رواية من القاتل بقلم شادى محمد شيكو

وقت القراءة المقدر: 12 دقيقة (دقائق)

من القاتل ..
الحلقة الاولي..
#جريمه_في_المنصوره
حادثه حقيقيه….
…
يجلس رجل في العقد الخامس في منتصف شهر رمضان هو عائلته و تقوم زوجته بوضع الطعام علي السفره منتظره انطلاق مدفع الافطار …
السيده… ايه يا جابر.. مافيش اخبار جديده
جابر.. اخبار ايه؟ يا نبيله..
نبيله.. هو فيه اخبار غيرها… عم مجدي…
جابر… لا مافيش..
نبيله… انا كنت شيفاك واقف تتكلم معاه و انتوا رجعين من صلاه العصر…
جابر… لا كنا بنتكلم في حاجات عادية..
نبيله… ده راجل معندوش دم
جابر..( بعصبيه) بقي مجدي معندوش دم؟ الراجل اللي عمرنا ماشوفنا منه ولا من مراته غير كل خير طول السنين دي..
نبيله.. ما هو شايف الظروف يا جابر و مافيش اي اخبار عن الفلوس اللي عنده..
جابر.. يا ستي الراجل كل مايشوفني يقولي انا وشي منك في الارض و انا اللي بقول له عيب يا مجدي احنا اهل…
نبيله… لا المره الجايه شد عليه…
مجدي..( ينفعل جدا) اشد علي مين؟ علي مجدي؟! انتي مجنونه…
ده مجدي ده حته من قلبي ده انا اتغربت عشر سنين في الخليج.. و اللي كان مطمني ان مجدي معاكوا في البيت…
ناسيه كنتي انتي و اميره و كان هو ليلي بيعملوا ايه معاكوا…
ده اميره و عماد ابنه زي الاخوات ايه يا نبيله..
نبيله.. ما هو احنا داخلين علي عيد و مصاريف يا جابر…
( ينطلق ادان المغرب)
جابر… تعالي افطري و يحلها ربنا
…..
يجلس عم مجدي و زوجته و عماد ابنهم الوحيد شاب في الرابعه و العشرون..
مجدي… اكسروا صيامكوا بس دلوقتي ماتفطروش غير لما مدحت يجي؟
ليلي، زوجه مجدي… يووووه.. يا دي مدحت.. هو مدحت ده نازل لنا في البخت..
مجدي..( ضاحك) ابن اخويا يا ستي..
ليلي.. علي عيني و علي راسي.. بس مش لدرجه دي… انت حاشره في كل حياتنا…
مجدي… ما هو واد حرك و لما بطلب منه حاجه مابيتأخرش..
عماد.. عادي يا ماما هو مدحت يبان رخم شويه بس، هو و الله طيب
ليلي… الواد ده انا مش بلعاه…
مجدي…( يضحك) هتبلعيه لما يجي دلوقتي
ليلي.. ليه بقي ان شاء الله
مجدي… شكله لقي مشتري للعربيه بسعر كويس
عماد..( بحزن) خلاص يا بابا هتبيع العربيه؟
مجدي..( متأثر بحزن عماد) اعمل ايه بس.. الديون كترت علينا و القضيه بتاعت المعاش شكلها لسه قدمها وقت..
ان شاء الله اول ما القضيه تحكم هجيب لك عربيه و اكتبها بإسمك..
ليلي… بس العربيه كانت ايدك و رجلك..
مجدي… يا ستي.. يعني انا كنت مولود و عندي عربيه… اللي جبها يجيب يغيرها..
عماد… ولا يهمك يا بابا انا بس مش عايزك تتبهدل
مجدي.. يا ابني و الله لولا الزنقه اللي احنا فيها عمري ما كنت افكر، ابيع حاجه…
( يرن الجرس… ثم يدور مفتاح الباب و يدخل شاب)
ليلي..( بضيق) اهلا يا مدحت عمك مقعدنا قدام الاكل زي الخفر عشان منتظرينك..
مدحت…(؛ يقبل رأس مجدي) ليه كده يا عمو بس..
مجدي… يا حبيبي رمضان يحب اللمه يعني هناكل و انت تيجي تاكل لوحدك
عماد… يلا بقي كلوا انا هموت م الجوع (؛ و يمد يده علي الطعام ليأكل)
مجدي…( ينظر الي مدحت) ايه يا حبيبي فيه جديد عشان العربيه..
مدحت.. ااه بس مش عارف السعر هيعجبك ولا لاء
مجدي.. هو قالك كام..
مدحت.. 220 الف..
مجدي… ياااه ده كده اقل من سعرها يجي 30 الف علي الاقل
مدحت.. و الله يا عمي المشكله عشان حضرتك مستعجل و عايز نخلص قبل العيد… حضرتك لو انتظرت لبعد العيد ممكن يجي زبون تاني و بسعر افضل…
ليلي.. و ده بقي بعد السمسره…
مدحت.. سمسره…؟ هو انا هخد من عمي سمسره يا طنط..
مجدي.. ايه يا ليلي.. مش تاخدي بالك من كلامك..
ليلي.. هو انا كلمتي لازم توقف في الزور…(؛ و تنهض و تأخذ اطباق امامها و تدخل الي المطبخ)
مجدي…( لمدحت) ولا يهمك يا مدحت… علي بركه الله… انت معاك توكيل خد العربيه و خلص و ابقي هات الفلوس
مدحت… ماشي يا عمو اسبوع بالكتير هجيب لك الفلوس..
مجدي… لا.. اسبوع ايه؟ انا عايز اسرع وقت… بكره بالكتير قوي بعده..
مدحت…. حاضر..
…..
نزل من مدحت من عند عم مجدي وقف عند منتصف الشارع ليشعل سيجاره…
سمع صوت شاب ينده عليه..
نظر في اتجاه الصوت..
وجد اصدقائه سعيد و شكري يجلسوا علي القهوه…
يتجه اليهم مدحت و يجلس معهم…
شكري… تشرب ايه..
مدحت… شويه قهوه..
( يصفق شكري لعامل القهوه… شويه قهوه جامدين للاستاذ مدحت)
سعيد.. ايوه يا عم كنت بتفطر عند عمك مجدي
مدحت… يا عم بلاش عينك اللي زي الصقر، دي
سعيد.. طيب فطروك ايه؟
شكري.. بذمتك ياض يا مدحت كنت صايم انهارده
سعيد… صيااام؟ مدحت عمره ما صام اصلا
مدحت… يعني انت اللي بتصوم قوي..
شكري… يضحك.. احنا هنفضح بعض دلوقتي يعني..
مدحت… ما السجاير و الكيف هما اللي بيخلوني ماعرفش اصوم..
سعيد… بس بتبقي عامل زي البنت البنوت قدام عمك مجدي…
مدحت.. بس المرره بنت الووسخه مرااته اللي قارشه ملحتي
سعيد… فهماك و كشفاك
مدحت.. مع اني بعملها ارجوز عشان ترضي عني بس دماغها ابن ووسخه..
سعيد… بس عمك بيروق عليك و انت بتعرف تقلبه
مدحت.. ما هو محلتوش غير عماد…
شكري.. هو عماد مانزلش معاك ليه…
مدحت… بيعقد بتفرج علي المسلسلات..
شكري… الواد عماد ده عليه شويه تناكه..
مدحت… يا عم ده واد غلبان بس انت بس اللي متعرفوش كويس
شكري… بس بصراحه انا لما قصده في فرح اختي جه زفنا بالعربية و ماسبناش..
مدحت… شوفت… هو طيب بس عشان عيل وحيد و مالوش اختلاط بحد تحس انه مغرور بس هو طيب…
سعيد… طيب ابقي قوله يا مدحت يجي يزف ابن خالي في العيد..
مدحت.. لا هما هيبعوا العربيه..
شكري… ليه.. دي عربيه حلوه.. هو فيه زيها دلوقتي
مدحت… الظروف ملخبطه مع عمي و عايز يمسك فلوس..
شكري.. انا عندي مشتري و جاهز
مدحت… لا خلاص انا جبت لها زبون..
شكري.. قشطه… يبقي سهره الوقفه عليك
مدحت… ليه بقي ان شاء الله…
شكري… مش هيطلع لك سبوبه من المصلحه دي
مدحت… مصلحه من عمي يا حماااار
سعيد…( يضحك بصوت مرتفع) يا مدحت انت هتعمل علينا شريف ده انت تمصلح علي ابوك مش عمك..
مدحت..( بخبث) اسكت يا ابني الحيطان ليها ودان
شكري.. طيب وقفه العيد ازازه وسكي م الفاخر..
مدحت.. ماشي يا عم
سعيد… و الحشيش؟
مدحت… هو انا بايع عربيه مرسيدس..
سعيد… يا عم الموضوع كل 2000 جنيه.. ده انت هيطلع لك مصلحه علي الاقل 20000 الف
مدحت…(؛ ينهض و يأخذ، هاتفه و علبه سجائره) انا همشي بدل ما تخلوني اجيب لكوا صافينار ليله الوقفه…
و ينصرف…
شكري… قشطه السهره هيظبطها مدحت..
……
يرن هاتف عم مجدي..
عماد..التليفون بيرن يا بابا
مجدي… شوف مين كده
عماد.. ده عمي ابراهيم
مجدي… اااه ابراهيم اخويا هاته…
مجدي… اهلا اهلا اذيك يا ابراهيم عامل ايه؟
ابراهيم…(؛ بلهجه ريفيه) وحشني و الله يعني مش هتيجي تفطر عندنا يوم قبل ما رمضان يخلص..
مجدي.. انا عارف و الله اني مقصر معاك و مع الناس عندكوا في البلد بس ان شاء الله هتفرج و هجي افطر و اعيد معاكوا ذي كل سنه..
ابراهيم… هو انت محتاج فلوس يا مجدي؟
مجدي… لا لا.. دي مستوره قوي يا ابراهيم
ابراهيم.. بس دي اول سنه ماتعملش شنطه رمضان ولا تيجي تعقد معانا…
مجدي.. هجي و هعمل شنطه رمضان و كل حاجه بس السنه دي هتبقي اخر الشهر..
ابراهيم… عندنا في البلد بيحبوك و عايزين يشفوك و الله يا مجدي..
مجدي..( ضاحكا) بس قول بقي لمراتك ام هدير تجهز دكر بط حلو كده
ابراهيم… و الله من اول الشهر و هي بتزغط دكر و بط و كام جوز حمام عشان لم تيجي انت و ام عماد و عماد…
مجدي… و الفطير عشان ام عماد …
ابراهيم… يا سلام احلا فطير لام عماد بس عرفني قبل ما تيجي بليله عشان ام هدير تقوم من بدري تخبزه
مجدي… طبعا هقولك..
ابراهيم… خلاص في انتظار اتصالك
مجدي… حاضر… سلام مؤقت بقي عشان اسيبك تشوف اللي وراك
ابراهيم… سلام…
يغلق مجدي الهاتف..
و تدخل عليه ليلي…
ليلي.. شنطه رمضان ايه اللي هتعملها.. يا مجدي
مجدي… ايه يا ليلي من امتي و انتي بتدخلي في مصاريفي..
ليلي…عمري ما دخلت و بسيبك تعمل اللي تعمله بس دلوقتي بقي خلاص الموضوع ذاد عن حده
مجدي… ذاد عن حده (؛ و يعتدل في جلسته)
ليلي..( ترتبك قليلا) ااه لما تكون ظروفنا كده و مديونين و تيجي تقولي هعمل شنطه رمضان يبقي انت غلطان…
مجدي… ده حقهم… مش فشخره مني.. ده حق ربنا يا ليلي…
ليلي…( هي تعلم جيدا ان مجدي لا يريد سوي عمل الخير لكنها تشعر انه ليس، وقته الان) براحتك بس انا بقول لما تكسب قضيه المعاش ابقي اعمل اللي انت عايزه بس دلوقتي
مجدي…(؛ يقاطعها و بحزم) و لما اموت انهارده هقول لربنا ايه؟ كنت مستني القضيه…
يااا ليلي اللي مشاها قبل كده هيمشيها دلوقتي.. سبيها علي الله و هي هتبقي فل…
ليلي..( تستسلم) و نعمه بالله…
……
يجلس مدحت مع رجل يبدو عليه انه نصاب او ملاوع…
مدحت… دلوقتي عمي عايز يخلص البيعه دي بسرعه يا زغابي..
زغابي.. ماشي.. الفلوس بكره هتكون معاك..
مدحت.. تمام و انا معايا التوكيل و العربيه و كله تمام نروح الشهر العقاري و مرور، نخلص الصبح
زغابي… ماشي… بس عمك لازم يمضي..
مدحت.. يمضي؟ ليه بقولك معايا توكيل..
زغابي.. بص يا مدحت.. انا هدفع 250 باكو يعني مش ورق ابيض.. لازم اطمن عشان انت عارف انا برضه هعطيها لزبون و اخد مصلحتي.. دي مش فلوسي ( و يشعل سيجاره) اوعي يكون الدخان بيضاقك عشان احنا في رمضان ( ويضحك جدا لانه يعلم ان مدحت لم يصم)
مدحت…( لا يهتم لكنه يسرح كيف يجعل عمه يمضي، دون ان يعرف المبلغ الحقيقي)
زغابي.. ايه.. يا عم سرحان في ايه…
مدحت… اصل…
زغابي… اصل ايه.
مدحت… اصل انا كنت عامل مصلحه و مش عايز عمي يعرف…
زغابي..(؛ يضحك جدا و يكح من كثرة الضحك) ما انا عارف يا مقطف…
مدحت… طيب ايه العمل..
زغابي… انت طالع بكام
مدحت.. 30
زغابي.. خلاص انت 15 و انا 15
مدحت.. لا كده كتير.. هو انا هقسم معاك من المشتري
زغابي… طيب… انا هاخد 10 و ده اخر كلام
مدحت… ماشي بس هنعمل ايه…
زغابي.. ولا حاجه.. انا هجيب المخالصه من المحامي و اجي معاك و اقول له العربيه ب220 و يمضي عليها و بعد كده انت معايا بقي في الشغل الرسمي…
مدحت.. و فلوسي..
زغابي… قبل ما نطلع البيت ال 20 هتكون في جيبك…
مدحت… اتفقنا… بس خلي بالك من كلامك
زغابي… انت بتكلم تلميذ ده انا مقتول في الشغلانه
اتفقنا…
مدحت… هنخلص امتي…
زغابي… بعد صلاه التراويح هتكون الفلوس معايا…
مدحت… اشمعني يعني صلاه التراويح… هتصلي يعني؟
زغابي… لا.. بس المشتري بيصلي التراويح..
مدحت.. و هنعمل ايه…
زغابي.. تعدي عليا بالعربيه. نركنها في جراج المشتري عشان يطمن …
ناخد الفلوس منه و نروح لعمك يمضي ياخد فلوسه نشتغل انا وانت في الباقي….
مدحت… تمام…
…….
في احد الحدائق العامه و في اجواء رمضانيه بعد المغرب…
يجلس عماد و اميره ( بنت جابر)
اميره… عملت ايه؟
عماد… اصبري بس بعد العيد..
اميره..( بغضب) يوووه انا عاوزه الفلوس قبل العيد اصلا
عماد.. انا اعمل ايه يعني..
اجيب لك 4000 جنيه ازاي
اميره.. اتصرف.. ماليش دعوه…
عماد.. هشوف… كده طيب
اميره.. امتي…
عماد… يومين كده
اميره… هتعمل ايه يعني..
عماد.. بابا هيبيع العربيه و هحاول اخد منه فلوس
اميره..( تلمع عينها) بجد هيبعها بكام
عماد… ب 200 الف
اميره… واوو عارف لو معايا المبلغ ده كان زماني عملت البيوتي سنتر و في ظرف سنه كان زمان معايا اول مليون..
ما تقول لعمو يشاركني
عماد… انتي طموحك كبير، جدا
اميره… انا نفسي يبقي، معايا فلوس كتيره جدا اسافر و البس، اجمل لبس، و اركب احسن عربيات وو
عماد… خلي طموحك قد قدراتك يا اميرة…
اميرة… خد من عمو 100 الف و تعالي نتشارك
عماد.. 100 الف مره واحده.. لا بابا عنده ديون هيسدها و الباقي هنشوف نقدر، نجيب عربيه اصغر ولا لاء
اميره…( ساخره) ما تجوزني ابوك شهر واحد
عماد.. طيب ما تتجوزي ابنه…
اميره… لا يا عماد انت ذي اخويا.. و انت عارف انا عايزه اتجوز راجل غني.. غني قوي…
و علي فكره كل قرش اخده منك هرده لك
عماد…(؛ بخيبه امل) ماشي.. اخوات.. اخوات.
……

 498 اجمالى المشاهدات,  3 اليوم

الصفحات: 1 2 3 4 5 6 7 8