وقت القراءة المقدر: 9 دقيقة (دقائق)

رواية إنذار بالعشق للكاتبه #مريم_غريب

{ #إنـذار_بالـعشق }

( الجزء الثالث عشر )

(13 )

_ عملاق وسيم ! _

صباح يوم جديد …

يستيقظ “عمر” إثر ضربات خفيفة متواصلة في كتفه ، يفتح عيناه بتثاقل ليري مصدر الإزعاج هذا … كان ضوء الشمس قد غمر الغرفة و أثقل عليه الرؤية قليلا

لكن سرعان ما تبين الأمر ، تأفف و هو يسحب الوسادة و يصق بها أذنه مغمغما بضيق :

-سـليم ! بـرا أنا مش فايقلك . عاوز أنام

قبض “سليم” علي رسغ شقيقه و هو يقول محاولا إزاحة تلك الوسادة التي غطت رأسه بالكامل :

-قـووم يا عـمر . لازم تقوم دلوقتي في حاجة حصلت لازم تعرفها !

عمر بإنفعال :

-أنا عارف حاجة واحدة بس دلوقتي .. إنهاردة أجازتي و من إمبارح قلت محدش يزعجني و لا يجي يصحيني لا عشان فطار أو غيره . إمشي إطلع برا بقي ماتعصبنيش عالصبح

عقد”سليم” حاجبيه قائلا و قد إكتسبت نبرته الطفولية بعض الحدة الآن :

-بقولك في حاجات بتحصل و البيت كله مقلوب تقولي ماتعصبنيش ؟ قـووم يا عمر نناه جلنار عايزاك حالا !

-تـيتة مالـها ؟؟!! .. صاح “عمر” قافزا من فراشه بلحظة

كان الذعر ينفضه نفضا

إقترب منه “سليم” و هو يقول مهدئا :

-Relax يا عمر . نناه كويسة بس هي عايزة تروح المستشفي و كلهم مشيوا و سابونا أنا و هي

عمر بصدمة :

-مين دول ؟ و مستشفي إيــه إتكلم !!

-زياد عمل حادثة بالـScooter بتاعه و صاحبته كانت معاه . هي إللي كلمت بابي من شوية

-زياد عمل حادثة ؟! .. قالها “عمر” كمن تلقي نبأ بالغ في تقديره ثم إكتشف فجأة حجم تفاهته

أطلق زفرة حارة من صدره ، ثم قال و هو يفرك عيناه بإصبعيه :

-و أنا إيه المطلوب مني دلوقتي يعني ؟ مش بابا راحله و خد معاه الباقي ؟ جاي تقولي أنا ليه ؟؟ .. كانت نبرته فاترة إلي حد يدهش

سليم متعجبا :

-جاي أقولك عشان لازم تعرف . مش المفروض هو أخوك بردو ؟
و بعدين نناه عايزاك . قالتلي أطلع أصحيك بسرعة

تنهد “عمر” و رد عليه بسأم شديد :

-إف بقي . خلاص يا سليم . إسبقني إنت علي تحت و أنا هغسل وشي كده و هاجي وراك .. يلا !

بضعة دقائق قليلة ، و لحق “عمر” بأخيه الصغير للأسفل …

ولج إلي غرفة جدته ، كانت تجلس فوق الكرسي المتحرك متململة بجانبها “سليم” وقف يمسد علي ذراعها لعلها تسكن قليلا ، كان القلق بادي عليها بصورة كبيرة

مشي “عمر” ناحيتها بمنتهي الإسترخاء و هو يقول :

-إيه يا جلنار هانم ! مالك ؟ شايفك متنرفزة شوية ؟!

نظرت له الجدة و قالت بتلهف :

-عمر . إنت فين يابني ؟ تعالي شوف إيه إللي حصل لأخوك !!

-بس يا تيتة إهدي ! .. قالها “عمر” و هو يركع علي ركبته أمامها

أمسك بيديها و قبلهما ، ثم تطلع إليها و تابع بلطف :

-سليم قالي .. ماتقلقيش إن شاء الله خير

جلنار بصوت متهدج :

-خير إيه بس ؟ أنا قاعدة هنا لوحدي مش عارفة حاجة و أبوك مش بيرد علي موبايله !

مسح “عمر” علي شعرها قائلا :

-يا حبيبتي أنا معاكي أهو . مش هاسيبك و بابا هتصل بيه دلوقتي و هخليكي تتكلمي معاه . بس إهدي شوية .. و أستل هاتفهه من جيب بنطاله الخلفي

راقبته “جلنار” بوجهها الشاحب ، إنتظرت مرتابة و هي تراه يضع الهاتف علي أذنه مترقبا إجابة أحدهم …

لكن مرت الثوان دون حدوث شيئا ، فأبعد “عمر” الهاتف و هو يتمتم بفتور :

-بابا مش بيرد . أنا هفضل وراه ماتقلقيش يا تيتة

جلنار بوهن :

-عشان خاطري يا حبيبي كلم أي حد و طمني

نظر لها و رد مبتسما :

-حاضر يا حبيبتي . و الله هطمنك بس من فضلك إهدي .. الدكتور محذر من الإنفعال

أومأت “جلنار” موافقة ، ليربت علي يدها بحنان ، ثم يعاود الإتصال بأبيه ثانيةً … جاب الغرفة بناظريه و هو ينتظر الرد الذي لا يأتي أبدا ، لم يري دلالة علي وجود شخص غريب هنا

زم شفتاه ممتعضا ، تنهد بحرارة و هو يستحضر صورتها بعقله .. و فجأة إصطدمت عيناه بنظرات الجدة المتساءلة …

وجد لسانه ينطق من تلقاء حاله :

-هي ساره ماجتش إنهاردة ؟

جلنار بصيحة جزعة :

-يا خبر أبيض ! أنا إزاي نسيتها ؟ دي مشيت إمبارح و هي تعبانة أووي يا عمر . و ماجتش إنهاردة يا تري جرالها إيـه ؟؟!!

تنفس “عمر” بعمق ، ثم قال بصوته القوي :

-هكلمها هي كمان يا حبيبتي .. إطمني !

•••••••••••••••••••••••••••••••••••••••••••••••••••••••••••

في منزل الريـس “وصفي” …

تجلس “ساره” في سريرها ، متدثرة بالغطاء الرث .. جلس “صلاح” مقابلها مستندا إلي وسادة قاسية القوام ، كان يمسك في يده صحن مليئ بالطعام

إنتظر حتي إبتلعت “ساره” ما بفمها ، ثم مد يده بالملعقة نحوها مجددا …

إبتسمت “ساره” و هي تباعد بين شفتيها لتستقر الملعقة المعدنية داخل فمها من جديد ، ثم تخرج عارية .. تمتمت و هي تباشر عملية المضغ :

-يعني إنت نمت هنا طول الليل ؟ ينفع كده يا صلاح ؟ أصحي ألاقيك نايم جمبي علي الأرض ؟!!

يملأ “صلاح” الملعقة و هو يجيبها بنبرة باردة :

-كنتي رايحة خالص . لا بتصدي و لا بتردي .. و كنت قلقان عليكي . مقدرتش أسيبك قلت أفضل جمبك يمكن تصحي في أي وقت و تعوزي حاجة … ثم قال و هو يرمقها بنظرة متنمرة :

-بس الصراحة لسا مش داخلة دماغي حكاية إنك وقعتي دي . إللي في وشك ده مش خبطة عادية ! .. و دس الملعقة بفمها مرة أخري

لوكت “ساره” الطعام بين فكيها و هي ترد بشئ من التوتر :

-و أنا هكدب عليك ليه يا صلاح ؟ أنا قولتلك إللي حصل .. إتكعبلت و وقعت علي وشي !

أومأ “صلاح” ناظرا في عيناها بطريقة أربكتها ، إزدردت “ساره” الطعام بشكل خاطئ ، فأخذت تسعل ، إزداد سعالها حدة و أحمـّر وجهها و هي تراقب تحول ملامح أخيها من الغموض و التجهم إلي الإرتباك و الخوف عليها …

و فورا كان قد أتي لها بكوب من الماء و هو يقول ممسدا علي ظهرها بكفه الغليظ :

-علي مهلك يا ساره . إشربي مايه .. مش تاخدي بالك يابت ؟!

شربت “ساره” المياه و هي تشعر بالراحة .. رأت وجه “صلاح” العطوف الآن ، تنفست الصعداء و عرفت أن اللحظة الصعبة قد ولت …

أعادت له الكوب فارغا و هي تقول بإمتنان :

-تسلملي يا صلاح .. ربنا يخليك ليا يا حبيبي

إبتسم “صلاح” و إنحني ليقبل رأسها ، ثم قال مداعبا خدها بأنامله :

-و يخليكي ليا . إنتي قلب صلاح يابت .. عارفة كده و لا لأ ؟

ساره بإبتسامة :

-عارفة !

صلاح بجدية :

-خلاص طالما عارفة . بالليل علي الساعة 7 كده . تجهزي هدومك .. لمي كل حاجتك و ألبسي و أقعدي إستنيني لحد ما أرجعلك

ساره و قد تلاشت إبتسامتها :

-ألم هدومي ؟ ليه يا صلاح ؟ إنت عاوز توديني فين ؟؟

صلاح و هو يضحك :

-جري إيه يابت هو أنا هخطفك ؟ ده إنتي أختي يا هبلة بتحققي معايا ؟!

عبست “ساره” و هي ترد :

-مش قصدي .. أنا بس مش فاهمة حاجة !!

تنهد “صلاح” و قال :

-هتفهمي يا ساره . إصبري بس و عايزك تبقي واثقة إن أنا بعمل كل حاجة عشان مصلحتك

نظرت له و قالت بثقة :

-أنا واثقة فيك دايما .. أنا ماليش غيرك أصلا يا صلاح . إنت بالنسبة لي الأب و الأخ و كل حاجة !

و هنا إنفتح باب غرفتها … هكذا فجأة و بدون سابق إنذار ….

-أنا لما عرفت إنك تعبانـ آ ا .. كان المقتحم ، “هيام”

قطعت عبارتها عندما إكتشفت وجود عملاقها الوسيم ، جمدت كليا و هي تنظر إليه بعينان جاحظتين .. شعرت بقلبها ينتفخ بين أضلاعها

خافت لو إنفجر بصدرها ، فإبتلعت ريقها و هي تشيح عنه بصعوبة قائلة بنبرة مرتجفة :

-صباح الخير عليكوا . إزيك يا صلاح ؟!

كانت “ساره” هناك ، تشد علي شفتاها بشدة حتي لا تفلت منها تلك الضحكة المجلجلة و تزيد أكثر من حرج صديقتها …

بينما وقف “صلاح” بثبات كما هو ، رد بصوته الرجولي الخشن :

-صباح النور يا هيام . أنا تمام الحمدلله .. تسلمي

هيام بعينان لامعتين :

-إن شاالله تسلم من كل شر يارب ! .. و أخذت تشمله بنظراتها الوالهة

لوي “صلاح” فمه و أدار عيناه شاعرا بالضيق من هذا ، نظر إلي “ساره” قائلا :

-طيب يا ساره . أنا خارج دلوقتي و هرجع في المعاد إللي قولتلك عليه .. ماتنسيش بقي

ساره بإذعان :

-حاضر يا صلاح .. مش هنسي !

-تمام . يلا بقي أسيبكوا مع بعض . سلام يا هيام .. و سارع بالخروج قبل أن يسمع ردها :

-سلام يا سيد الرجالة ! .. تمتمت “هيام” و هي تحدق في إثره الفارغ بتيه

في هذه اللحظة ، أطلقت “ساره” العنان لنفسها و تركت ضحكتها تنفجر إنفجارا مدويا …

إنتفضت “هيام” بفزع و نظرت نحوها ، إستشاطت غيظا و هي تتجه صوبها قائلة :

-ياللي ماعندكيش دم . بتضحكي علي إيه ياختي ؟ صدقي أنا الحق عليا إني جيت أطل عليكي . حسبي كده .. و جلست بجوارها علي حافة السرير

سيطرت “ساره” علي ضحكاتها بصعوبة ، أمسكت بيد “هيام” و هي تقول معتذرة :

-معلش يا هيام . حقك عليا .. بس مقدرتش أمسك نفسي أصلك ماشوفتيش إللي أنا شوفته . ماشوفتيش نفسك كنتي بتبصي لصلاح إزاي … و ضحكت ثانيةً

هيام بحنق :

-يا سلام ياختي ! طب كويس إني ضحكتك و الله .. ماشي يا ساره

ساره و هي تربت علي كتفها :

-طيب خلاص . خلاص يا هيام ماتزعليش أنا آسفة .. خلاص بقي !

نظرت لها الأخيرة من طرف عينها ، ثم قالت :

-ماشي . خلاص مش زعلانة .. ثم نظرت في وجهها و دققت النظر أكثر و هي تكمل :

-المهم قوليلي إيه إللي جرالك ؟ الحارة كلها علي سيرتك . و إيه إللي عمل فيكي كده ؟؟ .. و لمست كدمتها بطرف إصبعها

تأففت “ساره” و هي ترد بنفاذ صبر :

-أنا مش عارفة الناس مالهاش سيرة غيري ؟ مش كفاية كل إللي جرالي يعني ؟ عايزين مني إيه بس ؟؟؟!!!

هيام بتأثر :

-معلش يا حبيبتي . هما الناس كده .. هيتكلموا هيتكلموا . حتي لو مافيش حاجة يجيبوا سيرتها . ماضيقيش نفسك

ساره بحزن شديد :

-أنا تعبت يا هيام . و رحمة أمي تعبت !

و هنا دق هاتفهها ، أدارت رأسها لتنظر من علي بعد نحو الشاشة المضاءة .. و لا تعرف لماذا ساورها شعور مبهم بالقلق …………… !!!!!!!!!!!!

يتبــــع …..

رواية إنذار بالعشق الجزء الرابع عشر للكاتبه مريم غريب #14

 12,755 اجمالى المشاهدات,  3 اليوم