتم نايمين خلاص يا حبيبتى بكره انزل واجبلكم ولا تزعلى

اسماء قالت فى سرها ازعل ع ايه على سنين عمرى اللى راحت هدر مع راجل خاين بس مش هسيبك ولا هسامحك طول ما انا عايشه
مدحت : مالك يا قلبى
عبير فتحت الباب وقالت ايه ده فى حاجه متجمعين عند النبى

اسماء ومدحت عليه افضل الصلاة والسلام
مدحت : صباح الخير
عبير: صباح الفل شكرا يا اسماء ع اهتمامك بيه
اسماء رددت بغيظ وقالت ده واجب عليه
اسماء : يلا حبيبتى ادخلى كملى نوم يلا يا مدحت علشان نكمل نومنا وخدت مدحت من ايده ودخلت شقتها ودخلوا يكملوا نوم بس أسماء كانت بتغلى وجواها نار 🔥

والبيت كله نايم وقام فارس من النوم وكانت الساعه 7 الصبح وقام حضر فطار لنفسه ومكنش عنده فكره ان عبير موجوده عندهم وكالعاده فارس فطر ونزل وقامت سوفيا من النوم وحضرت فطار للكل ودخلت صحت مامتها وباباها وسألت ع عبير وأسماء قالت لها فى شقه عمتك نهى

سوفيا : مامى ادخل اقول لطنط عبير الفطار جاهز تفطر معانا

اسماء : لأ سبيها ع راحتها
مدحت : ليه ادخلى يا سوفيا صحى طنط عبير وخليها تيجى تفطر معانا
فون سوفيا رن وسوفيا بصت وخدت الفون ع اوضتها ودخلت تتكلم وقالت الو اخيرا اتصلت بيه يا نصاب يا محتال
عمر : ههههههه نصاب ليه وانا خدت حاجه منك غصب عنك
سوفيا : خدت فلوسي حتى دهبى اخدته
عمر : اسمعى حسك عينك تتصلى بيه تانى انتى فاهمه يأما هوريكى ايام سووووده وقفل فى وش سوفيا وسوفيا فضلت تعيط

الكاتبه كوكى سامح
اسماء: سوفيا سوفيا يلا تعالى
سوفيا : حاضر يا مامى
وسوفيا مسحت دموعها ومحدش فالبيت عارف عن مشاكلها حاجه
سوفيا دخلت شقه عمتها علشان تصحى عبير واول لما دخلت لاقت عبير صاحيه وتتكلم فالفون وقالت تعالى يا سوفيا
ثوانى حبيبتى هخلص تليفون
سوفيا : طنط الفطار جاهز تعالى افطرى معانا
عبير : اوك يلا يا قمر
والكل اتجمع ع السفره وقعدوا يفطروا مدحت وأسماء وسوفيا وعبير

عبير : اسماء بليز محدش يكلم مصطفى دلوقتى خالص انا عارفاه أصله بيكون متعصب يومين بس ويهدى وبعد كده حد فيكم يكلمه

اسماء : طيب والمشكله ايه
عبير : انا قرفت منه خلاص ومن عيشته حتى ولاده قرفونى
اسماء : لا حول ولا قوة الا بالله دى حياتك يا بنتى
مدحت : احنا الرجاله غلابه
اسماء قالت فى سرها اه غلابه يا خاين انا هوريك
عبير : غلابه اه انت غلبان اللى زيك مفيش منه يا مدحت
اسماء : ههههههههه اتفضليه
مدحت : وانا موافق 😂

وسوفيا قاعده مش بتاكل بتفكر فالنصاب اللى تعرفوا
وبعد ما خلصوا فطار كلهم قاموا وعبير دخلت الشقه التانيه وأسماء نزلت سوبر ماركت تشترى حاجات ومدحت واخد اجازه من الشغل وسوفيا قاعده مع باباها
سوفيا : انا هنزل الساعه دلوقتى عدت 2 وانا هروح اذاكر مع لميس صاحبتى اوك
مدحت : عاوزه فلوس لو عاوزه ادخلى خودى من المحفظه فى اوضه النوم
سوفيا : ميرسى يا بابى ربنا يخليك لينا انا اخدت من مامى
مدحت : متتأخريش ولما اتصل بيكى ردى عليه
وسوفيا نزلت وقالت حاضر يا بابى ومدحت لاقى عبير داخله عليه الشقه وقالت فين اسماء،

مدحت : راحت تشترى حاجات من السوبر ماركت
عبير : ههههه احسن سيبك انت وحشتنى بقولك هى حست بحاجه امبارح
مدحت : هههههه لا بس مش عارف هى ايه اللى خلاها تفكر انى عندك ف الشقه الموضوع ده قلقنى
عبير : تفكر ايه لا طبعا هى اكيد كانت داخله تطمن عليه عارف لو اللى انت بتقولوا ده صح يبقى بتشك فيك
مدحت : مستحيل طبعا

اسماء فالشارع وخدت تاكس وراحت عند اختها نيره ومعاها تليفون مدحت علشان تنزل عليه برنامج التجسس على الواتس وكانت مرعوبه لمدحت ياخد باله ولما وصلت عند نيره ودخلت مزعوره نيره قالت لها مالك بس أسماء قعدت وطلعت تليفون مدحت وتليفونها وقالت انجزى نزلى البرنامج يلا انا عندى مصيبه فالبيت ولازم اعرف دول بيعملوا ايه ولازم اققفشهم لحسن والله اقتلهم واخلص بس نيره قالت اهدى احكيلى ايه اللى حصل بس أسماء مستعجله وقالت لها بعدين راحت نيره مسكت تليفون مدحت وقالت الباسورد انتى تعرفيه

اسماء : يادى المصيبه لا بس طيب اى رقم
نيره : ازاى شعوذه هو يعنى
اسماء : اه اكيد عيد ميلاد سوفيا ما هى حبيبت ابوها انتى عارفه روحه فيها وفعلا اول لما دخلت عيد ميلاد سوفيا الباسورد اتفتح وابتدت نيره تظبط البرنامج
وعبير ومدحت قاعدين بيحبوا فى بعض ومش حاسين بحاجه وفارس رجع من بره وفتح باب الشقه وعبير ومدحت مش حاسين بيه خالص وسمع باباه بيكلم عبير وبيقولها انا بحبك من زمان وكان عينى عليكى بس يا خساره متجوزه
عبير : ايه عاوز تضمنى لليسته بتعتك ده انت متجوز ع مراتك اربع مرات عرفى يا راجل اتهد 😂 وهى متعرفش حاجه زى الهبله

مدحت : خلاص وانتى الخامسه فى مانع
عبير : بس عرفى لا لا انت عارف انا محضره ليك مفجأه انا أطلقت الطلقه التالته 😍
مدحت : يا نهار اسود وكل ده وانا معرفش يا بنت الايه
عبير : هههههه خلاص تيجى محلل بقى 😂😉
مدحت : وأسماء مش هترضى
عبير : ايه هو انت بتكذب عليه ولا بتضحك عليه
مدحت : ابدا بس رسمى مقدرش عرفى اه انتى عارفه ولادى واسماء
عبير : وانت من امتى عملت حسابهم انت كل يوم والتانى تتجوز عرفى متجوز لحد دلوقتى اربع مرات واخرهم الراقصه اللى نصبت عليك 😂😁

فارس واقف ومش مصدق نفسه وقال هو ده بابا ودى طنط عبير صاحبه ماما وقال انا لازم اتصرف ولازم ابعدك عن بيتنا يا عبير الكلب وقال انا عرفت هعمل ايه هحرمك عليها…


قصة الزوجة الخامسه بقلم كوكي سامح

الجزء الخامس

وفارس سمع كلام عبير مع باباه وقال انا هحرمها عليك وراح هز المفاتيح وعمل صوت علشان يحسوا بيه ومدحت شاور لعبير علشان تغير الموضوع أو تسكت وطبعا معندهمش فكره ان فارس سمع حاجه وفارس اول ما دخل قال ايه ده مين عبير ازيك يا عبير اخبارك
مدحت : فارس طنط عبير

فارس : طنط ايه لولا اعرفها كنت احسبها صاحبت سوفى اختى
عبير : ما تسيبوا ههههههه العيال كبرت يا مدحت انا لسه شايفاه عيل من يومين وبقى شاب زى القمر ازيك يا فارس خليك براحتك ملكش دعوه بمدحت

فارس قعد جمب عبير وفضل يهزر وقال فى سره انتى عاوزه تخطيط كبير ولازم ع الاققل احافظ ع بيت امى وابويا 😭
وفى نفس الوقت نيره خلصت البرنامج ع الواتس ونزلته ع تليفون مدحت وخلصت وفهمت اسماء تستعمله ازاى علشان مدحت مياخدش باله من حاجه وأسماء نزلت من عندها وراحت السوبر ماركت تشترى طلبات للبيت وخلصت ورجعت ع البيت واول ما دخلت وشافت فارس قاعد بيهزر مع عبير اضايقت بس هى مشغوله علشان تليفون مدحت معاها ودخلت ع اوضه النوم وحطت تليفون مدحت ع التسريحه وخرجت بس مدحت قالها فى ايه يا اسماء مالك كده ده انتى جريتى ع اوضه النوم وحتى الحاجه فى ايدك وأسماء قالت لا مفيش بس كنت ناسيه شنطتى اللى فيها الفلوس وقولت انا خدتها معايا وبحسبها ضاعت
مدحت : فداكى يا حبيبتى

فارس بيكلم نفسه وبيقول يا حبيبتى يا ماما بابا متجوز عليكى عرفى 4 مرات وبتاع ستات وانتى فكراه ملاك وكمان هيتجوز الخامسه بس هتبقى رسمى وانا مش هخليه يتجوزها ويجرحك ابدا 💔😭
اسماء : مالك يا عبير مش كنت سيباكى فى شقتك كنت عاوزه حاجه ولا ايه
عبير : حسيت انى قاعده لوحدى بتفرج على الحيطان ومفيش اى حاجه خالص
وعبير قامت ع شقه اخت مدحت ودخلت جابت فلوس من شقتها ورجعت ع شقه اسماء وقالت لأسماء خودى يا حبيبتى
اسماء : ايه دى
عبير : فلوس معلش، خودى
اسماء : ليه

عبير : معلش عاوزه شويه طلبات فالتلاجه عندى وشاى ونسكافيه علشان بس لما احتاج حاجه الاقى ومزعجش حد معايا كفايه عليه انى قاعده معاكم وغير باكل احسن اكل تسلم ايدك يا اسماء 😘
اسماء : اممممم يا حبيبتى ده واجب وبعدين مدحت يكلم مصطفى ونحل المشكله وتروحى بيتك وتنوريه وقالت فى سرها وتريحينا وتبعدى عن جوزى يا خرابه البيوت
فارس : منوره يا عبير 😍
اسماء : فارس طنط عبير
فارس : ماما انا شايف ان طنط كبيره عليها وهو انت عندك كام سنه
عبير : انا اتجوزت صغيره يا فارس انا أصغر من أسماء بشويه انا عندى 35 سنه عارف انا اتجوزت وانا عندى 20 سنه عايشه 15 سنه فى عذاب واتظلمت مع الراجل ده طول عمره عينه زايغه وانا مش، ماليه عينه
فارس : مع انك قمرررررر 😘 وبص لعبير نظره فيها معاكسه

عبير عينها فى عين فارس ومدحت وأسماء مش فى بالهم لحظه ان فارس بيفكر يقرب من عبير
فارس : ياااه مش كبيره خالص انا بحسب انك قد ماما وانا بقووول كلمه طنط كبيره عليكى
اسماء : انا اتجوزت مدحت وانا صغيره فى وقتها كان عندى 17 سنه وعشت أجمل سنين عمرى معاه ❤️ وربنا رزقنا بفارس وسوفيا انا بحس انهم اخواتى واول ما اتجوزنا خلفنا فارس ع طول متجوزين بقالنا 27 سنه وفارس اهو بقى راجل عنده 26 سنه وجبت سوفيا بعده بخمس سنين عندها واحد وعشرين سنه ياه عمر تانى انا عندى دلوقتى 44 سنه
عبير : لسه صغيره يا حبيبتى فاكره يا اسماء لما اول شوفتك فيها وانتى سكنتى قصادى قبل ما تيجى هنا وانا كنت لسه راجعه من بره واتصحبنا ع بعض
اسماء قالت فى سرها اه وطمر فيكى يا قليله الأصل

مدحت : ايه يا جماعه انا لسه شباب
اسماء : انت عندك 48 سنه واللى يشوفك يقول أصغر منى 😂😁 اه ما انا شايله كل حاجه ع دماغى
اسماء : مدحت ارجوك اتصل بمصطفى جوز عبير واتكلم معاه شوف مشكلتهم ايه
عبير : انا أطلقت يا اسماء، ودى التلاته مفيش فيها رجوووع خلاص
اسماء : نعم……


قصة الزوجة الخامسه بقلم كوكي سامح

الجزء السادس

اسماء اضايقت وقالت يا نهار اسود انتى كده عاوزه محلل يا عبير
عبير: انا مش هرجع تانى انا قرفت من عيشته خلاص

مدحت: والحل ايه
اسماء : محلل يا عبير! 😁
عبير : يا جماعه انا مش عاوزاه
اسماء : وولادك حرام عليكى
عبير : ولاد مين يا حبيبتى انا اتجوزته وهو متجوز قبلى وعنده ولد ولما مراته ابتدت تغير رمت ابنها لى وانا ربيته وبعدها بتلت سنين اتفجأت بالبنت كمان جاى وجايباها ربيتها مع الولد هى اخته بس من ام تانيه ولا منين بس بقول وانا مالى المهم بيصرف كويس اما عن نفسى انا مخلفتش

اسماء : مع انى بفتكرهم ولادك لان بيقولولك يا ماما وبعدين كنتى بتعامليهم كويس تصدقى عمرى ما حسيت انهم مش ولادك وقالت فى سرها انتى كده مش باقيه ع حاجه وجايه تخربى بيتى ازاى مكنتش اعرف ان دول مش ولادها
مدحت : خلاص اتجوزى وبعدين ارجعى لجوزك
اسماء : ايه انت هتفتى 🤔✋ لو محلل ع اتفاق 🤝 حرام
مدحت : ايه اللى حرمه 🤨 انا اعرف ان لازم يدخل بيها
اسماء : اه ده كلام الأفلام هى تتجوز عادى من غير اتفاق مع الزوج الجديد وتكمل حياتها عادى يمكن تعيش معاه سعيده وتكمل لو أطلقت دى حاجه تانيه ولو حبت ترجع لجوزها مفيش مانع المهم من غير اتفاق او ميعاد معين انها تتطلق فيه إنما تتجوز ده براحتها وبعدين ده عقاب الزوج اللى كلمه الطلاق لبانه فى لسانه ده عقاب ربنا لى ان مراته تجوز محلل وتجوز راجل غيره وتعشره كمان ووممكن يكون احسن منه ويراعى فيها ربنا وكمان متتطلقش والزوج وقتها لازم يندم
عبير : بس هو فين المحلل وبصت لفارس اوبااااااااا

مدحت : كان نفسى اساعدك واجوزك حد من اصحابى
اسماء : مش انتى قولتى مش عاوزاه خلاص شوفيلك شقه وريحى أعصابك واشتغلى
عبير بصت لفارس وقالت هفكر 😉
مدحت دخل اوضته وقال انا داخل اريح شويه لما تحضرى العشا صحينى من النوم يا حبيبتى
اسماء : ماشى بقولك انا هعمل سمك وسلطات ورز سمك اللى بتحبه وكمان جمبرى علشان عبير بتحبه وسوفيا وفارس نفسهم فيه
وطبعا اسماء بتتكلم عادى ومتكله ع الواتس انها هتعرف خط سيرهم من الواتس وبيقولوا ايه وبيعملوا ايه
ومدحت دخل نام وعبير قاعده مع فارس تتكلم معاه وسوفيا لسه مرجعتش وأسماء فالمطبخ ومش فى بالها لحظه ان فارس يبص لعبير
واول ما اسماء دخلت المطبخ فتحت الواتس وابتدت تراقب ايه اللى هيحصل ومستنيه تعرف بيقولوا ايه
فارس : عبير عارفه انتى صغيره اوى اوى فعلا الحكايه مش سن انتى مش باين عليكى عارفه انتى عينك حلوه اوى
عبير : بجد عينى حلووه

فارس مسك ايد عبير وقالها انتى حلوووه اوى وابتدى يبوس ايدها
وعبير مش مستوعبه امبارح مع مدحت والنهارده مع ابنه وكمان فارس صغير فالسن وكمان بياكل عقلها بالكلام
عبير : فارس بتعمل ايه
فارس : حب 😍 مش عارف انتى حركتى فيه حاجات كتير انا حاسس انى عاوزك بحبك انا معجب بيكى اوى
عبير : براحه لحد يشوفنا استنى مش هنا
ومسكت ايده بس فارس قام وقالها انا داخل اوضتى لما تحسى بيا كلمينى
عبير : هو انا مالى فيه ايه بس لا لا لازم اهدى واركز وقامت دخلت شقه نهى اللى هى قاعده فيها واول ما دخلت مسكت الفون علشان تكلم مدحت واتس وبعدين قالت مش وقته انا بفكر فى فارس الواد صغير وزى القمر
وأسماء فالمطبخ وبتعمل السمك وخلصت والرز عالنار وكانت بتحضر السلطه ومسكت السكينه فى اشعار رساله واتس جه فتحت لاقت مدحت باعت قلب لعبير وأسماء مستنيه يحصل كلام بينهم وقالت الخاين عامل نفسه نايم بس انا هوريك يا خاين انت والخاينه دى كمان بترسم تاخدك محلل 😂😁 وفكرانى عبيطه

وطبعا كل ده متعرفش ان فارس عنده خلفيه وبيلعب ع عبير من وراهم
وأسماء قالت غريبه ازاى عبير مردتش عليه 😁🤔 هو فى ايه يمكن الهانم مش واخده بالها
وخرجت اسماء حضرت السفره وملقتش حد فالصاله ومسكت الفون واتصلت بسوفيا بس سوفيا مردتش
اسماء : فارس فارس يلا صحى بابا قول العشا جاهز وفعلا مدحت قام غسل وشه وفارس قال انا هروح انادى عبير وخرج وخبط على الباب وعبير بصت من العين السحريه ولما شافت فارس قلعت الروب وفتحت بالقميص واول لما فتحت فارس بص ع جسمها وهى عملت نفسها بتتاوب وقالت فارس وهى بتتدلع ايه ده فارس معلش كنت نايمه وجريت لابست الروب بس فارس دخل وقفل الباب ومسك عبير من ايدها وشدها عليه وباسها وهى استسلمت لفارس وحضنته بس فارس قالها بقولك طيب يلا ناكل دول مستنين ع الاكل البس حاجه وتعالى وبعدين نتكلم وخرج وسابها

وعبير فضلت متنحه وحاسه بحضن فارس ليها وحست انها بتحبه اوى وخرجت وراه علشان تاكل معاهم ومحدش ياخد باله
وكلهم قعدوا ع السفره ومدحت قال لاسماء هى سوفيا اتأخرت ليه دى قالت هى رايحه تذاكر مع صاحبتها وأسماء قالت انا اتصلت بيها مش بترد اكيد بتذاكر
وفجأه وكلهم بياكلوا باب الشقه اتفتح وسوفيا دخلت وكانت مضروبه ومتبهدله وكلهم قاموا وقفوا وفارس جرى عليها ولسه هيكلم سوفيا بصلها اوى وبيقولها فى ايه راحت سوفيا وقعت ع الارض اغمى عليها……


قصة الزوجة الخامسه بقلم كوكي سامح

الجزء السابع

سوفيا وقعت على الأرض وفارس جرى عليها ومسك ايدها وقال بابا؟ سوفيا مضروبه مش عارف فى ايه وفارس شال سوفيا ودخل بيها ع اوضتها وفضل يفوق فيها وأسماء مسكت سوفيا وبقت تعيط وتقول مالك يا بنتى ايه اللى صابنا احنا كنا زى الفل وهى بتبص لعبير بس عبير خرجت فى الصاله ومدحت وأسماء قاعدين مع سوفيا ومدحت قال لفارس يتصل بالدكتور وفارس خرج الصاله ومسك الفون يتصل بالدكتور وعبير اول لما شافت فارس قامت ووقفت جمبه وفارس اتصل بالدكتور وطلب منه يجى وبعد ما خلص وقفل معاه راحت عبير مسكت ضهر فارس وابتدت تحسس عليه وفارس قالها مش وقته انا مش عارف اختى فيها ايه😢 وبردوا عبير مش مبطله
فارس : عبير مش وقته وعلى الاققل مش هنا 😁

عبير : انت اللى عملت فيه كده انا بحبك اوى يا فارس بجد مش قادره
وكل لما فارس يبعد عبير تقرب من فارس وتلمسه بأيدها وتحسس ع ضهره
وأسماء ومدحت قاعدين جمب سوفيا ومش عارفين سوفيا فيها ايه
الباب خبط وفارس جرى يفتح الباب وقال الدكتور وصل وخده ودخل بيه ع اوضه سوفيا وكل ده سوفيا لسه مغمى عليها والدكتور كشف على سوفيا وبعد ما كشف خرج بره الاوضه لأنه صاحب مدحت ويعرفه معرفه شخصيه وقال لمدحت عاوزك بره انت والمدام
مدحت وأسماء قالوا فى صوووت واحد خير يا دكتور بس الدكتور طلب يخرجوا بره الاوضه علشان فارس موجود وسوفيا لسه مغمى عليها بس فارس قال للدكتور هى مش هتفوق يا دكتور..
الدكتور قال لفارس انا علقتلها محاليل وبعد ما اخدت الحقنه دى هتفوق ان شاء الله دى كسور وكدمات نتيجه ضرب مبرح وكمان هه…..
فارس : فى ايه يا دكتور اختى مالها حالتها خطيره لدرجه دى
الدكتور : لو سمحت يا مدحت تعالى معايا بس بره ارجوك
مدحت : اتفضل يا دكتور احمد

وخرج مع مدحت بره الاوضه وأسماء، خرجت ووقفت تسمع فى ايه
الدكتور : يا مدحت انا مش عارف اققولك ايه البنت تعبانه ومحتاجه راحه ولازم تعرف مين اللى ضربها
مدحت : فى كسور يا احمد
د. احمد : لا هى كدمات بس مش خير فى حاجه تانيه
مدحت : فى ايه
د. احمد : البنت حاامل 😔
اسماء : يا نهار اسود بنتى انا حامل
مدحت الخبر نزل عليه زى الصاعقه ومش عارف يتصرف ودخل يجرى ع اوضه سوفيا ومسكها وفضل يقولها موتى انتى اللى زيك لازم يمووووت
فارس : فى ايه يا بابا فى ايه بس

مدحت : الهانم بدور ع حل شعرها الهانم اختك حاامل عارف يعنى ايه خلاص اتفضحنا
عبير خدت بعضها وراحت ع شقه نهى اخت مدحت وقالت يا نهار اسود دى مصيبه سوده عموما هبقى اكلم فارس لما الدنيا تهدى شويه
والشقه كلها ولعت بخبر حمل سوفيا وأسماء فضلت تعيط ومش عارفه تعمل ايه ومدحت منهار وزعلان ع بنته ونور عينه اللى تعب فى تربيتها وفارس واقف متمسمر مكانه مش عارف يعمل ايه
وسوفيا ابتدت تفوق والبيت كله مولع نار 🔥 بسبب خبر حملها والكل مش مصدق ان سوفيا تعمل كده
فارس مسك سوفيا وقالها بكل عصبيه مين اللى عمل فيكى كده وسوفيا مذهوله وقالت عمل فيه ايه محدش عمل فيه حاجه بقولك انا عملت حادثه

اسماء قالت اه ما انتى كذابه زى ابوكى تعملوا مصايب وتقولوا حادثه ابن الوز عوام هو انتى هتجيبيه من بررره وفضلت تعيط بس مدحت كان مضايق علشان سوفيا ومخدش باله من كلام اسماء
مدحت : انتى بنتى اللى ربيتك احسن تربيه خذلتينى وجرى ع سوفيا وقالها مين اللى عمل فيكى كده لازم تتجوزبه يأما اققتلك واشرب من دمك


قصة الزوجة الخامسه بقلم كوكي سامح

الجزء الثامن

سوفيا قالت تقتلنى ليه انا بقولك عملت حادثه يا بابا وقامت واقفت ومسكت جسمها وقالت انا مش فيه حاجه اهو راحت واقعه ع الارض مستحملتش
فارس : سوفيا انتى بتخبى علينا ليه خلاص انا وبابا وماما عرفنا كل حاجه عرفنا انك حاامل يا مدااام

سوفيا : انا انا 🤦‍♀️ اخرجوا بره وانهارت وفضلت تصوت وتعيط
فون فارس رن ومن غير ما يشوف مين رد ع طول وكانت عبير اللى بتتصل وقالت لفارس عملتوا ايه دلوقت بس فارس رد عليها بأسلوب وحش وقالها مش وقته بعدين وقفل فى وشها وقال مش نقصاكى انتى كمان
عبير : اكيد مضايق علشان اخته بس لازم اشوفوا

وفى شقه مدحت الدنيا مولعه والبيت كله مكتئب وكلهم مستنين سوفيا تقول مين
فارس قال ماما بابا انا داخل لسوفيا اتكلم معاها وهعرف منها ايه اللى حصل انا مش هسيب حق اختى
مدحت : اختك عاوزه القتل والدموع نزلت من عينه
اسماء : انت بتعيط يا مدحت
مدحت : معنديش أغلى من سوفيا انا اتمنيت انها تموت 😭 وطول عمرى بتمنى تلبس فستان الفرح
انا بقول دلوقتى ياريتها ما اتولدت انا محرمتهاش من حاجه
فارس قام ودخل لسوفيا وفضل معاها جوه اكتر من ربع ساعه وسوفيا بتعيط وخرج وقال مش عاوزه تتكلم هى بتعيط بس
فارس : ماما بابا متقلقوش انا هحل كل ده وهعرف مين عمل فى اختى كده مش هسيبه وبعدين خلاص احنا عرفنا كل حاجه لا هنقدم ولا نأخر اللى حصل حصل يعنى هنموتها 🤔 احنا نجوزها للى عمل كده
مدحت حط ايده ع خده وتفكيره كله فى سوفيا

اسماء قالت انا مش قادره انام انا حاسه انى تعبانه اوى وحزينه ع بنتى انا قرفت وربنا قرفت مش عارفه الاقيها منين ولا منين وقالت فى سرها من مدحت اللى هيتجوز عليه صاحبتى ولا بنتى اللى ربتها احسن تربيه بنتى انا حااامل 😭
مدحت : اسماء ادخلى نامى انتى انا هدخل البلكونه اشرب سيجاره انا حاسس انا قلبى هيقف 💔
اسماء قالت فى سرها كله منك انت منك لله انت والملعونه اللى تعرفها
ومدحت دخل البلكونه يشرب سيجاره وأسماء دخلت تنام وحزينه ع سوفيا وفارس فضل قاعد فالصاله وعبير بتتصل بيه ومكانش عارف يرد ورد عليها لما مدحت دخل البلكونه وقالها لما يناموا والبيت يهدى هيدخلها الشقه
عبير : بقولك تعالى عاوزاك فى حاجه مهمه
فارس : حاضر يا حبيبتى كلها ساعه وهكككون عندك 😎 وفارس قفل مع عبير ومدحت خرج من البلكونه وقال لفارس يلا ادخل نام وبكره نشوف هنعمل فالمصيبه دى ايه؟؟
فارس : حاضر

وفارس دخل نام والبيت كله سكت وسوفيا فى اوضتها وأسماء نامت ومدحت دخل جمب اسماء وقام يتسحب من جمبها وماشى ع طرطيف صوابعه ورايح لعبير الشقه وهو بيفتح الباب فارس كان خارج لما شاف باباه رجع ع اوضته وقال اه هو اكيد رايح لها 😔😁 بس انا هراقبه وهشوف هيحصل ايه ومدحت فتح باب الشقه ونسى ياخد مفتاح شقه اخته نهى اللى فيها عبير وفارس بيتسحب وراه علشان يشوف هيحصل ايه 😁🤔 وفضل واقف فى صمت
مدحت لما لقى نفسه نسى المفتاح راح خبط براحه عالباب وعبير قاعده مستنيه فارس فتحت لاقت مدحت قدامها وقالت عاوز ايه مش خايف حد يشوفك
مدحت : وسعى عاوز ادخل لحد يشوفنى
عبير : ياراجل عيب عليك فى ظروف بنتك دى يلا ادخل ع شقتك أمشى يا مدحت وقفلت فى وشه
مدحت : يا بنت الكلب انا هوريكى

فارس : هو ده اللعب ولا بلاش ههههههههههههههههه اشرب يا بابا لازم احافظ ع بيتنا سامحنى انت اتجوزت ع ماما اربع مرات عرفى وكمان هنتجوز الخامسه ورسمى 😒 بس انا مش ههقر امى وقال لما ادخل ع اوضتى قبل ما يشوفنى لتبقى مصيبه
ومدحت رجع مكسور الخاطر ودخل زى الكلب جمب اسماء مراته
ولما فارس اتأكد أن ابوه نام وطبعا بعد ما عبير طردته راح ع شقه عبير وفتح بالمفتاح ودخل ونسى باب الشقه مفتوح ومن لهفه عبير اول لما شافت فارس خدته فى حضنها ودخل بيها ع اوضه النوم وقفلوا الباب عليهم بس باب الشقه مفتوح كان موارب
ومن ناحيه تانيه سوفيا صاحيه وقامت حضرت شنطه هدومها وقررت تهرب من البيت وبصت فالساعه لاقتها عدت 4 بالليل قامت فتحت باب اوضتها وخدت شنطه هدومها وخرجت وهى خارجه اوووبا الشنطه خبطت فالترابيزه وكان عليها فازه ووقعت اتكسرت وأسماء

ومدحت قاموا جرى من الخضه الصوت كان عالى وشافوا سوفيا واقفه ومعاها شنطه هدومها ومدحت قال لسوفيا ومسكها من دراعها وقالها انتى يا كلبه كنتى هتهربى كمان كنت هتكملى باقى الفضيحه وبقى يزعق وقال لاسماء شوفى بنتك يا ام يا مربيه يا ست هانم وجرى ع اوضه فارس قال تعالى يا فارس بيه شوف اختك وفتح اوضته لاقاها فاضيه وخرج وقال هو فارس فين دلوقت ؟! وقال يمكن فالحمام ودخل ملقهوش وأسماء، وسوفيا واقفين وراح فتح باب الشقه وقال يمكن نزل يشترى حاجه ولمح باب شقه نهى وقال ده الباب مفتوح وقال ايه ده باب شقه عبير مفتوح ليه ودخل الشقه وأسماء وسوفيا خرجوا وراه ولما دخل ملقاش حد فالصاله راح جرى ع

اوضه نوم عبير وكان مخضوض عليها ليكون فى حرامى ولا حاجه ورجع ع شقته وجاب مسدس ورجع تانى وابتدى يخبط ع باب الاوضه ويرزع ويقول عبير افتحى يا عبير؟؟ وأسماء وسوفيا واقفين وراح الباب اتفتح وقال فارس وعبير……..


قصة الزوجة الخامسه بقلم كوكي سامح

الجزء التاسع والاخير

والباب اتفتح ومدحت قال فارس ابنى ومع مين عبير💥؟ وأسماء وسوفيا واقفين مصدومين وفارس خرج وعبير خرجت وراه ومدحت بص فى ذهوول وقال انت ابنى اللى ربيتك ومع مين مع عبير ومسك اسماء من دراعها وزقها وقال احنا معرفناش نربى يا اسماء الهانم حامل والبيه نايم فى حضن واحده قد امه 💔 احنا معرفناش نربى وقال لا لا انتى اللى معرفتيش تربى دول كانوا فى مسؤليتك انتى انا فى شغلى طول النهار ومش حارمكم من حاجه كان الواجب عليكى تربى ولادك كويس

وكل ده وأسماء واقفه تسمع ومش عارفه تتكلم بس فارس رد وقال. امى ربتنا احسن تربيه ولو كنت غلط ف ده بسببك انت
انت اللى عملت كده فينا يا بابا
عبير : انا بحب فارس وهنتجوز يا مدحت عندك مانع
مدحت : انتى يا يللى ملكيش راجل وخاينه تتجوزى ابنى
عبير : وانت مالك خليك فى حالك ولا اقولك خليك فى اللى انت فيه بلاش اتكلم احسن

فارس : ايه هو فى ايه هو انتوا بتكلموا وتردوا على بعض

عبير وقفت جمب فارس ومسكت ايده وقالت انا بحبك قولهم اننا هنتجوز
فارس: اتجوز هههههههه اتجوز مين انتى؟؟ يلا خودى هدومك واطلعى بره حياتنا
عبير : انت بتقول ايه يا حبيبى لا اوعى تسبنى انا سبت الدنيا علشانك يا فارس
فارس : ابعدى عنى بقولك يلا اطلعى بره وزقها
عبير : اه انا فهمت كل حاجه انت وابوك بتغنوا وتردوا على بعض
فارس : بقولك يلا بره يا عبير

اسماء : انتى خاينه منك لله خربتى بيتى
عبير : لا انتى فاهمه غلط يا حبيبتى 🤣 انتى بيتك مخروب من زمان من اول ما اتجوز عليكى عرفى
مدحت : اسكتى بقولك اسكتى
عبير : خايف ولا اصل ابنك سى فارس فاكر نفسه هيعدل المايله 😂 لا لا انا هقولك يا اسماء جوزك ده اتجوز عليكى 4 مرات عرفى وكان عاوزنى اكون الزوجه الخامسه ده ياما حفى ورايا منه لله غاوانى وخرب بيتى
اسماء بصت لمدحت وقالت انت اتجوزت عليه عرفى 😭وكمان اربع مرات وانا عايشه معاك فاكره انك ملاك حسبى الله ونعم الوكيل
مدحت : اهو ما انتى عرفتى تربى بنت حامل وراجل ماشى مع واحده قد امه 😂

فارس مسك ايد امه وقال يا بابا ماما ربتنا احسن تربيه وقال لسوفيا تعالى يا سوفيا ومسك ايدها وقال سوفيا مش حامل يا بابا كل ده كان لعبه

سوفيا : ايوه يا بابا انا هقولك حصل ايه انا فى يوم كان عندى مشكله مع شاب زميلى فالجامعه كنت بحبه اوى وكان هيخطبنى فى يوم مامته تعبت طلب منى مساعده خدت فلوسى ودهبى وساعدته علشان كنت بحب وعلشان ماما كانت بتربى فينا حب الخير.. انا مكنتش اعرف انه كداب ونصاب ولما عرفت طلبت فلوسى وابتدى يهددنى وانا مش بخبى حاجه ع اخويا فارس لما شافنى مضايقه سألنى وقولتلوا ع كل حاجه لأنى مغلطتش بس عرفت غلطى واخويا خد حقى وقالى على حكايه عبير وانه سمع انكم هتتجوزا طلب منى نعمل المقلب ده علشان انت تتراجع عن اللى فى دماغك وتشيل مسؤوليتنا شويه بس وتحس

بمشاكلنا ورحنا عند صاحبك الدكتور أحمد وهو ساعدنا ع ده الله يكرمه واهو جسمى انا مش مضروبه يا بابا ده ميك اب كأنى مضروبه شوف اهو يا ماما إنما ماما ست الكل ربتنا احسن تربيه اما اخويا فارس راجل انت فعلا خلفت راجل هو حرم عبير عليك يا بابا إنما أنا واخويا اتربنا احسن تربيه انت لازم تكون فخور بينا 😍 وياريت تخلينا احنا كمان نفتخر بيك وفضلت تعيط 😭
مدحت : يااه انا كنت فى كابوس انتى مش حامل يا بنتى أحمدك يارب واشكرك

وراح مسك ايد مراته وقالها انا اسف انا جيت عليكى كتير بخاينتى ليكى بس انتى برضه اهملتينى ومش هبرر ده بس ياريت تخلى بالك منى انا فعلا غلط وانتى أعظم زوجه وافتخر بيكى وبولادى
عبير : أسقف انا😂
فارس : يلا اطلعى بره
بس مدحت قال دى مشكلتى انا وراح مسك ايد عبير وطردها بره وعبير فضلت تقول انا مش هسيبك يا فارس مش هسيبك

ومدحت قال لمراته انا اسف يا اسماء يلا يا فارس تعالى يا سوفيا يلا نروح ع شقتنا وقفل نور الشقه وقفل الباب بالمفتاح وخرجوا ع شقتهم وأسماء قالت هات المفتاح ده انا هشيله لنهى اختك ومش هتاخدوا تانى وكلهم دخلوا ناموا فى امااان وفى صباح اليوم التالى الكل صحى فرحان ومبسوط وكان عيد ميلاد سوفيا وابتدوا يجهزوا الحفله وعزموا اصحابهم ودقت الساعه 8 بالليل وابتدت حفله العيد ميلاد مع القرايب والأحباب وفى عز الفرحه والكل مبسوط ومدحت وأسماء وفارس، وسوفيا بيحتفلوا فجأه عبير جت بس مدحت راح قالها انتى عاوزه ايه وطردها بره بس فارس خرج وراها وقالها عبير انا منفعكيش انا كنت بحافظ ع بيت ابويا وامى من الخراب ارجوكى روحى عيشى حياتك بعيد عننا

عبير : ههههههههههههههه متآكد ان انت حافظت ع بيتكم من الخراب ههه يا فارس انت متعرفش ابوك كويس للأسف ابوك زى الحربايه بيتلون 😅 كل ده كدب فى كدب اوعى تفتكر من كلمتين حلوين قالهم انه اتعدل ديل الكلب عمره ما هيتعدل اسألنى انا✋😁 وانا هوريك بنفسى ثوانى
ونزلت عبير تحت ع باب العماره وطلعت معاها ست فى حدود ال 30 سنه وقالت هههههههه عارف دى مين
وخرج مدحت عليهم وقال ايه اللى جابك هنا انتى كمان
فارس : بابا انت تعرفها
مدحت : لا لا لا
عبير : ما تقول مين ولا اققول انا

وراحت عبير قالت ابوك شكله مكسوف اصل وش كسوف😂 دى الزوجه الخامسه يا استاذ فارس مدام مدحت الجديده مدام امل مطلقه وحب يصطاد فالمياه العكره
مدحت : يلا أمشى من هنا يا عبير بدل ما امموتك
عبير : انا همشى بس اللبس انا كنت عاوزه اعرف فارس بس انا مهما يعمل الراجل الخاين عمره ما هيتعدل سلام يا فارس
فارس : 😭😭 ليه كده يا بابا ليه بس
مدحت : انا انا اتجوزتها من فتره
وراح طلقها وطردها
فارس : بابا انا مش عاوز ماما تعرف حاجه

اسماء خرجت وقالت يلا يا جماعه هنطفى الشمع ودخلوا وفارس كان مضايق من عمايل أبوه وقال فى سره ربنا يستر على اللى جاى بس مدحت قال لفارس ابوك تاب يا فارس اوعى تزعل ومش عاوز ماما تعرف حاجه والعيد ميلاد خلص ع خير والكل فرحان ومبسوط لحد ما مدحت قعد مع فارس واتكلم معاه وعلشان يثبت حسن نيته حكى كل حاجه لأسماء مراته وأسماء سامحته ورجعوا احسن من الاول ومدحت اتعلم من غلطته وفهم ان لم شمل الاسره مش بالسهل وغلط فى حق مراته وان زى ما الاب عمود البيت فالام كل حيطانه وتمت القصه 😍 انتظرونى فالجديد ان شاء الله

لكل راجل.. زى ما انت بتتعب فالست بتتعب اكتر منك وبتكون راجل وست فى نفس الوقت فى مواقف كتير✋ مش علشان بتتعب وتجيب فلوس تبقى عملت معجزه لا ده ربك اللى قال الرجال قاومون ع النساء
انت راجل اه بحنيتك ع مرتك وتربيتك الصح لولادك
فميكونش جزائها الخيانه علشان تثبت انك راجل ياريت تقدر تعب الست دى ✋ هى مش ورقه بتتكتب وخلاص وتخلف عيال لا ✋ ده سكن ربك مقالش حب ربك قال موده ورحمه علشان الحب القلب بيتغير فممكن الحب يروح إنما الموده والرحمه بتيجى من العشره وبتكون سكن

لكل بنت وابن ياريت تراعوا تربيه امهاتكم ليكم وتراعوا ربنا فيهم وياريت تقدروا بيتعبوا قد ايه 😭💔 ربنا يبارك فى كل ام ويطول فى عمرها ويرحم كل ام وينور قبرها اللهم امييين 💔

انتهت