رواية في داخلي انثي البارت الاول بقلم محمد مالك

وقت القراءة المقدر: 5 دقيقة (دقائق)

رواية في داخلي انثي البارت الاول بقلم محمد مالك

المهندس احمد سهران في غرفته والوقت متأخر جدا من الليل وامه تطرق باب الغرفة 

احمد .. ادخل .. ماما !!

الام .. انا معدية من ناحية اوضتك لقيت النور والع .. هو انت سهران ليه لدلوقتي يابني ؟!

احمد .. معلش يا ست الكل المشروع ده لازم يخلص انهارده .. الشركة عايزاه بكره الصبح 

الام .. مشروع ايه ده يابني اللي مسهرك لدلوقتي ؟!

احمد .. ده مشروع قرية سياحية يا امي .. بقلك ايه يا ست الكل نفسي اشرب كوباية شاي تقيلة اوي .. حبر زي ما ابويا بيقول كده بالصعيدي .. 

الام .. تشرب شاي في الوقت المتأخر ده يا احمد !! انت كده مش هتعرف تنام !!

احمد .. ومين قالك يا ست الكل اني هنام انهارده ؟! انا سهران للصبح لحد ما اخلص المشروع ده 

الام .. يابني انت كده بترهق نفسك اوي في الشغل وبعدين ليه ده كله احنا مش محتاجين للشغل ده اصلا !!انت اللي عند ابوك مش شوية ولا انت نسيت انت ابن مين ؟!

احمد .. لا منستش يا امي .. بس انا مش بشتغل عشان الفلوس .. انا بشتغل عشان احقق ذاتي واكون انسان نافع وليا كيان في المجتمع 

الام .. والنبي ما انا فاهمه انت بتقول ايه ؟! الجهل وحش اوي يا اولاد !!

احمد .. قطع لسان اللي يقول عليكي جاهلة يا ست الكل .. انتي نور حياتنا كلنا وكفاية اتعلمنا منك حاجات مدرسنهاش في الكتب .. ده حتي بيقولوا الام مدرسة .. يعني انتي لوحدك كده مدرسة بحالها .. تبقي جاهلة ازاي بقي .. ههههههه 

ثم يقبل يدها 

الام .. ربنا يجبر بخاطرك يا احمد زي ما دايما كده جابر بخاطري 

احمد .. هو انا اقدر ازعلك ابدا يا ست الكل ؟!

الام .. لا مزعلني يا احمد !!

احمد .. انا ؟! .. مقدرش ازعلك ابدا يا امي 

الام .. لا مزعلني .. عشان مش عايز تتجوز لحد دلوقتي ؟!

احمد .. تاني الموضوع ده يا امي ؟!

الام .. ما انا عاوزة اعرف انت ليه مضرب عن الجواز ؟! يكونش حد عاملك عمل واحنا مش عارفين ؟!

احمد .. عمل ايه بس يا امي ؟!

الام .. اومال ايه الحكاية يا بني فهمني ؟! خلي بالك ابوك جاب اخره معاك وزعلان منك اوي !!

احمد .. زعلان مني ليه بس ؟!

الام .. يابني انت ابنه الوحيد ونفسه يفرح بيك قبل ما يموت ويشيل ولدك علي ايده .. انت نسيت انه صعيدي ولا ايه ؟!

احمد .. لا مش ناسي .. بس انا مش عايز اتجوز دلوقتي خالص !!

الام .. اومال هتتجوز امتي بس ؟! انت يابني بقي عمرك ٣٥ سنه يعني كام سنه كمان وهتعجز يبقي هتتجوز وتخلف امتي بقي ؟! وبعدين لو مش عاجباك هند بنت خالتك شوف غيرها مع ان البنت طيبة اوي وبنت حلال وهتموت عليك !!

احمد .. لا هند ولا غيرها .. انا كدة مرتاح وزي الفل .. روحي بقي اعملي الشاي 

الام .. بص انا تعبت معاك وجيت اخري .. ابوك بقي يتصرف معاك وانت حر بقي 

ثم تتركه وتنصرف ورد فعل علي وجه احمد

احمد يحاول ان يواصل ولكن لا يستطيع يبدوا ان حديث امه معه قد اغضبه وشتت انتباهه يتناول المحمول ويتصل ب مهندسة زميلته تدعي داليا ويبدوا انها كانت نائمه واستيقظت علي مكالمته 

داليا .. الو 

احمد .. اسف صحيتك من النوم 

داليا .. لا ولا يهمك يا احمد .. المهم انت كويس ؟!

احمد .. لا مش كويس ابدا 

داليا .. ليه خير ؟! 

احمد .. انتي عارفة ليه يا داليا ؟!

داليا .. اها !!فهمت .. ع فكرة المشكلة فيك انت يا احمد ؟!

احمد .. يعني ايه المشكلة فيا انا ؟!

داليا .. يعني انت سبب المشكلة وانت اللي تقدر تحلها !!

احمد .. مش فاهم ؟!

داليا .. لا انت فاهم قصدي كويس علي فكرة !! 

احمد .. يا داليا انا معنديش الجرآة بتاعتك انتي وبعدين انا ظروفي مختلفة تماما عن ظروفك .. انتي فاهماني كويس ؟!

داليا .. ايوه فاهماك طبعا .. ومقدرة تماما انك في موقف صعب جدا .. بس مفيش حل غير المواجهه زي ما عملت انا بالظبط .. غير كده هتفضل تلف حوالين نفسك ومش هترتاح ولا هتريح اللي حواليك !!

احمد .. عندك حق .. بس انا معنديش الجرأة اني آجي فجأة كدة واصارح اهلي واعمل زي ما انتي عملتي بالظبط ؟! الا بالحق انتي فعلا كنتي ولد ؟! 

داليا .. ايوة يا بني ما انا وريتك الصور قبل وبعد العملية ؟!

احمد .. طب وانتي احساسك ايه دلوقتي بعد العملية .. حاسة انك بقيتي مرتاحة كدة ؟!

داليا .. اكيد .. رغم ان اللي حواليا لسة مش مصدقين وخصوصا بابا وماما واخواتي وفي منهم مستنكر تماما التحول المفاجئ ده .. بس اهم شئ اني انا كدة مرتاحة عشان رجعت لطبيعتي اللي المفروض اكون عليها من ساعة ما اتولدت .. انا معاك ان الموضوع صعب جدا وهتقابلك مشاكل كتير بعد كده بس مهما كان حجم المشاكل دي مش هتبقي ابدا اد المشاكل اللي انت بتعاني منها دلوقتي وخصوصا الضغط النفسي اللي جواك 

احمد .. عندك حق 

داليا .. خد قرارك يا احمد عشان ترتاح 

احمد .. يا مسهل .. اشوفك في الشركة 

داليا .. اوك .. باي 

رد فعل علي وجه احمد ..

تابعوني والبارت التالي .. تحياتي ..

 1,825 اجمالى المشاهدات,  3 اليوم