رواية إنذار بالعشق الجزء السابع عشر للكاتبه مريم غريب #17

رواية إنذار بالعشق للكاتبه #مريم_غريب
{ #إنـذار_بالـعشق }
( الجزء السابع عشر )
( 17 )

_ إمتلاك ! _

ساد الصمت لدقيقة واحدة …

قال “صلاح” بصوت جاف :

-إشمعنا سألتيني السؤال ده بالذات ؟؟

مطت “ساره” شفتاها و أجابته بنبرة محايدة :

-ده سؤال كان لازم أسأله من زمان . مش عشان حاجة يعني .. إنت مابقتش صغير يا صلاح . إنت داخل علي الـ30 أهو

تنهد “صلاح” و رد و هو يلتقط ملعقته ثانيةً :

-عادي يا ساره . الراجل بيتجوز في أي وقت 30،40،60 .. و بعدين أنا أصلا مش حاطط الموضوع ده في دماغي لسا بدري

ساره محتجة :

-لأ طبعا ماينفعش إللي إنت بتقوله ده . يعني إيه مش حاطط الموضوع في دماغك و يعني إيه لسا بدري ؟ صلاح إنت لازم تتجوز . لازم تخلف حتة عيل يبقي سندك في الدنيا و يمد في إسمك .. ثم قالت مبتسمة بعفوية :

-إيه رأيك في هيام ؟ بصراحة مش هخبي عليك و إنت أكيد حاسس بردو . البت عينها منك من زمان يا صلاح

و هنا ترك “صلاح” الطعام نهائيا .. تطلع إليها بتعابير متصلبة ، إبتلع ما بفمه ثم سألها بإقتضاب :

-هيام مين ؟!

ساره بدهشة :

-هيام يا صلاح . بنت الأسطي فوزي الله يرحمه . إيه مش عارفها دي صحبتي و كانت بتيجي عندنا كتير !

بدت ملامح “صلاح” تهكمية و هو يقول بصوت به نبرة غضب خفية :

-آه عرفتها . هيام إللي بتشتغل مع عطوة الحرامي ؟ و نعمة النسب الصراحة . دي إختيارك بقي يا ساره !

نهرته “ساره” عابسة :

-بس يا صلاح ماتقولش كده علي هيام .. علي فكرة هي بطلت شغل في الحاجات دي و بجد البت كويسة هضيعها من إيدك

صلاح ببرود :

-و مين قالك أصلا إني ميت عليها أو علي غيرها .. أنا مش بتفرق معايا الحاجات دي

أحمـّر وجهها من الغيظ ، لتقول و أسنانها تصطك :

-إنت عايز تجنني صح ؟ بتقفلها كده ليه يا صلاح ؟ طيب إيه رأيك أنا مش هرتاح إلا لما أشوفك متجوز هيام !

نظر لها “صلاح” .. كان يعض علي شفته السفلي و يشد علي قبضتيه من فوق الطاولة ، بدا و كأنه موشك علي ضرب أحدهم

حملقت فيه “ساره” بقلق ، سرت قشعريرة في عنقها و هي تراقب صمته الملبك .. حاولت تفسير تعابيره ، أحست أن ثمة أشياء كثيرة تضايقه ، لكن طال السكون فبدأت تفقد أعصابها …

-إنت ساكت ليه صلاح ؟! .. قالتها “ساره” بإندفاع و واصلت النظر في عيناه بقوة مـُلحة

صلاح بهدوء مفتعل :
-كفاية كلام في الموضوع ده يا ساره . دي حاجة تخصني لوحدي و أنا بس إللي أقرر فيها .. ياريت ماتفتحيش كلام تاني لو سمحتي

-يعني إيه مافتحش كـ آ ا …

-قـلت إسـكتي بـقي ! .. هدر مقاطعا إياها و هو يضرب الطاولة بقبضته العنيفة

إرتعدت “ساره” و هي تنظر له بصدمة …

لا تعرف كيف تطور الأمر بهذه السرعة حتي خرج أخيها عن السيطرة .. برزت الشرايين و الأوردة بوجهه و رقبته ، و عندما تكلم مرة أخري خرج صوته مختلجا من العصبية :

-إنتي زودتيها أوي معايا . لحد إمتي هفضل مستحمل طريقتك دي ؟ إنتي بقيتي فاكرة أي حاجة تعوزيها لازم تحصل وقتي ؟ حتي أنا عايزة تمشيني علي مزاجك ؟ إنتي مفكرة نفسك إيـه ؟؟؟ أنا خلاص جبت أخري من عمايلك خلاآااص .. و هب واقفا ثم إلتفت بإتجاه باب البيت

-إسـتني يا صـلاح ! .. هتفت “ساره” لتستوقفه و قد قامت من مكانها هي الأخري

جمد “صلاح” بموضعه ، كان ظهره مواجها لها … أحست بتصلبه و هي تقترب منه علي مهل ، كانت مدهوشة لما آلت إليه الأمور .. مدهوشة من كلماته ، أدركت في هذه اللحظة أنها ربما تكون بالغت في تصرفاتها معه بالفعل ، و هو الذي لطالما كان واقفا إلي جوارها ، يدافع عنها و يحميها ، يبث فيها القوة و الشعور بالآمان

حتي أعتقدت فجأة أنها بلا قابضة ، من كثرة لطفه معها و صبره عليها .. لكنها معذورة علي أي حال ، ما زالت مضطربة إلي أبعد الحدود ، بعد أسوأ حادث مرت بها بحياتها كلها ، لم تعد علي ما يرام أبدا ، و حتما هو يعرف ذلك ، لكن يبدو أن صبره نفذ ، و هي تعذره أيضا …

-أنا آسفة يا صلاح ! .. تمتمت “ساره” و هي تطوق خصره العريض بذراعيها

أحست بتيبس عضلاته تحت خدها الضاغط علي حدبته الشوكية اليمني ، الدفء المنبعث من جسده الضخم مدها بشئ من القوة و الآسي في آن .. لتضيف بصوت كالأنين :

-أنا عارفة إني تعبتك معايا كتير . و بعترف إني ساعات بستغل طيبتك معايا و بقنعك بحاجات أنا عايزاها و إنت مش بتكون عايزها .. أنا زودتها زي ما إنت قلت فعلا . بس و الله أنا بحبك يا صلاح . بحبك و ماليش غيرك في الدنيا .. أنا آسفة . عمري ما هضايقك تاني و لا هدخل في حياتك و لا هقول رأيي في أي حاجة حتي . بس ماتزعلش مني الله يخليك ! … و إختنق صوتها من الدموع

أغمض “صلاح” عيناه و هو يستمع إلي نحيبها المكتوم ، أطلق زفرة مشحونة من صدره ، ثم إستدار إليها ..

أفلتته بسهولة ، ليمسك هو بكتفيها مكوبا وجهها بكفاه .. دمدم بصوت هادئ و هو يحني رأسه محاولا النظر لعينيها المسبلتين :

-خلاص يا ساره .. ماتعيطيش . أنا إللي آسف إني إتعصبت عليكي . صدقيني غصب عني بس أنا حاولت أسكتك كذا مرة

ساره ببكاء حار :

-أنا آسفة .. ماتزعلش مني . أنا مابقتش عارفة أنا بفكر إزاي و لا بقول إيه . أنا مابقتش ساره إللي إنت تعرفها . خليك جمبي يا صلاح و حاول تعذرني عشان خاطري

إجتذبها إلي أحضانه في هذه اللحظة ، أطبق عليها بذراعيه و هو يقول مقبلا رأسها :

-أنا معاكي يا ساره . هاروح فين ؟ إستحالة أسيبك أبدا .. إنتي أغلي حاجة في حياتي و من بعدك زهرة . إطمني مافيش حاجة ممكن تآذيكي تاني طول ما أنا عايش . بس كفاية عياط بقي

حاولت “ساره” الكف عن نشيجها الحاد ، إستمرت شهقاتها لبعض الوقت و هي ترفع عنقها لتنظر إليه ، قالت و الدموع لا تزال تتدفق من عيناها الجميلتين :

-مش هتزهق من مسؤوليتي في يوم من الأيام ؟ مش هترميني لأي حد عشان تخلص مني و من قرفي ؟؟!!

تعهد لها و هو يمسح دموعها براحة يده :

-عمري ما هفرط فيكي أبدا .. إنتي ملك صلاح . مش ملك الريس وصفي . و صلاح مش بيرمي حاجة ملكه . إنتي مش رخيصة عشان أرميكي يابت . إللي حصل قبل كده كان غلطة .. و أوعدك مش هتتكرر تاني

تنهدت براحة غامرة و هي تسند رأسها علي صدره الخافق ، غمغمغت بإمتنان :

-و هو ده كل إللي محتاجة أسمعه .. ربنا يخليك ليا ياخويا . و مايحرمنيش منك أبدا !

إرتسمت علي وجهه إبتسامة بها شيئا من الحزن ، ربت علي كتفها بلطف ، ثم أبعدها عنه ببطء و هو يقول و قد إستعاد صوته نبرته القوية :

-طب يلا روحي كملي أكلك . أنا طالع برا شوية

ساره بإهتمام :

-رايح فين دلوقتي ؟!

صلاح و هو يتركها متوجها نحو الباب :

-هخرج أشرب سجارة .. مش عايزك تشمي الدخان هنا . مش حلو عليكي

-طيب مش هتاكل الأول ؟؟

-شبعان ! .. و سحب الباب خلفه بسرعة حين خرج قبل أن تقول شيئا أخر

جثي فوق لوح حجري موضوع أمام البيت مباشرةً …

أخرج علبة سجائره من جيب بنطاله الخلفي ، أستل منها سيجاره و دسها بين شفتيه .. أشعلها بعود ثقاب ، ثم رماه تحت قدمه ، سحب نفسا عميقا من سيجارته المفخخة ، و زفره علي هيئة موجة هائلة من الدخان

رفع رأسه عاليا ، كانت السماء صافية هذه الليلة … نقيض باله تماما ، و شيئا فشئ ، تملكت منه الأفكار ، ليشرد في ماضي بعيد ، بعيد نوعا ما ….

Flash back …

كان ولدا ، لا يتعدي عمره العشرة أعوام .. في ذلك النهار كان يلعب الطابة مع أولاد الحارة كعادته ، و في ذروة إنهماكه و تركيزه الموجه صوب المرمي كي يحرز هدفا من أهدافه التي لا تخيب أبدا

عندها شاهد والدته تترجل من سيارة أجرة توقفت أمام منزلهم …

عبس مستغربا و إزداد فضوله أكثر حين لاحظ تلك اللفة الضيئلة التي ضمتها أمه إلي صدرها و كأنها تخشي أن تلتقطها الأعين المتلصصة ، رأها تدفع الأجرة للسائق علي عجالة .. حتي أنها لم تهتم بإسترداد الفكة علي عكس طبيعتها ، بل إنطلقت إلي داخل البيت بسرعة

و هنا ركل “صلاح” الكرة بإتجاه أحد الأولاد ، ليسرع وراء أمه …

لحقها قبل أن تغلق باب الشقة تماما ، كان نظره معلقا علي ذلك الشئ الذي إحتوته بين ذراعيها ، فلم يسمعها جيدا و هي توبخه بصوتها الغليظ :

-إنت بردو يا واد بطنش كلامي ؟ 100 مرة أقولك ماتلعبش في الشارع و إنت عرقان . هدومك بتشر مية هتبرد يابن الـ××× خش غير .. و أغلقت الباب بعنف

-طب و أبوه ذنبه إيه عشان تشتميه يا ولية ؟! .. قالها “وصفي” و هو يخرج من غرفة النوم بملابسه الداخلية

مجيدة بفظاظة :

-ونبي أقعد ساكت كده و إنت عامل زي خيال المآتة . مش عارف تحكم علي حتة عيل و سايبه سارح في الشارع الإسم ريس و خلاص ؟ بلا خيبة

كانت نظرات “وصفي” مركزة علي نفس الشئ الذي إجتذب إبنه من الوهلة الأولي ، تجاهل إهانتها الصريحة و قال بلهجة إستجوابية و هو يشير بسبابته نحو تلك المادة المبهمة :

-إيه إللي في إيدك ده يا ولية ؟ إيه إللي جوا اللفة دي ؟؟

في هذه اللحظة تماما ، أجابه عواء طفولي مفاجئ سرعان ما إستحال إلي عويل مجلجل ملأ الشقة كلها …

شحب وجه “وصفي” عندما إقترب من فهم الحقيقة ، فغر فاهه و هو يسأل زوجته مرتابا :

-هو إنتي عملتي إللي في دماغك بردو ؟ إوعي تقوليلي آه .. خطفتي البت ؟ … و لما أجابته بالصمت ، إنهمرت الكلمات المصدومة من فمه :

-الله يخربيتك يا مجيدة الله يخربيتك . روحنارفي داهية الله يخربيتك

-هشششش يا راجل إنت هتفضحنا ! .. صاحت “مجيدة” بغضب ، و ذهبت لتضع الرضيعة فوق آريكة الصالون ، ثم عادت لتقف أمام زوجها :

-مش عايزة أسمح حسك ! .. كانت نبرتها تحذيرية

وصفي بإنفعال :

-مش عايزة تسمعي حسي ؟ ده إنتي ناوية علي خراب بيتنا . الليلة هنلاقي البوليس فوق راسنا و كله من تحت راسك

مجيدة و هي تكز علي أسنانها بقوة :

-إكتم يا وصفي . محدش هايجي و لا هايروح دي أول حاجة .. محدش يعرف طريقنا أصلا . بس عشان تطمن إحنا مش هنقعد هنا كتير . من بكره هنلم حاجتنا و هنرجع طوالي علي الحارة القديمة

وصفي بإستنكار :

-و البت إللي خطفتيها دي هنوديها فين ياختي ؟؟؟ إوعي تقوليلي هتقتليها عشان يزوفونا أنا و إنتي علي المشنقة عدل

-ما تهمد شوية بقي و بطل جبن ! .. غمغمت “مجيدة” بحنق ، و أكملت :

-بطل جبن يا ريس وصفي .. البت هتفضل معانا . أنا مش هقتلها إيه العبط إللي إنت بتقوله ده !!

-أومال كان لازمته إللي عملتيه ده ؟؟؟؟

مجيدة و قد قست ملامحها الخشنة علي نحو خطير جدا :

-لازمته إني كان لازم أدوقهم من نفس الكاس .. الهانم أمها و أبوها الضاكتور . الضاكتور الشاطر المشهور أووي إللي سابني و أنا بين الحيا و الموت . و بدل ما يولدني الأول راح يقعد جمب مراته ست الهوانم إللي قعدت بالساعات تتوجع منغير طلق أصلا و في الأخر فتح بطنها . و جالي بعد كده .. سلمني بنتي آه . بس بدل ما تكون صاحية . حطها في حضني ميتة … كان لازم أحرمهم من بنتهم زي ما حرموني من بنتي !

-إنتي مجنونة و الله .. قالها “وصفي” و هو يهز رأسه بعدم تصديق ، و تابع بإنفعال أشد :

-بنتك ماتت خلاص يا مجيدة . هنقول إيه للناس ؟؟؟

زمجرت “مجيدة” :

-محدش هنا يعرف عننا حاجة . و لما مشينا من الحارة القديمة كنت حبلة ( حامل ) .. و بعدين كده كده مش هنقول إنها بنتي أصلا إطمن . هنقول بنت الغندورة اللي روحت اتجوزتها عليا في البلد . بدرية هانم . هنكتبها بإسمك و هتعيش معانا علي أساس كده

وصفي يإعتراض :

-لأ كده خطر . كده خطر و أكبر غلط يا مجيدة أنا مـ آ ا ..

-خلاص يا وصفي ! .. قاطعته “محيدة” محتدة ، و أكملت بصرامة :

-البت مش هينفع ترجع .. أنا خطفتها من قلب المستشفى و زمان الدنيا مقلوبة عليها !

علي الطرف الأخر …

كان نصف تركيز الفتي مع حوار والديه ، و النصف الأخر منصبا علي هذه المخلوقة الضعيفة جدا ، كان راكعا أمامها الآن .. مطلا برأسه عليها

وجهها ذي إستدارة تامة ، و لها شعر جميل .. قصير لكنه أملس و دامس السواد ، وجد نفسه يمد أنامله المتسخة ليصنع دوائر وهمية علي خدها المكتنز النظيف

أجفل مرتبكا عندما تململت قليلا مصدرة تثاؤبا عميقا ، بدت له أشبه بالهرة و هي تفعل ذلك .. ليفاجأ بعيناها في اللحظة التالية … فتحت الرضيعة عيناها علي وسعهما

إلتحم بؤبؤيها الواسعيين بنظراته المذهولة ، توقف الزمن للحظات و هو ما زال يرمقها بنظراته … و فجأة إنبلجت الإبتسامة علي وجهها ، مجرد إبتسامة عفوية من طفلة مثلها

لكن تأثيرها عليه لم يكن هينا مثل المتوقع ، كان هنالك سحر ، بدأ مفعوله منذ تلك اللحظة … و يبدو أنه لم ينضب إلي الآن ، و لن ينضب أبدا ….

Back …

أفاق “صلاح” من شروده حين شعر بوهج السيجارة يلامس أطراف أصابعه …

ألقاها أرضا و دعسها بنعل جزمته ، ثم عاد يتطلع إلي السماء من جديد و هو يتمتم متحسرا :

-و بتقوليلي إتجوز ؟ أنا ملكتك من يومها . و لحد دلوقتي مش عارف و مش قادر أصارحك بمشاعري حتي ؟ .. و أخرتها يا سـاره ………… !!!!!!!!!!!!

يتبــــع …

رواية إنذار بالعشق الجزء الثامن عشر للكاتبه مريم غريب #18