1,963 اجمالى المشاهدات,  3 اليوم

رواية عشق محرم الجزء الثانى عشر والثالث عشر بقلم كوكى سامح

ج. 12و13…..عشق_محرم
ولما دخل الاوضه كانت الهام مش موجوده
= نزل يجرى على تحت وهو مذهول وعلى ضرخه واحده عمى عمران اتقتل وطلع على اوضه حماته وخبط عالباب وقامت وهى مخضوضه على صرخاته ان عمران جوزها اتقتل
.. فى ايه يا أدهم
.. الحقى عمى عمران بره مضروب بالنار ردت بصرخه وقالت هو فين وخرج يجرى فى الجنينه وهى خرجت وراه واول لما شافته قربت منه ومسكته وايدها بقت كلها دم عمران وفضلت تصرخ وانهارت وكل أولاده قاموا على صرخات الام وشافوا اغلى شئ مقتول قصاد عينهم
أدهم.. محدش شاف الهام دى مش موجوده فى اوضتها
الام.. هى فين الهام؟ رد احمد وقال لازم نطلب البوليس دلوقتى بابا اتقتل ودى جريمه قتل
أدهم.. ايوه وانا هكلم المحامى اهو يكون معانا
ساره.. خلاص اتيتمنا يا ماما يا حبيبى يا بابا 😭
= واحمد طلب البوليس وقال إن ابوه اتقتل فى الڤيلا وعمران مرمى على الأرض سايح فى دمه
وبعد مرور الوقت البوليس وصل والاسعاف وبالكشف على عمران كانت هنا المفاجأه
الدكتور.. ده لسه فى نبض وبيتنفس يعنى عايش
الام.. يارب
وكيل النيابه.. مستنى ايه يا دكتور يلا بسررعه على المستشفى
= وفعلا الإسعاف شالوا عمران وطلعوا عربيه الإسعاف والام ركبت معاهم هى وأولادها الرجاله والبنات قعدوا فى الڤيلا وأدهم بين نارين عمران وكمان اختفاء الهام
وصلوا المستشفى وعمران دخل عمليات وخرج على االانعاش وكان فى غيبوبه
أدهم.. عمى عمران عامل ايه يا طنط
الام.. فى غيبوبه بس قولى الهام رجعت البيت
.. لأ انا رجعت من المستشفى عند وليد وكانت الساعه حوالى 6 الصبح ولقيت عمى عمران مرمى غرقان فى دمه والهام مش فى الاوضه
الام.. امال هتكون راحت فين الصبح كده
أدهم.. مش عارف الساعه دلوقتى عدت 11 الضهر انا هكلم اصحابها وهسأل عليها
الام.. اصحابها مكنش فى غير أمينه وماتت الله يرحمها بقى
.. خلاص يا طنط انا همشى على الڤيلا دلوقتى علشان البنات هناك وشوف هعمل ايه يمكن الهام رجعت
احمد.. فى ايه يا ماما
.. اختك الهام مش موجوده من الصبح
.. هتكون راحت فين يعنى
.. والله ما اعرف ده انا حتى عرفت من أدهم
= وكيل النيابه قرب منهم وقال
.. مين اللى اكتشف قتل عمران وضربه بالنار
.. أدهم جوز بنتى وكمان عمران يبقى عمه
.. ممكن تحكى شوفت ايه بالظبط
.. ااااا انا رجعت البيت 6 الصبح وكانت البوابه مفتوحه وده مش طبيعى
.. وحضرتك كنت راجع منين فى الساعه دى؟!
.. يا باشا انا كنت مع اخويا لأن بالليل جاله ألم جامد فى جمبه وروحت المستشفى معاه وطلع زايده ولما اطمنت عليه رجعت من المستشفى علشان اطمن مراتى عليه لأنى خرجت من غير ما تعرف وكمان مخدتش معايا التليفون بس لما رجعت كانت البوابه مفتوحه وعمى مرمى سايح فى دمه جريت وانا مخضوض وطلعت على اوضتى اقول لمراتى الهام بس ملقتهاش
.. يعنى ايه ملقتهاش؟
.. ايوه ملقتهاش بس قولت يمكن فى الحمام وجريت على اوضه مرات عمى وبلغتها باللى حصل
.. ومراتك رجعت وكلمتها؟!
.. لأ مرجعتش لحد دلوقتى يا باشا
.. بس ده معناه أن اختفائها وراه حدوث الجريمه
.. ازاى يا باشا؟
.. يمكن حد كان بيحاول يخطفها وخصوصاً انك كنت مش موجود وعمران بيدافع عن بنته قام ضربه بالنار وخطفوها
.. معقول بس مين اللى هيخطف الهام؟ دى ملهاش اى أعداء
.. هو لازم أعداء يمكن حد وعاوز فديه عموما لو مظهرتش النهارده كله هيبان بس انا عاوز اشوف اوضتها ممكن
.. اكيد يا باشا انا عموما كنت راجع الڤيلا دلوقتى اتفضل معايا
الام.. ابقى طمنى يا أدهم
احمد.. ماما يا ترى مين اللى عمل فى بابا كده ومعقول تكون الهام مخطوفه
الام.. انا قلبى جواه نار 🔥 يا ابنى
احمد.. انا هروح معاهم وهطمنك ومحمد معاكى ولو فى جديد عن بابا بلغينى وانا برضه هكلمك
الام.. ابوك فى غيبوبه والله اعلم هيقوم منها ولا لأ يمكن مكناش متفاهمين فى حاجات كتير بس هو عشره عمرى مليش غيره ونايم جوه لا حول ولا قوة ربنا يقومه بالسلامه وغير الهام انا خايفه عليها
.. ان شاء الله خير والهام هترجع متقلقيش يا ماما
الدكتور.. عمران بيه حالته لسه مش مستقره بس لو عدى 24 ساعه مع الوقت هيفوق هو دلوقتى محتاج دعواتكم
الام.. يارب يارب
الدكتور.. معاكم الممرضه أيه لو محتاجين اى حاجه هى هتكلمنى على طول
الام.. حاضر يا دكتور
= واحمد خرج وراهم وراح معاهم الڤيلا واول لما دخلوا كانت ساره وتوأمها قاعدين
أدهم.. اتفضل اوضه الهام فوق يا باشا
= واول لما طلعوا الاوضه كانت مفتوحه
وكيل النيابه.. دى اوضتها
أدهم.. ايوه
= وابتدى يبص ويفتش فى الاوضه شمال ويمين وقرب من البلكونه وفضل يبص على الجنينه ودخل وفتح الدولاب ومسك شنطه الهام
وكيل النيابه.. دى شنطه المدام الهام
أدهم.. ايوه
= واول لما فتحها شاف تليفون أمينه وقال ده تليفونها رد وقال لأ مش تليفونها
.. امال تليفون مين؟
.. معرفش انا اول مره اشوف التليفون ده
وكيل النيابه.. ده مقفول بباسورد
أدهم.. يارب ترجع
احمد.. انا اختى اختفت وياريت تحقق فى اختفائها لأنها مش متعوده تخرج فى الوقت ده
.. تليفون أمينه رن
= الكل مذهول ووكيل النيابه مد ايده وادى التليفون لأدهم وقاله رد وخده منه ورد وكانت مامت أمينه وقالت الو ده تليفون بنتى وانا بدور عليه رد وقالها مين معايا رددت وقالت انا مامت صاحبه التليفون رد وقال مين صاحبته رددت وقالت صاحبته ماتت 😭 رد وقالها اسمها ايه يعنى؟ رددت وقالت المرحومه أمينه رد وقال أمينه!
أدهم قال لوكيل النيابه دى مامت أمينه صاحبت الهام بس ايه اللى جاب تليفونها هنا؟
وكيل النيابه.. هات التليفون يمكن تعرف الباسورد
= ساره طالعه تجرى وقالت الحقوا فى واحد كلمنى وقال إن الهام خطفوها وعاوزين 5 مليون جنيه
أدهم.. مين دول
ساره.. معرفش
وكيل النيابه.. هات الرقم بسرررعه
ساره.. ده رقم خاص
وكيل النيابه.. فى حاجه غلط
مامت أمينه.. الو الو
وكيل النيابه.. ازى حضرتك انتى متأكده ان ده تليفون بنتك رددت وقالت اه رد وقالها طيب انا عاوز اكلمها اتأكد منها رددت وقالت دى ماتت من اسبوعين وقعت من البلكونه عند صاحبتها الهام رد وقال ماتت البقاء لله ومشى بخطوه سريعه لحد البلكونه ومسك السور بإيده وقال بس السور عالى ازاى تقع من البلكونه
مامت أمينه.. الو الو انا بس عاوزه تليفون بنتى عليه كل صورها وده الذكرى الوحيده ليه رد وقالها اول مره تتصلى عليه رددت وقالت ايوه انا لسه يا دوب بفوق من صدمه موت بنتى الوحيده
وكيل النيابه.. تعرفى الباسورد بتاع التليفون
مامت أمينه.. هى كانت بتعمله عيد ميلادها او عيد ميلاد اخوها الله يرحمه ده كان غالى عليها اوى واهى حصلته يا قلب امها 😭
وكيل النيابه.. قولى تاريخ عيد ميلادها ولما كتبه طلع غلط وقالها تقول عيد ميلاد اخوها؟ وقالت عيد ميلاد اخوها وطلع غلط
وكيل النيابه.. السر مع عمران هو اللى شاف كل حاجه وعارف مين خطف بنته
مامت أمينه.. انا عاوزه تليفون بنتى
وكيل النيابه.. انا هجيبه لحد عندك وقال ممكن العنوان
أدهم.. حضرتك هتديها التليفون
وكيل النيابه.. قفل مع مامت أمينه بعد ما وعدها ان التليفون هيوصلها لحد عندها وخد العنوان منها
أدهم.. يا باشا هو فى حاجه
وكيل النيابه.. التليفون ده اكيد هنعرف منه حاجه بس فى اسئله كتيره هو ليه مع الهام وازى صاحبتها وقعت من البلكونه مع ان السور عالى وهى مش طفله علشان تقع فى لغز فى الموضوع
أدهم.. المهم ان مراتى تكون بخير
وكيل النيابه.. السر مع عمران
= وكيل النيابه نزل من الڤيلا وراح المستشفى ومعاه التليفون وأدهم والبنات واحمد قاعدين مستنين اى خبر عن الهام وعمران فى المستشفى وفجأه وليد رجع ومعاه جلال من المستشفى ودخل اوضته
= وجلال ساب اخوه ودخل الڤيلا
.. فى ايه هو ايه اللى سمعته ده
أدهم.. شوفت عمى عمران كان هيتقتل بس جت سليمه
احمد.. بابا فى غيبوبه والله اعلم هيفوق ولا لأ
جلال.. بس الحمد لله انه عايش
ادهم..بس الهام مش، موجوده اتخطفت شوفت المصيبه وكمان فى تهديدات انهم عاوزين فديه
جلال.. الهام يا نهار اسود
أدهم.. انا مش عارف هعمل ايه
جلال.. خلاص ادفع الفديه
أدهم.. معرفش بقى
جلال.. ازاى متعرفش انت جوزها
أدهم.. انا مش عارف حاجه خالص ومش عارف مراتى راحت فين؟
فى المستشفى…
وكيل النيابه وصل واطمن على حاله عمران وعرف انها مش بسيطه ولسه فى غيبوبه وخد شويه اقوال من مامت الهام واخوها محمد الكبير ومسك تليفون أمينه وفضل يبص فيه
وكيل النيابه.. ممكن حد يتصل بإلهام
الام.. انا بتصل بيها من الصبح مغلق
محمد.. وانا كلمتها مغلق بس ممكن تكون عند حد من قرايبنا
وكيل النيابه.. للأسف اختك مخطوفه واللى خطفها طالب فديه واكيد هو اللى ضرب عمران بيه بالنار
= الدكتور خرج وقال عمران حالته بتسوء وعاوز أكياس ده لأنه نزف كتير وفصيله دمه نادره _AB ومش موجوده
الام.. وايه العمل يا دكتور
الدكتور.. المفروض نعمل اعلان بسرررعه او نشوف حد من أولاده
وكيل النيابه.. انا نفس فصيلته سبحان الله ومستعد اتبرع
= وفعلا اتبرع وبعد نقل الدم لعمران حالته ابتدت تستقر
الام.. متشكره جدا يا ابنى انت عملت موقف انسانى
وكيل النيابه.. لا شكر على واجب اى حد مكانى كان هيعمل كده انا والدى متوفى واعتبرته زى والدى وان شاء الله يقوم بالسلامه وتطمنى على بنتك
الام.. يارب
= واستأذن وراح لحد بيت مامت أمينه يحقق معاها ويستفسر عن موت أمينه ولما راح شاف انها لا تقل مستوى عن عمران ودخل الڤيلا وكانت مامت أمينه قاعده والڤيلا كلها ضالمه
مامت أمينه.. اتفضل
وكيل النيابه.. حضرتك عارفه انا مين
مامت أمينه.. ايوه البواب بلغنى وعرفتك انت اللى هتدينى تليفون بنتى بالله عليك انت لقيته فين؟
وكيل النيابه.. المهم أمينه ماتت ازاى
مامت أمينه.. من يوم ما مامتت وحيطان الڤيلا ضلمت الضنا غالى اوى البيت مبقاش فيه روح خدت كل حاجه معاها 😭
وكيل النيابه.. ايه الصريخ اللى جاى من فوق ده
مامت أمينه.. مفيش صريخ ده الجيران
= وبص على صوت الصريخ وكان فوق وطلع يجرى وهى طلعت وراها وقرب من الاوضه والصريخ صوته بيعلى وقال ده صوت بنت وبيفتح الباب
مامت أمينه.. سيب الباب ومتحاولش علشان مش هيتفتح وبقولك هات تليفون بنتى وغور من هنا ورفعت عليه المسدس…
يتبع
الجزء_الثانى_عشر_والثالث_عشر
عشق_محرم
بقلمى_كوكى_سامح
علقوا ب 20 ملصق علشان يوصلك اشعار الأجزاء الاخيره وفك اللغز وياريت الكل يعلق علشان البوست يوصل لكل أعضاء الصفحه 👍🏼
اسفه على التأخير لأنى دى ظروف شغلى وبحاول على قد ما اقدر اتابع وانزل القصه وانتظروا الاجزاء الاخيره ✋